泰蘭花

網誌日期：2010-11-30 00:41



好開心！跟New York來的好友見面！上次見面已是一年前我剛從大版旅行回來的時候，轉眼又過了一年！約好了在朗豪坊等，我早了點到達，在朗豪坊行了一圈，在L4影了幾張Hello Kitty，再到樓下等，落到樓下已見到她在等，她剛從泰國和廣州回來，還帶了手信給我，真不好意思！我沒有買甚麼給她！她還嚷着請食飯！我當然堅持我請！

我們在樓下水牌睇吓有乜食，我話原本想食泰國菜，但係佢剛從泰國回來大概已食過更好的泰菜吧！但她說在泰國沒怎麼吃過泰菜，所以我們還是選了這家泰蘭花，好多時睇完戲經過都想去試吓，今天終於去試，我們只叫了兩道菜，一個炒肉碎和炒金邊粉，味道不錯，我們邊吃邊傾，傾到人家清場才走，好開心，雖然很少見面，多數只在facebook傾幾句，見面時還是無所不談！真希望有一天能在New York相見！

Rita's wedding

近日有好幾個朋友結婚，這天是Rita的婚宴，我地見到個menu都笑"徐陳"仲爭個"紙拖把"，成枱只有三四個熟d，其餘都唔熟，原本留返個位比Moon同Ken，等等吓都比人坐左，新娘子明顯瘦左兩個碼，着起晚裝明豔照人，阿Jack就最遲先到，上甜品先到，算係好有心！

Let it snow

網誌日期：2010-11-23 23:27

都有一陣子無去迪士尼！往年Halloween都會去，今年太忙去唔到！今次順便續埋個Annual pass，送左士迪仔咭套同四個badge，心情興奮極！

呢日晏左入去，去到已經三點幾，剛剛好三點半做 Parade，主題係Let it snow，開始時仲有飄雪效果，氣氛很好！

睇完Parade入左大街睇精品，多左好多新product，好得意，而且周圍都佈置得好靚，好有聖誕氣氛，今年無左米奇大屋，而改為城堡前既小花園，搭建左幾間屋，都好靚！影完d屋又夠鐘睇米奇金獎，睇完已經天黑喇！再去睇4D，睇完再去玩buzz lightyear，行多陣都差唔多要去等睇煙花，煙花當然無乜唔同，如果好似之前咁有眼鏡玩吓就好！

天空之城 Skyline

網誌日期：2010-11-23 00:34

都知道呢期無好戲睇，果然係！

套戲講一班人在酒店發現窗外有幾團藍色光出現，那道藍光會將人帶走，吸上一隻巨型飛船，隻飛船又會放d怪物出來搜查人類既蹤影，呢班人意圖逃出酒店唔成功，成班人响酒店想辦法對抗，最終全世界都難逃一劫！最後死淨男女主角，佢哋吸左上飛船之後，男主角被抽出腦部，植入怪物身上，但男主角的腦控制了怪物的身體，當懷孕的女主角將要被劏肚時，怪物身的男主角當然出手相救，完！！！

話完就完！可能電腦特技支出太大吧，除了電腦特技外，其他部份好似低成本製作！全部在酒店內發生！各演員都是名不經傳！戲中既飛船怪物都熟口熟面！似異形加Matrix！總之就令人失望！

曹格演唱會

網誌日期：2010-11-21 01:32



很久沒有聽演唱會，Flora一早買左飛，佢竟然買左飛先揾人睇，佢揾唔到人睇仲差d自己都去唔到，我唯有涯義氣啦！hahahaha....！其實曹格既歌我一首都唔識！就睇吓有冇令我感動既歌。



我地約咗七點响東涌等，我諗好唔好買嘢入去食，定係入去先食？我記得博覽館無乜好食，但係我地唔夠時間，最後决定入去食，我地坐巴士入去，去到好多人，因為好多係睇清明上河圖，去到食野既地方迫滿人，無人果d就係d野食賣哂！早知買嘢入去食啦！最後我地買到熱狗同雞脾！食完就入得場，入場後我地打比阿文，睇吓佢哋坐邊？原就响我地左邊上十幾行！


一開場就唱左幾首慢歌，我一首都唔識！只係有一首應該係改編歌，melody有d耳熟，之後嘉賓表演時，我都唔知係邊個？唱左兩首好rock既歌，到曹格再出場先知原來係周國賢，佢劃左眼線，gel左頭，真係唔認得！之後曹格唱左幾首英文舊歌，又唱四大天皇既歌，最後encore左一首歌就完。

濕地公園

網誌日期：2010-11-20 00:35

一行八人去了元朗濕地公園，我是第一次去，有幾個就去過一次，因為半年証$50，一次証$30，我對睇雀鳥興趣不太大，所以去一次已足夠。

我地坐西鐵去元朗轉輕鐵705號直達濕地公園，我第一次撘輕鐵，都好快去到，一去到先食飯，呢日有好多學生，好似成間小學咁嘈！！出到去公園既area就無哂學生，反而幾多大陸遊客，同埋有幾pair人在影婚紗相，有d景都幾靚，好啱影人像相！

我地行行吓兵分兩路，佢哋帶左重型裝備果幾個專注影雀鳥，我地輕裝備果幾個就影吓花花草草，一路行一路影，好快影到五點關門！影完相就散，我地三個坐巴士出旺角都要個幾鐘先出到去！！

match.too cafe

網誌日期：2010-11-17 23:38

今晚同好友到朗豪坊食飯，以為今日開始聖誕 promotion，原來是翌日，不過今次是Hello Kitty大家的興趣不大，純粹想食餐飯。

今天的晚飯時間較平時少人，很多地方不用等位，就選了我一直想試，但經常無位的match.too cafe，一入門口就見到郭少芸，她自己帶位，店內有很多人都望着她，大概她也習慣了吧！
坐位頗擠迫，與鄰坐的食客坐得很近，傾計也不太方便。我們叫了招牌菜軟飯皇，三文魚意粉，豆豉鯪魚油麥菜，那個飯好像加了芝士，幾好味，意粉就一般，飯後叫了三款迷你甜品，味道沒甚麼驚喜，雖然不差，但沒有令我有想再去的衝動。

大閘蟹

網誌日期：2010-11-17 23:25

上星期剛病好一點，便與家人在家吃大閘蟹，家人一早在銅鑼灣的華記永昌號訂了蟹，還有鼎泰豐的小籠包，和店員推介每日鮮制的蟹粉餃子，開飯時先飲湯，便試試餃子，因店員說是每日鮮制自家做的，一入口.........嘩.............好腥呀！再試小籠包，OK喎！保持水準！但係個餃真係覺得受騙！我叫家人打電話去告訴店主，雖然吃過沒有事，但免得做壞招牌，這店一向賣台灣食品，質素也不錯，這回可把我們嚇怕了！起初以為離開雪櫃太久變壞了，但同樣要雪藏的小籠包卻沒有問題，大家在想是否用了死蟹？但死蟹是不能吃的，大概是質素較差的蟹吧！

至於大閘蟹就好好味，都幾大隻，很多膏，只是有幾隻的膏淺色點，但仍好好味！附帶的薑茶就一般沒甚麼特別！

11.11

在這特別的日子，是好友結婚的好日子，期待已久，卻去不成，因為我病了！

也想過帶病上陣，但總不該一面病容的去飲，或帶著口罩去飲吧！雖然我不介意影出來的相我很嚇人，最緊要新娘靚，不過也不能在席間猛咳或包雲吞吧！最後我吃了藥，醒來已八時！中間聽了兩個電話問我到未？我還迷迷地！

已經是第三次，想去好友的婚宴時，因事故而去不到，真可惜！

板奬自家火煱

網誌日期：2010-11-06 23:12

前幾日，收左工等埋Flora收工一齊食飯，佢同我一樣，都想試吓呢間火煱，因為品牌的其他食肆都唔錯，去到赫德道，見到自家烏冬旁邊有個樓梯入口就係，眼見地方唔大，可能因為間左VIP房，店員感覺好老練，服務都算OK！我地叫左蕃茄土豆豬軟骨湯底，食物方面有黑豚肉，本地肥牛，蝦，魚片，金菇，黑百頁，四寶丸等等，都係好大路既野，又叫左一jar無花果蜜，用料雖然唔錯，不過呢種質素，好多地方都食到，佢哋都有d特色食物同剌身，我地無試到，總覺得食火煱同剌身係兩樣野，唔會一齊食！

幻險巴黎：美女‧魔龍‧木乃伊 The Extraordinary Adventures of Adele Blanc-Sec

網誌日期：2010-11-04 23:30



終於都上畫啦！想睇係因為導演洛比桑！喜歡他的天馬行空，喜歡他的破格，喜歡他的才華！我唔會話套戲好好睇，我只會話好鐘意睇，始終都係自己好鐘意既導演，而且題材唔係咁商業化，未必人人喜歡，他選角亦獨具慧眼，女主角樣子標致，就像當年的 Mila Jovovich，他的作品，由"墮落花"到"這個殺手不太冷"，"第五元素"都是很好看的電影.

講返套戲，背景係1912年，女主角Adele係探險家和寫作家，她為救妹妹，深入古墓尋找法老王身邊醫師的木乃伊，並帶回巴黎，再找年老科學家替她喚醒木乃伊，與此同時，科學家因喚醒了翼龍蛋，而令全城恐慌，他亦因此被捕入獄！Adele想盡辦法劫獄，當中鬧出不少笑話.......!

女主角在戲中有多款做型，相當漂亮，亦有多種不同戲的演譯，當中講述妹妹如何受傷的過程時，既令人感動得淚盈於睫，又覺得意外發生得頗攪笑，只是結尾一段去得較快，可能這part較多電腦效果吧！而且成套戲法文對白，要追字幕，我諗第日要買碟睇多幾次先得！

Awfully chocolate

網誌日期：2010-11-02 23:23



果日睇完戲，去左朗豪坊行，一路等埋嘉嘉，等齊人之後，就行去砵蘭街果間"正斗"火煱，果度同一般既中小型既火煱店，比較光猛，一張八人枱有兩個爐，開一個又側埋一邊，開兩個又好似太多，最終亦選了兩個湯底，我地都係叫左d大路野，所以我都無影相，食食吓Rita都到左，呢個凖新娘，瘦左兩個碼，女人為左靚，幾難都做得到！

食多一陣，神秘嘉賓出現！係好耐無見既魚魚！好surprise！知道她婚姻出了問題，都好想探吓佢，去過佢公司揾佢，兩次都撲空，估唔到佢會"自動獻身"！相信是一班好友為我安排驚喜，其實驚喜不只一個，還有Awfully chocolate既蛋糕，只是這驚喜，在朗豪坊時，已被我發現了！不過，這家朱古力餅店我一直都好想試，仲係我最想試既香蕉味，雖然成個蛋糕都係朱古力，但係唔太甜，好味道！好開心！thank you so much !

飯後一衆人行到附近便分手！我同魚魚一齊行，嘉嘉就同孫一齊行，一路上魚魚都講佢依家既情況，行到去惠豐魚魚要走了，我和她來個深情擁抱！心裏很感觸，感覺到她所受的傷，只希望她幸福快樂！魚魚走後，我和嘉嘉，孫，一邊行，嘉嘉在訴說自己的感情問題，有時男女間感情問題，就好似魚魚所講，個人"迷"左一般時間之後，就會醒！

湊仔戀咁嚟Life as we know it

網誌日期：2010-10-31 23:35



生日當天跟好友看了這套戲，那天沒有甚麼好看的電影，我地去Starbucks食野，一邊等阿Moon同嘉嘉，最終嘉嘉趕不及到來，唯有稍後再一起吃飯！

套戲講男女主角由好友做紅娘，但二人初次見面已經好唔夾，當然沒有拍拖，但因為兩人的好友是夫妻，所以還經常見面，後來好友夫婦交通意外身亡，遺下小女兒，遺囑指定由這兩個冤家合力撫養這孤兒，當然，劇情可以想像到，在湊B過程中，有苦有甜，然後兩人相戀.....！

睇完戲，成班人行去砵蘭街打邊爐！

再單身遊記 Eat Pray Love

網誌日期：2010-10-30 00:26



上星期睇左呢套一直想睇既戲，我對上一套睇既 Julia Roberts演既戲係 Closer，我見套戲安排在淡季上，應該係個題材唔係商業片。

故事講Julia Roberts係作家Liz，去Bali既時候，見過一個大師，大師話Liz會失去所有金錢，之後會揾返，亦會重返Bali，大師送了一張圖畫給她，畫中神像的雙眼畫在心口，表示要用心去看。Liz後來婚姻失敗，之後認識了一個男演員，一起拍拖一段時間後，又分手了，每般感情都令Liz傷心極了，她無意中見返大師比佢既畫，令她決定離開New York一年，先去意大利，然後印度，再去峇里，在第一站意大利認識了一班朋友，邊學意大利文，邊忘形地吃吃吃.......之後到了印度，在廟宇邊做修行邊在廟內工作，認識了美國來的男仕，他帶着對兒子的愧悔到此修行，他向Liz坦言一切後，得以釋懷，再返回美國，Liz再去到峇里，認識了同樣失婚的男主角，Liz原本要和他分手，最終因大師的指點後，兩人才走在一起！

頗長的一套戲，聽說是改編自小說，我只是不太明Liz的想法，牛每般感情出了問題時，她好像有點情緒問題？男主角的戲份不多，反而印度的那個男演員，講述自己過去的那段戲，想喊又要忍，好令人感動！

Amici

網誌日期：2010-10-22 23:39

上星期去左朗豪坊食飯，上到13樓，見有兩間都食過，就試吓其他，除左食中菜既佳餚店，仲有一間食西班牙Tapas，另一間食pizza既餐廳Amici，我地揀咗坐裏面，不過個空間回音大，覺得好嘈吵，再行入d就靜好多，waiter帶我地去窗邊位，係十三樓既落地玻璃，望落去係馬路，嚇得我"嘩"了一聲！個waiter就轉左入d既卡位比我地。

我地叫左兩個set dinner，頭盤有南瓜湯或者perma ham，仲有沙律，主菜揀左鮮蝦燴飯同白汁雲吞，味道不錯，只是份量少，如果肚餓真係唔夠食！食物質素雖然唔差，但係service就差左d，個waitress全程有點黑面，唔多願招呼咁！我地坐得入，又難叫人！坐得出又好嘈，價錢都唔算平，我諗唔會主動再來！

食完飯，臨走時，好友忽然送上禮物，是一個好重既揼揼鬆！食飯時已見到，只是沒有想過是送給我的！好surprise！由於它很重，好友一直自己拿着它等車和步行，直至走的一刻！那份心意比它更重！thank you !!!

Key West

網誌日期：2010-10-15 23:57

上星期去了isquare 食飯，選了 Key West ，記得第一次去的 Key West 是又一城的店，之後好似轉過名，後來轉了賣泰國菜的又一泰，現在是王家沙，超過十年了！這種日式西餐廳，也頗受歡迎過一段時間，就像Pokka ，UCC，不過香港的食肆愈來愈多選擇了，人人都喜歡到處試不同的菜式，我也少去了。

這天叫了兩個鐵板扒和燴飯，味道沒甚麼特別，普普通通的一餐，服務比較差，總覺得現在的食肆服務員都沒甚麼服務可言，可能是薪酬較低又時間長吧！

不倒翁中日火煱料理

網誌日期：2010-10-13 22:58

時間過得很快，一星期又過去了，有點唔知做過乜既感覺！就過左一個禮拜！很迷惘！

上星期難得跟姊姊吃飯，沒有小孩在身邊，頓時有點冷清，原先想吃大閘蟹，但未是時候，忽然想吃火煱，便去了 isquare 的不倒翁，我還是第一次去，上到去，沒有滿坐，主要是窗邊的卡位和VIP房坐滿了，我也不介意坐入一點！

看看餐牌，主要是海鮮和魚生，價錢也不低，我們叫了蕃茄龍蝦湯和胡椒豬肚湯底，半斤中蝦只有六隻，一碟大的牛肉，四寶丸，魚麵和蔬菜，味道和質素算是不錯，只是貢丸不好吃，魚麵淡而無味，不過仍吃得很飽，還有生果和甜品送，整體來說不過大失，但價錢較貴也未必會再去了！