冬蔭公湯

之前買左包冬蔭公醬，今日走去九龍城，想買包冬蔭公料同辣醬，唔記得城南道定南角道，有好多泰國雜貨舖，佢地得散賣的湯料，曾經見過一 pack pack 有齊晒咁賣，依家拆散賣，唔知要買乜野！去街市睇都冇，見到有靚草菇，買唔到湯料，有草菇都冇用，走左去超市買其他野煮，點知超市有pack裝售賣！！真係衆𥚃尋他！一包有三支香茅、一舊南薑、一個青檸、幾隻指天椒、幾片檸檬葉、兩粒蒜！去買埋椰奶同辣醬，但係買唔到辣醬同草菇！再去屋企樓下睇睇，又冇，連鮮蝦都冇！！！我諗冇辣醬，最多會冇咁辣啩！

屋企有盒雪藏蝦，就用佢來煮！跟鬼嫁食譜，將香茅一開二，檸檬葉撕開，蝦解凍後先拆左蝦頭，煎香佢，然後加水約600ml，再加冬蔭公醬，煮滾後，加蓋細火煮5分鐘，然後加晒香料，如果有草菇同泰國茄子就加埋落去，加蓋細火煮10分鐘，再加蝦同椰漿，煮約三分鐘，熄火，加埋青檸汁，攪掂！

椰漿只用兩湯匙，買一罐只用少少好浪費，落多少少，煮出來覺得椰漿太多，椰味太重，因為冇落醬所以覺得唔夠辣，不過味道還不錯，下次試試用細隻D蝦，多D蝦頭，應該會再香D！

Nutella at Pacific Place

金鐘 Pacific place 同 Nutella 聯乘，做可以印名在包裝紙上的朱古力，做左成個月，上星期諗住去整，下午去到已經滿額，佢地早上11；00開始，可能 lunch time 已經爆晒 quota，因為每日得500個 quota!

今日再去，早D去，十一點四十分去到，人龍去到扶手電梯厎，大約有有八、九十人，排隊時，有個工作人員問每個人整幾多瓶，應該計定數截龍，原來每人只可以買兩瓶，上星期問係每人三瓶的，可能太多人整，不過我想整三瓶，排我前面的先生只買一瓶，即管問佢可唔可以攞埋佢個 quota，佢好 nice 好好人，話可以，仲同工作人員講改2，真係好多謝佢！我自己冇整，因為我唔食，同埋佢地陳列出來D sample 有我名，影左當係！不過佢呢度話唔可以整有 meaning 的字和句子，只可以整9個字，英文全部細楷，不過佢 show 出來果D sample ，好多都有 meaning，例如 I love you、whats app 咁！

排左足足一個鐘先到！其實比低名，比錢，過程大約大半分鐘一單，有八、九十人差不多是一個小時了，見職員登記，我去到293，我諗兩點前會爆晒！比完錢，可以15分鐘後取，在附近行一圈返去攞，條人龍短左，大約少左十幾人，取貨位有個牌標示出左400瓶，差不多要截龍，我諗一點前去排隊先至買到！

慢煮

近年流行慢煮 Sous vide，早個幾月德國寶出左部支慢煮棒，有埋真空機，標價$1750，心思思想買，本身心儀英國的 Anova，之前價錢平D，英國脫歐之後，唔知會唔會平D，早排做兩部特價平左$777，比之前每部平$400，貴左十幾元，等多陣睇睇，會唔會平多D先！

未有慢煮棒，用蒸爐試試先！

之前趁有折上折，買左真空機，除左用來整慢煮，真空機亦可以包其他食物做儲存！今日在City super 買了安格斯牛扒，價錢平D，肉厚D，叫店員將牛扒一開二，將一邊真空包裝，另一邊正常煎，比較一下兩煮分別！

先煲熱一煲水到60度，將牛扒放入暖水，再入蒸爐，睇食譜介紹用58度煮一小時，但係蒸爐只可以較5度的倍數，所以用55度，蒸一小時，剩返廿分鐘，開始煎另一邊牛扒，等蒸爐蒸完，見塊牛扒粉紅色，（唔記得影相），肉質冇縮水，煎牛扒一般會縮細左，將慢煮牛扒煎一煎，切開睇落差不多，吃起來只有小小分別，慢煮那邊肉質結實一點，肉味濃小小，兩邊肉質有點不同，可能慢煮那邊近根位，有舊肥羔，應該叫店員橫切才對，下次再試！