航拍 7 - 泥涌

今日天朗氣清，最適宜放飛機，好友帶埋兩個仔一齊去，小朋友可以去沙灘玩，我地大人就玩大人的玩具！好友次次都行錯路，今次都唔例外！佢個仔暈車浪，仲要兜錯路，好彩冇嘔！一落車即刻生猛返晒！今日星期六，都唔算多人，雖然係石灘，不過冇燒烤爐，冇士多，所以冇乜人來，不過航拍都有幾部！我地搵個位有瓦遮頭，又有得坐，剛剛有人放完飛機走，我地就坐，個有瓦遮到頭遮唔到背脊！不過我地都係會行出左去！

我地放左小朋友去石灘玩，然後就開動！好友換左新機 Mavic 2 Pro，佢今日第一次放，睇 size同舊果部一樣，係淺色左D！

今日要飛得小心D，因為附近有兩三隻機，好驚撞機，我飛左去附近的燈洲，同埋井頭村果邊，今次剩返40%電就預備回航，驚好似上次咁唔夠電返來！天氣好，影D相都靚D！

放完飛機同D細路去尖沙咀食拉麵，然後先至返歸！

幸せのパンケーキ 香港店 A happy pancake HK

之前在日本食過好好味嘅幸福 pancake ，終於在香港開店了！店子開在利園第三期，今日開業當然要第一時間去試下啦！我哋嘅策略係冇錯嘅，就係先取票，然後去食飯，再翻返嚟，食咗個半鐘頭，返來嘅時候號碼已經過咗，不過俾返個號碼佢，會重新再叫過我地先，所以基本上回來一陣就有位喇！

餐牌同日本果個基本上係一樣，當然價錢就貴左好多啦，始終香港嘅租金都係好貴！成本問題，價錢一定貴左好多，我地叫咗一個原味疏乎里 pancake 同埋一個雜莓醬，另外一人一壼茶，佢地有供應清水，同日本店一樣，都有自助水機，可以自己斟水，廚房亦都同日本一樣，都係隔左塊玻璃，食客都可以睇到pancake 製作過程，餐牌上面寫明製作需時大約要20分鐘，不過見廚房不停做，實際只係等左十分鐘左右，從外表睇，個樣係冇乜分別，味道方面都好食，不過唔及日本嘅好食！始終食材唔同，不過都好食！雖然頭先午餐都食得幾飽，不過呢種疏乎里 pancake，食落去都係一陣風咁，唔會好飽，好開心可以在香港食到！我地食完都唔坐咁耐，因為真係好多人等位，所以食完就嗱嗱聲走，等其他人可以快D有位入座！

Belgos

今日要去銅鑼灣試吓新開嘅 pancake 店，根據呢D新店開幕嘅經驗，通常等位都等到暈，所以我地決定先去攞飛，然後去附近食午餐，再返嚟食 pancake 當甜品！

利園三期係新開嘅商場，開咗唔少食店同埋商店，我哋攞完飛，落咗去樓下呢間餐廳度食飯，我哋在門口睇餐牌嘅時候，已經有店員出來介紹俾我哋，見到午餐價錢都算合理，就入去試下，呢度係食西餐嘅，主要都係薄餅意粉果D，我哋叫咗一個牛扒、海鮮意粉、青口，午餐有湯或者沙律選擇，我哋因為叫咗三個餐，所以有兩個湯同一個沙律！先來青口同牛扒，我哋先食青口，D青口雖然都幾細隻，不過真係好味，完全冇腥味，每粒青口都係橙色嘅，個汁亦都好好食，如果可以大隻D就好啦！海鮮意粉都頗多海鮮，有蝦、蜆、魚柳、青口，味道都OK，牛扒雖然薄薄地，不過都夠我地食，因為有好多麵包同埋薯條，真係食澱粉質都食到你飽！牛扒嘅味道都幾好，肉味都算濃，呢度服務都好好，D人個個都好友善，唯一係半開放式嘅店設計，有少少熱！食完飯飲番杯咖啡坐下先，因為預計 pancake 店要等個半至兩個鐘，我地食咗個半鐘先至行上去！

金滿庭

尋日食完好友生日飯，今日又再去食，去咗九龍灣金滿庭，一年都去咗兩、三次，因為九龍灣較少中餐廳，加上今日星期六，好多人做節，所以訂唔到枱，唯有wall in 去搵位，我先去九龍城買蛋糕，然後再去會合朋友，等左成個鐘先有位，等位時，見餐廳門口部電視播緊佢地既月餅廣告，發現部電視竟然係祼視3D !!!!! 我地七個人，佢地竟然比一間八人房我地，真係出乎意料之外！

今晚大家都肚餓所以都叫咗幾多嘢食，呢度隻烤鴨，都幾抵食份量都好足，我地叫咗燒鴨之外，仲有清炒蝦仁、松子魚、津白、炸豆腐、小籠包、生煎包、炒飯、上湯浸菜，仲有兩碟小食前菜，所以食得非常飽，本來想食高力豆沙，但係太飽喇！加上有蛋糕，所以最後都冇叫到！食飯嘅時候大家傾開計，席上所有女士都有追延禧攻略呢套電視劇，男士們就話無睇，但係就話佢他老婆都有睇！最好笑係講到最呢套劇，原來大家都因為呢套劇，上網搜尋乾隆歷史！我認識嘅女性朋友，有追呢套劇果D，全部都有上網搜尋，所以我諗依家好多人對乾隆呢個年代嘅歷史都非常清楚！! !    （＾_＾）

焱手工涮涮鍋

又有生日飯局，今次去旺角食，去咗呢間上樓嘅火鍋店，睇佢裝修都幾新淨，其中一個好友來過這裡，佢話食物質素都唔錯，呢度地方唔大，最大果張枱都係10個位，因為佢地D座椅比較闊，其實可以坐到12個，不過張凳會頂住，所以有一兩張換咗做細圓櫈燈先至坐到，好友話呢度九點半後半價，望望個餐牌D價錢都頗高，如果半價都幾抵食，不過食完之後就會覺得佢用半價嘅食材來收正價嘅價錢，點解咁講呢？因為佢嘅份量好細，牛肉切得超級薄，D餃好細粒，所有食物嘅份量都好細，以食物嘅份量同埋大細去計，用半價價錢先叫做合理D，用正價來講就真係唔值喇！

佢呢度個火鍋叫做三味鍋，因為有三種湯底，除咗一般鴛鴦湯，中間仲有一個蜆湯，佢先係放D蜆落去煮，然後點火等佢燒一陣，先至加湯落去，所以又叫做三味鍋，我地叫咗蕃茄薯仔湯同埋雪山飛龍喎，即係蛋白龍躉魚湯，因為有小朋友，所以我哋冇叫辣嘅湯底，食物方面我地叫咗一碟牛肉，發覺唔對路，所以冇叫第二碟，因為覺得物非所值！另外叫咗D火鍋配料，質素都可OK，只係份量太少，我地講笑咁講，係咪比錯咗半價時段的食物分量我哋呢？

飯局作客 - 中秋做節

山竹就快殺到，大家都嚴陣以待，周圍都見到米字膠紙貼玻璃，膠紙賣晒、超市D食物賣晒，好誇張，個個都好緊張，天文台話今晚半夜掛八號，明天可能十號，甚至持續至星期一，係就好喇！多返一日半日假期！

暴風雨前夕，都非常焗熱，日間仲陽光普照，今晚做節，一家人如常食飯，一樣係好豐富，預訂的食物都冇甩底！好豐富的晚餐，吃的好飽！飯後一家人一齊睇延禧攻略，好少有套劇會大家一齊追！雖然一早上網睇晒，都一樣會睇埋電視版本！

睇完拿拿聲走人，驚一掛八號就冇車搭，仲要返屋企貼米字膠紙！

航拍 6 - 汀九麗都灣

最近DJI 出咗新機 Mavic 2 Pro 用上 Hasselblad 鏡頭，畫質提升不少，電池嘅使用時間亦都多咗幾分鐘，另一個款 Mavic 2 Zoom 就只有兩倍變焦，相對之下就失色喇，好友蠢蠢欲動好想換機，雖然我都好鍾意部新機，但係我諗佢如果每年都出新款，我哋都換唔到咁多，可能出年有更強勁嘅機都唔定！所以都冇打算換機！

尋日颱風百里嘉啱啱走咗，另一個超強颱風山竹來勢洶洶，預計話星期日會最接近，兩個風中間嘅今日，天氣放晴，雖然有D風但係唔係好強烈，我哋趁呢個機會就去放飛機，好友早一個月前去左汀九果間酒店住咗一晚，在酒店望到有個沙灘，已經想放飛機，所以今日我地就去果度，行到落去沙灘先至知道原來係叫麗都灣，可能就快打風，所以海灘冇乜人，只有一兩個人游水，我地行去沙灘則邊嘅長廊，果到比較空曠，所以喺果度放起飛，飛出去影汀九橋同青馬大橋個景都唔錯，今日雖然都有D熱，但係都有D風，所以都唔會太辛苦，今次放到第三舊電嘅時候，有少少驚險，本身設定左電池剩餘30%就會自動返航，我飛到去青馬大橋嘅時候要自動返航，我諗住影多幾張相先飛返嚟，影完佢係咁警告我要回航，所以我就即刻回航，但係飛行嘅途中個電池用得好快，可能我飛得太遠，飛回來差D唔夠電！去到剩返幾個%嘅時候，個遙控話要降落，但係我都未見到部機係我頭頂出現，我以為會降落在海上，原來佢飛咗係側邊，好在好友睇到，叫我即刻降落，咁先至冇事，因為我見唔到架機，我以為佢唔知會唔會撞到汀九橋，果下真係好緊張，因為過警告聲越嚟越急，畫面顯示未到，仲不斷喺度講要降落，嚇到我地以為架機唔見咗，真係嚇死寶寶！好在有驚無險，安全降落，下次都係預返多少少電先返航！