2022年11-12月大阪飛機團 Day 1 - 難波、心齋橋

原來已經四年半冇去過大阪！對上一次去大阪係2018年，今次又同好友兩公婆去，上個月出發去東京之前已經訂左機票酒店，今日班機11:30 飛，先和好友去Gate 1 附近 Premium lounge 食早餐，去到先至發現我張咭已經冇得入去，職員話要去Gate 40 果邊先用得！咁就同好友分道揚鏢，之後再在登機閘口等！我記得上次去 Gate 40 果邊個 Premium lounge 改咗做 Sapphire lounge ，再過去睇吓，見有指示 Premium lounge 在另一個位置，跟住指示行左一段路，搵到個 premium lounge 但係開12:00 🤦🏻‍♀️比人點左過去，雖然話登機閘口在三十號都好近！但係過到嚟冇野食，跟住行左去 Starbucks ，食咗個Sausage roll ，飲返杯咖啡先！☕️

會合好友之後仲係有個幾鐘，大家吹下水，上吓網等飛！11:30飛三個半鐘頭就到，跟住過關，上次用 MySOS app，今次用 visit Japan web，但係我遲左 upload 針紙，所以仲係赤色碼，未係青碼，分流時只係比青碼人士做多一個step，就係 show 返針紙 copy 對一對係咪認可疫苗，同埋是否passport 同名就得，好快！所以 upload 唔到都唔使擔心！因為赤色碼的人唔多，所以好快攪掂！40分鐘完成整個過關流程可以去攞行李，以前有兩張申報紙，依家在 Visit Japan web度填有兩個 QR code 比左你＇攞完行李仲要攪埋申報表，係自助型式，有部機要scan passport同 QR code ，呢度攪左廿分鐘，因為得八部機，全機人逐個整，最後出接機大堂之前仲要 scan 多次你個樣！成個流程比上次用 MySOS + 填紙
本申報表慢左！日後加多D機應該好D ! 前後攪左65分鐘先出到嚟！

一出嚟就去撘 Rapit 返難波，但剛走了一班車，佢依家班次每小時一班，每班車都係05分開，要等成個鐘！轉搭普通車，5分鐘後有車，車程50分鐘，比Rapit 多十分鐘，唯一係冇得擺行李，有小小阻路，好在非繁忙時間，影響不大！

今次住 FourZ hotel Kintetsu Osaka-Japan ，放低行李，先去搵食！行去心齋橋附近，好熱閙好多人，雖然有D店係冇開，但係條街好熱閙好多香港人！因為周圍都聽到廣東話 😅😅 我地去くら寿司，好友 check 左佢在心齋橋開左間新店，所以去試吓！先攞飛，要揀卡位定單邊位，在等候區等，都好快，店內裝修好新淨，全部卡位！每個卡位可以坐六個人，而且係網上點餐，壽司由¥125起，我地一坐低就叫左好多碟，不過今次冇做大拖羅 promotion，我地第一次在九州食呢間 くら寿司嘅時候，做緊大拖羅期間限定，D拖羅好正，今次呢間整體質素係差左，三年前去過涉谷果間都係爭D，市區分店好似冇偏遠地區地區D質素咁好！我地食左三十幾碟，未破到上次最高紀錄！🤣🤣

食完野就梗係去影吓固力果啦！跟住就去藥妝店行，睇定D價錢先，之後再去買！不過好多店八點已經收左，得一、兩間收夜D，行左一陣就返酒店，因為明天要清晨出發！

酒店住後感：
FourZ Hotel Kintetsu Osaka-Japan
酒店好新，在心齋橋附近，由難波站步行約七分鐘 （如果行心齋橋過去就耐D，因為塞人😂）酒店用自動 check in 及自助暫存行李，當然有職員stand by 協助，大堂有獨立包裝的牙刷、潔面用品、剃鬚刀、浴帽、咖啡粉等供應，客人可自取，但夜D會收檔，所以check in 完要攞左先，房間比預期大小小，起碼有張梳化仔，一入門口旁邊係 toilet 加浴室，有個籃同浴衣毛巾供應，因為頂樓有個小小浴場，當然唔係好大，可以容納四個人左右，我都有上去浸左一陣，剛剛好四個淋浴位，浴場有提供獨立包裝的髮膜同body lotion，好貼心！

霸王川莊

今晚去iSquare呢間食京菜，原本想叫套餐，不過套餐係主要食蟹嘅，唔係特別想食蟹，所以就散叫，我哋叫咗小籠包、雞絲粉皮、水煮魚、片皮鴨、上湯菜苗，同埋甜品拔絲香蕉，食物嘅質素都唔錯，我哋仲叫咗兩杯大杯嘅水果茶，仲可以睇埋幻彩詠香江，都好耐冇睇喇！

食完飯仲行去半島酒店影相，今次聖誕嘅裝飾係用咗 Chanel 巨型珍珠鏈，好靚好特別！

 

正義迴廊 The Sparring partner

 

張顯宗同唐文奇被控謀殺張顯宗的父母，有九個人組成嘅陪審團，來自社會不同階層職業嘅人組成，每個人有自己嘅睇法，由於張顯宗早已承認殺人，基本上陪審團嘅成員都認為佢罪名成立，只有一人反對，卻沒有具體嘅原因，而最具爭議嘅係第二被告唐文奇是否有罪？

電影取材自一宗真實的謀殺父母嘅命案，真係想像唔到可以落到手去殺人！ 我唔知現實中D陪審員係咪咁兒戲，咁樣去判定被告是否有罪，最主要係第二被告疑似扮傻，逃過罪責，真正嘅正義係咪真係能夠彰顯？ 

兩個演被告的演員做得唔錯，有久違了的周文健，林海峰都係做返自己，擺脫唔到佢少少攪笑嘅作風！

富園海鮮酒家

好友J生日，去咗九龍城食海鮮，呢間之前係竹園，我哋叫咗個海鮮餐，有乳鴿、扇貝、芝士焗龍蝦、豉油王蝦、鮑魚、䱽魚、炒菜，另外再加左蟶子，好豐富，水準不過不失，蛋糕就訂咗Tony汪嘅雜莓拿破崙，而家出咗半磅裝，啱晒人少少嗰陣時食！

 

闊別三年-東京快閃五天遊 Day 5 東京站

行程去到最後一日，今日搭三點幾機，如果要一點幾去到機場都要12:00左右到東京站搭火車，朝早check out 之後，將行李放喺酒店，然後出去行吓，由於時間太早，周圍都冇乜嘢行，秋葉原一帶都冇咁早開，所以行咗一陣就返酒店攞行李走，直接去東京站度行吓！攞行李之前，去酒店樓下嗰間Starbucks飲杯咖啡，坐咗一陣先至走，喺火車站見到賣生雞蛋嗰檔嘢已經開咗檔，諗咗一陣都係冇買到生雞蛋，應該唔可以入境 😅所以只係買咗支醬油、紫菜絲，同埋一個袋仔 ☺️

去到東京站，再買多少少手信，因為尋晚執行李嘅時候仲有少少位剩，可以買多幾盒手信，另外買咗一隻叫做 Cocoris 的朱古力夾心餅，見到有D人排隊，應該唔會太差掛，買兩盒試吓先！

去到機場，先去將行李寄艙，咁就可以行吓，寄艙嘅手續都好快，過關之前去藥妝店睇吓有冇朋友要嘅嘢，竟然有！咁就買埋先至上機！平時唔會喺機場買藥妝，因為價錢比較貴，但係好友要嗰隻藥，喺市區買唔到，機場呢間有就算貴D都要買！

因為驚過咗關之後冇嘢食，所以過關之前搵嘢食先，都有好幾間食肆有開，去咗壽司岩，呢間食過幾次，雖然水準唔算高，不過叫做平平哋，價錢合理，食埋呢餐壽司先上機！

過海關都好快！過咗關之後再睇吓啲舖頭仲喺唔喺度，果間 FaSoLa 仲有一間 Akihabara 有開，手信有好多，不過冇乜人買！我就買咗兩支 sake ，跟住就等上機，日本呢邊都係要用Passport同登機證做核對！回程呢班機少人好多，我諗坐滿一半都冇！咁就大家坐得鬆動！同樣飛機餐，只係一個包，同埋一支水，因為我食飽咗嘢，所以我唔要個包喇，淨係要咗支水，不過我都冇飲，留返落咗機之後先飲！回程要四個幾鐘，返到香港接近八點，落咗機之後要行一段好長好長嘅路，然後仲有一個分流嘅地方，每個人都要掛一個綠色嘅牌，然後去一個位置要scan你個牌上面嘅 barcode，跟住又派張紙俾你，就係嚟緊要做檢測同埋點樣網上登記，跟住就去做核酸檢測，做完檢測再搭無人駕駛去返 T1 ，再出去等行李，由落機到等行李大概用咗20分鐘，比想像中快！等行李都等咗成15分鐘，一出去接機大堂，睇吓個安心出行已經轉咗做黃碼！原本想買外賣返去食，不過車程都要D時間，所以都係冇買！返屋企煮個麵食就算，返到屋企就要攞晒所有嘢出嚟影相，雖然話冇乜點買嘢，不過擺晒出嚟都幾多嘢🤣🤣

闊別三年- 2022年 10-11月東京快閃五天遊 Day 4 築地、Skytree、渋谷

尋晚諗緊今日去豐洲好定去築地好🤔，今日係日本假期，豊洲開六點，應該唔夠人早，所以都係去築地！

去到築地場外市場，好熱閙，不過都比以前少左六七成人，間間店都好多人，因為大部分店冇開！迫晒D人在有開的店外，最多人係入口果間拖羅店，同埋玉子燒，排晒長龍，呢度就外國人佔八九成，都聽到有D香港人！

我目標係鮨國，9:35 去到冇人排隊？唔通今日唔開？🤔見到入面有人做緊準備，就等吓，等左10分鐘左右，後面已經有十幾人😅，大部份係日本人，真係說時遲那時快，等緊位嘅時候睇一睇餐牌，海膽丼已經漲價到 ¥6500 ! 三年前，我記得應該係4千幾円，計埋通脹同埋而家低匯率，其實都係差唔多價錢，佢呢個價都唔算誇張，我2019 年去果間うに虎，嗰陣時五種海膽丼要 ¥5980已經係貴絕全場，當時唔多人食，而家仲要去到¥9600 😨，差不多要$500 港幣，但係都排晒長龍等位！等到十點正鮨國就開門喇！我第一個入坐，今日有好幾個都係一位，坐滿左吧枱之後，就派四人座位嘅枱，佢呢度唔會搭枱，所以有一位係坐四人枱！餐牌冇咩點變，只係改變左價錢😅 我除咗叫海膽丼，例牌叫多個煮蜆同埋牡丹蝦！🦐 今日D蜆好大隻！牡丹蝦非常新鮮！我見大部份日本人都係食兩餸飯！🤣🤣 即係海膽拼拖羅、海膽拼三文魚籽等等兩款餸雙拼！因為呢D係正常價錢，冇乜加價！今日啲海膽雖然係好細條，但係係好好味，食得好感動 ！🥹🥹

食完真係好飽！一路喺場外市場行，見到好多嘢都想食，有好大隻嘅生蠔、蟹腳、水果、燒牛肉、玉子燒等等，見到 ¥500-800 一隻嘅新鮮花竹蝦，好大隻，好新鮮，好想食！🤤 不過實在太飽！冇辦法再食多少少嘢 😅 下次都係留肚食其他嘢，或者掃街都飽！

食飽咗就去Sky Tree，可以在築地市場站搭大江戶線去清澄白河轉半藏門線直接去押上站，或者在本願寺對面的築地站，搭日比谷線去人形町，轉淺草線去押上站，不過我要去東京站買手信先，然後攞返酒店，先至再出去，因為東京站入面嘅 NEWYORK PERFECT CHEESE 呢隻手信，通常中午就賣晒，而且佢全日本得一間店，其他地方買唔到，同埋個個朋友都話要呢隻手信，所以一定要買咗返酒店先，晏D就會賣晒！雖然呢款手信係好輕，但係個盒都唔細，所以都唔買得咁多，除咗呢隻 NEWYORK PERFECT CHEESE ，亦都買咗另一隻 Tulip rose ，呢隻都好食！都買咗幾盒，攞晒返酒店先，搭兩個站去秋葉原都好近，放低就即刻出返去！

搭JR中央線，搭三個站去錦糸町，轉半藏門線搭一個站去押上，去到Sky Tree，在商場行咗一陣，裏面嘅店舖冇乜點變，旁邊嘅 Solamachi 大部份都冇變，只係有一層圍曬板，見有個位做緊Harry Potter嘅Pop up Store ，D產品都幾靚，不過我自己就冇嘢啱，因為最靚嗰D都係頸巾、披肩、冷衫，可能在香港都冇乜機會着唔到！😅 

行咗陣又係時候搵嘢食，呢個商場我覺得鰻魚飯最啱我食，前兩日食咗蒲燒鰻魚，今日就試吓名古屋嗰種燒鰻魚，個分別係名古屋嗰種做法，果皮係脆嘅，而蒲燒鰻魚就係比較多汁同埋魚肉係淋嘅，兩種唔同食法，呢度嘅食肆都好靜，雖然今日假期都幾多人，但係冇乜人食嘢，可能時間尚早 😅 當然有D食店都會排隊嘅，都係D拉麵店同壽司店！呢個商場有兩間鰻魚店，兩間我都食過，一間個價錢係比較貴，另一間就較為大眾化，我去左果ひつまぶし備長，就係比較大眾化嘅一間，我覺得呢間性價比好啲，我叫咗個三種食法嘅 set ，佢有個中英對照嘅牌俾你，教你點樣食，其實我食過好幾次，第一種食法係就咁食原汁原味，第二種食法係家沖同Wasabi，第三種食法係第二種食法加埋個湯汁，好似食湯飯咁，我個人認為原汁原味係最好食，因為湯飯會令到個鰻魚淋咗，食唔到嗰種脆嘅感覺 😆 個鰻魚好好食，食到好感動 🥹🥹

食完嘢，再搭車去渋谷！始終要去吓渋谷個十字路口睇吓，先去 Scramble square 睇吓，今次唔上去 Shibuya Sky ，再去行吓商場，睇吓有冇啲新款嘅手信，不過都冇乜嘢啱，有興趣嗰D都賣晒！😅，由 Scramble square 行出嚟個燈位嗰度，見到對面有幢大廈嘅地下燈光火著，好似好熱鬧咁，所以行過去睇吓，呢度原來叫做 Miyashita Park 嘅建築物下低，有一個叫做渋谷橫丁嘅地方，之前冇見過，唔知係我冇為意定係佢新開，呢度好熱鬧，你係橫丁又係屋台，佢係分咗好多個地方嘅食芇，有沖繩、北海道、橫濱、東海、近畿等等，不過我就幫襯唔到啦，一嚟已經好飽，二來呢啲地方係要成班人去先至開心，佢嗰D枱都起碼 for 四人以上 😅 唯有等下次同朋友嚟先至去試！

你到渋谷，就去Loft 嗰度行吓，我都好鍾意行日本嘅Loft ，都好多嘢買，雖然冇 Tokyo hand 咁多嘢睇，但係有我所需嘅就夠喇！今次冇收穫，因為睇啱嘅嘢之前已經喺渋谷嗰間 Tokyo hand 買左！再行去十字路口果邊，十字路口仍然係好多人，八千公像都有D人影相，以前喺白癡工匠前邊，有個旅遊資訊中心，係好似一卡火車咁，而家都變咗係一個舖位咁，就冇咗佢嘅特色 😆

行完街就返酒店喇，行程去到第三第四日對腳都好攰，可能真係好耐冇自由行！返酒店食埋D巨峰提子，然後要執行李啦，因為聽日就要走了，真係歡樂嘅時光過得特別快，又係時候講拜拜 🥹