好好火鍋店

睇完戲，約咗好友去打邊爐，出咗去佐敦，好友之前食過話呢間OK，去到見店入面唔係好多人，大概只有一半座位有人！

我哋叫咗個雞煲，有半隻雞，另外叫咗牛肉、椒鹽粟米🌽、蟶子、脆肉鯇魚片、響鈴、菜🥬，唔係叫咗好多嘢食，因為大家要留返個肚食榴槤！呢度食物質素都OK，價錢合理，而且服務都好好！

打完邊路，行過去果欄買榴槤，我哋買咗兩個金枕頭，原本想買寶石球，但係冇貨，唯有買金枕頭啦，今次呢兩個金枕頭都OK，比上一次好食 👍🏻👍🏻

Top Gun Maverick 壯志凌雲 - 獨行俠

Pete 已在空軍服役多年，以他的資歷應該可以有更高成就，然而他為了可以繼續駕駛飛機，而拒絕升職，他在超音速飛行實驗，令機體不勝負荷而失事。上司原本想以此事來勒令他停飛，但現任太平洋艦隊司令 Iceman 卻調派他往北島的海軍航空站，訓練一隊精英飛行員，秘密執行任務 …….！

印象中冇睇過第一集，原本對呢套戲興趣都唔係太大，不過我覺得Tom Cruise都已經接近60歲，仲可以拍呢套戲，所以都想睇吓，出乎意料之外地好睇，執行任務個場面拍得好緊張，感受到飛行員駕駛飛機嘅時候好吃力，睇到我好肉緊，唔怪得票房咁好！

 

京都勝牛

之前見到呢間食店裝修緊，都好想試，終於等到佢開張，我唔知佢開咗幾耐，因為最近冇經過，我估都係一兩個禮拜嘅事！

今日就去試一試佢，佢令我諗起上次去日本都有食呢種吉列和牛，見佢有幾款牛肉選擇，就揀咗一個set係有兩款牛肉嘅，係菲力牛同翼板牛，店員冇俾個爐我，我就主動問佢哋攞，我唔知佢哋係漏咗？定係你唔問佢唔俾，見到呢set吉列和牛，日本嘅回憶返晒嚟，再輕輕燒一燒牛肉嘅表面，好味！菲力牛嘅牛味重D，好食D 👍🏻，只係個吉列厚咗少少🤏🏻

松本清 （沙田店）

前幾日APM果間松本清開張，原本想去行吓，但係條人龍實在太長，望到個舖頭都好細，所以冇入到去，到沙田店開張，又過去睇吓多唔多人！

啱啱見到條人龍都唔算太長，因為呢間店有兩層，我相信可以快D入到場，排咗大概半個鐘就入到去，雖然係有兩層但係地方都係好細，樓上主要係賣藥妝同埋化妝品，樓下就賣其他產品，例如清潔用品、營養食物等等，我都買咗少少嘢，最重要係買到一隻喺香港搵唔到嘅潤唇膏，之前在日本買左幾支，已經差唔多用晒，好彩而家買到，而呢隻潤唇膏亦都轉左包裝，因為之前佢嘅包裝係好容易漏，宜家呢個包裝就好好多！感覺上佢有D似迷你版嘅Donki，只不過冇咁多食物賣，同埋整齊好多！當然同日本嘅松本清比，細好多，同埋少好多嘢買 😄

 

飯局作客 - 十全十美生日飯

好友生日，佢媽媽親自下廚，煮10個餸，佢話咁先十全十美，我第一次試佢手勢，真係煮得好好味，不過煮嘅份量真係非常之多，淨係生炒骨都煮咗成三碟！😅仲有成煲蘿蔔炆雞翼、白切雞、蝦🦐、涼瓜排骨、金菇牛肉卷、蒸魚🐟、金銀蛋莧菜，真係好多餸，其實我哋得七個人，佢煮嘅份量絕對夠14個人食！🙄仲有蛋糕🎂同埋西瓜🍉，最後個西瓜都食唔到，D餸食剩左，用食物盒入，都入左成十盒 😅

 

下雨天迪士尼

又去迪士尼！上次去完冇幾耐，又想入去行吓，預約咗今日去，今日都唔算太多人，上次因為好多人，機動遊戲都冇玩，今日可以玩下！玩完 Iron Man，想去搵D嘢食，唔知係咪因為落雨，D食店都坐滿人，唯有去Starbucks買杯嘢飲，順便在旁邊嘅麵包店買咗一個蛋撻同埋一個麵包，店外面有少少座位可以坐，但都要掃安心出行同埋針卡，咁啱有一張枱，就可以坐低慢慢食！食緊嘢嘅時候不停有雀仔 飛埋嚟想搵嘢食，就搣咗少少麵包比佢哋，呢兩次入嚟樂園都有飲Starbucks，唔知係咪天氣熱，飲杯凍咖啡特別覺得好飲😂 

唔知樂園幾時先至有返夜間巡遊同埋煙花呢？🥺

Harbour road cafe

在會展站想搵D嘢食，都睇唔到有啲乜嘢食店啱食，行返去會展，記得果度有餐廳，好幾年前嚟過呢間餐廳，今日只有兩三個客，可能因為呢排冇乜展覽，簡簡單單叫咗個包，一個南瓜湯，同埋一杯咖啡，貪佢靜靜地可以Hea下！

食完嘢做，在附近果間設計廊行吓，見到D公仔幾得意，就買咗個史迪仔！😍 帶埋佢去灣仔碼頭行吓！

 

東鐵過海線通車 - 會展站

會展站今日通車啦！一於去湊下熱鬧！

由九龍塘站上車，先去咗金鐘站，行一個圈，而家金鐘站有條好長嘅扶手電梯上返去出閘，又喺度影吓相，原本想去金鐘食少少嘢，但係冇乜嘢啱食，所以再搭返地鐵去會展站，月台上面人頭湧湧，因為好多人喺度影相，因為呢度有個戰時炸彈擺咗喺度俾人睇，個炸彈係喺地鐵站嘅時候發現嘅，而家當然係得個殻擺響度，另外牆上面有一D舊火車站相片，例如馬料水、大埔滘，影完相出去行吓，行去會展食D嘢先，食完嘢再去灣仔碼頭果邊，呢度原來有個海濱公園，而且都幾靚，喺度影咗一陣相先至走！

 

M+ 博物館

M+ 博物館開咗應該有幾個月，預約咗今日去，食完飯之後，就準備入場，正門入口都係一個打卡位，門口有一啲好大嘅燈，正面對面仲有一D老店嘅光管招牌，入場嘅時候只需要出示預約QR code，在入場果層有一個展館，呢個展館好多人排隊，因為有人流管制，呢度而家展示緊一D泥公仔，密密麻麻擺晒成個場館，真係有少少密集恐懼 😅，其餘嘅展館都要上一層！

上一層有好幾個展館，呢度有幾個打卡位，第一個係廁所門口等候區，另外就係一條旋轉樓梯，條樓梯係冇得上去嘅，唔知係咪仲有一層未開定點？好多人都喺樓梯下面打卡影相，每個展館嘅門口都有講展館係做緊啲乜嘢展覽，我冇好詳細咁睇，直接走入展館參觀，有一個展館係講以前嘅香港，有好多舊嘅物件同埋相片，另一個展館就係一啲比較美術性質高啲嘅展品，即係唔係咁多人識欣賞嘅嘢 😅😅 仲有D展館係展示一D畫作、藝術擺設等等，又有互動區，又有小朋友玩嘅地方，我諗最特別嘅展品，應該係將日本一間壽司店重新裝咗響展館入面，呢度要排隊入去，每人只係可以有幾分鐘時間影相，我都情願輪流排隊入去，好過成班人迫晒入去，不過只可以睇，唔可以掂入面嘅嘢！😅😅 

睇完呢度又落返去地面果層，呢度有一間商店，不過唔係好多嘢賣，呢度應該仲有一間影院，好似仲未開， 另一個半露天劇院，就播放緊一D影片，如果行到攰都可以喺度坐下睇吓片！

我哋睇咗兩個半鐘，就走喇！出返去旺角食杯野，下一陣食埋飯就返屋企！