航拍 5 - 大網仔

今次去旅行冇帶到航拍，因為冇乜去郊區嘅地方，所以就唔帶，返到香港就梗係要飛下啦！

相約好友去萬宜水庫影千島湖，去到附近先發覺原來萬宜水庫係唔可以入去嘅，只有負責工程嘅人員先可以申請入去！除非坐的士入去！我地駕車，入唔到去！我地就搵其他地方，近近地在大網仔見到有個燒烤營地，又冇人，就喺呢度放啦！

今日真係好熱，企喺度都標晒汗！雖然我哋响樹蔭下放，但係都好熱，D汗係咁流，好友仲因為部手機過熱，用唔到個app ，要即時 cool down 部手機，我就飛左三轉，佢就飛咗兩轉，因為未 cool down 到手機！

大家都頂唔順太熱，而且接收都唔係太好，跟住就出咗西貢飲嘢，去到碼頭果邊搵咗間茶餐廳坐下涼冷氣，真係舒服好多！又去碼頭睇下人地D海鮮！

宮保

仲放緊假，呢日去銅鑼灣行下，去咗登龍街食飯，呢度主打沙煲鍋田雞鍋，就叫左一個田雞鍋試下，店員介紹跟佢哋嘅粥一齊食，其實個田雞鍋個汁都頗咸，因為預咗要配粥食，所以就咁食會咸！另外叫咗個蟹，配炸饅頭，蟹汁好好味，饅頭唔夠食，不過都唔加喇，因為再加就太多，因為我哋仲有一碟菜！食得好飽，店員係咁介紹我地要甜品班蘭蛋糕，咁就叫左一客試吓啦！唔係特別好食，叫做幾香啦！

2018年6月第一次去名古屋 Day 5 - 名古屋駅，中部機場

話咁快就第五日啦！今日四點幾機，D時間兩頭唔到岸有點早，不過冇得揀，呢班已經係最晏嘅一班機，尋晚已經在車站買定今日嘅火車飛去機場，得返幾個鐘頭都唔知去邊好！繼續留在火車站附近行下，行李就擺低咗喺酒店先！

先去搵食去返らまいもん通り，唔係好多間有開，去左一間なご家，主要係食拉麵同一D日本小食, 叫左一碗鹽ラーめん，同一客手羽先，味道一般 !

今日要去搵一個叫做 Unimall 嘅商場，呢幾日喺車站都見唔到有呢一個商場，其實佢係地下街，不過見唔到有指示係點樣去，後來我估佢應該係8號或者9號地鐵出口果度入去，我在地鐵站嘅8號出口入去睇下，呢度之前去搭火車返來嘅時候去過，再行入少少就見到係 Unimall ，主要我係想去搵 fancl ，因為fancl D嘢平過香港，大約係香港嘅六至七折，入到呢個商場嘅地下街，再行落多一層，原來入邊都有幾多商店，搵下搵下就見到 fancl 喇！在 Diana 鞋店果條巷入去就見到，間舖好細，我入去行咗一陣，睇啱自己要買嘅嘢就攞個籃去執，我見到佢出咗25周年特別版嘅卸妝油，入邊係有薰衣草味，就買一支試下啦，我記得有03年我去東京買 fancl ，當時佢地係10周年，送咗隻碟俾我，我依家仲用緊，今年25周年，就即係15年前嘅事喇！

買完野返酒店攞返行李，將啱啱買完嘅野塞埋落個喼度，就出發去搭火車啦，去到火車站未夠鐘，在月台坐咗一陣，差唔多有車先至行去月台等，今日班車冇乜人，旁邊無人坐，大概35分鐘就去到機場啦！去到機場，先去寄艙，同樣係自助辦理，印行李牌，自己貼，再埋 counter 寄艙，放低左行李就可以去行下，機場的商店街比想像中大，有扶手電梯行上去就見到有個露天觀景地方，可以睇到D飛機，不過好曬，所以睇一陣就去，入返去見有D食店，見到一間叫做鈴波的，之前在 Esca bazar 都有，主要係食銀鱈魚，又去試試！叫左個跟埋刺身的套餐，銀鱈魚有點焦，味道都 ok ，食完野繼續行多陣，呢度仲有個溫泉可以浸！

時間差唔多就過海關先，過咗海關仍然有得shopping ，不過都係一D名牌店，同埋手信店，亦都見有一D係 2020年奧運嘅紀念品，我就冇嘢睇啱，夠鐘就上機，返香港！

2018年6月第一次去名古屋 Day 4 - 名古屋城

話咁快就到第四日，尋晚諗今日去邊好，考慮左兩個地方，一個係名古屋城，叫做呢度嘅地標，亦都係古蹟， 而另一個地方就係名古屋港水族館，諗完最後都係去名古屋城！

名古屋城位置好近名古屋市，睇介紹單張話搭火車去丸之內站行5分鐘就到，先去食D野！

今日瞓晏咗，可以去 Esca bazar 食嘢！上次見到有間食店好多人排隊，今日唔係假期所以冇人等位，呢間店叫做きしめん亭，開10點半，去到仲有5分鐘開門，無人等位，我就坐低等下先！呢度主要食烏冬，同埋一D日式嘅食物，例如手羽先，呢度嘅烏冬好多都係配天婦羅，開門只有兩、三個客，我就叫左一個淨烏冬，係冷烏冬，另外叫咗一客手羽先，等食的時候，見到牆上面係一D以前名古屋市嘅相，有D懷舊感覺！手羽先皮薄香脆，冇乜皮下脂肪，比起我前幾日食果隻有D唔同，上次果隻係鹹辣嘅，亦都有D味粉在表面，今日呢隻就冇，唔同食法，都好味！烏冬就比較扁身，醬汁都幾好味！

食完野出發去名古屋城，搭櫻通線兩個站就到丸之內，落左車跟地圖去行，似乎5分鐘係行唔到，一路大概行左10幾分鐘，先至去到！去到入口果度，見到有個巴士站，呢度有巴士去榮，但係冇車去名古屋市，陣間走嗰陣可以搭巴士去榮，唔使行咁遠！在門口影吓相，見到有售票處，要買飛入場，今日好熱同埋好曬，加上行左10幾分鐘就更加熱！呢度大部份都係露天地方，所以好熱！一入去就係小賣部同埋廁所，睇過D紀念品都冇乜特別，係見到一個史迪仔金幣，就買咗一個，沿路行經過御殿，呢度剛剛翻新完，所以好新淨，亦都最多人入去參觀，我冇入去因為要除鞋，而且在出面已經望到裏面有乜嘢，所以我冇入去睇！行過D有一片空地，呢個位就係最啱影名古屋城！影咗一輪相，就去附近果間小賣店買杯雪糕食下，順便坐下休息！

食完雪糕再行去二の丸庭園，行咗一陣又坐下，因為頭先睇咗巴士嘅到站時間，所以坐一陣等夠鐘就去搭巴士，原本冇諗住再去榮，不過唔想再行10幾分鐘，所以搭巴士去榮轉火車返去名古屋市，巴士竟然遲咗到站，車費¥210，上到巴士發覺冷氣係好夠凍，雖然見到其他乘客關晒冷氣風口都覺得凍，而我因為身水身汗，就覺得真係好爽！真係唔想落車！

巴士去到總站係 Oasis 21！既然再次來到 Central Park ，就去Light cafe 食多一次pancake ！要返同一款pancake ，今次就要楓糖漿，而3D拉花咖啡就揀咗豬豬公仔，好好味！食完pancake順便在商場行咗一陣，然後先返去名古屋站！

返到去名古屋市，去咗車站附近行街，先去 Loft 買返尋日原本想買嘅妝物，跟住就去手信店買手信，因為諗住攞返D嘢返酒店，所以一次過買晒要買嘅手信，然後一次過攞晒返酒店先，跟住再行多一陣街，就去搵嘢食，去咗名古屋站入面的驛麵通り，呢度有幾間拉麵店，我去咗一間叫做鬼金棒，前兩日經過嘅時候見到好多人排隊，今日過去就唔使排隊，呢間拉麵店主打麻辣拉麵，佢有兩種唔同嘅辣，一種係四川麻辣，另一種係唐辛子，兩種都有辣度選擇，除咗大、中、小辣，仲有一款鬼增し，呢個最辣嘅辣度要加錢¥100，我唔知佢有幾辣，所以我叫咗個中辣試下，加左D芫茜，碗麵只有一舊豬肉同埋一條粟米仔，個湯就唔係好辣，麵就稍為淋咗D，豬肉亦都比較肥，整體都唔係特別好食！

食完麵行多一陣就走，今晚要執行李，明天返港了！