藍象泰國餐廳

睇完戲，去尖沙咀食飯，之前經過藍象兩次，今日一於會一會佢！

行過美中、鴨子，見勁多人等位，都擔心好多人，去到藍象，冇乜人，仲有位，餐廳睇落唔大，但可能入面仲有房，見到有藍象的sauce 售賣，餐牌好簡單，食物選擇都係大路野，餐具以藍白色為主，D餐具洗得唔係好乾淨，有小小漬，要叫侍應換，我們叫了泰式香辣肉碎沙律、鐵板蠔仔蛋、青咖喱雞、大蝦冬陰公湯、蒜蓉包，飲品原本想叫橙汁，侍應好老實話今日D橙比較酸，建議飲椰青，所以最後叫咗椰青！呢度D侍應服務態度都好好！

上菜好快，先來青咖喱雞，有個火熱住，跟手上埋鐵板蠔仔蛋，再來大蝦冬陰公，冬陰公湯都係有火爐仔熱住，食泰國菜當然要先試吓個冬陰公湯得唔得，就知正唔正宗，雖然只係去過一次泰國，仲記得果度D風味，當然香港食材同水質都唔同，唔可以比較，不過在九龍城都食過唔少泰國菜，可以講呢一間嘅水準令我好失望！因為品牌好出名，佢哋嘅Sauce 我都買過，我覺得個湯同我自己煮差唔多，而且覺得佢好似冇落到椰汁，少咗椰汁果種香滑味道！青咖喱雞不過不失，個泰式肉碎沙律篇咸，鐵板蠔仔蛋鐵板唔夠熱，正常鐵板夠熱的話，應該接觸到水份會嘶嘶聲，就算等佢 cool down 小小，唔想彈親客先送出來，都冇理由冇煙出，食落口係唔熱，D蠔仔有小小腥，成餐最好味應該係蒜蓉包！

可能慕名而來，對佢充滿期待，期望過高，失望越大，不過平心而論，佢比起我在九龍城食過的任何一間泰國菜都要差！味道好港式化，價錢亦偏貴，唯一係服務比較好，見D侍應都係本地人多，唔似其他泰國菜館，多數係泰國人做，可能口味有所不同！

攻殻機動隊 Ghost in the shell 2D 全景聲

未來世界，人類可以輕易改造身體，Mira除了腦部之外，全身都是人造，而且她是最先進的機能，因此她是攻殼機動隊 section 9 中的少佐，她與其他人一起尋找黑客古世，在找到他的時候，在他口中得知自己身世的秘密........!

改編自日本同名的電影，雖然未睇過原著，感覺該沒有原著好吧！因為頗悶！電影曾在香港取景，不少熟口熟面的建築物，加入了後期加工，增添了未來感！

老陳皮冰糖燉檸檬

去完廸士尼，出去朗豪坊，去買老陳皮冰糖燉檸檬，之前在 FB見到廣告，介紹呢款老陳皮冰糖燉檸檬，店主自家制，話用左義大利西西里檸檬，話因為西西里檸檬的酸度不強，而且唔澀口，佢將檸檬和冰糖用微火慢燉13小時，見佢將D玻璃樽放入焗爐消毒焗亁，而且小量生產，質素睇落唔錯，逐佢未大量生產，品質未因此改變，買樽試下先！

店主話呢個產品對喉嚨痛、止咳化痰、潤喉、喉嚨痕癢有改善作用，又話長期飲用可減少黑斑、雀斑，有美白效果，檸檬係有美白作用，都應該有幫助，最重要潤喉，年紀大左經常有喉嚨乾的情況，好需要潤喉，見佢在朗豪坊的 Cinema city戲院小食部有售，$150 一樽，買樽返去試下！建議食法可直接飲兩匙，或冲水飲，我試過冲水飲淡左D，直接食唔太甜，慢慢流過喉嚨呑，幾舒服！包裝內有支木匙比埋你，樽上面有生產日期，話唔使冷藏，不過要確保匙𡙡冇油冇水先得！食完麻辣米線喉嚨痕，有小小咳，飲左舒服左好多！

買完野見雪糕店 i Cremera 有意粉食！又試下佢，叫左温泉蛋意粉，好味！意粉有點 Al denté ，正是我喜歡的 texture！

後記：翌日朗豪坊發生扶手電梯意外，扶手電梯急速倒行，有八個人受傷，好可怕！

迪士尼明星春日嘉年華

呢期香港迪士尼都學日本迪士尼，做春日promotion，春天總係離唔開粉色系列的產品，或者花花圖案的產品，順帶預備復活節 promotion ，單係睇宣傳相，都覺得好有春日氣氛，日本方面剛剛推出左新的 Duffy friend，繼 Gelatoni 貓之後，新出的名叫做 Stella Lou， 是一隻淺紫色的兔兔，造型十分可愛，好吸引呢！可惜未來半年都唔會去日本東京，無緣見到佢喇！

原本上星期想入園，但係約左好友 high tea，今星期入去，主要想搵 Beauty and the Beast 影相，今期 promotion 話有過百位明星，睇官方網頁D相，睇來睇去都唔見有過百位廸士尼明星，不過我目標只有一個，所以唔理咁多，目標為本！

今日幾好天氣！有太陽，有點熱，一入園，見上次有一架美食車，今日有兩架，一架係池記，另一架係大師兄，都唔少人買野食，我幫襯大師兄，買左個芝士牛肉餅，即叫即做，新鮮熱辣，好味！

未入園前在廸士尼 app 睇左Beauty and the Beast 位置同時間，見未夠鐘，行下商店先，今期 Duffy 產品不吸引，反而 Pandora 出了Duffy 、Shellie May、Gelatoni 的手鍊的珠珠，話只限樂園售賣，可惜我冇興趣，好友有戴開 Pandora ，可能佢會啱 ! 今期唔少 Beauty and the Beast 產品！ 

Belle 、全部都係 Belle ！

見仲有半個鐘，去望下個影相位，已經有人排隊！即刻去排！排隊果陣有D曬，好在都好快過，先影左佢地先再合照，好開心！影完相去、玩 Iron man，今日頗多人，可能天氣好友，又係星期五，好多家長帶小朋友來，見 fastpass 要排隊入，反而冇 fastpass 條隊冇乜人，話要等三十分鐘，其實唔使，基本上一路行，冇乜停低等，好快可以攞眼鏡，好快可以玩到，今日同一卡的人，應該大部分冇玩過，反應都大，增加了氣氛！

玩完 Iron man去食個雞翼餐，行多陣就走，今日都係冇收穫！

Taste of Hong Kong

第一次去呢個 event，之前唔知有做過幾多次，淨係知去年都有，今日天色唔太好，一片灰濛濛，行去入口處，見附近有美食車，老實說，位置真係唔多好，好似今日個 event 係食野，好似我地準備去食野，就一定唔會幫襯！入場分左三條隊，一條係渣打咭客戶，一條係 VIP門券，一條係基本門券，最多人係 VIP 門券，我地都係！

入到去揾下有乜食，我地門券包左$300咭，食野可以用咭扣錢，或者另外比錢，行去 Amber個 booth ，剛好有示範，每位$250，可以坐低睇大廚講解佢地款惠比壽生蠔配梅子甜菜頭冰沙及黑胡椒，我地坐低之後，就有侍應倒香檳比我地，香檳係 Laurent-Perrier，見呢隻香檳都有個 booth，如果買一杯要$90，即係隻蠔要$160，大廚只係講佢地用左乜野材料做個汁，而佢地D生蠔係來自九州福岡市，再由福岡市代表講解佢地生蠔養殖場，講講下有D人走左，剩餘三組人在聽，佢地亦示範即場開蠔，見到隻蠔好肥美，心臟仍在跳動，問答環節仲有一份禮物比最先問的一組，最後更將即場開的生蠔給了我們吃！

食完野行下，見有D售賣食物飲品的 booth，又買左野飲，又試食左火腿，然後去VIP專用區，剛好有張梳化，坐低左真係唔想郁，見到有 deliveroo服務，每家餐廳落 order收$20捐款，就送埋食物比你，我地揀左六家店，叫左宮崎和牛、黑豚肉叉燒、牛油果手卷、墨西哥辣雞煎蛋脆夾餅、仲有黑毛豬火腿等等，在VIP 專用區有三杯免費飲品，又攞杯香檳飲下！天色雖然唔好，不過冇落雨，坐室外都ok！

食完又出去行下，再買D野食，又去 deliveroo 個 booth 攞禮物，再去買黑毛豬火腿同藍梅汁！買完都四點幾，要走喇！去IFC行左一陣先走！

Beauty and the Beast 美女與野獸 IMAX 3D

多年前，城堡內住了英俊的王子，一天，王子的舞會中，出現了衣衫襤褸的老婦，王子因為她的外貎而拒絕他，原來這老婦是女巫，他向王子施咒，令他變成野獸，當玫瑰花最後的一片花瓣掉下前，如果王子找不到真愛，便永遠變成野獸！

Belle 與父親住在一個小村莊，Belle 只喜歡看書，卻被村民視為怪人，而村中的 Gaston外表英俊，很受歡迎，卻只喜歡 Belle，但 Belle 卻不喜歡他！一天 Belle 的父親外出後失蹤，Belle 由父親的馬匹帶領下，去到一個古舊城堡，她甘願留低代替父親被監禁，她在城堡內，與野獸一起生活，漸漸對他產生好感....!

期待已久的今天，一個月前已經買了飛，好友差點要甩底！我地睇 IMAX 的3D version，3D效果做得好好，好靚，雖然中間有少少悶場，去到最期待的畫面，兩人共舞，好喜歡呀！個人覺得呢場戲，由真人扮成野獸，好過用電腦做野獸效果出來！

green x Crabtree & Evelyn

約了好友去 High tea，自從好友拍拖後，已經很少兩個去食野，多數係三人行，今日兩個去街街，好友上網 search 左 Icon hotel 的中式下午茶，但發現只在週末供應，於是轉去 Lobby 呢間 green！

呢度做緊聯乘 Crabtree & Evelyn的 Tea set，就叫呢個試下！先來 scone ，clotted cream 同 jam 係細樽裝的，味道唔錯，而茶點一共有三層，咸點方面，有香脆蝦卷、蟹肉脆多士、香草海鮮酥、煙三文魚薄餅、松露菌蛋撻、法國肝醬批、鮮茄意大利飯脆球、由最底層食起，多數咸點都係脆口，可惜唔熱，如果暖暖地都好，可惜凍左，味道都ok，甜點就少D款，有朱古力曲奇、紅桑子撻、朱古力愛心小蛋糕、玫瑰香檳法式小甜餅、酒浸車厘子朱古力，味道太甜了，我和好友都覺得太甜了，我們都叫了 latte 飲，一路傾計傾左好耐，大家好似好耐冇傾計咁！埋單時，送了兩張 Crabtree & Evelyn 的 coupon和每人一支小 hand cream！

食完野上去望下中式下午茶果間中菜廳，然後去行街街，行左去海港城，又去 City super 試下紅酒，依家做緊清洒遊，試左幾款梅洒，買左一支！街左陣又去返 isquare ，預備去睇戲喇！

倪姐泰國美食、小方糖

又又又 Farewell !!!!!!

今晚去九龍城食泰菜，好友 send 左 open rice條 link 比我，跟住 open rice 地圖搵，發現地址係錯！走左去富豪酒店，先發現地址係候王道！要行返過去！好友已經到左，呢度唔算好大，不過無幾多個高，我地一路食住等，叫左生蝦刺身、無骨鳳爪、咖哩蟹、沙嗲串、燒雞翼、鹽燒鰂魚、炒椰菜苗等等，其實一班好友之中，有兩個已經離職多時，都一齊出來食 farewell dinner，有D都冇見幾年，個個都過得好好，聽到都覺得開心！

食完飯去食甜品！去左過幾個街口的小方糖，又有位！叫左即撞木桶豆腐花，店員話一人份量，但係都有兩、三碗！另外叫左黃金拿破倫，係芒果拿破倫，好脆好好味，仲有個齒頰留香，係牛奶布甸加榴連肉、榴連汁，大家講返那些年，收埋個榴連去後門食，驚D同事話臭，點知比人話收埋D好野自私食，原來個個都鐘意食！以後可以大大方方一齊食(^-^)