隱形客 The Invisible man

Cecilia 和 Adrian 住在海邊的豪宅內， Adrian 是富有的年輕科學家，但他們控制 Cecilia 的一切，令她決定要逃走，幸得妹妹 Emily 的協助，才成功逃脫，她暫居在好友 James 家中，兩星期後，突然傳出 Adrian 的死訊，指他已自殺身亡，他弟弟 Tom 向 Cecilia 講解遺囑內容，Cecilia 以為可以重過新生之際，種種奇怪事情發生，她發現 Adrian 好像沒有離開遇......！

套戲都幾好睇，氣氛都幾緊張，配樂做得好，令人睇得緊張，要到最後先知發展成點，呢部戲都算低成本製作，大部分場景都在屋內，特技場口亦不算多，演員都不是一級影星，不過女主角好似攞過艾美獎，都做得幾好！我覺得可以交代多少少兩人之前發生乜事，因為一開場已經逃跑，整體來講都值得一睇！

嘉樂冰廳

再次回到荃灣區，呢度最好嘅係多野食！

去左呢間老牌冰廳，裝修都係老舊的，以前沒有去過，因為長期排隊！今日在疫情下唔使排隊，不過都好滿座！呢度全部係卡位，大概8-10個卡位。呢度唔會有套餐，全部散叫，最出名係鮮牛肉/咸牛肉蛋治，超厚的蛋！好味！亦試左雞翼麵，係瑞士汁雞翼，配雲吞麵果種麵，唔係配公仔麵！好味！飲品方面都係一般大路野，不過有衛爾牛茶，即係保衛爾牛肉汁加水，估唔到仲有呢個D史前文物😅，上網 search 過，話佢依家係用酵母做，冇牛肉成份，雖然低脂低卡，但高鈉！不宜多飲！不過佢個味道又真係幾似牛肉！😄

新滙聚

返埋聽日就去第二度轉換下新環境，離開港島區，一班同事話一齊食餐飯，雖然而家疫情之下大家都唔想聚餐，不過呢餐都係要食，約咗去觀塘一個工業大廈，呢度主要係食小菜，今晚見到都有六、七枱客，我相信平時呢度係好旺嘅，只係而家疫情之下個個都唔出街食飯，所以先至得幾枱客，我哋自己帶咗一支 1.8L sake 同埋兩支 2L 梅酒，然後叫咗一D小菜，呢度食物嘅質素都唔錯，而且價錢都好實惠!

始終大家都共事左幾年，有D仲係識得耐D，大家喺度想當年，又搵返D舊相出嚟睇，真係好搞笑，個個飲多兩杯落肚，就玩到癲晒，笑咗成晚，真係好唔捨得！不過都預咗有呢一日，都係果句啦，又唔係離開咗公司，大家仲有機會見到面，公事上都可能會有聯絡，日後大家都仲可以約出嚟食飯！

北海道牧場

每星期都會去油塘大本營，多數去會去呢間餐廳度食飯，離別在即，食埋呢次唔知幾時會再來油塘，因為冇乜嘢都唔會嚟呢度，呢度有幾樣野都好啱我食，有北海道3.6牛乳炒蛋，仲有D日式咖喱，不過我多數食炒蛋飯，因為都唔係特別喜歡成日食咖喱，原本食完飯想飲杯咖啡慢慢坐下，不過隔離枱有個男士似乎係有傷風感冒，不停在包雲吞，後來更打了一個大乞嗤，雖然他已經立即行出店外，但係在店內已經打咗一個大乞嗤，嚇得我匆匆離開，而家呢個疫情，就算傷風感冒都唔好啦！其實佢有病就唔應該出街食嘢，因為餐廳入面個個除低口罩，係最低設防，就算係普通傷風感冒都好容易被傳染，有時都擔心自己會唔會中咗武漢肺炎都唔知，都驚傳染俾人，因為始終潛伏期都兩個星期或以上，希望疫情快D過啦！

超音鼠大電影 Sonic the Hedgehog

Sonic 自小便是擁有很快的速度，他被送到地球之後，獨自在地球生活了一段時間，他一直躲藏在美國的綠山，每天看着這裏的人生活，而他對Tom 特別有好感，經常留意他和女友的生活，有一天，Sonic 的行蹤被發現了，他與 Tom 更成為了朋友，後來政府調查早前因 Sonic 影響的大停電，派出了行為怪異的博士去追查，博士追查到 Sonic 和 Tom 的是一黨，便開始追捕 Sonic .....!

據講呢套卡通片係根據一個遊戲角色去拍，我冇玩過呢D遊戲，所以唔知道佢個角色有D乜嘢特別之處，純粹係睇預告嘅時候，覺得佢應該幾好睇，加上久未露面嘅Jim Carrey，所以想睇下，劇情都係大路嘢，都幾好睇，始終 Jim Carrey 嘅演出都好生鬼！

十三姨

在女人街有很多食店，近日有好多都要結業，因為市道實在太差，今日在旺角行左幾個圈，最後去咗女人街呢一間試吓，點知入面都幾多人，差不多滿座，睇吓個餐牌食物嘅選擇都唔係好多，主要都係食雞麵，即係雞肉材料，同雞湯底，佢用鐵鍋上，所以果碗湯麵係好熱！我叫左個雞叉燒湯麵，貪佢啖啖肉，份量就細碗左D，不過味道都唔錯，好多時湯麵都係豬肉或者豬骨湯，佢用雞湯，個味道都幾啱我口味！

鮨之

睇完戲喺朗豪坊度食晚飯，見到呢間壽司店應該開咗唔係好耐，前身係元氣壽司，而家呢一間同鮨穴係同一個集團，應該質素都係差不多，點入面嘅枱都唔係好多，大部份係卡位，不過近日市道低迷，晚飯時間只有三、四枱客，餐牌選擇都唔少，除咗壽司亦都有串燒，落左order之後，會有部機自動送餐，送到你個座位側邊比你自己攞，都幾方便，見到有一款拖羅壽司，有四款拖羅，所以叫咗客試吓，味道都唔錯，質素都幾好，串燒就叫咗兩款唔同嘅雞翼，同埋骨付腸，仲有個炸番薯，同埋幾款壽司，全部嘅食物質素都唔錯，價錢就貴咗D，宜家呢個市道佢都冇比折，不過店員嘅服務都好好，如果有埋折扣就更加理想！

越蘆

偶然喜歡到炮台山這邊食飯，這間越南餐廳之前不是這個店名，大概是轉了手，仍繼續做越南餐廳，偶然會在這裡喝杯越南滴漏咖啡，雖然覺得佢甜咗D，但係都幾好飲，食物方面通常都係食河粉，始終喜歡有啖湯飲吓，所以比較少食撈檬粉，之前食過幾間越南餐廳，都覺得佢哋嘅辣椒係特別辣，每碗湯粉都跟咗一小碟辣椒，放埋落湯係非常之辣，平時打邊爐就算落好多都唔覺得辣，唔知係咪D辣椒唔同品種嘅關係呢？

獸頭救兵 Secret zoo

薑寶寶一直想做律師，希望加入招氏嘅律師樓，在一次招氏被人抗議的時候，社長與示威人士起了衝突，薑寶寶為了護主，瞓身對抗示威者，因而受到社長嘅注意，後來社長決定派遣一份差事給薑寶寶，就是希望他接手青山動物園三個月，希望能做好動物園，令佢能夠售出動物園，薑寶寶接手後，發覺動物園𥚃沒有動物，因為動物園欠債而變賣了值錢的動物，只剩下有病的北極熊，同埋四個職員，他們五個人要想辦法令到動物園有生意，但係在沒有動物嘅情況下，如何能夠起死回生呢？薑寶寶想出了一個辦法，就是要職員假扮成動物.........！

近期韓國電影都因為上流寄生族而受到重視，今日呢場入場嘅人數都比較多，有超過一半座位有人，近呢兩個星期，我見最多人睇呢場戲，可能因為佢個價錢係特別平，今日呢場戲只係$65 ，算係優惠價錢，因為夜晚要$105，可能因為做特價先至咁多人睇，其實好多韓國電影同埋電視劇，題材都幾新穎，亦都有一定嘅吸引性，不過好多時拍出嚟，總係覺得唔到位，之前嘅炸雞特攻隊，同呢套獸頭救兵，都有相同之處，題材搞笑之餘，都會有加插一D溫情嘅橋段，但可惜笑點唔到位，可以有更豐富嘅笑料，有D浪費左個題材！D演員都係熟口熟面，好多係韓劇都睇過佢哋嘅演出，整體來講，呢個價錢都可以一看無妨！

屯馬線

今日係情人節，亦都係屯馬線第一期通車，新屎坑又去八卦下，今日因為晏左起身，所以遲咗出嚟，所以淨係去咗兩個站睇睇，冇入到去烏溪沙咁遠，因為得兩個站係新啟用，一個係啟德站，另一個係顯徑站，先由鑽石山站搭車過去啟德，車站入面好熱鬧，最近已經好少見到有咁多人聚集嘅地方，而且好多係小朋友，小朋友對於地鐵通車係好興奮，聽講頭班車五點幾已經好多小朋友去搭，不過有D好細個嘅小朋友就真係家長帶佢哋去，鑽石山站新嘅月台，鋪左新嘅鑽石圖案磚，都係黑色做主要顏色，搭去啟德只係一個站，去到啟德站個個都喺月台影相，上去大堂又影吓相，睇到佢兩個主要嘅出口，一邊係去新蒲崗，另一邊係去啟程邨，既然係屋邨我就冇乜興趣去，新蒲崗亦都冇乜嘢特別可以去嘅地方，所以選擇搭返車走唔出閘，由啟德站搭去顯徑只係兩個站，顯徑呢個地方之前未去過，在月台影完相望出去，就正正係顯徑邨，既然係屋邨，亦都冇乜特別值得去嘅地方，所以就搭返車走，基本上今日去咗兩個新站都冇出閘，純粹到此一遊參觀下！