洪師傅牛肉麵

熱左咁多日，終於都落返幾日雨，最近疫情仍然好嚴峻，連續多日過百人確診，所以周圍都靜咗D，上星期交咗樣本做檢測都仲未有結果，自己都要小心D，因為就算冇事，唔等如以後唔會有事！

今日去油麻地上海街買嘢，先去旺角食少少野，去咗呢間台式牛肉麵店，店入面只有兩枱客，都有D人嚟買外賣，叫咗碗紅燒牛肉麵，飲品方面只係有茶，所以都叫咗杯綠茶，另外加咗碟菜，食物一般，唔係特別好，亦都冇台灣風味，有點本地化的味道！

食完麵去上海街行吓，買左個四方型的蛋糕模，諗住整蛋糕！

 

南豐紗廠 - Koko coffee roaster

之前睇雜誌介紹過呢間coffee shop，佢位於南豐紗廠，成日都聽到呢一個地點嘅名，但係從來未去過，今日就去睇睇，位置有少少僻，我由荃灣廣場行過去，唔係太近，我記得之前喺愉景新城有個位置可以行過去，不過今日喺荃灣廣場，所以喺呢邊行過去，去到見到呢度嘅建築，好似PMQ元創方！入去睇吓見到呢度係可以帶寵物狗入去，唔少人帶咗佢哋嘅狗狗去呢度，即刻諗起好友F 可以帶佢隻狗嚟，不過佢住喺上水，搭的士都要$200 ，來回就要$400 ，所以應該都唔會帶隻狗嚟！

 

入到去先搵D嘢食，見到呢間 coffee shop，D座位都好開陽，裏面有一D座位之餘，店外面亦都有一D座位，帶住狗狗嘅朋友就可以坐出邊，出邊亦都係商場內嘅範圍，即係有冷氣唔係露天！

睇一睇個餐牌，呢度有all day breakfast ，又有我最鍾意食嘅班尼迪蛋，當然要叫返一個啦，另外叫咗杯凍咖啡，平時多數飲熱咖啡，但係行到過嚟成身汗，所以叫咗杯凍嘅飲，等嘢食嘅時候見到佢哋有個玻璃房，裏面有D機喺度磨咖啡豆，同埋有大量一袋袋好大包嘅咖啡豆，感覺好專業，咖啡都好好飲！食物都做得唔錯，係麵包比較硬D，純粹因為我唔係咁鍾意食硬包！呢度係自助形式，食完要自己執返餐具回收！

食完野去行咗一陣，呢度D店舖都比較文清，唔係一D大型連鎖店嘅舖頭，各有自己特色，不過店舖數量唔多，食嘢嘅地方就有幾間，亦都有D歷史資料關於呢間紗廠，不過今日冇乜時間慢慢睇，所以行咗一陣就走，下次有時間先再嚟睇！

謙益雜貨店

平時去荃灣街市附近，都會見到有間雜貨店，長時間都有人排隊，基本上任何時候行過，佢都有人排緊隊，埋去睇吓D人排乜嘢，原來係買雞蛋，聽講呢度嘅雞蛋好新鮮，我諗咁多人買，貨如輪轉，都好難唔新鮮，不過佢嘅選擇都有幾款，除咗國內嘅湖北同埋北京雞蛋，亦都有歐洲嘅雞蛋，同埋泰國雞蛋，我見好多人都係買湖北蛋，佢有一排或者半排雞蛋賣，一排應該係30隻，半排就15隻，佢會俾埋紙嘅蛋架，仲有得回收添，自己帶返蛋架返嚟可以平五毫子，其實我見佢拆箱嘅過程，裏面都好多紙蛋架，而且店外面仲排左好多蛋架，可能係有D人買半排，已經用咗一個蛋架，所以唔係好夠，其實佢每做一單生意都好快綁好雞蛋比人，不過佢得一個人做，所以先至要排隊，不過都排得好快，而係不斷有人嚟排隊，差唔多每兩、三分鐘就有一個人嚟排隊，我都係排咗一陣就買到，我就揀咗歐洲蛋，因為諗住過幾日整古早味蛋糕，所以買定雞蛋！

氣炸鍋 （récolte)

終於買咗氣炸鍋喇，其實呢個產物都出咗好多年，一直都冇買，係因為自己都唔係太鍾意食熱氣野，加上之前朋友買過一個，用咗兩年就壞，不過近期疫情嚴重，多咗留喺屋企整嘢食，所以今次決定買一個平平地嘅玩吓，因為唔想買一個貴嘅，到時用兩用又擺埋一邊，同埋馮係焗爐呢一類產品，都好難清潔一D刁轉位，用到咁上下就好容易壞，所以唔會買咁貴！之前見到CSL可以用積分加$1000換飛利浦果隻粉紅色氣炸，不過話要等兩三個禮拜，最後都係決定買隻再平D嘅試吓！

呢隻氣炸鍋有兩隻色，一隻係紅色，一隻係米白色，個人唔係太喜歡紅色，所以揀咗米白色，買返嚟就要試一試佢，整咗塊牛扒，根據說明書入面嘅食譜，整牛扒嘅時間，我用咗180度焗佢10分鐘，中間冇翻過佢，個色睇落好似未得，所以翻左佢再焗多幾分鐘，顏色都可以，不過就成塊牛扒差不多全熟，熟過頭，應該每邊7-8分鐘就夠喇！

跟住又試咗整叉燒，呢個都好簡單，買一舊梅頭肉，買一罐現成嘅叉燒醬，叉燒醬落豬肉度醃佢四個鐘頭或以上，參考左人地個食譜，先用160度焗10分鐘，覺得唔係好上色，所以轉左用180度，反轉佢焗5分鐘，見到個色差唔多，然後調到200度，搽蜜糖，每邊焗5分鐘，搞掂！不過我舊梅頭肉一邊厚一邊薄， 厚果邊睇落有少少未熟透，所以再焗多一陣，薄果邊就啱啱好，下次要買厚度平均嘅梅頭肉先得，同埋覺得個醬太咸，唔知係咪我落得太多，同埋焗之前唔記得掃走D醃料先至焗，下次參考吓鼎爺個食譜點樣醃叉燒先得！

Caseificio Bubalis Mozzarella di bufala 水牛奶芝士

之前睇 Facebook 的 KK life in Italy ，介紹咗拿玻里 Napoli 一間水牛奶芝士廠嘅 mozzarella 生產過程，好吸引，佢話而家我地在超市買到果D，係大量生產嘅 mozzarella ，質素冇咁高，同埋佢地運到香港之後，又擺咗雪櫃好耐，由佢生產去到人客手上都可能要十幾日時間，其實最好係即刻做即刻食最好味，當然啦，佢要寄來香港就做唔到，不過佢最快兩日寄到過嚟香港，其實佢唔係第一次代訂呢個水牛奶芝士，不過上次我冇order，今次就訂咗兩個原味加兩個煙熏味，D芝士13號上飛機， 15號已經到香港，交咗去荔枝角一間食物公司果度攞，果間食物公司本身都有賣緊凍肉之類嘅嘢，我就17號先去攞，順便買咗一舊雪藏三文魚，攞到返屋企都好心急想食，先試左個原味，個芝士一路係有D水浸住，一袋有兩粒，每粒好似係50 gram，建議嘅食法，係將佢擺放到室溫，大概18度左右食就最啱，佢最簡單食法，就係配蕃茄同埋羅勒，不過我買唔到羅勒，只係配左蕃茄去食，芝士外面好似有一層皮咁樣，裡面都唔會好實，正如KK 所講佢唔會好重奶味，質感亦都有D咬口，好香奶味，果D香味係好令人回味，成日都諗起果陣味，好想再食，食咗一粒之後，夜晚忍唔住食埋另外果粒！好味！第二晚食咗一粒煙熏味，一樣咁好味，只係個外皮有陣煙熏味，到第三日食嘅時候，芝士嘅外皮開始有啲甩甩地，正如KK話齋，超市買果D浸得耐外皮係會甩，擺咗四日都已經開始甩，所以要快快趣趣食晒佢！期待下次再去order食過，睇怕食完都好難返轉頭食超市果D！

馬六

疫情越嚟越嚴重，第三波比起第一、二波更加嚴重，確診嘅人數每日都新高，真係冇辦法唔覺得驚，尋日開始已經冇得夜晚堂食，好多食肆都頂唔住要執笠，有舖頭執笠亦都有舖頭新開，呢間餐廳啱啱新開試業中，所以都去試吓食個lunch！

叫咗個雞髀摻摻，雞脾份量十足，摻摻係一種麵，有D似油麵，味道都唔錯，包埋飲品價錢合理，下次試吓個海南雞飯！

Dear Lily

早幾個星期，相約好友F和J 去淺水灣酒店食晚飯，但係因為疫情嚴峻，上星期突然爆發第三波，每日都有幾十人確診，早兩日政府就宣佈收緊限聚令，唔遲唔早剛剛好今日開始，晚六朝五不設堂食，無奈取消咗個booking，原本想改下午茶，點知佢又full Booking ！

去唔到淺水灣，就改咗去中環，我地去IFC行左陣先，一路睇吓有冇D乜嘢好食，睇咗幾間都有D興趣，最後上到4樓見到之前去過嘅呢間 Dear Lily，見佢都有下午茶，就去呢間啦！下午茶嘅價錢都好平，兩位都係$298，每人都係百零蚊，上次來覺得呢度好靚，今次覺得佢比上次細間左，因為佢好似加咗D枱在路中間，最重要係食物嘅質素真係麻麻地，上次食午餐都覺得唔錯，今次下午茶真係好普通，可能換咗個廚師！ 鹹點只係有三文治，四種唔同麵包同埋餡料嘅長條型三文治， scone 都整得唔好食，甜品亦都唔好，其中一件朱古力味嘅甜品，我地都唔知係乜嘢嚟，因為佢溶晒，個樣好核突，所以我都冇食到，我地每人叫咗杯咖啡，個拉花都拉得好差，不過收你百幾蚊一位，質素都唔可以期望太高！🤦🏻‍♀️

頭先我地坐低咗，叫嘢食嘅時候，好友J同我哋講，佢上星期去過慈雲山果間好多人確診嘅溫莎餐廳........😳😨😱🤦🏻‍♀️

Oyster bar @ City super

去 Donki 迫完一輪，落咗去時代樓下行街，去超市嘅時候見到有個 Oyster bar，就食生蠔吧！

叫咗個拼盤，有六隻，都算幾大隻，味道都唔錯，小小 creamy ，跟住見到有啲好大隻嘅美國蠔，就每人叫咗一隻食下，食果陣都覺得幾飽，不過呢D食完好快就會肚餓！

Don Don Donki @ CWB

今日去咗中環睇醫生，一早睇完醫生，就去附近食個 early lunch，去咗上次去過嘅 Knockbox ，叫咗個沙律同埋咖啡，坐係吧枱慢慢食慢慢飲，去到午膳時間，開始越來越多人，我就走喇，因為約咗人未夠鐘，所以四圍行吓，去咗 Zara 行吓，呢間Zara有幾層，睇吓衫試吓衫，好容易又磨左成個鐘，仲買咗條褲添，跟住就去銅鑼灣喇！

先去Sogo 食個意粉，又飲咗一杯咖啡，因為去到呢間餐廳，佢有藍山咖啡，冇理由唔飲！

跟住就去今日新開嘅 驚安殿堂度行喇！超級無敵多人！首先要排隊入場，裏面好多人、好迫、好焗 ！🥵 所以都係行咗陣，基本上呢度地方都唔算好大，不過有四層樓咁多，產品種類都比尖沙咀果間多，地方當然都比佢大，本來想睇多陣，都因為太焗所以冇行到，因為有D頭暈，淨係買咗支梅酒同埋Mask ！

跟住又去咗 Ikea行吓，原本想買嘅嘢佢都冇，所以淨係買咗一舊 sponge 😅

飯局作客 - 火鍋

又去好友屋企打邊爐，每次好友都會去街市買晒海鮮，仲洗乾淨晒，我地都好準時人齊，到差唔多ready嘅時候先發覺唔記得整個湯底😅，不過都好快趣搞掂，因為開盒雞湯煲滾就得喇！今晚海鮮有蝦、扇貝、脆肉腩、象仔蚌、唔少得牛頸脊，好友食開呢一隻牛頸脊在佐敦買，好好食，下次可以再去呢間買！

食完飯，好友突然攞出一支響17年威士忌，既然佢攞得出嚟，我地就飲下啦，每人斟左半杯，一路飲一路傾偈，而家一支響嘅價錢都唔平，在日本都買唔到，其實唔係買唔到，只係機場先至有，而且價錢貴咗好多，老實講我自己唔識得品味威士忌，所以都唔識得佢係咪真係值咁貴，我只係覺得以前呢隻酒係好平，可能因為好抵飲而有咗口碑，所以就出名左，令佢越嚟越貴，加上話停產左有年份嘅響，就令佢更加貴！