奇異博士 Doctor Strange

我地食完tea，去睇戲，去左UA 睇3D IMAX ，睇來睇去，都係 Imax 畫質最好！

套戲講述男主角 Dr. Strange 是一個優秀、自負、自私的醫生，而且技術超群，一次意外，令他一雙手，無法正常活動，更不能再次執起手術刀，在沒有痊癒希望的時候，他得知一個脊髓受傷，下身癱瘓，根本不可能痊癒的病人，竟然能從新走路，他從病人口中得知，令他康復的機會，於是隻身前往尼泊爾，尋找高人，找到的卻不是醫生，而是 Ancient one ......

套戲大玩視覺效果，打鬥場面略為悶了點，加插了香港做基地，雖然場景好假，仍有點親切感！

Vivienne Westwood café

去完旅行返來馬不停蹄每日都有節目，今日就約咗好友去 High tea，去尖沙咀的 Vivienne Westwood cafe ，之前剛剛開的時候好多人排晒隊，而家就唔使等位，去到已經有枱，坐左門口側邊張枱，呢度除咗High tea ，仲可以叫單獨一件cake，不過我哋都係叫咗 tea set，我就叫咗一杯咖啡，好友就叫左果茶飲，tea set 咸點方面，黑橄欖酥卷、迷你三文治、巴馬臣芝士脆條、煙三文魚忌廉多士，味道唔錯，甜點有杏桃撻、Macaron、Tiramisu cup、雲尼拿水果撻，食完都好飽，雖然仲有朱古力棒，不過已經食唔落！

2016年10月開心東瀛遊 -Day 6 天神橋筋六丁目 天然溫泉浪速之湯、心齋橋 gram 、樂道

今朝起身，去搵溫泉浸！上網搵到一間，在天神橋筋六丁目，我地去難波站搵野食，在地下街一間叫古潭的拉麵店，吃了拉麵和餃子，在地下街行左一陣，搭千日前線，去日本橋站轉乘堺筋線，六個站就到天神橋筋六丁目站，在5號出口出來，轉左手邊一路直行，呢區係住宅區，冇乜高樓，抬頭望到右邊遠處有座高D，看似就是溫泉所在，行近D見到就係天然溫泉 なにわの 湯，呢座 building 有八層高，溫泉在頂樓，中間幾層係停車場，上到去，有自動售賣機，除了入場票，還有租毛巾，售賣乳液、牙刷等等，入場費 ¥800，租大毛巾要¥500，我地只買入場票和租毛巾，沐浴露有免費供應的，憑票去接待處入場，呢度都幾大，人也不少，我地比較鐘意浸露天風呂，今日有太陽，呢度有一排石床，瞓在石床，有水浸住，又曬住太陽，好易瞓著，有D風吹下就凍凍地，浸左大約一小時，就走喇！

地鐵站附近有個天神橋筋商店街，行一陣，呢度有點舊，所以都沒有收穫，搭返火車返去心齋橋，去食 pancake ！呢間位於心齋橋的 pancake shop 叫做 gram ，尋晚經過見到疏乎里 pancake 好吸引，但係尋晚太夜食唔到，今日早D來，入口是一條樓梯，要排隊，一日分三個時段供應，早上 11:00，下午3:00和6:00，我地食3:00果段，排第七、八，等緊的時候，好友去大丸買巨峰提子返香港，我就排隊等，佢買完返來仍未入得，等到3:25才到我們可以入坐！我地一人叫一個疏乎里 pancake！蠢左，應該叫一個，另外叫一個其他款試，個 pancake 送來時，我地超興奮，狂用 live 影相，好攪笑，雖然食落一陣風，不過都好好味！

食完 pancake 最後衝次，encore 再去楽座食立食！今次叫左天婦羅蔬菜、鮑魚、帶子、牛肉、燒雞翼，還叫了兩杯菠蘿酒！食完野返酒店 check out ！酒店太近火車站，時間可以用到好盡，慢慢搭火車去機場，返香港喇！時間過得真係好快！

2016年10月開心東瀛遊 - Day 5 京都、和服體驗、八板神社、花見小路

今日去京都，玩左幾日，都有點累，遲左起身，去搵野食，行左去大丸，去食肆果層，有間叫有喜屋的蕎麥麵店，叫了兩碗麵，味道一般！食完野撘車去京都！

去到京都衹園四条，接近一點！我地先去租和服，去返之前租開果間，在八板神社旁邊的大廈上去，叫夢京都 Yume Kyoto ，今日頗多人，要等一陣，入到去先揀和服，揀了最貴的¥10800那組，因為是最漂亮的，而且包埋set 頭，揀完和服又要揀腰帶同埋包包，我揀了黑底橙黃花的和服，好友揀了淺藍色和服好搶眼！著好和服等 set頭，因為我比好友快換完衫，所以set頭先，到好友 set頭時，我就幫佢影相！攪掂晒就落去影相，因為送兩張專人拍攝相片，所以先去影相，好快影完，就我地自己繼續去八板神社影相，冇入去清水寺影，因為好友唔想行，影完出去行街，行到花見小路果邊，搵左間甜品店叫做ぎおん，要上一層的，坐位是 tatami ，坐的那種，我叫了款期間限定的粟子雪糕，因為著左和服好熱，好友叫了款熱的，食完甜品，出到來，竟然落大雨！我地跑過對面的商店，卻沒有甚麼好買的，無奈在門外等，雨勢頗大，有路過的大陸人見我們穿和服，走過來拍照，我地乘機叫佢地遮我地出街囗，因為前面街囗出去的商店街，是有瓦遮頭的，這邊有很多商店，可以慢慢行，等停雨，行左幾間店之後，雨勢減細了，我們衝過對面商店街，又繼續行，行去我最鐘意果間日本髮式店かつ"ら清老舗，他們的髮式真係好靚但好貴，而且只有穿和服才適合用，所以每次只可以來欣賞下，影下相，行完差不多要還和服，去到和服店對面仍有微雨，我地冒雨衝呀衝，衝去和服店，交還和服就好快，除晒出來換返衫就得喇！

返返去難波揾食，尋晚睇 Facebook 見有人介紹一間食店，好似好吸引，一於去試下，店名是立ち吞みあたりや食堂，就在難波，係一間立食的居酒屋，店內非常熱鬧，好多人爆晒場，要等一陣先有位，餐牌主要係日文，都有個簡單英文餐牌，我地叫左刺身、燒雞翼、鮑魚、扇貝、和牛片和酒，食物好ok，酒類選擇好多，而且大多是日本酒，不過我地揀左果汁酒，貪佢易入口！

食飽又返酒店食水果！

2016年10月開心東瀛遊 -Day 4 大阪環球影城

第二日嘅環球影城，今日時間冇咁趕，主要玩鬼屋都係夜晚，可以瞓晏少少，瞓醒覺當然係食嘢先啦！

好友去過高島屋的一間壽司店，但係唔記得個名，我地就上去搵，比我地搵到，呢間叫做繩壽司，我哋叫咗壽司set 同埋鰻魚飯，呢間都好好味！在日本要食到好味嘅壽司都唔難！食完順便落地庫望下D水果，好多巨峰呢！

食飽飽當然入園啦，由車站出來沿路影返D相先，尋日趕住入園冇影到，今日可以慢慢影！一入園，又去哈利波特園區先，睇下機動遊戲多唔多人排隊，見排隊時間60分鐘，走去睇下啦，大約排左50分鐘左右就入得喇！好友今日冇着波鞋，佢驚對鞋甩，所以除咗鞋玩，玩到半路突然停機，雖然有廣播，但係日文唔知佢講乜，好在只係停左一陣，玩完遊戲時，職員同我地講因為頭先停咗，可以比我地玩多次，仲唔使排隊，梗係玩啦！排左50分鐘玩兩次，真係抵晒！

玩完出去食個lunch，好友尋日買咗Halloween 貼紙，食完飯攞出來貼，跟住開始去玩鬼屋，要跟 fast pass 時間去玩，先後玩左猛鬼街、Chucky 、驅魔人、崇，呢D都係類似一般鬼屋咁，有人突然走出來嚇人，不過每間鬼屋都係根據電影場景佈置，玩法係六至八人一組，一同牽住一條繩或布條，一齊向前推行，我地行最前時，後面的人行得好慢，拉唔郁，要工作人員走來拉我地行快D，其中驅魔人做得最快迫真，牧師灑聖水一幕，我地可以攞樽聖水灑個女主角（公仔），一組人得一支，我地梗係晤客氣！崇呢個就好悶，造型係日本公仔，好靜又唔驚嚇！最後一個鬼屋係今次重點項目，Trauma 2 恐懼實驗室，聲稱最恐佈最驚嚇的遊戲，又話有人要中途放棄，參加者要綁手綁腳玩，我們諗起去年海洋公園的H15，我估計係類似的玩法，呢個遊戲係冇人排隊的，因為要買 fast pass 先可以玩，去到遊戲館，人影都冇個，以為去錯地方，首先，要將隨身物品放 locker，入到館內，佈置成醫院一樣，職員都穿著手術袍，去到一間類似急症室的地方，要坐低等，除左我地兩個，只有一個人在等！前面有幾部電視，講解緊急掣的使用方法，仲要不停重播，令人心情好緊張，好友先入去，跟住到我，入到去有好多間房，我地在其中兩間房外等候，聽到其他房傳出尖叫及呼救聲！！好緊張！！入到去見好細間房，大約六呎乘十呎左右，前面好似係個門，中間有張有轆的病床，張病床係教高左上半，好似張櫈咁，比你坐上去唔係瞓低玩，房入面只有一個穿著手術袍的人，然後要除低所有首飾，再綁住你手腳在病上，好緊張，係咪推出去呢？呢個時候，個職員取出一個..........…........................VR 眼鏡!?!?!?!?!?!?!?!?! 原來係玩虛擬實境!!!!!!!! 個職員配合個畫面去整你，例如噴血場面時，會噴水落你度，同時會推動你張病床跟住畫面一齊郁，但係好難令我驚囉！雖然我好欣賞佢地製作好認真，好用心，畫面同職員配合得好好，唔止體感，仲有氣味，但係明知只係場景，無辨法投入，好似去戲院睇戲咁，明知螢幕係唔會有野走出来，而且只係個眼鏡入面的螢幕！ 我諗我係最無反應果個！其他人叫到好大聲！(^_^*) 我本身個人就算驚都唔會大叫尖叫，可况唔驚！玩完出來，好友話佢都有小小驚叫，不過唔係高聲尖叫。

行多陣就走，出返去心齋橋附近食野，見到一家餃子店叫做こてつ家，是很細間的那種，只有一排高櫈，約八至十個位，我地叫左エビ五昧，係五款唔味的餃子，另外叫了兩碗担担麵，味道一般，唔算突出，我地狂影 live，好攪笑！

跟住去左激安殿堂行下，買左支梅酒，返酒店食巨峰，飲梅酒，yeah !