HIKARI

又有新開咖啡店☕️，位於荃灣大壩街，今日就去試一試，見到唔使等位，就真係最好！店入面嘅面積都好細，有條樓梯上樓上，不過明顯就冇開樓上，樓下大約20個座位，已經坐滿晒，剩返兩個面壁位對住門口塊玻璃，面壁為一共有三個，都係對住塊玻璃望住出街，有人等位嗰陣時，就會你眼望我眼有啲尷尬 😅，睇吓個餐牌，都係吐司、意粉、小食、少量甜品，當然唔少得咖啡，同埋非咖啡類飲品！

試咗三文魚意粉，同埋黑松露意大利飯，飲品就試咗竹炭咖啡同埋芝麻鮮奶，兩杯都係黑色飲品！食物嘅味道不過不失，份量亦都唔算好大，竹炭咖啡就咖啡味比較淡，可能比竹炭嘅味道掩蓋左，芝麻鮮奶亦都唔算好特別，都係想像中嘅味道！試埋佢哋嘅甜品 crème brûlée ，味道有少少淡，不過都啱我食！整體來講呢度都唔錯，店員都友善！

 

聖耀皇權俄羅斯皇家珍品展 / 瞧潮香港60+

飲完茶去睇展覽，去左車公廟站的香港文化博物館，之前去睇過羅浮宮展覽，今次去睇瞧潮香港 60+，呢個展覧是免費的，另外有個聖耀皇權俄羅斯皇家珍品展，要收費的，只係$10，咁就睇埋啦！

呢個聖耀皇權俄羅斯皇家珍品展，話精選左俄羅斯克里姆林宮博物館170組宮廷珍品，話呈現出俄羅斯沙皇時代的君皇氣派，入面的展品包括皇室物品，例如權杖、聖物、馬具、武器、貢品、飾物及玩具等，以闡述當時16-18世紀沙皇的加冕典禮、出行儀式、軍事權力、外交禮儀和宮廷生活，反映當時政治和文化如何結合教會與皇權等等，展品相當有歷史！

睇完就去睇瞧潮60+，呢個展覽主要展示香港流行文化的故事，戰後流行文化的進化，隨着時代的變遷和媒體的發展，戰後至近代香港流行音樂、電影、電視和電台廣播節目的發展，展出逾一千件展品，包括歌手登台服裝、獎座、唱片等，佢有一個 photo booth ，可以揀一D電影海報做背景影相，都幾攪笑，我都影左兩張😆😆，入面有D展品因版權問題，咁可以影相，不過大部分都可以影，所以都影左唔少相😅

 

㒰堂茶聚

好耐好耐冇去飲茶，今日經過呢間食店，呢間食店都開咗一段時間，一路都未去過，今日見冇乜人，自己又想食點心所以試吓！

餐牌同一般酒樓差唔多，選擇都唔少，揀左杏汁白肺湯、蝦餃、菜餃、牛肉生煎包，我唔飲茶，驚今晚瞓唔著，但係見佢地竟然有咖啡！所以叫左杯飲😅 因為好耐冇食點心，所以食得好開心，一路食一路傻笑🤣，店員見我食得咁開心，問我係咪好好味？我話係呀😄

點心都唔錯，咖啡亦出乎意料之外好！最後叫多個甜品，係茶棵，甜品就麻麻地，店員服務好好，下次再嚟食過！

 

奪金🏅👏🏻👏🏻👏🏻

今年香港都好多運動員去參加比賽，難得花劍張家朗為香港奪得第一金 🏅🤺，睇到大家都好緊張，得獎一刻我都心情好激動，真係與有榮焉！呢個亦係25年來香港第二個奧運金牌，上一個係李麗珊的滑浪風帆，眨吓眼已經20幾年，時間過得真係好快，希望今年可以有多啲運動員攞到獎牌啦！🥇🥈🥉🏅

 

Brew Corner

呢間咖啡店，位置都有少少隱蔽，首先位處工廠大廈，雖然係地舖，但係個位置唔起眼，呢條街亦冇乜行人，如果唔係門口擺咗D盆栽同埋擺咗張木枱，可能都冇人睇到佢！

店入面嘅面積唔係好大，大概有16個坐位，食物嘅選擇就幾多，見到佢有好多款  bagel 🥯、panini、croissant 🥐、scones 、飲品除咗咖啡之外亦都有茶同埋 smoothie，試咗佢哋嘅 panini 同 scone，當然唔少得咖啡！Panini 睇個配搭已知道都唔會差得去邊，scone 就唔太理想，而且冇跟 jam 或 cottage cheese 總係覺得爭D😅，咖啡都唔錯，下次可以再試吓其他嘢食😋

 

東京奧運 2020

 

延期左一年嘅東京奧運，今日終於開幕啦！🥇🥈🥉🏅

在家裏看開幕式，個人應為個開幕式唔算好精彩，有部份都幾搞笑，我當然最鍾意無人機果部份啦！今年個個電視台都有得睇奧運，因為政府俾咗錢直播，所以按下邊個電視台都係播緊同一樣嘢😅 當然主持人係有分別，因為都好睇旁述講成點樣，都好影響個氣氛！

Blue Bottle

今日又去睇中環睇醫生，睇完醫生想去飲杯咖啡，諗起呢間咖啡店開咗都一段時間，上次經過想去，但係因為太晏驚飲咗今晚瞓到，所以冇幫襯到，今次就去幫襯下，在天橋行落去嘅時候，已經望到樓上滿座，樓下啱啱好有一個位剩，其實門外仲有三個位，不過今日太熱喇！我就買咗杯凍咖啡同埋一件牛油果多士，樓下嘅座位係冇枱嘅，所以食嘢來講就唔係太方便，因為我一個人，唔想上樓上睇吓仲有冇位，如果上到去冇位，落嚟有連呢個位都冇埋，所以就算喇！反正只係食塊多士，對上一次幫襯呢間咖啡店就係在東京新宿，在百貨公司裏面的店，我覺得咁樣嘅咖啡，日本個杯好飲D😅，可能個人去旅行嘅時候，食咩都好食D🤣

 

新冠疫苗接種

 

今日終於去打疫苗💉🦠，揀咗復必泰，第一針約咗去彩虹道嘅羽毛球中心嗰度打，我知道好友 J 都係約咗今日去打針，不過佢就朝早去何文田打，佢話朝早打完可以快啲返屋企休息，我就下晝去彩虹道打，我就覺得朝早做吓其他嘢，晏晝打完就返屋企，直到夜晚休息😅 

去到場地，先在入口出示短訊，然後入去出示身分證登記，然後打針，跟住休息15分鐘，冇事就可以走，過程都非常之快，因為唔使等，每樣野都係順住去做，好快就可以打針，支針睇落好幼，打落去都冇乜嘢特別感覺，同其他嘅針一樣，打完之後，打針位都係有D好似瘀傷嘅感覺，又冇特別唔舒服，跟住就返咗屋企休息，返到去都唔覺得攰，不過我比較擔心第二針，因為好多人都話第二針嘅反應大好多，到時睇吓點！😏

Lazy Creature

下雨天，今日特登去九龍城想試吓新開嘅咖啡店，不過好多人，而且仲要等位，所以轉左去世運公園對面呢一間咖啡店，一來個位置比較隔涉，二來佢都開咗段時間，所以應該唔會太多人，呢度係兩個鋪位，應該係一間好生意所以開多一間喺隔離，因為隔離個位冇招牌，門口寫住要去隔離俾錢落單，我冇入去睇裏面係點樣，我諗應該只有一邊有收銀處落單，即係話你落完單可以去隔離嗰間舖度坐，等佢送食物過嚟，我就直接坐收銀處果邊，因為店入面冇乜人，反而新嗰邊就多人D！

我叫咗個羽衣甘藍蘋果沙律🥗、一個咖喱牛肉批🥧，同埋一杯咖啡☕️，因為今日好肚餓！個沙律除咗有羽衣甘藍同埋蘋果之外，仲有合桃同埋芝士，呢個組合加埋又幾好食，而且夠晒健康，牛肉批裏面係碎牛肉，味道都幾好，如果係牛肉粒（大粒D😋）應該會好食啲，咖啡都唔錯，我諗我會再嚟食呢個沙律！🥗👍🏻😅