鍋匠

去完迪士尼出來，當然要食飯啦，出咗去旺角，搵左呢間未食過的火鍋店，佢係任食果種，有好幾種價錢，貴D嘅就包埋刺身，但我哋唔想食刺身，所以揀咗淨係火鍋果種，間鋪應該係新開嘅，因為裝修好新淨，識得嘅選擇唔算多，都係一般火鍋料，火鍋本身包左三款海鮮，有蝦、蠔同魷魚，海鮮唔係咁靚，牛肉亦都切得好細塊，其他火鍋料都係一般，飲品都係任飲，不過都係一D支裝國內品牌為主，整體食物以價錢來計都差不多喇！服務都算係比較好嘅一間！

最後的巴斯光年

迪士尼的巴斯光年要拆喇，做到8月31號，趁佢拆之前去懷念一番！

今日約埋好友一齊入去，同我地預期一樣好多人，因為好多人都好似我哋咁，查之前入嚟玩埋最後一次，加上暑假仲未完，之前打咗兩次風終於都有太陽出，所以會好多人入園！

去到巴斯光年個位置，排晒長龍！我地都決意要玩，不過先玩咗其他先，先去小鎮大街行下街先，因為新果隻兔 Sella Lou 在香港已經有得買喇，所以一齊去睇下有乜野產品先，睇過D產品同日本賣緊嘅，有一半呢度都有買，我地買諗住隻大既 Stella Lou，仲有其他野，等玩先出來先買，我地去攞左 fastpass，然後去睇巡遊，睇到差不多完結的時候，就走去劇場等睇show ，四點半開場嘅show，四點鐘就要去等喇！我地去到已經係最後一批可以入場的人，遲多幾分鐘就入唔到喇！排咗半個鐘先可以入去等睇show！呢個show之前睇過兩次，仍然覺得新不如舊！睇完show 我地就諗住玩 Iron man，又係大排長龍，諗住攞 fast pass ,但係搵唔到部機，問吓人，原來頭先我哋攞嘅fast pass就已經係，換句話講玩巴斯光年係冇花pass攞，一定要排隊，既然已經攞咗 Iron Man的fast pass ，咁就去排巴斯光年啦！出面寫住要排55分鐘，其實半個鐘左右就入到去玩，個個排隊嘅時候都不停影相留為紀念，我也都影咗唔少，今次玩嘅時候，部車停咗好多次，趁停低車，就梗係喪射目標啦！所以今次攞咗自己玩咁多次以來最高嘅分數，就係包到 999,999 分，計分表最高係1,000,000 分，但係部機根本冇七個位，所以佢顯示都係 999,999分 L-7 ！完成最後任務，我地去 shpping，買完野再去睇4D，睇完再去玩Iron Man ，D時間啱啱好，出到來夜間巡遊已經行到最後喇，我地睇唔到，跟住就走啦，如果唔係咁多人，我哋會睇埋煙花匯演先走，不過實在太多人喇！

又打風

星期三打完十號風球，星期日又八點風球！

風球打到中午就落波，去快餐店食個 lunch，黃昏再飲左杯咖啡，夜晚就睡唔著！

Ocean Terminal

今日出尖沙咀，見到海運大廈最入的 LCX，之前圍左板裝修，見依家開返，原來成個商場擴建左，雖然只係多左幾個鋪位，但係開揚左，商場終於醒覺佢地最大賣點係個 view，開D有海景 view的食店，絕對吸引到人！見到得兩間食肆開左，一間叫天穴，食日本菜，睇睇餐牌，食品睇落唔錯，價錢個別略貴，例如三件大拖羅刺身要$588，不過以個view同食物質素（睇相估計）部分食品算價錢合理！例如刺身拼盤、十件壽司拼盤三、四百元有交易，當然係一D好基本的刺身、壽司，另外一間係塚田農場，之前在大阪食過一間叫山內農場，主打鐵板地雞，呢間都有D類似，見佢地門口等位的梳化坐了些等上船的大媽，店員都要驅趕他們，原本想試下，但店員話冇位，得返bar 枱，但明明入面沒有客，可能訂晒枱？行過 Ladurée 聽講佢地8.28會撤離香港，在香港經營，實在不易！後去左 BLT burger，都好幾年冇食過！質素仍保持到！

飯局作客 - 東頭邨

又去作客食飯，今晚打邊爐，除咗海鮮之外，今晚仲整咗沙律同埋生菜包，海鮮方面，買咗一條石斑、花竹蝦、蟶子、同埋牛肉等等的火鍋配料，今晚開左支 Rosé ，同埋柚子梅酒，仲有為小朋友慶祝生日的蛋糕！有幾個朋友已經幾個月冇見，今日忙於洗野同煮野，又要照顧小朋友，都冇乜時間真係傾計！

俠盜聯盟 The Adventurers

張丹在監獄服刑五年後，出獄時見到的是一直追捕他的警員Pierre ，Pierre 一直留意着他的動向，因為有一些套著名的首飾名叫 Gaia，由三件珠寶組合而成，其中一件五年前已比張丹盜取，另一件將會在拍賣會拍賣，最後一件收藏在一個富商的城堡內，知道張丹一定會去到取另外兩件珠寶，不知道唯一可以幫助他的人，就是張丹未婚妻 Amber，張丹和他的拍檔小寶，一直替剛叔辦事，後來加入了新成員葉紅，張丹決定盜取全套 Gaia 之後，就會收山，他們三人在天羅地網的保安系統下行事，同時 Amber 與 Pierre 攜手合作追截張丹，而張單一直希望查出五年前出賣他的人是誰......!

套戲都拍得好緊湊，故事發展都係意料中事，都係荷李活商業電影模式，樣樣元素都有D，成套戲歐洲拍攝，靚人靚景，乎合大眾口味！

十號風球

新聞話五年前打過十號風球，我都冇乜印象，今次呢個風叫天鴿 Hato 我諗係日文(はと)大概係鴿的意思，10號波掛咗五個鐘，就轉返8號，跟住黃昏又轉返3號，馬上回復正常，但係街市都冇開，咁就唯有買外賣食啦，買咗譚仔三哥米線返屋企食，全日冇出街既感覺真係好悶！雖然已經煲咗幾集韓劇，都真係想出街行吓，不過路面嘅情況都頗惡劣，所以都冇真係出街，新聞報告全日都講出面嘅情況，有嚴重的水浸，淹沒左整個停車場，又有吊船撞豪宅，實在好耐冇試過咁強勁既颱風喇！

太湖

好耐冇去太湖食飯喇，以前在港島區返工，好多時收咗工都同D同事去太湖食飯，離開咗港島區之後就冇去過喇，今晚同同事 farewell ，原本去耀華街食西餐，但係間餐廳格局比較迫，而且店員態度麻麻地，所以轉左去太湖食，我地一行11人，在銅鑼灣行來行去，去到酒樓攞咗間房，傾計都方便D，其他同事都有間唔中去太湖食飯，所以佢地都知道叫D乜野食！

我地叫左招牌菜三弄回味牛肉，這是一款厚切的牛肉片，有點像叉燒的口感，牛肉下面D青瓜，另外有一碟蝦片，吃的時候一片牛肉加一片青瓜，連埋汁放蝦片上一齊吃，又好夾喎！好味！食完前菜，來兩盅燉湯先，螺頭鳳爪豬展湯，好好味，湯渣都有兩大碟！跟住叫咗片皮鴨兩食，隻鴨未送來之前，侍應推咗張枱入來，用來即場片鴨用的，枱上面放咗一個金色馬奬座同埋證書，話呢款片皮鴨係中國飯店金馬奬得主，好搞笑，我地係咁影相，又攞人地片鴨把刀來玩，乜都笑一餐！見佢攞咗獎，都有所期待，不過成隻鴨片出嚟D肉真係好少，每人都食唔到兩塊！皮脆肉唔會乾，味道都唔錯，只係嫌佢地D京蔥切得太厚，一般都會係切絲，佢地就切段，蔥係要幼絲先好味！個鴨殼就切粒炒，再生菜包！仲有斑頭腩兩成，斑腩炒西蘭花，頭就薑蔥煀，好似好耐冇食過斑腩，啖啖肉就最好味，另外仲有兩食的鮑魚仔，分別有豉油王，同埋椒鹽，鮑魚仔真係好細隻，一人一隻，有D唔夠喉！跟住黃金蝦，黃金即係鹹蛋黃，呢款餸真係好耐冇食過，好好味但係好邪惡！另外我地叫咗兩碟菜，一碟腐乳通菜，一碟係鹹魚粒炒芥菜膽，炒芥菜係我叫的，因為我好鍾意食芥菜，我當然覺得佢好好味啦，雖然有少少苦味，但係芥菜本身就係有D苦！

最後想甜品，有迷你煎堆同埋蛋散，我好少食炸野，不過呢個真係炸得幾好食！另外仲有紅豆沙，真係食得好飽，食完飯，將要離職既同事，講咗好多想當年的往事，我們也不忘催婚，他口頭承諾2019年，真係想話比個女友知，不過我地都覺得佢只係隨口噏，未必成真，費事去女友期望過高啦！

保鑣救殺手 The Hitman's bodyguard

Michael 係3A級保鑣，在一次保護日本軍火商失敗後，自此一蹶不振，另一方面，前白俄羅斯領袖 Dukhovich，為了逃避海牙的軍事審判，不斷將所有證人殺害，最後只剩餘一個殺手Darius可以指証他，Darius 因為他的妻子 Sonia 被禁錮，為了讓她獲得釋放，他唯有答應國際刑警出庭作證，在國際刑警護送他到法庭前，衆人受到白俄羅斯的人襲擊，Darius 和刑警 Amelia逃到安全屋，因為他們的行蹤被內奸透露給 Dukhovich，刑警 Amelia 為了不讓 Darius 行蹤被發現，唯有委托他的前度 Michael 做保鑣，保護 Darius 到荷蘭出庭作證，卻原來Michael和 Darius 是死對頭，一個殺人、一個保護人，兩人針鋒相對，卻又要一起逃避追殺........!

套戲都拍得好精彩，兩人針鋒相對，性格南轅北轍，一個講求計劃周詳，一個諗到就做，爆出唔少笑話，對白抵死惹笑，飛車追逐、連場槍戰，絕無冷場，而談情說愛，亦同兩人性格相同，既浪漫又搞笑，都係近期值得一睇既電影！

好少星期日去睇戲，今日近近地去咗又一城 MCL，近期都好少去呢度睇戲，因為覺得佢地服務好差，上次去覺得改善咗，今次去又覺得差返，售票員同小食部的職員，冷漠又黑面，如果 UA 、CinemaCity 同 AMC都唔啱時間，先會考慮去 MCL！

飯局主場 - 第十一回

今日二人前，原本想煲湯，但係睇完戲已冇乜時間，去街買條魚，見有好多貝殼類水產，有幾種蜆、蟶子、扇貝等等，想試試炒蜆，所以買左一斤試下，另外再買左蝦，蒜蓉蒸！

先處理D蜆，先煲一D暖水，約60度水溫，用來浸蜆，然後處理D蝦，剪腳挑腸，都攪左一輪，蒸爐煲落飯，切埋D蒜蓉、豆鼓、辣椒、葱，蒸落蝦同魚，差不多蒸完先炒蜆，好快炒好，食得！

天使愛芭蕾 Balleria

Félicie 和 Victor 自小在孤兒院一起成長，Félicie 的夢想是跳舞，而Victor 的夢想是發明能夠令人飛行的方法，兩人決定一起逃離孤兒院，到巴黎尋找自己的夢想，去到巴黎兩人際遇各異，Félicie 誤打誤撞闖進了巴黎歌劇院，這是她夢想要去的地方，她無意中看見有人在跳芭蕾舞，燃起了她想跳舞的慾望，可是她人生路不熟，又身無分文，幸好得到清潔工Odette 的幫助，還收留她在 Régine 的大廈工作，Régine 的女兒 Camille 自小已學芭蕾舞，還準備參加劇團的甄選試，爭取胡桃夾子一角，她還奚落 Félicie 是茄喱啡....Félicie 收到劇團的通知信，沒有交給 Régine ，反而拿着信件冒認 Camille，進入了劇團.........!

之前睇到trailer，見到巴黎歌劇院，就想起上次去法國，和好友在巴黎歌劇院門外坐，還到對面的The Grand hotel 酒店地下的餐廳 Cafe de la Paix 飲野，套戲嘅劇情都係一般卡通片嘅模式，先苦後甜，努力不懈、尋求夢想、最終成功！套戲比較短，所以對女主角練跳舞描述得比較簡單！