2024年10月東京七天生日之旅 Day 7 - 東京站

又去到行程嘅最後一日，今日搭三點幾機，所以12點左右要去搭車，我哋在酒店check out，直接拎埋行李走，搭一個站去東京站，一嚟要轉車，二來買埋手信，我要買NY cheese ，先去車站入面嘅Beck’s coffee shop食早餐飲咖啡，買完手信將啲手信塞返入篋，再喺車站行吓，見到有一間賣手信嘅店，叫做 Patisserie Gin No Mori 。成間都係藍色，個裝修好似森林，又有啲松鼠嘅畫像，好有童話feel，見佢啲手信個樣幾靚，所以買兩盒細嘅試吓，因為價錢都唔平，最細盒都要¥2,160，佢係用鐵盒，所以我諗成本都貴啲，而且未食過唔知好唔好食，所以買最細盒嘅試一試先（後記：又真係幾好食，一路睇電視可以食晒成盒，因為佢唔係好多份量）一盒裏面有十多種嘅餅，仲有英文同日文嘅介紹圖文並茂！呢度亦都有賣蛋糕同埋茶葉，我就冇買到！

買完晒手信，就搭火車去機場，過關都算幾快，跟住梗係去搵食，今次成個行程唔好食過壽司，所以喺機場搵返間壽司店食午餐，呢度得一間叫做京辰的壽司店，店入面只有壽司吧枱，大概可以坐十幾人，去到嘅時候只有三個客，因為佢價錢都唔平，一個十件壽司set都要6千幾円，食完都唔係好夠飽🫢，行到去閘口附近，有見到一間食丼嘅小店，見佢啲丼唔係好大碗，所以又食返碗😂叫咗一個牛肉同一個鰻魚丼，味道就一般，食完再去登機，不過佢delay左10分鐘，喺飛機上面睇咗套戲，返到香港見到九龍城寨嘅佈景，先諗起佢擺咗喺機場度做展覽，所以都影返幾張相先至返屋企😄

 

2024年10月東京七天生日之旅 Day 6 - 新宿

今朝搭JR 中央線去新宿，先去高島屋，想去頂樓椿屋茶房飲杯咖啡，見到佢又有Event 做，又係做北海道 Event，見到宣傳相牛肉丼好吸引，不過時間太早佢未有嘢食，而且牛肉丼做早餐好 heavy 😅 coffee shop 都係要等位，不過都好快夠鐘安排入座，我哋叫咗一份三文治，兩杯咖啡飲，都唔錯，走嘅時候仲買咗兩包咖喱😄

喺高島屋行咗一陣街，又去Hands度行吓，行到咁上下，就去食晏，揀咗高島屋入面一間鐵板燒，我哋我哋揀咗神戶牛同松阪牛，兩款都好好味，食完飯去咗北海道Event 度買咗乾瑤柱俾阿媽做手信，然後去歌舞伎町嗰邊行吓，同埋去藥房買藥

行到夜晚，就喺新宿三丁目嗰邊食晚飯，再去木曾路食壽喜燒，我哋叫咗松阪牛set，每人可以有三片牛肉，仲有大量蔬菜，店員幫我哋煎咗第一塊牛肉之後，我哋就自己煮，店員煎得比較熟，自己煎就可以唔煮咁熟，更加好食，除咗蔬菜仲有蒟蒻麵同埋烏冬，所以食到非常之飽，走嘅時候又買咗一包壽喜燒醬汁，上次買咗一包，擺到過期都唔記得食🤦🏻‍♀️，今次買返香港一定要盡快食！

食得好飽，所以食完嘢又去行吓街，又影吓3D廣告牌隻貓貓，行到咁上下就返酒店休息，去酒店附近嘅便利店買甜品，竟然搵到貨架上最後一個篝嘅杯飯(冇錯，係飯唔係麵）🤣 咁就梗係買咗先，另外再買咗雪糕同crème brûlée ，返酒店慢慢嘆！

 

2024年10月東京七天生日之旅 Day 5 - 築地、渋谷 Shibuya Sky

今朝一早醒左，早D出門，行去小伝馬町站，撘Metro 日比谷線直接去築地，由本願寺嗰邊行過去場外市場，行咗一個圈，想去虎杖食海膽飯，發現佢開咗一間分店，但係呢間分店係完全冇客，因為佢個格局同其餘嘅唔同，呢度冇壽司吧枱，即係話睇唔到師傅嘅製作過程，我哋覺得冇乜所謂，唔使排隊等位食同樣嘅嘢都OK，因為呢間舖係長方形，只係擺到一張枱嘅闊度，所以做唔到壽司吧枱，我哋叫咗一碗海膽飯，另外叫咗刺身拼盤，裏面有帶子、大拖羅、牡丹蝦、蟹鉗、三文魚，我哋唔想叫兩碗飯，因為驚食得太飽，食唔到其他嘢，呢度只有一個店員，我哋坐低一陣之後開始有其他客入嚟，聽到佢哋同店員傾偈，原來個店員係台灣人，所以識得講國語同英文，海膽飯仍然係五款來北海道嘅海膽，店員都有展示俾我哋睇海膽嚟自邊度，唔同嘅海膽真係有唔同嘅味道，我覺得五款都好食，我哋走嘅時候都係仍然得我哋兩枱客，其他嘅分店都要排隊😅

食完海膽飯，我哋繼續行，先去飲杯咖啡，去咗上次飲過嘅米本咖啡，見到佢喺賣玉子燒嗰邊開咗間分店，不過好細間，只係做外賣，我哋去返有得坐嗰間，呢間嘅佈置全部都係Beatles，我哋影吓相嘆吓咖啡，飲完咖啡亦都買咗少少咖啡豆，然後繼續搵食，去咗一檔專賣燒海鮮嘅檔口，買咗蟹腳、燒蠔、燒扇貝，呢一間亦都係有位坐，而且仲有樓上，蟹腳啖啖肉好食！燒蠔同扇貝都好新鮮，好食！跟住買咗少少水果串，係蜜瓜、青提子同士多啤梨串，不過不失，唔算話好甜！

跟住再去食cheese cake，呢度又係可以坐低食，今日喺築地都冇乜點行過，大部份時間都係坐低食嘢🤣，行過鮨國嘅時候，見到竟然有位，冇人排隊，店員仲要喺門口招客，真係估佢唔到，可能競爭太大，呢度確實開多咗好多間海鮮丼，淨係虎杖都有五間，加埋其他都有十幾間，比起以前早期我哋嚟食嘅時候，係得佢有海膽飯！已經唔同晒！

食飽之後，行去銀座，因為想去搭銀座線過去渋谷，我哋買咗Shibuya Sky嘅門票，去到渋谷又落雨，先去樓下手信店行一陣，睇啱咗少少嘢，諗住行完街走嗰陣先至買，到咁上下時間就上去入口附近坐低等夠鐘，入去嘅時候職員話俾我哋知因為落雨，露天嘅地方唔開😱只可以喺室內行，既然都嚟到，都入去睇吓，因為佢呢度最靚應該係露天嘅地方，我哋仲特意買三點幾嘅飛，諗住可以影到日與夜，可惜而家乜都影唔到，好多人同我哋一樣照入去影室內位，所以都幾多人，行咗兩個圈影吓相，就落返去買手信，我買咗熊貓蛋糕仔，跟住我哋行去附近另一個商場，因為想去食壽司，不過去到話full book冇位，所以search咗附近另一間壽司店，係要上樓嘅，去到先發現個電梯唔能夠直接去到嗰層，除非有人帶你上去，所以唯有放棄！

最後我哋決定返酒店附近嘅商場搵嘢食，去咗Coredo 室町其中一個商場，見到地下有一間係食北海道生蠔嘅，叫做牡蠣場北海道厚岸，就入去試吓，餐牌只有日文，我哋先叫咗兩隻生蠔試吓，又叫咗兩杯梅酒，店員又俾咗一碗海帶湯我哋，佢應該係每枱客都會比一碗，生蠔好新鮮，而且都幾大隻，我哋再叫咗帶子同魚刺身，又叫咗一隻焗蠔同一隻燒蠔，一個烤洋蔥，一份顯拌麵包，焗薯仔，再叫多四隻生蠔，食飽飽再行返酒店😌😌

 

2024年10月東京七天生日之旅 Day 4 - Tokyo Disney Sea

今日要早少少起身，因為要去迪士尼，近期東京迪士尼係超多人去，而且要買到 premier access 就要早d入去，因為佢要個Apps detect 到你在樂園裏面，先至可以買到 premier access ，我哋搭JR 去東京站，再轉京葉線，去到舞濱站再轉迪士尼綫去Sea 嗰邊，我哋都買咗紀念車飛，我哋喺車上面經過 Disneyland 果邊，望到超多人排緊隊入完，而我哋去到 Sea 嗰邊相對冇咁多人，但係都係好長龍，我哋排咗大概40分鐘先至入到去，入到去又顧住影相唔記得咗買 Premier access🤦🏻‍♀️ 都諗起要買嘅時候，已經買唔到Soaring 嘅 Premier access 🤦🏻‍♀️🤦🏻‍♀️  唯有睇吓有冇啲時間會少人啲先去排隊！

今朝趕住入嚟，所以冇食早餐，入到去先去食啲嘢，又去我最鍾意嗰間 Cafe Portofino ，買咗兩個燒雞餐，再加一個沙律，好味！食完嘢四圍行吓，見到基本上個個機動遊戲都要排兩個鐘🙄🙄所以去坐吓貢多拉！😅 然後繼續行吓睇吓嘢，今日見到是史高治，又同佢影吓相！

行到五點幾，就上去隻船度睇吓有冇位，早D食dinner，主要係想食個生日dinner，我哋叫咗兩個set dinner🦞🥩，又加咗兩杯氣泡酒🥂，慶祝一下😄

最後我哋7:00左右就走，因為玩唔到機動遊戲，又冇乜嘢啱買，我哋搭到去八丁堀轉車，因為想避開東京站嗰幾條好長嘅路，直接返去小伝馬町，我哋由地鐵站出嚟嘅時候，見到原來酒店附近都有一間鳥貴族，不過今日食飽咗，所以冇再去食，跟住就去便利店買甜品返酒店食！