Billie Eilish - Hit me Hard and Soft Tour 巡迴演唱會3D 現場版

之前睇預告，見到呢套戲都好有興趣，因為呢個歌手自己都幾鍾意，不過佢嘅歌我只係識幾首，不過都想睇吓3D效果，現場感係咪好強勁，套戲已經上咗畫一段時間，所以冇乜人睇，今日呢場就得四個人，好耐冇睇過3D電影，佢係需要帶3D眼鏡，好彩屋企有幾副，之前因為太多已經掉咗一啲，有需要現場買都係$10 ，不過唔想再多樣嘢擺喺屋企，反正舊嗰啲都用得到！

3D效果加埋音響，現場感十足，開場嘅氣氛非常熱鬧，鏡頭好多時都影去觀眾，歌手真係純粹以歌會友，全程只係着住一套波衫，完全冇換過衫，亦都冇華麗嘅服飾，甚至係自己化妝梳頭，歌迷只係喜歡佢嘅作品，好不介意她的外型，佢本人亦都唔想用主流社會眼光去定義自己，係好有個性，最重要佢係非常親民，因為佢自己都曾經做過歌迷，知道一個小小嘅接觸，已經令到歌迷非常開心，所以佢有落台同觀眾擊掌，歌迷亦都看得如痴如醉，氣氛非常好，佢嘅慢歌係令人好感動，每次佢唱慢歌啲觀眾都聽到喊，唱快歌嘅時候大家亦都好興奮，雖然有啲歌我唔係好熟，但係我都覺得好好睇，中間亦都有加插導演同佢嘅對話，籌備成個演唱會都用咗好多時間同體力，真係唔係一件容易嘅事！

 

The Wall Street bar and lounge

今日天氣非常炎熱，係今年最熱嘅一天，夏天正式開始了，今日去尖沙咀食晏，路上太陽很猛烈，真係少一陣冷氣都唔得🥵

去咗呢間樓上嘅餐廳，去到只有兩三個客，佢有一部份位係窗邊，相對會比較熱，所以坐入D，唔使曬住太陽，不過冷氣都唔係太夠，因為少客人，冷氣都唔會開得太大，呢度有午餐，我哋分別叫咗鵝肝多士同帶子做前菜，主菜有蜆肉意粉同埋羊架，餐湯係忌廉蘑菇湯， 頭盤同湯都係比較鹹，雖然本身食嘢係比較淡味，仍然覺得佢比正常偏鹹，主菜就正常，不過整體食物嘅質素就麻麻地，不過店員嘅服務都好好，我哋食到得返我哋兩個，店員都唔會埋嚟清枱趕你走😂 不過我哋自己都想出去行吓，雖然好熱，所以就去附近商場涼吓冷氣🤣

 

別離無恙 Until we meet again

美空正在尋找工作，仍未找到合適的工作，一天她前往參加喪禮，離開時看見一個孕婦，在靈堂外要求她幫忙，告訴在靈堂內的丈夫，要把二人一起收拾的紙尿片，一同放入靈柩內，原來美空能看見逝者的靈魂，她告訴喪主他去世的妻子，就在靈堂外要求幫忙，而作為喪禮的主持者漆原，事後邀請美空在殯儀館工作，美空便開始了她在殯儀業工作的實習期。。。。

故事有點像之前睇過嘅日本電影禮儀師之奏鳴曲，戲入面都係講幾個喪主同逝者的經歷，如何在逝者去世後，家人得到釋懷，包括兩位主角自己都曾經係喪主，兩人在工作的過程中，同時學懂讓自己和家人都能夠釋懷，都有唔少感動場面，故事雖然沒有愛情分線，總覺得發展落去會有機會，男主角目黑蓮，是我頗喜歡的日本演員，但他演出的作品不多，有報道亦都叫佢做木村拓哉接班人，雖然冇木村咁靚仔，但係都有一種冷漠嘅型格🤭

 

飯局作客 - 蒸海鮮+火鍋

上星期同好友傾開偈，話好想去佢屋企打邊爐，咁就即時約，即刻又約到，今日我負責買餸，因為個個都有嘢做，先出去深水埗買牛肉，呢班朋友對於牛肉都有啲要求，所以要去指定嘅店舖買，之前係去佐敦買，但係佢加價加得好密，所以我哋就改咗去深水埗呢度買，今次好友要求想食匙柄，問咗肉檔嘅叔叔，佢話有，即刻買返一斤先，另外再要一斤我哋食開嘅牛頸脊🤣 

買完牛肉，行出大街搭巴士落九龍城，因為大家要食九龍城嘅雲吞，所以要去九龍城買，落到九龍城時間尚早，所以我就去咗Blossom 食lunch，去到要等位，好彩等一陣就有，因為今日都幾熱，而且我拎住啲肉，冇冷氣又驚會好易變壞，店員仲要求我哋喺出面等🫢 我叫咗個親子丼同一杯手沖咖啡，叫完即刻有啲後悔，因為食飯可能會太飽，所以我最終都係食唔晒碗飯，嘆埋杯咖啡就去買雲吞，啲雲吞一次比一次貴，不斷咁加價🤔

買完雲吞再搭車去大成街街市，我睇吓有啲乜嘢海鮮，然後通知我另一個好友過嚟join我，我哋買咗扇貝、蟶子、北寄貝、蠔、蝦、魚蛋豆腐粟米、菜等等，原本想買脆肉鯇魚，但係海鮮買得多，所以冇買到🤭

買完餸好友call Uber，直接去好友屋企，就開始洗洗洗，我帶咗一包湯包去，係篝嘅蕃茄雞白湯，好彩我帶咗湯包，原來好友屋企冇湯包😅我哋一路蒸海鮮，一路打邊爐，今次冇人生日，純粹係大家想聚吓傾吓偈，今次買嘅匙柄，肉質比較煙靭，好友就係話貪佢有咬口，味道就係牛頸脊好D，下次睇吓佢哋仲想唔想食，先決定買唔買，不過下次未必去好有屋企，因為呢個朋友圈當中有一個係好唔願意去，因為佢住得相對比較遠🫢其餘嘅人因為住得近，就好鍾意去😅

 

Non cafe

今日臨時臨急出去尖沙咀，去咗亞士厘道呢間越南餐廳，叫咗一個越南Pho ，同一個扎肉法包，咖啡當然要試吓越南滴漏咖啡啦，不過佢杯咖啡唔係連埋個滴漏壺一齊攞嚟，而係沖好晒，就咁一杯咖啡咁俾你，食物同飲品都唔錯，而且服務都幾好，臨走店員仲介紹佢哋嘅班蘭蛋糕，不過我哋就飽啦，所以冇買嚟食，下次有機會再去試吓！

 

Beyond coffee and bar

食完韓國菜，同好友去耀華街飲咖啡，之前我哋去藍色裝修嗰間，又執咗笠😅同一舖位轉左手兩次，我哋都有去過，上次去冇位，今次去冇埋😅 

行入少少，見到呢間，其實只有一個客，我哋嗌咗手沖咖啡，咖啡粉嘅選擇有幾款，全部係英文，就用Google Gemini翻譯，仲叫AI介紹埋邊款好， AI嘅選擇同我一樣，想試吓佢嘅藝妓咖啡，可惜佢話今日冇貨，唯有試其他款，佢只有五六款選擇，我哋叫咗三款唔同產地嘅咖啡，味道都唔錯，我哋一路飲一路傾偈傾到差唔多六點，佢話要收舖，見佢明明係酒吧唔知點解會收六點🤔 可能夜啲再開都唔定😅

 

青年大邦

連續兩次約朋友去銅鑼灣食飯，都係去呢間韓國餐廳，兩次都叫咗一隻雞，一次係香蒜，另一個係蜜糖，又試咗佢哋嘅海鮮煎餅、牛肋骨年糕鍋、紫菜飯，紫菜飯係加落年糕鍋個湯度，再整到好似煎餅咁，都幾好味，年糕鍋好好食，兩款雞就冇想像中咁好，整體嚟講都唔錯，不過價錢略為貴少少，始終喺時代廣場，又冇午餐優惠😅

 

Pick coffee (樂富）

 

今日去樂富，每次經過呢間coffee shop都想入去試，但係次次都唔記得，今次終於記得了，撞啱食晏時間，叫咗個日式午餐，另外加杯凍滴咖啡，佢呢度有咖啡豆賣，價錢個Range都幾大，食物就正正常常，冇乜特別驚喜，咖啡就唔錯！

Michael 米高積遜

一路想睇呢套戲，終於都有時間去睇，套戲係講米高積遜早年嘅經歷，由佢細個同哥哥組成Jackson 5 ，一路到個人發展，開始走紅，電影只係講到佢剛走紅不久，應該會有第二part電影，Michael Jackson 係陪伴好多人成長嘅一個歌手，我個人認為佢嘅一生都好悲慘，細個就俾父親逼佢練歌，冇咗童年，青年期到成年，都係由佢父親操控佢嘅演出，到脫離咗佢父親，自己就要面對好多人嘅利用，感覺真係真心對佢嘅人唔多，亦都冇人教佢條路應該點行，導致佢後期負債，甚至死亡，佢嘅成就係前無古人後無來者，冇人可以超越到佢，某程度上，佢父親自細逼佢練歌，可能先至早就到佢嘅功力，就好似梅艷芳咁，細細個出嚟唱歌，先至有足夠嘅練歴，套戲中間有唔少復刻佢嘅經典歌舞場面，睇到我都想起身郁吓拍吓手，可能喺外國會好多人聞歌起舞，喺香港就應該唔會喇！呢套係我自己就睇得好感動，男主角都做得好好，搵佢姪仔嚟演佢應該都係一個好嘅選擇，整體我覺得好好睇！
 

穿Prada 的惡魔2 The Devil wears Prada 2

Andrea 剛取得新聞獎項，隨即收到報社解僱嘅消息，因為紙媒嘅沒落，令佢哋報社無法生存，與此同時，Runway 因推薦一個品牌，而該品牌背後係剝削員工血汗嘅工廠，導致Runway面臨嚴重嘅公關危機，老闆Irv看到 Andrea 得獎報道，決定搵佢入Runway嘅編輯部，希望以佢嘅文章能夠挽救呢個公關危機，相隔20年，Andrea 再次回到Runway，而Emily 已離開Runway，在Dior 工作，她的男朋友更是一名富商，Miranda 正準備升職之際，公司卻發生巨變。。。。！

估唔到呢套戲上一集原來已經相隔20年，劇情都好符合現實，現時亦都係紙媒難以生存的世代，不過我覺得Miranda 冇左上一集嘅霸氣，雖然佢面臨好多危機，但係以佢嘅性格，應該能夠保持佢嘅強勢，但係今次喺入面嘅佢，就變得好弱咁😅成套戲都維持好多上一集嘅經典，係唔少人嘅集體回憶😄

寒戰1994 Cold War 1994

2017年新一屆政府準備籌辦管治班底之際，李文彬忽然失蹤，局長找簡律師，要求查看他手頭上李文彬的檔案，因為簡律師講明下半世咩都唔做，淨係招呼李文彬，所以佢手頭上有好多李文彬嘅資料，事情去返1994年，李文彬年輕時，那時候因接近97回歸，英國準備解散政治部，警隊內部亦出現權力鬥爭，此時潘氏家族的女婿黃嘉輝被綁架，李文彬在調查黑幫老丸時，發現被綁架的黃嘉輝，令他卷入政治及權力鬥爭中。。。。！

套戲有好多影帝參與演出，不過好多都係特別演出或者友情客串，所以出鏡時間比較短，真係群星拱照劉俊謙😅因為成套戲主要都係講佢識演嘅年輕版李文彬，套戲都講好多政治鬥爭嘅嘢，不過李文彬嘅失蹤仍然係一個迷，聽講話仲有一套1995 ，可能仲有後續所以有啲鋪排！
 

Pizzeria Vincenzo Capuano / Coffganio

之前睇報道World champion pizza 在灣仔開店，今日就去試吓！

佢哋開12:00 pm，11:45左右去到已經有幾個人排緊隊，佢哋可以網上訂位，但整個五月都冇得book ，最快要六月，不過實有啲位留返做Walk in，店入面嘅職員只有四個人，一個安排座位，其餘三人落單，pizza爐嘅廚房就有四五個人，一路有訂咗位嘅人入嚟，又一路放排隊嘅人，安排有啲慢，因為只有一個人做，我哋排第六組，開門後15分鐘可以入座了，見到佢有樓梯應該有樓上，但係好少帶人上樓上，所以我諗樓上唔大，樓下大概有三十幾個位，有一排座位係向住起回，呢邊係開晒窗，好彩今日有少少落雨，天氣唔係太熱！有啲風吹入嚟都幾好！

餐牌主要係pizza、意粉、沙律前菜、甜品，我哋揀咗佢攞獎嘅Pizza 煙燻半軟芝士胡椒薄餅，加一個Burrata classica 沙律，每張枱都會放一把金色鉸剪，用嚟剪pizza，pizza嘅皮係做到好有空氣感，比較薄身，個邊唔會硬，所以食落唔會好似食咗麵包咁頂住，所以我諗一個人食一個Pizza都未必唔得，而且佢一個Pizza都係剪開四件，我哋每人兩件再加埋個沙律都唔夠飽，都係要加多個Tiramisu甜品，我覺得Pizza嘅味道唔係特別好，係個Pizza嘅皮係做得幾好，我都係覺得Little Napoli 好味啲，如果兩者可以合併就好喇😅 

平時食pizza都會叫咖啡，因為意大利嘅咖啡都出色，不過我知道好多人等位，都唔會坐得耐，所以留返去第二度飲咖啡，行咗去新開嘅合和酒店商場，見到有間coffee shop，過咗午飯時間，店入面就冇乜人，我哋叫咗兩杯咖啡，又叫咗個雞蛋仔小食，可以喺度坐下傾吓偈，咖啡就一般，雞蛋仔就唔係好夠趣，不過佢用雙皮奶做餡，都幾特別！