人間喜劇

前晚去咗睇，原本想睇Toy story 3，但係無位，都無乜選擇，即管睇吓好唔好睇，入場前order 左玉桂條，唔係間間戲院都有得食，最重要係通常無"現貨"，有人買先至整，咁就會新鮮熱辣辣送到你個位，yummy ! Karen佢哋竟然未食過，問我係乜嚟，我比左一節佢試，佢覺得好得意，我雖然鐘意食，都係覺得太多糖粒！

套戲講杜汶澤係國內殺手，而王祖藍就係宅男編劇，一次颱風，令兩人在屋內一起相處左幾日?當中有唔少笑話，重玩左d經典電影既劇情，亦提及到王祖藍同薛凱琪既感情，薛凱琪演精神病者，都演得幾好。

套戲比想像中好笑，有幾場好抵死既對白，尤其扮集結號果場，我無睇過集結號，但係d對白真的好好笑！

Boat trip

星期二去左西貢夜釣墨魚，去到碼頭天仍未黑，仲好光tim,我地响碼頭影相，我好少入西貢，對上一次路過都有兩年，有停留既都有五六年了！我見碼頭有艇家在賣海鮮，見d瀨尿蝦好大隻，都好耐無食過，如果有車，可以入嚟買海鮮返去煮！

一路見好多人落船，天氣好好，好多人出海，見好多晒到黑黑地，我地就比較"密實"，只有幾個背心短褲，上到船諗住有海風吹吓，不過係又熱又濕既風，好快就要開冷氣，主要係個個都想打麻雀同玩啤牌，出到海先開始釣墨魚，我就釣唔到，仲暈浪tim，食完野有d暈，之後响艦倉休息，成程都無乜點玩過，佢哋都睹到暈，佢哋有幾個釣足全程，都有十幾隻墨魚，我無食到，唔知好唔好味？好快就hea左四個鐘，回程果陣我先精神返！

史力加萬歲萬萬歲 Shrek Forever After

終於去左 isquare 睇 Imax 3D版電影，前晚去睇呢套3D卡通，Imax 真係靚好多！我地好似大鄉里，睇到嘩嘩聲，猛話好靚，好攪笑！真係睇完就返唔到轉頭！已經約定睇Toy story 3，事關開場前睇完3D trailer 覺得真係好正！

印象中史力加做左幾集，我只係睇過第一集，但係唔記得故事細節，只係記得故事大綱，今集講史力加同公主結左婚生埋BB，日日如是的生活，令史力加好想去返以前既日子，令侏儒怪有機可乘，訂立了一份魔鬼合同，要史力加將自己生命中其中一日交換自由的一日，結果令他去到一個無人認識他的世界，他的妻子不認識他，孩子也沒有出生，要解這個curse，就要兩人真愛的一吻！

戲入面隻貓好得意，唔記得第一集有冇出過，佢求驢友果個樣超得意，套戲既畫質真係好靚，睇怕以後睇3D一定要睇Imax，好彩唔會頭暈，最緊要坐後D同坐中間D！

Joy Luck Club

上星期，一行十二人，入左去粉嶺食飯，朋友們都經常去這店，所以很熟絡，我第一次去，在門口見店名中文是玉龍軒，英文Joy Luck club，我諗起電影喜福會，我地幾個先到，店員讓我們入厨房看看預備給我們的海鮮，還是第一次入厨房睇，地面相當濕，難怪他們要穿水鞋工作！那些厨子見我地拍照都雞飛狗走................那天晚上還有世界杯看，晚飯時間不算多人，但他們已諗定是否留下看足球，我當然唔會陪佢哋睇啦！咁夜！

人到齊時，店員拿出我們預訂的原隻乳豬，大家都拍照一番，阿雯用她新買的Sony NEX3來拍照，相機還沒有用熟，有些功能都不太清楚，所以佢哋成晚玩部機，我就對Sony機興趣不大，一路影相d食物一碟碟上得好快，一如以往大家都係搶食頭果幾碟，兩碟鮑魚好快清哂！帶子同蝦都好受歡迎，隻乳豬要分兩碟上，一樣好搶手，之後開始慢，大家都飽飽地，但係仲有雞翼，炒蜆，菜.....都食唔哂！

成晚食得好開心，走既時候Leo車我地出去，响車上面大家又笑一餐，行行吓比road block 問左兩句，Leo 話來回比 road block 問左兩次，梗係啦，人地見佢"死靚仔"揸七人車!哈哈哈！

鐵血戰士S Predators

見套戲無乜口碑，都諗吓睇唔睇，見有鋼琴戰曲影帝Adrien，Mama Mia 男星，而且賣飛情況很好，幾近滿座，就去左睇，睇左一陣已經覺得唔對路，幾個人分被"掟"左入個森林，又唔交代點解，又唔知邊個安排，總之幾個人在森林內行行行行，一路行，一路逐一遇險，d角色又怪，個日本人幾乎全場無對白，臨尾用日本武士刀同Predator打！竟然可以用刀殺低對手？？咁又使乜攪咁多，而個黑人生還者一路自言自語，好似夾硬揾個位比佢哋休息食野咁，唯一好d既係男主角同Predator單對單果場打戲！如果期望有大量特技打鬥，就一定有點失望，結局更加係再去返套戲既開始一樣！呢幾日仲見雜誌評論比好高分？大概是收了廣告費吧！

Simply life

上星期日，還是第一次去Simply life 食 dinner, 今次Ronald請佢個女食飯，我就去黐餐，我地坐喺入面，呢度不論坐外面定裏面，都係唔多夠冷氣，不過都未至於熱。

呢度最出名係麵包，餐前既餐包保持水準，好味道，我叫左南瓜湯，同羊扒，佢哋就叫左西冷同天使麵，我覺得d食物同呢度既麵包一樣有水準，當然不是最好的，只是物超所値，飯後少不了甜品，呢度既甜品就只有cake，我地叫左兩件cheese cake，細細件，不會太heavy！

席間，都談到工作上，大家都希望阿女真正成長，去面對未來的挑戰，雖然她常常說要偷懶，但我覺得她會努力工作，不用我們擔心的！

色破孽緣 Chloe

上星期睇左呢套戲，因為兩個女主角都係我好喜歡既，記得對上一次睇Julianne Moore應該係Far from heaven,而 Amanda Seyfried就 Mama Mia，之後套Dear John想睇與唔睇之間，都係無睇到！

套戲講Julianne因為誤以為丈夫不忠，為了測試他，而聘用了Amanda演的Chloe去誘惑他，卻原來她才是Chloe喜歡的人，令她陷入萬劫不復的地步！

感覺上Amanda演情慾戲有點不自然，始終頭一次吧！未知是否急於改變戲路，期實我覺得她演一些愛情小品較適合！

迪士尼老友大召集

熱到溶的一天出發！呢d"吽"落雨既天氣真係流汗流到落雨咁！今次一行三人去，阿雯第一次去，佢哋兩個買左Annual pass，以後多兩個人可以同我去啦！

尋日十二點入左去，有玩既野比平時多d,連平時好少去既泰山樹屋都去埋，但係睇唔到大街show，因為落雨取消左！又睇左Lion King ，平時覺得有d悶，呢次就覺得好感動！可能今次d觀眾好大反應(可能好多第一次睇) ，現場氣氛好好，當然係仙女空中飛人同玩火果兩part 最多掌聲啦！今次淨係同巴斯影相，路上見到皇子同Cinderalla，之後玩幸會史迪仔，好攪笑！我地三個人三部相機，都影左好多相，仲未有時間整理，每次Howard去洗手間，我都會幫佢"保管"佢部單反機！乘機影吓相！哈哈....都未抄返d相，唔知影成點！

新羅寶

端午節果日16/6一家人去左尖沙咀果間新羅寶食韓燒，唔食中菜，因為唔想咁迫，我地book左間房，有直播足球睇，記得好耐之前去過呢間新羅寶，一路都無再來，我唔係特別喜好韓國菜，所以好少去，呢餐飯都叫左幾款唔同既肉類，有侍應幫我地燒烤，我地食住泡菜，生菜包等，人蔘雞湯味道比較淡，蒸魚肉丸一樣係淡味既食物，中和吓濃味既肉類，今次唔叫咁多野食，剛剛好，沒有吃剩，飯後媽媽拿了粽子給我們，沒想到她忙於搬屋仍包了粽子給我們！但我沒有要，怕會胃痛，媽媽有點不高興，下次還是問清楚免得好白忙了！

冰火時光機之回到80後 Hot Tub Time machine

單睇海報覺得應該幾好笑，都估故事應該係講呢四個中年男人，返左去1986年，有d似Back to future，可惜套戲浪費了個故事！拍得有點求其！全套戲都好多粗口，又有三級笑話同裸露，亦無交代整時光機既男人係乜嘢人，匆匆忙忙就送返佢哋走！返到去d野又唔同哂！唯一係跟足八十年代既服裝値得一讚！幾個人返到去1986時，個樣無變，只係在別人眼中及鏡中才看到年輕時既樣！

Mr.Steak grill again

再一次去呢間餐廳，其實對上一次已經係幾年前既事，果次同Ronald去灣仔既三里屯食，之後呢間餐廳搬左去銅鑼灣，呢日去餐廳既時候去錯左新寧道，行返去百德新街果邊，行到一身汗，入到餐廳都覺得好熱，感覺上好多扒房既室內温度都係比較高，我地坐左一輪都仍然覺得無乜冷氣，飲埋湯就更熱！

我地叫左洋葱湯同酥皮龍蝦周打，味道唔錯，煎鵝肝個樣唔係幾好，但係入口就好好味，沙律就出乎意料地差，通常沙律唔使特別烹調，可能果sauce唔係咁好吧！D.A 扒則保持水準，甜品Brulee好香滑，心太軟普普通通無乜特別！

成餐飯食左好耐，傾左好耐，好友買了新headphone，係 Monster 既 Beats by Dr. Dre，舊年新出既時候，已經令我心動，有黑色同白色，只是售價高又無得試，而令我卻步，而家試上"耳"更加喜歡，不過，外殼好易印晒手指模，又唔想用埋同一款式，雖然減左價仍是未能决定！

色慾都市2 Sex and the city 2

食完晏，去睇戲，果日得兩套戲上，一路有睇開Set and the city 既朋友一定會睇，入場前買左玉桂條食，(好懷念响Tokyo Disney食過既玉桂條！)呢日買既時候要等，我地入場先，佢哋會攞去我個位比我，送到來既玉桂條熱辣辣，好味道！

套戲講結左婚兩年既Carrie同Mr.Big既生活，開始有d意見分歧，Carrie仍enjoy像拍拖時的生活，而Mr.Big開始像好多已婚男仕一樣，開始想多留在家，多吃住家飯，甚至想一星期兩天自己的時間，讓Carrie回舊居住兩天，給大家有自己的空間，與此同時，Samantha得到免費去中東遊玩的機會，四個老友，一同享受，一同冒險...........!

我覺得呢隻比上一集好睇，Samantha因更年期變化帶來不少笑話，Carrie同Mr.Big既關係，就好似發生在你我他身上的問題一樣。

小南國

要幾日先入到一次自己個blog，好麻煩！

上個星期去左銅鑼灣，Times門口有大形足球擺設，迎接World cup (依家當然開左波！)果日落雨，地下都濕，影左幾張相就去食晏，上左Times果間小南國，之前去過Mega box果間，呢間感覺差左，我地叫左花茶飲，呢種花茶之前去上海買過比媽媽，個waitress話人手做？？我以為係原朶整出黎tim！

我地叫左小籠包，义子燒餅，三文魚馬蘭頭(食到成口菜！)醉雞，味道普普通通，早知去金滿庭啦！不過杯茶都唔錯！