深圳一日遊

相約好友一齊又返大陸，今次去落馬洲過境，第一次喺呢邊過關，過咗關之後，喺福田口岸站集合，然後一齊搭深圳地鐵去一個叫做紅山嘅站，由呢度搭過去要10個站，第一次搭深圳嘅地鐵，用香港Alipay都可以掃碼搭地鐵！呢度嘅地鐵係要用X光機掃描你嘅包包/行李先可以入閘！

去到紅山站，去一個叫做紅山6979 嘅地方，呢度有一個商場，叫做微醺廣場，我哋去咗一間叫做客家本色嘅飯店食飯，好友用美團app買咗個套餐，套餐有客家手撕鹹雞、梅菜扣肉、茄子、釀豆腐、炒菜心、燉湯，份量啱啱好！人均都係60幾蚊！手撕雞唔算好鹹，啱食，菜心就好甜！👍🏻

食飽飽再行吓個商場，去咗一間叫做俄羅斯國家館，主要係賣一D俄羅斯嘅食品，有朱古力、蜜糖、烈酒等等，我就買咗兩排朱古力試吓，味道唔算特別好，不過不失！

跟住我哋搭的士去咗一個叫做荷蘭花卉小鎮嘅地方，睇網上介紹呢度應該有鬱金香🌷同埋風車，去到只係見到風車，一朵鬱金香都冇😅，唔知係咪唔啱季節，呢度主要係賣花，就好似香港嘅花墟咁，亦都有少量雀鳥🦜和兔仔🐇售賣！我哋行咗一陣就坐低飲杯手搖，然後繼續下一個行程，我哋行去搵地鐵站，一路都搵唔到，最後選擇搭的士，其實我哋四個人搭的士係最抵，不過好友話驚塞車，呢一程的士坐咗好耐，期間因為接到公司有突發事件，有同事受傷 🙁 所以冇留意路面有D乜嘢睇🤦🏻‍♀️

去到一個叫做海上世界嘅地方，就好似香港嘅黃埔咁，有隻船做地標，我哋一到步見到係船前面一個廣場，有啲市集feel，我哋買咗茅台雪糕食，價錢一D都唔平，做咗優惠之後平均一杯都要50幾蚊！同食晏差唔多價錢！我哋坐喺船旁邊嘅樓梯食，食食吓有個女仔埋嚟Sell清潔用品，仲幫好友抹鞋，所以佢都買咗支返去試吓！我相信淘寶會平好多🤭

我哋揀定咗去一間食肆晚餐，攞位之前我哋去咗附近超市買啤酒，因為好想飲原漿啤酒，所以買咗一罐上去飲，今次去呢間叫做79號漁船，好友在網上睇過呢間係任食海鮮，不過呢間分店就冇任食海鮮，而係按重量計算海鮮，海鮮嘅選擇都好多，我哋就冇揀自選海鮮，而係揀咗個套餐，人均都係百幾蚊，套餐有百香果鮑魚、燒蝦串、蒸蠔、東風螺、蒸魚、炒飯、炒菜、蠔仔蛋餅、炸白飯魚、水果拼盤、飲品一jug，自攜飲品不用另加收費，我哋另外加咗個海蜇頭，食到非常之飽！我哋坐嘅位置係室外位，原本想話坐最出，想睇吓佢嘅水上匯演，但係最出嘅座位已經full咗，所以坐入一排，都叫做睇到，但係我哋全程冇乜點睇，因為顧住食同傾偈😂😂

食飽飯在附近影吓相就走，搭地鐵去福田口岸，要搭10幾個站，同埋要轉車😅搭咗成個鐘先返到去福田口岸，跟住過關落馬洲，就各自搭車返屋企！全日使費三百幾蚊，喺香港真係做唔到，難怪咁多人北上消費，不過對於我哋住港島及九龍嘅人嚟講，車程比較遠，都未必會經常上去！

 

Komeda’s coffee コメダ珈琲 (香港）

平時去日本都會去呢間 Komeda’s coffee ，分店多，咖啡都唔錯，又好坐，價錢唔貴，同埋最鐘意買佢花生豆豆做手信！

之前見到 The One 地庫 Aeon 開左呢間店，當日因為食飽左冇幫襯，早兩星期想去試吓又要等位，今日早左起身，就去試吓！

去到就有位，呢度有三個面壁位，啱晒一個人嚟！ 呢度掃 QR code 落單，終於有中文餐牌睇😂😂 叫左拿破倫意粉追加塊多士，本身意粉有塊法包，追加嘅係方包，方包可配牛油或果醬，如果要晒兩樣要另計$10 😅 咖啡要左大杯裝嘅豆乳咖啡，每杯咖啡都跟一小包花生豆豆 (11:00 後才有) 😅 意粉份量唔多，跟左沙律菜，法包🥖對我嚟講好硬 🤣 方包好味又鬆軟！咖啡不過不失。不過總覺得日本的豆乳或燕麥奶味道唔太好！ 

食鉋睇吓門口有咩賣，有方包，花生豆豆、盲盒，咖啡豆、杯等等，我原本想買方包，但份量太多！(好似有6片) 花生豆豆留返去日本買，呢度太貴了！🤣🤣

 

香港花卉展覽2024

一年一度的花卉展覽又嚟，上星期五已經開始左，但因為冇假放，要遲左一星期，今日先入去影相！今朝先去睇醫生，再去中環歌賦街果間座銀，食碗雞白湯拉麵，幾鐘意佢D餸幾好味，可惜湯都係唔及篝！然後先過去維園！

今年主題花係香彩雀，平時唔係好聽到呢隻花嘅名！今年擺設都好靚，天氣都幾好，不過一年比一年多人！影到人嘅機會大好多，今年埸內有幾棵樱花🌸🌸，而且開得幾茂盛！今年個鬱金香花海 🌷🌷🌷，亦都較往年豐富，而今年嘅品種亦都係比較大朵，顏色亦多左！靚！近天后果邊有個用花砌出嚟嘅粵劇花旦頭，青B B咁，感覺怪怪，好似第一次見渣打一百蚊紙上面個花旦樣咁，再詭異一D😅😅

又過去太陽花田🌻🌻果邊影吓相，好多太陽花🌻都低晒頭！工人都努力換花！今年影相比往年少！可能太多人，又熱又口乾，冇乜mood 影！