Dog house & Vesper

睇完戲，去尖東食飯，去左尖東海濱呢間 Dog house，呢度之前來過一次，全露天坐位，有 live band 比較嘈，我地叫左一個牛扒，一個 pizza，但係大家都唔想飲野，所以只叫了一支水，牛扒頗大塊，但味道很淡，同午餐果塊牛扒相差好遠！pizza就幾好味，加左水牛芝士，大量芝士係好味D，今晚唔熱，仲有D凉，坐室外都舒服！live band 的女歌手唱Whitney Houston 的 I will always love you，讓大家屏息以待，結果她唱到高音位，全場報以掌
聲！

食完野行返去諾士佛臺飲野，上左一間叫 Vesper的酒吧，門口的侍應説要最低消費要$1000，我地三多人，最多二、三百消費，$1000大高了，便走了，等電梯時他又説不需要最低消費，雖然今晚好多間 bar 都好爆場，但係都有位，我地入去見到仲有幾張吉枱，呢度又桌球、掟標等，我地淨坐飲野，不過呢度頗嘈，我傾唔到計，我地叫左三杯 cocktail ，影相時把好友的糭也放出來影，好攪笑！

加勒比海盜 - 惡靈啟航 Pirates of the Caribbean - Dead men tell no tales 3D IMAX

10歳的 Henry 跳進海𥚃尋找他的父親 Will ，Will 的荷蘭人號此時帶著他升上海面，Will 受到詛咒，被困在荷蘭人號，Henry 說只要找到傳說中的戰㦸就能解除詛咒，但認為不可能，並叫他以後不要再找他.......長大後，Henry 在英國的戰船上工作，船長打算駛入魔鬼黑三角，Henry 知道那處有惡靈，想阻止但反被鎖在牢房，當船駛入黑三角，惡靈登船殺了所有人，剩下 Henry一人，惡靈船長 Salazar說，他每次都留一個活口，讓他將這裏發生的事流傳出去，因為如果所有人都死了，就會 dead men tell no tale ! Henry 獲救後，遇上特意來找他的 Carina，她是天文學家，但被人當作女巫，而 Henry 則被當做叛國賊，兩人被追捕時，一起尋找 Jack Sparrow，因為只他才能幫助他們尋找戰㦸........!

之前幾套魔盜王的劇情都忘記了，今次好似第一次睇咁，唔記得 Will 點解被詛咒，又唔記得佢原來同左 Elizabeth 一齊，anyway 我覺得今集都幾好睇，起我印象深好多，播完電影仲有小小預告，我冇等，因為約左人，趕住走，所以冇睇到！

Bovini & HONEYMOON dessert de avenue

今日去大坑食野，試試呢間應該唔係開左好耐的餐廳，過左午餐時間，得兩枱客，地方唔算好大，大約有廿個位，餐廳主打牛扒，餐牌只有 set lunch 選擇，我地選了 7oz 牛扒配意粉，同埋 Beef short ribs risotto ，可揀沙律或湯，湯係大蒜薯仔湯，沙律配黑醋同橄欖油，我地各叫一款，個湯好好味薯仔味好濃，先來 Risotto ，上面有好多沙律菜，早知唔使叫沙律，個 beef short ribs 好腍好好味，飯就濕左D，牛扒意粉個牛扒煎得好靚，只是牛扒 rest 得未夠，血水多了點，但肉質 juicy ，肉味濃，意粉就略為失色，對於喜歡 Al denté 的我，這意粉煮過腍了！整體食物質素好，店員非常有禮貌，頻頻加水，每次都說唔該/多謝！

食完野行返去銅鑼灣，去希慎食甜品，去左滿記，叫左榴槤甜品、parfait 同埋奇異果汁，甜品都保持水準！

Joe's Billiards and Bar

今晚約了去好友東頭邨的家吃飯，今晚打邊爐，買左海鮮，有象仔蚌、蝦、龍蝦仔、䱽魚、魚卜、當然唔少得牛頸脊，同菜菜，今次少買左丸，近期大家都比較抗拒腸仔同丸類，呢類加工食品，不過仍然有一兩個好友想食，所以只係買咗好少，仲有少少雲吞、烏冬，今次份量預算得比較好，食剩好少野，今次雖然係慶祝五月之星的生日，但係竟然冇人買蛋糕！好少食生日飯冇蛋糕錢，之後睇返D9相，都會唔記得果日係慶祝生日！

食完野，壽星公話要去酒吧飲野，我地出咗去旺角西洋菜街，呢間樓上酒吧，係周慧敏同佢個老公開既，在尖沙咀也有分店，今晚好靜，計埋我地先至得三台客，呢度有桌球、掟標等等，我地純粹傾計冇玩其他野，呢度D cocktail 味道比較淡，都飲唔出又酒味！要叫 double shot 先至有濃D酒味，唔怪得咁靜啦!

FooDo

睇完戲剛好會合好友，一起吃午餐，去了這家閞了不久的餐廳，店子在女人街內，地方細細，裝修很簡單，大約有廿多個位，餐牌選擇不多，主打自家製意粉闊麵，當然要試試！叫了自家製醃肉及日本生雞蛋闊麵，和茄汁雞塊飯（唔記得名！），午餐包埋水果冰茶，係錫蘭茶浸泡蘋果，其實是沒有冰的，我另外加了湯$12，是日餐湯是蘑菇湯，好友加了一個薯蓉沙律$8，沙律是非常細份的，細過一球雪糕，我們 share食，係咁意食小小，蘑菇湯值得一讚，好味！先來意粉，醃肉只有幾片，但意粉好味，有著人手做的粗糙質地，應該真是人手做的，而且加了生雞蛋，蛋味再提昇，好味，相對來說，飯有點失色，不過雞塊都好好味，表面微微乾了點，以$53一個set lunch 確是物超所值，而且店員態度殷勤，值得再來！


我們再加甜品，不過甜品只剩焦糖脆脆雪糕，不是蛋糕，因爲其他甜品都賣晒，都別冇他選，個焦糖脆脆太甜了，配有甜味的雲呢拿雪糕，真的太甜，可能配忌廉蛋糕會好D！

拆彈專家 Shock wave

一年前，拆彈專家章 sir，做臥底一直跟隨火爆製造炸彈，一直得到火爆信任，比親弟更信任，在一次爆竊金庫的行動中，眼見同袍快被炸死，唯有身份敗露，雖然能拘捕了火爆親弟，但被火爆逃脫，警方亦有不少傷亡！一年後，火爆在金三角，招兵買馬，為了救走親弟，策劃了一場騎劫紅隧的勒索......!

今日屋企停水停電，雖然今日天氣清凉，可以唔開風扇，但係冇電就好多野都做唔到！唯有一早走出街，約了好友午餐，仲有幾個鐘，去睇返場早場消磨時間先！印象中沒有睇過早場，見拆彈專家未落畫，時間又啱啱好，就去睇呢套！先去 Starbucks 食個早餐，成個星期都冇乜食過野，食左個包飲杯豆奶，坐在室外，涼涼地幾舒服！

異形、聖約 Alien、Covenant (2D Atoms)

聖約號太空船載著二千多人，在太空尋找新的星球作為殖民地，他們接收到一個星球發出的音樂聲，知道那個星球有人類，於是他們派出一隻飛船着陸，監察一下當地情況，艦長和幾個成員及人造人Walter ，一同着陸，着陸後不久，其中兩個船員，被一些黑色的微粒入侵身體，原來這些微粒是異形，當兩人發作時，異形從他們的身體爆發出來，正當他們與異形在搏鬥的時候，突然出現了一個人，把他們帶到安全的地方，而這個人其實是人造人David，亦即是 Walter 前幾代的人做人，他們發現這裡曾經有飛船到此，發現當地有一些人類的遺體，後來得知 David 和普羅米修斯的唯一生還者 Elizabeth 一同來到這𥚃，其後 Elizabeth 死去，David 便留在這𥚃，因為他不是人類，所以不受異形襲擊，在他們等候聖約號來接他們時，他們逐一被異形襲擊......!

見到係列尼史葛導演，對上的火星任務不錯，普羅米修斯麻麻地，第一集異形後冇來者，再食老本拍返異形，絕對讓人期待，電影不在旺季上畫，已打了折扣，配上我喜歡也是他喜歡的 Michael Fassbender ，雖然一人分飾兩代人造人，從說話語氣已分別到兩者，可惜劇情有點冗長，異形的部分也沒有刺激的場面，尾場與異形對决也顯得有點馬虎！

二家姐正宗麻辣火鍋

都有一段時間冇去渡船角食野，今日相約一班好友去食火鍋，對上一次來渡船角也是跟同一班朋友食火鍋，都有好幾年時間了，訂咗枱去到都要等位，因為店內地方比較細，位亦都唔算多，等左半個鐘左右，就有位啦，佢D枱係二人或四人枱，因為用gas 爐，可以隨意合併D枱，我哋原本有七個人，但係其中一個病咗，得返六個人，佢都比張八人枱我哋，枱底有個籃比人放袋，都幾細心，我哋叫咗兩個湯底，一個係麻辣小辣，另一個係黃酒雞窩，食物方面選擇都頗多，當然唔少得叫牛肉啦，我哋叫咗牛頸脊、一條桂花魚、脆肉魚腩、響鈴、黑毛豬午餐肉、墨魚滑、冰豆腐、鴨血等等，除左火鍋料，亦有四川小食，叫左拍青瓜同皮蛋，青瓜送來時，另外來了一碟白色條狀的東西，以為係小時食，個樣似淮山，夾起來滑潺潺，吃起來又不像淮山，一問之下，原來是薯粉！是要煮的！幸好吃了沒有肚痛！

麻辣湯底看似很辣，其實一點也不辣，平時甚少吃午餐肉，這個卻很好味，這裡的食物質素好，店員友善又殷勤，值錢合理，可以再來！