慢煮韓牛

又玩慢煮，之前試左兩款唔同的牛扒，今次一試我最喜歡的韓牛！

先放鹽同黑椒在牛扒上，今次加多條 rosemary ! Set 左 55度，煮一小時，完成後，每邊煎45秒，完成！

韓牛的肉味確實濃好多！不過個人認為韓牛和日本牛都是雪花牛肉，油脂較多，較適合燒烤、煎或焗，能夠迫出油脂，吃起來沒有那麼油膩，用慢煮的方法雖然能保持肉質及平均的生熟程度，但油脂沒有流失，吃起來很油膩，吃時見到肥瘦相間，只吃了三分一塊，就像吃了一塊般飽滯！

IMAX 星聲夢裡人 La la land

Mia 在片場的咖啡店工作，她的夢想是做一個演員，她經常參與試鏡，可惜從未成功......Sebastian  是鋼琴家，他熱愛爵士音樂，收藏了一些有關爵士樂的物品，希望有天留夠有自己的一間 club ....... 一天， Mia 路過一間餐廳，被 Sebastian 的琴聲吸引，可惜他因為沒有跟餐廳經理的吩附，只彈奏聖誕歌，又再彈奏了自己喜歡的爵士音樂而被炒，Mia 原本想稱讚他，但他沒有理睬她。在另一天兩人再次相遇，在月色下共舞之後，改變了對大家的睇法。Sebastian 到 Mia 工作的地方找她，兩人談起各自的夢想，兩人惺惺相惜，成為情侶........

呢套戲一共有十四項奧斯卡提名，包括最佳電影、最佳男主角、最佳女主角、最佳導演、最佳原著劇本、最佳剪接、最佳服裝設計、最佳美術設計、最佳混音、最佳音效剪接、最佳電影配樂、最佳電影歌曲（兩首）、最佳攝影，令人非常期待，不過個人認為，不要對劇情抱太大期望，除非本身很喜歡歌舞電影，能夠有多項提名的電影，一般都不是商業電影，不能以娛樂的心態去看，套戲其實拍得好好，但不是絕無冷場果種，套戲成128分鐘，頭段有小小靜，要慢慢欣賞，中段打後會較精彩，一路睇都有D共嗚，夢想與現實，有誰沒有過這種無奈？個人認為套戲攝影果 part 最好，女主角因為在戲中要試鏡，有好多發揮機會，戲入面有兩首歌我幾鐘意，包括已獲提名的 City of star。

2017 開年飯 - 好彩

大年初二，又去飲茶團拜，呢幾年都係飲茶團拜代替上門拜年，大家都講買咗D食物放全盒，只係招呼人客食咗少少，剩返都係要自己食埋，出來團拜就唔使再買野放全盒喇！

去飲茶之前，買左盒水果做禮！次次揀去尖東好彩，貪佢少D人，細妹早少少去攞咗位，我地去到就已經有位，叫左點心為主，呢度D點心都幾多選擇，味道都OK，甜品好細份，都啱嘅，食小小就夠，今日姊妹買了曲奇餅給我們，我唔係太喜好曲奇餅，不過放在公司，用來充飢都好！飲完茶去睇戲喇！

2017 開年飯 - 潮館

大年初一團拜，周圍都冇位，去左位置較辟的荃新天地，呢度先有位！雖然位置比較平，但係朋友都住東涌、屯門、荃灣，都方便佢地返屋企！

呢度食潮州野，又點少得要食蠔餅呢！仲有我鐘意食的糯米飯，其餘都係叫D小菜，個蠔餅D蠔小得可憐，兩塊蠔餅切開八件，每件得一隻蠔仔！！其他野好一般，而且得兩、三個侍應，真係招呼唔到！

季季紅有米豬

又到年三十食團年飯，一如以往去姊姊的家食飯，今次在季季紅訂了有米豬，隻豬比預期細隻，大家夾手夾腳剪開隻豬，有鉸剪比埋，又有張紙教你點剪，有埋 QR code 去睇片，好細心，加埋其他餸，好豐富！隻豬的皮冇乜肥膏，D皮唔同燒味果D乳豬，有點硬，不易咬開，可能外賣包在錫紙盒內，有倒汗水，令D皮唔脆，至於D肉又幾厚喎！味道唔錯！

食完飯，去左花墟買花，超多人！花墟就真係只賣花，唔同其他年宵市場有好多野賣，我目標只係買花，行左一陣匆匆買左束百合花就走！

Moana 魔海奇緣

幾千年前，Te Fiti 女神將自己化成土地，讓萬物生長，但她的心被茂宜偷走了，土地開始枯萎，一直申延全世界，只有找到茂宜，將女神的心交回，才能拯救世界.......在珊瑚島的慕安娜，自小被大海選中，但她的爸爸擔心她有危險，一直不讓他出海，但她的嫲嫲卻鼓勵她做自己想做的事，更讓她知道家族的歷史，她鼓起勇氣衝出大海，帶著女神的心，尋找茂宜......!

新年檔期有好多套戲都想睇，原本想睇星聲夢𥚃人，但係即場買唔到飛，諗住睇呢套 Moana 英文版，又買唔到飛，只有中文版，我睇戲比較喜歡睇原裝版本，就算聽唔明，都覺得原裝傳神D，而且呢套戲男主角茂宜的造型, 令我即時想起 Dwayne Johnson，翻查資料，見到英文版配音正正就是 Dwayne Johnson呢 ！

亞龍咖喱

今日去佐敦攞介子，跟住去搵食，好耐冇去裕華國貨後面呢邊，上次去牛屋，在寶靈街那邊，今次去呢邊睇睇有乜食，呢邊改變左好多，不過仍然好熱鬧，行左一圈，唔知食乜，諗起好多年前食過的亞龍咖喱，舊地重遊，經過見到有位，入去試下先！

店子細細，坐位唔多，始終舊式食店，坐位比較迫，餐牌一目了然，叫了咖喱牛腩配薄餅，咖喱有好多我諗係洋蔥碎，牛腩唔夠腍，隻碟好細碟，不過牛腩都唔算少，味道唔錯，我叫少辣，所以唔係咁辣，薄餅之後先上，熱辣辣，正！任何包點類都係熱辣辣最好食！想叫多件薄餅，但係食多兩舊牛腩又飽飽地，所以冇叫到！下次再出來試下其他食店先！

慢煮乾熟成安格斯牛扒

又玩 slow cook ，今次買左塊 dry aged，見價錢平，預期唔會好好質素，不過即管試下！

開左慢煮棒，set 左55度，一個鐘，pre heat 需時，開左機之後，去整牛扒抽真空，上次個真空機吸至豉油汁，之後仲用到，不過今次唔著！！！用唔到，唯有用傳統方法，將牛扒放入真空袋，再將個袋放入水，將個袋D空氣盡量"拑"走，然後將個袋夾在煲邊！雖然唔及真空機，但已半真空！

一個鐘好快過，開爐煎牛扒，毎邊煎30-40秒，食得！切開牛扒，D肉生熟好平均，約有七成熟，好味！開支紅酒飲先！( ◠‿◠ )

IL Meglio Ristorante di Venezia

食完韓燒，去咗諾士佛台飲野，今晚好多人，間間酒吧都爆場，去到呢間 iL Meglio 剛好有張細枱，我地三個坐低飮野傾計，好友叫左 1664啤酒，冇諗過係支裝，有D失望，我叫左杯 Pina colada，另一好友叫左 Bailey's cappuccino，話係 secret recipe ，飲落完全冇酒精、冇 cappuccino 味！好似食緊朱古力咁，我果杯 Pina colada 都冇椰子味.......不過志在飲杯野傾下計，飲飲下見到舊同事，之前佢去做 part time model ，久唔久在電視廣告見到佢，今晚佢做萬寶露推廣大使，見好友的男友食煙，所以搵佢推廣一下新產品，又玩下遊戲，比左份禮物佢，佢又幫襯買包煙同登記會員！

今晚都幾凍，我地坐到成兩點先走，完全截唔到的士，呢個時候，係 Uber 出場時候，我 refer 好友安裝，但係佢裝左 app 先，整唔到優惠，要重新裝過同埋用另一個email 先得，由於時間關係，我用我個 app叫車，附近只有一架車，因爲架車在天文台道，過返來要等佢兜個大圈先來，我建議行過去，因為諾士佛台同天文台道好近，唔使等咁耐，好友的男友不知道是我提議的，知道要行個去，就有D不滿，認為call車應該架車駛到面前，佢話如果個司機要佢行，佢實媽叉個司機(*´-`)，我話其實係我提議的，如果唔想行，我打比司機叫佢駛過來，佢先話唔使，講笑啫！今晚係架 Audi，一上車，司機話唔好意思，要你地行，唔係個個客好似你地咁好，肯行多兩步，遷就一下方便大家....我同好友狂笑，個司機好似話緊好友男友！

其實，我覺得，做人既野，大家就下，一家便宜兩家着，又有乜所謂，我覺得呢個世界，有得必有失，有失亦必有得，唔使成日計較住，成日要搵著數，好似我朋友咁，成日搵到著數，又鐘意投訴攞著數，佢個仔成日病，有時突然又要入院，好在次次都無大礙，有時我諗，比人搵下小小笨，好過搵人著數，得不償失！

炑八韓烤

原本好友約19/1 食團年飯，但人唔齊，我諗住約其中一個19/1 可以出席的好友，兩個人食飯，點知佢見飯局唔成事，約了其他人，但係今晚就可以，所以改今晚去，佢男友知道，又話要來，咁啱另一好友又話食飯，令本來19/1唔成事，變左20/1，相請不如偶遇！

好友兩公婆帶埋兩個仔去 AIA 嘉年華，在中環 join 埋我一齊去尖沙咀，而另一 pair 好友要遲一點才到，我地去搵位先，去殿大喜屋，嘩！爆晒場，去附近極上都爆場！同好友去赫德道另一家叫伊賀的，又爆場！年尾流流，又星期五晚，周圍都好多人，上網 search下，睇下食評，同好友在尖沙咀折騰一番，都搵唔到野食！而另一 pair 又遲遲未到，在尖沙咀兜轉了近兩小時，好友才到，又想不到吃甚麼，求期見到有韓燒，上去試下！去到都要等，店員俾咗兩張枱我地，雖然只是在旁邊，但感覺像分開坐，大家唔想再行喇，所以就算啦！只係相隔一尺左右啫！

店員推介三至四人套餐，韓牛肩胛肉、護心肉、甕醃韓牛五花肉、厚切五花腩、LA牛骨、大八爪魚、蝦、魷魚泡菜煎餅，我地另外叫左醬油蟹、鰻魚、牛舌、熟豬肉，仲有石頭飯同海鮮鍋，個個都眼闊肚窄，加上好肚餓（佢地），係咁叫野食！我今日忙到5:00先食 lunch，所以唔餓，佢地飢腸轆轆，我冇阻止佢地叫野食！先來芝士粟米同埋泡菜蛋在爐邊，咁邪惡的組合我冇諗住食，不過好友夾左D比我，我先食小小，最快上的當然是醬油蟹，仲跟左一碗湯同一碗飯，好友們第一次吃，佢地話好正，我覺得ok，我上次吃過的更好！肉類方面，牛舌同韓牛肩胛肉都好味，牛舌超厚的，我地分兩個爐燒，有一個燒得過火，好韌，而另一個燒得剛剛好，好味好多！我諗起頭先睇其他食店的食評，有人話D烤肉好韌，我諗係自己燒得好唔好都好大分別，除非係燒好比你，如果自己燒，就自己功力都好有分別！

大家搶攻一輪，都好飽，呢個時候，店員問海鮮鍋上得未？！！忘記左仲有海鮮鍋！都要夾硬頂埋佢，佢哋又食咗芝士又食咗咁多肉，比我更加飽，但係我太遲食午餐，真係食唔落，個海鮮鍋仲有跟一大個麵餅，反而可以食晒D麵！飽到不行了！

食完飯，幫好友兩公婆同小朋友截的士，送咗佢地上車我哋再去飲野！