全日雞實驗所

今日出旺角，經過朗豪坊，見到戲院已經改咗做百老匯戲院旗下嘅 gala cinema ，跟住行去西洋菜街攪電話續約，撞到好友Rainbow，約佢下次一齊食晏，跟住自己行咗去女人街，因為記得睇過一個報道關於一間食雞嘅食店，所以想去試吓，呢間食店標榜係溫泉雞，另外仲有桑拿瑤柱肉餅，兩樣都想食，所以揀咗一個溫泉雞髀套餐，配蔥油干撈麵，另外加一件肉餅，肉餅可以選擇加一件或者三件，我覺得三件太多，所以揀一件試吓，食物睇落都靚，雞肉都好滑，而且起晒骨，啖啖肉好好食，套餐跟咗個湯同埋一小碟青瓜，肉餅又唔算好特別，不過味道都OK，撈麵都好食，麵條都幾彈，以價錢嚟講真係好抵食，下次一於約好友嚟呢度食👍🏻

 

農耕記。湖南土菜(將軍澳)

前兩日同好友食完牛角，今日又約我食lunch，不過今日得我地兩個，另一好友要湊女，我地兩個去左呢間在國內和香港都有分店的食店，將軍澳這間是新開的，雖然是星期六，但不用等位，睇吓餐牌，食物選擇算多，呢類國內食店，主打小炒，我哋叫左鮮炒黃牛肉、本來想叫土雞但售罄，改變了砂鍋煨豬腳、一份炒勝瓜，兩大杯鴨屎香檸茶，炒黃牛味道不錯，肉略為炒老了一點，而且份量少，豬腳也夠稔，味道不錯，檸茶好大杯，夠凍👍🏻

 

牛角

今日忙咗成日，朝早中環睇醫生，跟住去飲咖啡，然後去食點心放題，再去睇戲，跟住去睇公司嘅籃球比賽，再同好友食燒肉！

好耐之前都食過牛角，都有一段時間冇食，我多數只會在日本食燒肉😅，因為約咗一個間時見吓面及一個幾年冇見嘅朋友，所以大家揀咗個坐得舒服啲嘅地方，叫咗個信用卡優惠套餐，有幾款肉，再加多少少嘢食，燒肉嘅質素不過不失，主要都係想大家聚下傾吓偈，多數講吓好耐冇見嘅好友果女，今年已經10歲，我只係佢滿月嘅時候見過佢一次，之後冇見過佢真人，下次真係要帶埋出嚟見吓！

 

死侍與狼人 Deadpool & Wolverine

自從死侍六年前被拒絕加入Avengers 後，轉行做二手車銷售員，在死侍生日當天，Paradox 派人捉走了死侍，並邀請他加入616號宇宙。死侍穿回戰鬥服，但Paradix 透露，狼人在10005宇宙正在慢慢步向滅亡。因時變局改變了政策，不再主動刪除時間線，因此他打算加快這個宇宙滅亡。死侍偷走了他的「時間平板」，死侍穿越多元宇宙尋找的狼人，在遇到不同的狼人的變異因子後，死侍把酒吧裏飲酒的狼人帶回時變局，這個狼人是整個多元宇宙中最差的狼人，Paradox 隨即把他倆刪除入去”虛無”。在虛無，兩人再被送到Professor X 的妹妹Nova 面前。Nova入侵死侍心靈讓他認為自己沒什麼用。死侍試圖和狼人一同擊敗Nova，但失敗了。虛無中的怪物”玉衡”接着出現，看着玉衡漸漸逼近，死侍和狼人要在玉衡吞噬他們之前逃脫。。。。

之前在海運大廈影咗巨型死侍，今日就去睇呢套戲，今日都頗多人，可能因為同戲院做Event，周圍都係呢套戲嘅佈置，好多打卡位，套戲都幾好睇，死侍一如以往爛口兼口臭，有唔少對白係挖苦迪士尼，Fox 又不忘自嘲一下，都幾好笑😂

 

Chart、潮藝館

連續幾個星期放假都返大陸或者澳門，終於今日可以留喺香港，早上先去睇醫生，睇完醫生喺中環街市有間叫做 Chart 嘅Coffee shop，見佢擺咗幾個咖啡師獎牌，所以買咗杯咖啡試吓，另外買咗一個提子scone， 咖啡幾好飲， scone 就冇提供牛油或者果jam，雖然plain 一點但味道不錯👍🏻

跟住去尖沙咀食個lunch，去咗呢間食潮州菜，午市時間有點心放題，頭盤三選一，我地揀左椒麻糖心帶子配欖菜焗虎蝦，點心及小食選擇唔算好多，有17款，我地叫左一款小食同幾款點心，主食就揀咗安格斯牛鬆炒飯，始終中式食品比較飽肚，所以我哋都唔係叫咗好多嘢食，食物質素唔錯，食到好飽，再叫埋糖水，超飽！

 

自駕過關澳門遊

連續幾個星期放假都北上南下，今日澳門遊，第一次坐朋友車，自己揸車過澳門，今次我哋一行五人，好友帶埋佢媽媽一齊去澳門，我哋約咗喺沙田等，跟住直接揸車過去人工島，過關之前有個停車位俾人去廁所，去完廁所就停一個好似收費亭咁嘅位置，全車人嘅身份證俾晒關員，逐張對樣，全程唔使落車，跟住應該過X光機，因為要停低架車幾秒，先至俾我哋過，揸車過咗關之後，要喺澳門嘅關口停車場度泊低架車，又停車場上返嚟就係平時金巴落車嘅位置，跟住就過澳門嘅關，今次我搞埋自助過關嘅手續，但係過關嘅時候有排錯隊，又去咗人工檢查嗰條龍😅 唯有回程先至用自助過關🤣

過完關出嚟就call車，直接去酒店放低佢哋D行李，因為今次我哋五個人有兩個唔過夜，其餘三個book咗酒店，所以佢哋有行李，今次book 咗新濠影滙後面果間 W hotel ，去到酒店接待處，都頗多人等登記，等候區都坐滿晒人，佢哋都搞咗好耐，因為check-in時間係下晝三點，我哋未夠鐘，所以只係寄存行李，都搞咗十幾分鐘，放低行李之後就call車去官也街，今次又去食譚家魚翅，我地叫左兩位魚翅、一份花膠、話梅豬手、花菇鮑魚、海參、菜，好食👍🏻

食完行去官也街買嘢飲，去咗一間爆打檸檬茶，買咗三杯鎮店招牌飲品，鴨屎香檸檬茶、多肉葡萄、陳皮鴨，都幾好飲，一路飲一路行去輕軌站，搭車過去倫敦人，落咗車之後，可能行錯路，行咗好遠，幾乎行返去頭先個站咁滯，先至搵到個入口🤦🏻‍♀️ 跟住過去倫敦人影吓相，又去賭場行咗個圈，然後再去返 W hotel ，因為想放低好友嘅媽媽喺酒店休息，所以返酒店攞咗房先，佢哋book咗兩間房，但係話未執完房，只能夠比一間房先，所以我哋一齊上去佢間房度睇吓，房間個view幾靚，房內設計都唔錯，一坐低大家都唔想郁😅 喺房度Hea咗一陣先至出去，先去酒店嘅餐廳訂咗位先，因為今晚要在酒店食buffet !

其實我哋都冇咩地方好去，原先想話去玩VR，去到又覺得麻麻哋，跟住就改咗去大三巴，因為上次喺果邊嘅手信街，在其中一間手信店內飲過一杯咖啡好好飲，所以今次特登再去，去到先發覺佢哋已經冇賣咖啡，只有樽裝飲品，但係見到D設備都仲喺度，店員話因為師傅轉咗人，要遲啲先有咖啡賣😅唯有出去大三巴影吓相，不過今日澳門keep 住都落雨，所以我哋影咗一張相就走，跟住行咗過去新葡京，諗住睇吓有冇接駁巴士去新濠影滙，去到法國舞，的士站有排晒長龍，好在我哋call到車，就直接返去酒店！返到去攞埋另外一間房，當然都要上去參觀吓，呢間房大少少，不過個view就冇頭先嗰間咁靚 😅

今晚食buffet嘅餐廳叫做津津，酒店住客有八折優惠，呢度嘅冷盤放咗喺一間房裏面，當然個房係透明玻璃，因為係一個冷凍房，裏面主要係擺海鮮類，有生蠔、青口、龍蝦、蟹腳、壽司、沙律、芝士等等，熱葷方面都係一般嘅燒牛肉、中菜、薄餅、星馬泰菜式、粉麵等等，飲品方面就有啲特別，除咗一般嘅飲品，佢有一D係菠蘿冰、紅豆冰之類，選擇都頗多，甜品除咗一般嘅蛋糕，亦都有雪糕、糖果，食完飯之後，我同好友落去搭的士去港珠澳，佢哋就返上房，跟住我哋就搭金巴返去，再轉巴士出九龍返屋企休息！🥱

 

隴滿桂、西塔老太太

上星期去完大陸，今日又去😅今次又係四個人，約咗在落馬洲口岸等，一齊撘地鐵去會展中心站，去福田平安金融中心食 lunch ，之前第一次來呢個商場已經想食呢間隴滿桂，因為見餐廳裝修好靚，店中間有隻艇，可以在艇上進餐，見佢寫住西湖船宴，應該食杭州菜

我地被安排坐𥚃面最入果邊，𥚃面都有隻艇可以坐十人左右，睇吓餐牌，食物選擇好多，每枱必點的叫花(化)雞，只要有叫呢個菜，店員會攞一個假的叫化雞放左蕂籃內，讓人客敲打叫化雞，像敲打叫化雞嘅外層，每敲打一下都會講一句有意頭嘅說話，儀式感十足🤣 另外我地叫左一個臭豆腐、小籠包、秋葵、韭菜餅，同埋一個我都唔記得咗係咩嚟嘅菜，食物嘅味道唔錯，賣相都幾精緻，不過又係冷氣不足嘅問題，坐喺裏面都幾熱！😅

食完晏我哋call車去深業上城，喺呢個商場度搵間咖啡店飲咖啡，呢間咖啡店喺商場嘅頂樓露天area，好熱🥵 我哋去咗一間叫做See Saw嘅 coffee shop度飲咖啡，咖啡不過不失，冇乜驚喜😇 

飲完咖啡行過少少見到有間 Galleries Lafayette ，好友入去睇鞋，睇啱咗隻款，價錢比香港平，不過冇佢想要嘅白色，諗住黑色都可以，不過冇佢size，所以最後冇買到😅跟住我哋行返入去商場，先發覺原來 Galleries Lafayette 個正門原來喺下面嗰層，入到去見到有一檔賣公仔嘅，一入去見到一隻浣熊公仔，覺得好靚好鍾意，不過略為嫌佢大隻咗D，但係佢細隻size又冇咁靚，最後都係決定買隻大嘅，不過佢話得一隻存貨，而且隻存貨爭咗頂帽，佢話因為啲配飾全部人手做，頂帽仲未整完，而陳列緊果隻頂帽又甩咗粒珠，所以要另外後補寄返俾我哋，但係佢唔寄返香港，所以叫佢寄去好友在深圳嘅屋企度，遲啲先再攞返！

買完公仔再行入啲睇吓衫，見到佢做緊七折，好有睇中咗一件T恤店員話而家有至上次，基本有七折，如果買夠四件再有七折，差不多等於半價，但係好友只係睇啱咗一件，不過呢啲Offer可以同場搵其他客搭單砌夠四件就大家都有折，所以好友都買咗兩件，兩件係同款唔同色，原價在香港賣千四左右，而家同樣價錢有兩件，抵好多！

買完嘢本來想去蓮花山公園度行吓，但係出面實在太熱，我哋行咗條天橋過去之後已經想返轉頭，本來諗住行去公園嘅另一邊搭地鐵，但係見到條斜路我哋就放棄咗，行返轉頭去返商場，先去喜茶買嘢飲散熱線，飲杯凍飲真係冇咁熱，跟住就call車去返皇廷廣場，因為要去超市買嘢同埋食飯，走嘅時候方便D!

去到皇廷廣場，就直接我哋想食嗰間西塔老太太攞位，先攞咗飛，應該都有排等，所以落去盒馬超市先，因為好友想買手撕雞，佢嘅手撕雞又真係幾好食同埋幾抵食， $39一隻手撕雞，即刻成隻雞起肉再加配料撈勻入盒，好友一次過買咗六隻，跟住又買大樹菠蘿，同埋買一D包裝嘅鴨腎，話要寄去英國俾屋企人，我哋就買咗兩份水果，陣間食完飯食，買完嘢再去另一間薛記炒貨度買零食，我都買咗Nuts 同埋凍乾秋葵！

上返去餐廳睇吓有位未，上到去仲未有位，我哋坐喺外面等，等咗一陣好友去咗廁所，佢就有位喇！呢間係食韓燒嘅餐廳，座位有少少迫，冷氣又係唔多夠，今晚都座無虛席，我見好多都係本地人，我地又係經美團買咗套餐，另外加左份鱔，呢度係有店員會幫你燒，自己唔使出手，肉類質素都ok ，我地食埋生果先至走，一齊搭車返去落馬洲，再分道揚鑣！