泰仔美食

今日好友即興約食飯，晏晝約我哋今晚食，約埋喺宋王臺站等，因為我哋想食泰國菜，近排都食咗好幾轉泰國菜，今日又去試另一間未食過嘅，呢間都頗爆場，之前睇過影片介紹，話地道泰國人都鍾意去，我哋叫咗冬陰功湯、咖喱蝦配法包、生蝦刺身、飛天炒通菜、燒雞全翼、炸蝦餅、同埋串燒，生蝦刺身同雞翼好食，咖喱配蒜蓉法包亦都好好味，法包要叫多一客😆，整體嚟講呢間都好好食，不過食完返到屋企好口渴，應該係個冬陰功湯有味精，因為我哋四個人有一個冇飲湯，佢就冇口渴，其餘三個人返到去屋企都要狂飲水，所以應該係個冬陰功湯有味精，下次唔好叫冬陰功湯🤣

 

品味 BÁNH MÌ NẾM

今日去中環睇醫生，早咗去到中環，得半個鐘頭時間又唔食得啲乜嘢，諗起附近有間越南法包頗出名，就去試一試佢，店入面只有一個人在食嘢，因為佢主要做外賣，只有一張細嘅圓枱，俾人企喺度食，我見人哋入嚟都係買外賣多，我因為要去睇醫生，所以喺度食埋先走，揀咗燒雞法包，都要等啲時間，因為佢落完單即刻整，又要焗返熱佢，然後再加返啲唔熱嘅餡料同配菜，個包睇落好似好大個，不過佢都好鬆軟，但係外皮就好脆，而且多芫荽，好食，我只係嫌佢裏面有啲醬，略為鹹咗少少，食落好似鹹牛肉醬咁，另外叫咗杯檸檬梳打，食飽就走了！

 

金苑酒家

今晚約咗好友去旺角食飯，印象中冇嚟過呢間，一出𨋢見到假嘅12獸首，都幾有誠意，今晚都幾旺場，見到佢有啲套餐都幾抵食，我哋叫咗個片皮鴨加龍蝦伊麵，片皮鴨就麻麻哋，嚴格嚟講佢唔係片皮，因為啲肉都切到好厚，不過佢兩食都幾抵，龍蝦伊麵亦都不過不失，我哋另外叫咗黑椒茄子牛仔骨、上湯浸勝瓜，份量都幾大，我哋四個人都食唔晒，成晚大家喺度吐苦水，喺工作上面嘅唔開心，對公司嘅不滿，志在宣洩一下情緒，我自己就冇乜所謂，雖然都有啲唔滿意嘅地方，不過都習慣咗，打工嘅嘢，永遠都有兩個選擇，做到唔做，睇你自己點揀！

 

金不換 / F1 The Movie F1 電影

Sonny Hayes 是賽車手，年輕時曾是F1賽車手，他的F1生涯因93年一場嚴重事故而停下來，之後，他染上賭癮，歷了三次婚姻失敗。他的𡚒車隊隊友Ruben，他是APXGP F1車隊老闆，希望Sonny 能加入他的車隊，因他的車隊在F1賽事中排名已經墊底，投資者威脅稱，若車隊不能在今季贏得一場賽事，便會車隊出售，Sonny 先要試駕車隊的賽車，得到認可後正式成為他們車手，而他的拍檔是個年輕小伙子，對他不太尊重，兩人亦有不少磨擦…..！

上咗畫成兩個月先至得閒去睇，咁啱今晚約咗人食飯未夠鐘，而佢又未落畫所以去睇，個人覺得個節奏有少少慢，比賽嘅過程都好緊張，不過中間有啲位都有少少悶，整體都幾好睇😆

睇戲之前去咗海運大廈食泰國嘢，見佢午餐都幾抵食，一個冬陰功湯河加柚子沙律，加埋嘢飲都係百零蚊，而海運大廈嚟講都算好抵食，而且服務都好好👍🏻 搵日嚟試吓晚餐先得👍🏻

 

泰屋

前幾日即興約食飯，就約咗今晚，出去旺角食，早兩個禮拜先去過呢座大廈食越南嘢，今日就去佢樓上食泰國菜，好彩我哋訂咗位，因為都爆曬場，我哋叫咗鳳爪、魷魚鬚同埋豬頸肉食住先，因為好友嘅女朋友未到，我哋吹住水，人齊嘅時候就叫咗生蝦刺身、冬陰功湯、沙嗲串燒、生菜包、炒芥蘭、燒魚、豬手、甜品拼盤，除咗個湯之外，其他都唔錯，個湯唔夠辣，個魚就好好食，因為好友最近失業，所以約出嚟傾吓偈，睇吓有冇乜嘢好路數可以介紹俾佢，不過佢唔使返工嘅期間都好忙，所以佢可能遲啲先至再去搵工，本來想話一齊去旅行，可惜夾唔到時間🥹

 

鬼滅の刃無限城編 (第一章猗窩座再襲) Demon Slayer : Infinity Castle

鬼殺隊成員都跌入了無限城，各隊員在無限城內不同的地方分別與不同的鬼對打，蝴蝶忍對戰上弦二，而炭治郎與富岡義勇合力與上弦三猗窩座對戰，花了很長時間，兩人筋疲力盡，在對戰過程中，上弦二和三都分別記起變成鬼之前的往事……！

都好耐冇去睇戲，因為實在好忙碌，呢套係很期待的電影，所以第一日上畫就即刻去睇，買飛仲送咗Postcard，知道有啲戲院係送folder，套戲會分開三部曲，今集係第一章，片長155分鐘，可以話係絕冇冷場，多場打鬥，當然都唔少得好多感動位，我覺得應該要睇IMAX版本，當然4DX應該更加精彩，不過相信搖晃程度都好高，未必嗰個人頂得順😅我諗IMAX都已經好夠震撼，不過我趕住睇，所以只係買咗普通2D版🫢如果有時間可能會再睇多次IMAX版本！

 

雍雅

今日約埋朋友去食私房菜，喺觀塘嘅工廈，今晚得我哋一枱客，所以好寧靜，都有啲唔好意思，因為我哋只有幾個人，要人哋特登招呼我哋 😅

餐牌一早寫咗，主要都係食一啲海鮮，餐單有避風塘炒海中蝦、蒜蓉粉絲蒸扇貝、羔蟹蒸肉餅、豉椒炒聖子皇、蒸馬友、姜葱霸王雞、椒鹽鮮魷、菠蘿咕嚕肉、姜葱龍蝦炆伊麵、蒜蓉炒菜芯、甜品芝麻卷和西米糕，海鮮都好新鮮，蟶子又好大隻，雖然兩條馬友唔係好大條，但係有兩條，仲要兩條唔同做法，一條係豉汁蒸，一條係梅菜蒸，兩條都好食，雞翼都好嫩，又大隻，菠蘿咕嚕肉係啖啖肉，平時出邊食係炸漿好厚，呢度係相反，舊肉好厚，炸漿好薄，菠蘿亦都係新鮮菠蘿，仲有白飯任裝，我哋自己買咗支白酒，佢亦都冇收開瓶費，老闆娘都好好傾，呢度嘅裝飾擺咗好多公仔，而我哋入嚟食飯嘅時候佢都會落咗閘，因為做唔到其他客，冇準備食材比其他客，所以一定係要預先book枱，整體嚟講都好唔錯，好有亦都諗定同公司啲同事嚟呢度食團年飯，我諗佢大概可以坐到四張大枱左右，即係大約50人左右都可以容納到，如果小型公司嘅聚會都好適合，如果人少嘅話可能要同其他人一齊喺一個空間就會比較嘈啲！同埋佢10:30就收，都唔可以坐得太夜，下次我哋又可以再嚟食過！👍🏻

 

南越南餐廳

今日又約咗人出旺角，晏晝自己出咗旺角食啲嘢先，去咗越南餐廳度食嘢，去到一個客都冇😅又包場，我記得對上一次嚟呢間舖，佢係食魚麵嘅，估唔到今次嚟已經轉咗手，睇過餐牌啲食物都好吸引，個別有啲仲好啱打卡，我叫咗個嫲嫲南越湯招牌金邊粉，裏面有牛肉、牛筋、牛丸、牛尾、油炸鬼，個湯都唔錯，牛肉都幾好，另外叫咗個甜品，富國島之椰子奶凍，個甜品好似藍天白雲嘅造型，下低仲有啲乾冰出晒煙，夠晒浮誇，都幾得意😄

 

無肉食

今晚約咗好友一家去旺角食素食，呢間素食店都幾旺場，因為佢價錢都唔貴，而食物嘅選擇亦都好多，同埋佢唔係以前嗰啲齋舖咁樣，買啲比較中式嘅食物，而呢度嘅食物都有中式同西式嘅食法，都幾多樣化，而且佢有埋飲品，所以都好抵食，不過佢呢度嘅枱係長形嘅枱，我哋七個人坐，就會聽唔清楚最遠嗰個講乜嘢，所以我哋有啲嘢傾一半唔傾一半😅走嗰陣時落到樓下，又雞啄唔斷😂傾多陣先走，然後約定10月一齊再返大陸食嘢😄

 

pal.

今日去南昌，呢間匿埋喺角落頭嘅咖啡店，諗住買杯咖啡飲，見到原來佢入邊有座位，當然係好少大概三四張枱，
今日想飲冇奶嘅咖啡，店員介紹creamy black ，話佢係冇奶嘅，但係睇落好似有奶，飲落去覺得係一D泡沫咁，呢度嘅咖啡都唔錯，呢度其實都有嘢食，不過今日淨係想飲杯咖啡，所以冇食嘢！