蜘蛛俠決戰千里 3D4DX Spider-Man Far from home

自 Ironman 去世後，Peter 繼續校園生活，一次學校旅行，一行人前往歐洲， Peter想向女同學MJ表白，諗住去到巴黎鐵塔再向對方表白，去到威尼斯嘅時候， Nick Fury 找上門，同時在威尼斯遇上水怪，此時卻出現了一位神秘客，幫助打敗水怪，原來他是和 Nick 一黨的，他們希望Peter幫手對付另一隻火怪，但Peter只想做個平凡的學生，街坊的蜘蛛俠，自問沒有能力做第二個 Ironman...........!

套戲都幾好睇，不過唔應該揀 4DX，因為搖晃得比較利害，而且噴水效果比較多，不過因為遷就好友近D，所以先至揀 4DX，片尾有兩個彩蛋，等左好耐先睇到，有時我都未必會睇彩蛋，因為之後都會有人講彩蛋講乜嘢，而且等左好耐先至睇果十幾秒，好嘥時間！

睇完呢同好又去咗打冷，近近地去明記，兩個人叫咗蜆、蠔仔粥、蒜蓉蒸蝦、四季豆同埋送咗一碟拼盤，個蜆份量好多仲好鹹！我地食晒D蝦同埋粥，剩返果D，好友打包返去俾哥哥食！

宇治園

今日瞓到好晏先至起身，令到今日諗住嘅行程都打亂左少少，先去剪髮，原來幫襯開嘅髮型師同佢助理都跳咗槽去第二間公司，由尖沙咀搬左去旺角，對我來講仲近左D，匆匆忙忙起身去食少少野，去咗附近Starbucks食咗個三文治，就搭車去新世紀廣場，呢間 salon 都幾新淨，明顯比尖沙咀果間少人好多，師傅話呢度會貴左幾十蚊，都冇乜所謂啦，都係多$40，今次剪剪得比較多，大概都剪短左四、五吋，呢個師傅唔知點解次次都好想我前多D！

剪完髮搭車出尖沙咀，原本行去 K11 Musea 果邊睇吓，原來個商場仲未開，只係開咗間酒店，之後去咗海運出面影吓相，呢期做緊 Toy story 4，不過今日係未 open to public，所以只能夠在外圍影吓相，影完相去商場行吓，周圍都好多人，因為週末三日長假期，加上已經開始放暑假！

行到去海港城想食杯雪糕，就去咗呢間食，見到佢原來都有麵食，所以就叫咗個麵，叫咗照燒雞扒麵配飯團，再加個抹茶芭菲，因為好肚餓，同埋行到身水身汗想食D凍野，食物嘅味道就一般啦，芭菲就幾好食，食咗咁多茶類食物，我都驚今晚瞓唔着，不過抹茶就應該冇咁濃，希望冇影響啦！

樂翠園海鮮菜館

今日公司有籃球比賽，去到總決賽嘅今日，梗係要到場打打氣啦，尤其是今年我哋嗰隊表現出色，好大機會攞到冠軍，一早去到球場，先睇咗季軍賽，然後到冠軍賽，比賽嘅過程好激烈，睇到大家都好緊張，兩隊嘅分數只係差1至5分，拉鋸左一輪，終於我地果隊以5分之差贏咗！隊員仲攞埋 MVP ，大家情緒都好高漲，因為四年前輸咗之後，成對人一直保持練習，等到今年終於吐氣揚眉，成班都好開心，老細仲請食飯添！

成班人一齊去咗附近食飯，為咗幫老細慳錢，平平哋在舊區搵咗一間小菜館，呢度全部都係舊樓，間菜館亦都好舊，在後巷𥚃面間咗一個位置，可以擺兩張大枱，啱啱好我哋可以包場坐晒呢個位置入面，成班男仔打完波，狂飲左廿幾支啤酒！老細都飲到面紅紅，我就顧住喪食，我哋叫咗燒豬手、黃金蝦、小炒王、辣酒煮花螺等等，佢哋顧住廣播，其實我都唔識，所以只有聽的份兒，不過都好開心，今次真係完全體驗到團隊精神！不過出年應該未必做得返呢個組合，因為各個人都會調去唔同嘅區分，所以未必可以再一齊組隊，所以今次真係可一未必可再了！

木衛二 鑄茶所

今日去銅鑼灣開會，開完會正值午膳時間，原本想去食D嘢，但係周圍都好多人，所以淨係買咗杯嘢飲就算，行到去渣甸街，知道呢度開咗幾間新野，其中一間係呢間茶店，其實近期開咗好多茶店，真係條條街都有幾間，因為成本低，租嘅舖位亦都唔使太大，所以好多人都投資開茶店，去到呢間店見到冇人，我叫咗杯泰戈爾冰茶，入面有檸檬同青檸，酸酸地咁都幾啱我飲，份量都幾大杯，而且多冰，一路拎住佢返公司都仲係好凍呢！

迪士尼反斗夏日 大玩水花

今日迪士尼有會員活動，但係因為我登記唔到，所以冇得玩，不過都入去行吓，今日超級熱！一入園即刻要去商店行下，因為又有節折扣優惠，不過預計都唔會點買嘢！

今日非常之多人，行左一陣已經係巡遊喇，只係睇咗一陣，因為實在太熱，跟住去咗玩Iron Man，本來想玩蟻俠，但係果邊好多人，見到依家有花朶型嘅棉花糖，係用機製嘅，咁啱有人買，睇吓個製作過程，見到果朶花做出來同樣板差好遠！

最後只係買咗少少野就走，因為又多人又熱，周圍都要排隊，食嘢又冇位，剩係得室外位，所以早D出去食飯！

Tea WG 1837

上個月在又一城見到會開 Tea WG 1837，早幾日就已經開左，今日放假，就去試下佢，一點幾見仲有好多位，原來有 event ，2:30 要交枱，雖然有D急，都應該預多左時間，可能 event 3:00 才開始吧！

門口的餐牌是全日供應的主餐牌，午餐另有餐牌，starter 係 mushroom soup ，主菜有三款選擇，我選擇了西班牙八爪魚配北海道帶子，飲品就叫了凍茶，是 Geisha blossom tea，個湯味道比較淡，跟湯嘅麵包就幾好食，麵包仲可以 refill ，八爪魚都幾大舊，伴左青豆蓉，味道都唔錯，茶既味道比較清淡唔會太濃，啱晒我飲，店員服務都好友善，下次可以再嚟試吓其他嘢食！

味一番 （山林道)

相隔一年多，再去呢間食，上次去果陣話將會搬遷去山林道，今次就係去山林道食！新店比起之前大左好多，多左幾間房仔，位置都就腳左，今晚一行九人，為左 farewell 同事！

其中一個同事和店員相熟，我們帶了兩支 720 ml 的sake 來，另外在店裡叫了兩支獺祭，一支1.8 L 一支720 ml ，合共飲左接近4L sake！食物方面，每次都係店員安排，大部分食串燒/爐端燒，刺身拼盤有金目鯛、中拖羅、帶子、海膽、牡丹蝦，好正啊！牡丹蝦頭炸左來送酒！仲有D壽司、牛肉等等，食物質素保持水準！食完野，大家傾下計，主角盡訴心中情，大家相識多年，真的依依不捨！