源興香料

飲完咖啡，經過呢間香料店，聽講呢間店已經超過一百年歷史，入到去就見到貓店長，好肥，仲帶咗Halloween煲呔，非常之可愛，亦都唔怕人，咁就梗係要幫佢影返幾張相，跟住就買少少香料，聽講肉桂有幫助降低三高嘅功效，之前睇過一份報道講，每日食0.5克就夠，對於我哋成日飲咖啡嘅人嚟講，肉桂粉加落去咖啡就最Perfect ! 而且落咁少份量，都冇乜影響味道，另外再買咗一樽咖喱醬，同埋黑胡椒，下次試吓整咖喱牛腩先！

 

晨 Sunday Morning

食完嘢喺附近搵吓coffee shop，之前book mark咗一間，去到嘅時候見佢好細間，就行去附近睇吓有冇其他，行過少少就見到呢間，店入面係冇客人，我哋就入去坐低食甜品，叫左兩杯咖啡，再加檸檬撻同埋提子scone， 兩件餅同咖啡都唔錯！

 

Pecorino

好耐之前，去上環食過一次中餐晚餐，當時見到斜對面有間餐廳裝修緊，正正就係而家要去呢間，佢係韓式fusion菜，主打係食意粉同薄餅，一入門口已經見到有人整緊意粉，證明佢嘅意粉係手工做，自從上次喺灣仔食完個好好味嘅pizza之後，都想試吓其他pizza，所以特登試吓呢間，同樣地叫咗一個 Margheria pizza，另外叫咗一個貝殼粉，今次冇特別叫飲品，因為諗住陣間去飲咖啡，食物都唔錯，當然冇上次嗰間咁好食，始終上次嗰間都攞咗米芝蓮，而且係比較正宗意大利拿玻里pizza，所以係好食D，呢間都唔差， service亦都非常好！

 

The Jungle Harmony

今晚相約一班同事去觀塘Party Room燒嘢食，我哋12個人，但係個場都好大，可以容納150人，室外嘅BBQ場，只有四個爐，佢淨係俾我哋用一個，設備都相當齊全，亦都準備咗12個人份量嘅食物，室內嘅部份有卡拉OK、PS5、桌球、波波池、賭枱等等，飲品就任飲，啤酒要另外加錢叫，我哋提前訂咗一啲啤酒，不過都飲唔晒。呢度啲食物都唔錯，走嘅時候，淨係需要將啲垃圾綁起，熄返冷氣就走得，都幾方便，下次可以考慮再嚟！

 

B&B Oyster Steakhouse

去完迪士尼出嚟，會合好友去尖沙咀食飯，我哋早咗去到，所以四條友去咗諾士佛臺飲嘢，一人飲咗一杯嘢，坐咗一個鐘左右就夠鐘，呢間餐廳我哋一入去，見到個裝修格局就覺得好似我哋之前去過佐敦嗰間，跟住好又話認得個店員好似係之前喺佐敦，所以直接問咗佢，原來佢同佐敦嗰間嘅老闆係兩兄弟，一人做一間，唔怪得一樣有原個 Parmigiano Reggiano 芝士整意粉！呢間仲有歌手喺度唱歌，係行埋枱唱嗰隻😆

我哋叫咗一打生蠔，佢而家買一打生蠔會送一支白酒，我哋五個好快飲晒一支，等好友嘅女朋友到埋，又叫多一打生蠔😆又送多一支白酒，我哋又帶咗支紅酒嚟，主菜我哋叫咗威靈頓牛柳、豬手、卡邦尼意粉、豬扒、兩個pizza，個意粉少得可憐，基本上六個人係每人一箸😅😅到切蛋糕環節，店員都裝飾一下隻碟，先至放個蛋糕上去，然後個歌手就埋嚟唱生日歌，店員仲幫我哋影相拍片，十足十海底撈咁，非常搞笑🤣🤣 不過都好開心，呢餐都唔平，我都唔係幾好意思🤭

 

香港迪士尼20周年慶典 / 萬聖惡人派對

食完晏過咗去迪士尼，都好幾個月冇嚟過，趁今日生日又冇乜地方去，約咗人食晚飯又未夠鐘，所以入去行返轉，知道而家做緊20周年慶典，又有萬聖節惡人派對，所以入去睇吓有冇特別嘢，非常之多人，我諗好多都係為咗萬聖節呢個主題入嚟，因為好多人都係扮鬼扮馬，可能20周年慶典都做咗幾個月，所以個Focus都喺萬聖節度，睇到售賣嘅產品都係以萬聖節為主， 20周年嘅產品唔算好靚，吸引唔到我去買，萬聖節嘅產品亦都唔考慮，因為屋企都有好多，所以都係周圍影吓相，睇埋個城堡嘅歌舞表演，再睇埋個萬聖節巡遊，跟住就走，因為今晚都約咗人食飯！

 

上陽樓

又又又生日飯局，今次食午餐，同一班同事去咗大圍呢間酒樓，我哋訂咗間房， 12個人一齊食晏，傾咗個幾鐘頭偈，期間我都冇影到相，直至佢有壽桃包，我先至影咗一張，呢度嘅食物都唔錯，環境更加唔使講，當然價錢亦都唔算平，所以感恩大家都咁有心🥰🥰🥰🥰

 

金閣海鮮酒家

繼續飯局，今晚去牛頭角食小菜，原本話打邊爐，但係我已經食咗好幾日火鍋，所以堅決唔再打邊爐，所以揀咗食小菜，呢間酒樓舊舊地，去到門口見到落咗閘，以為佢冇開，原來要行去隔籬街另一邊入口入，晚飯時間都唔係好多人，不過佢啲餐都幾抵食，乳鴿只係$18 一隻，所以我哋每人一隻，仲有芝士蝦伊麵、羊腩煲、蒸扇貝，羊腩煲我覺得鹹咗D，其他嘢都不過不失，價錢都好優惠，所以都幾抵食，最後切埋個蛋糕，然後繼續傾偈，我哋傾咗好耐，越坐越凍，所以都係走喇😅

 

飯局作客 - 生日飯

今晚又去好友屋企食飯，又打邊爐，今個星期都打咗幾次邊爐，不過自己整嘅火鍋就健康啲，起碼湯底冇咁油，仲有蒸海鮮，買咗兩款牛肉、兩款蝦、扇貝、丸類等等，都有好多嘢食，食完之後仲有蛋糕，今次蛋糕加咗一啲裝飾，雖然啲裝飾唔食得，不過都好有心思，另外仲有兩份禮物，真係好感激呢班好朋友嘅細心安排🥰🥰🥰🥰🥰🥰