Italian Tomato

網誌日期：2008-03-27 23:24

今日去荃灣,諗住同阿天去荃新天地試吓嗰間 Pasta de Waraku,我地賣甩Alan, 馬馬,阿Va佢地,我地揾左好耐,由地鉄行到悅來酒店又行返去地鉄,都揾唔到,跟住响地鉄站睇地圖,原來離地鉄站好遠,唯有放棄!就近近地去左綠楊坊嗰間Italian Tomato,我地叫左兩個意粉share食,不過食唔飽,我地叫多個pizza食,一人一杯咖啡(好眼瞓zzzzz)坐坐吓就食左2個鐘,食完飯我地去揾Ronald佢地,阿孫捉住我傾計,Paula剪短左頭髮,個個都話佢咁捨得,佢話之前因為結婚先留長,佢話"又係你話頭髮會生長架麻,怕乜剪喎"係呀,之前我剪短頭髮時都係咁答架,同阿天hea左陣就走,佢就返未來外母度食飯,我就心郁郁去行左陣街,去左Log On睇耳環,見到我之前想買嗰對耳環減左價(好在之前無買!)我見之前賣$99依家有三折賣$29.7,抵!我買左4對特價貨同一對正價貨,都係$211,都好抵!好鍾意紅色車厘子嗰對,皇冠加骷髏骨嗰對我諗住拆左個骷髏骨,粉紅色珠嗰對可能會改為吊勾款!

王家沙/黑目壽司

網誌日期：2008-03-26 23:50

尋日約左Samuel, Alan, Simon, Angel,Pondy同埋黄生食飯,去左旺角嗰間王家沙食,嗰度d小籠包,生煎包都好好味,d汁都好熱,今次食飯都算準時,仍然係Alan包尾,最遲嗰個!Pondy個仔啱啱滿月,佢真係偏心到出面,猛話要返屋企同個仔玩,咁個女呢?仲猛show個仔d相比人睇,又話似佢,又話親自拍攝佢出世既情况,唔知以為生第一胎tim! Angel 就話過兩日搬返去同奶奶住,都好既,慳返d租金,Samuel 仍然滿口怨言.......食完飯都各自離開,又屈左黄生請食飯,哈哈哈!!!!!!!

今日心情麻麻,呢兩個禮拜工作上精神壓力大,加上天氣有點潮濕,睡得不太好,個人有d焦緊,不安,原本想去睇戲,但係坐响屋企唔想郁.....最後都係出去行吓,去買吓野發洩吓先.........去BB買新出嗰隻Creamy lipstick, 買完先知買錯左 Lip balm !!!!!去See's Candy 諗住買Toffee ,驚住太"漏",無厘頭買左罐 nuts ! 都唔係咁好食..........去Page One買左兩本書,Nuts + Books 好重呀!夜晚去左黑目壽司食左碗地獄拉麵,都唔辣既!!!!!!!

快食

網誌日期：2008-02-23 01:07

尋日去超市入貨,買左好多粉粉麵麵,墨魚丸,八爪魚丸,瑞士雞翼,有時夜左返又無野食,可以煮d快速食物,好似尋晚咁,好肚餓,即刻煮左個一丁麵,一邊煮一邊叮瑞士雞翼,加埋瑞士汁做撈麵,快趣又幾好味,間中食吓都OK,始終食得即食麵多唔係咁健康,仲好易肥添!

Cafe Balencia

網誌日期：2008-03-21 00:17

今日去左旺角新世紀,好少去個邊,唔係咁就腳,原先想買Bobbie Brown 新嗰隻唇膏,試完揀好顏色點知無貨!個sales姐姐話可以幫我留,問我會唔會下個禮拜過開黎,我諗唔會,不過佢都比左張地址咭我,或者下星期先去買啦.

响BB過d有間餐廳 Cafe Balencia, 有麵包賣,睇落唔錯,又多人買,我揀左兩個,一個係藍啤梨朱古力高洛芙,好似半個戚風蛋糕加左d朱古力醬响切口度,再加左d糖霜响面,另一個係香橙芝士忌廉包,成片橙响面,好似好香甜咁,留番聽日做早餐,睇吓好唔好食先!

Cafe Balencia

網誌日期：2008-03-21 00:17

今日去左旺角新世紀,好少去個邊,唔係咁就腳,原先想買Bobbie Brown 新嗰隻唇膏,試完揀好顏色點知無貨!個sales姐姐話可以幫我留,問我會唔會下個禮拜過開黎,我諗唔會,不過佢都比左張地址咭我,或者下星期先去買啦.

响BB過d有間餐廳 Cafe Balencia, 有麵包賣,睇落唔錯,又多人買,我揀左兩個,一個係藍啤梨朱古力高洛芙,好似半個戚風蛋糕加左d朱古力醬响切口度,再加左d糖霜响面,另一個係香橙芝士忌廉包,成片橙响面,好似好香甜咁,留番聽日做早餐,睇吓好唔好食先!

Edmond's Wedding

網誌日期：2008-03-18 00:08

等左成年,終於等到呢日17/3/2008,大家心情都好緊張,尤其係Henry,我地約埋一齊响中環等,見到Winson我好意外,見到Danny佢仍然係不停講電話,細傑就着得好靚tim.

去到酒樓好快見到Alan, Ceci, 我地即刻上台影相,今日佢地擺左38圍,好多人,好開心,間酒樓既裝修好有歐洲feel,d菜都唔錯,我都係第一次去飲有原隻鮑魚食,雖然細細隻,都算食得豪,我睇佢地d movie時就好感動..............新娘子好靚,成晚換左三條裙,全部都好靚,成晚都無人玩新郎新娘,可能親戚較多,d朋友又知佢地翌日要飛去日本度蜜月,所以無玩佢地,加上上菜慢,攪到佢地成晚都好得閒,雖然係咁,不過有Alan 呢個口水佬坐响我隔離又點會悶呢!我好開心呀!

鴕鳥蛋

網誌日期：2008-03-17 00:27

傷風左個幾禮拜仍未完全清晒,仲有小小流鼻水,都唔敢唔着褸,因為早晚都凍凍地,今日去超市買水餃,見到有鴕鳥蛋賣,要成$399一個,好巨型,唔知咁大隻有無人買?買左又會唔會整黎食呢?聽講係可以煮黎食架,唔知好唔好食?



上星期買左本旅遊書,介紹日本仙台,好有興趣去,不過依家d Yen 好高,成77,太貴喇!睇怕有排都唔跌啦!遲d先諗lu!

媽媽的生日

網誌日期：2008-03-13 00:57

昨天是媽媽的生日,我們一家人去了食鮑魚,可能病了幾天,都沒有甚麽胃口,食了小小已覺得飽,還有點想嘔.......可是到了甜品又不同了,先吃了個壽包,又熱又大個,之後吃心形士多啤梨果凍,不過無乜味咁,總之無士多啤梨味!之後吃水果,那些西瓜好甜,飯後和姊姊一起坐車,忽然覺得她老了..........!

No country for old men

網誌日期：2008-03-12 00:47

這電影拍得不錯,故事都幾特別,雖然結局有點不明白,不過套戲都好緊張,個主角既痴線又打極唔死,撞車撞到手骨都露出來,仲可以若無奇事咁走!又誇張左d.

The Bucket list

網誌日期：2008-03-08 00:13



呢套戲無乜宣傳,單係睇戲名同兩個演員,已經好想睇,Morgan Freeman既戲都有睇過好多套,Jack Nicolson 比較少睇,套戲講兩個時日無多既病人,一個富商,一個修理汽車,由陌生人變成好友,一齊坐言起行,用剩餘既時間做自已一直想做既野,當然,一個係富商,要實踐夢想也較易,成套戲有笑有淚,對白幽默抵死,令我想到,如果有一天知道自己的死期,會否像他們一樣,寫一份Bucket list,然後逐一實現呢?戲中的Jack Nicolson最喜歡飲一種叫Kopi Luwak 的咖啡,它是全球最貴的咖啡,早前飲食男女也介紹過,當他知道這咖啡的由來,也實現了他們Bucket list 內的"Laugh until cry"!

10,000 BC

網誌日期：2008-03-08 00:04

比預期差,諗住會好多特技效果,原來差不多响預告睇晒,隻大老虎都係出過2次,大部份時間都係d族人响荒山野嶺行行行........走走走..........都幾悶,個主子神神秘秘,點知不堪一擊,死左都睇唔到個樣,夠晒神秘,其實呢個題材可以拍得豐富d既,依家都幾失望!

病

網誌日期：2008-03-07 00:33

今日起身好病,冷親.....傷風感冒.......頭暈暈....... 之前响Fancl買左d粥就煲熱黎食,都幾多料,食完粥再食藥,就好左d,好想打乞嗤........係咁包雲吞,本來聽日去BBQ睇怕都去唔成 !

Juno 少女孕記

網誌日期：2008-03-02 00:41

尋日去睇左Juno少女孕記,入場既多數係女學生,她們吱吱喳喳令成間影院好熱閙,套戲好美國青春片既style, 對白較粗俗,不過令d學生好有共鳴,個男仔主角傻更更,女主角粗魯任性,大了肚又不想打掉胎兒,一心把孩子生出來便送給別人,產後也不去嬰兒房看他一眼,又繼續以前的生活,好像甚麽事都沒有發生過,恐怕會令那些看戲的學生們,像她一樣不理後果,以為生個孩子是很容易和隨便的事!

Jean-Paul Hevin Chocolatier

網誌日期：2008-02-29 23:37

昨天經過這朱古力店,人頭湧湧,小小的店站滿了人,又有記者在做訪問拍照,好不熱鬧,我看到一些小小的 marcaroon,每個賣$15,還是下次才試,晚上見到雜誌介紹這店,店主是法國人,已有三十年的經驗,又說店裏沒有白朱古力賣(又好似真係唔見有白朱古力),我見店有些不同濃度的朱古力,亦有朱古力珠(像珍寶珠),還有朱古力醬,我諗用來塗多士應該不錯,下星期試吓再同大家分享吧!

鼎泰豐

網誌日期：2008-02-28 23:33

上星期睇雜誌話台灣鼎泰豐响香港開店,經常聽人講佢地d小籠包好食,所以好多人,今日去開尖沙咀,見到個牌先諗起去試吓,下午時間係落場時間,要五點半先開,我五點四個字去到,已有十多人在等,我見間鋪都唔細,以前係酒樓,都唔怕無位,我諗七點後會爆滿,一坐低即刻叫左小籠包($42/6pc.蟹粉小籠包$60/6pc.聽講原味好食d所以叫左原味)同擔擔麵,小籠包都好味,細細個,一籠唔多夠食,個擔擔麵幾好食,佢無乜湯有d似吃撈麵,總括來說,是會再去的,可以試試佢地其它大包,麵食等,果度d店員好有禮貌,好多女仔都係講國語,服務很好,可以取代翡翠lo.

24.7

網誌日期：2008-02-20 01:38

持續了24.7天的寒冷警告才結束了一天,今天好像又凍了!這24.7天好難頂!
電視在播放沈殿霞的回顧節目,不知是多久前的節日,卻驚見初出道的徐子琪,那時真不太起眼,現在的樣子也真是福氣得多,那時羅文,梅豔芳仍在生............有時看這些節目,見到主持和嘉賓講懷念和感受,不知何時自己當"主角"!

南瓜露

網誌日期：2008-01-14

前兩日Sandy 响波仔買左碗南瓜露比我試,好大碗(2人份是)不過幾好味喎,佢話好平,我又唔記得幾$$,下次買d返屋企儲糧先.
呢幾日個blog好靜咋,好似無乜人寫blog, 可能呢排平平淡淡無乜特別事發生掛,我都一樣無所事事!

我眼睛想旅行

網誌日期：2008-01-11

很久很久沒有去旅行,身心都很疲累,腦裏想起黎明首歌"woo...oo....我眼睛想旅行!"

早陣子見blog友去完泰國返來寫既blog好吸引,咁啱高偉上個月去完泰國返來又讚不絕口,又話好relax,好爽咁,之前其實都plan左三月同高偉阿孫去日本,依家阿雯同Howard又叫我去日本,我又想去泰國...........去邊好???.........同邊個去好???????.........兩度都去????........$$$$$$$$...........????????
唔諗住,下個月先算,我買左兩本旅遊書睇吓先,之前去日本自遊行用個本"東京旅遊全攻略"好實用,成日見佢好快賣晒新版,今日見佢出左08-09年版,買本update吓先.

今日都好忙,去左先達幫家姐買左2部NDS,攞埋相機去整,跟住去媽媽屋企食飯,再去旺角買DVD,CD,book....etc, 夜晚去飲滿月酒.......tired!!!!!!!!

QB House

網誌日期：2008-01-07

成日見到呢間QB House 既牌,唔知有無人去過呢間QB House剪髮呢?見佢好似好特別,仲話10分鐘剪個髮,又好似好環保咁!我見佢係由日本引入,有個日本web site,可能係做學生生意,唔使洗頭吹頭就好快同好平掛!好似以前d飛髮檔咁,不過唔知剪得好唔好呢?

新電話

網誌日期：2008-01-05



上個禮拜終於都換左部電話,係我鐘意既Motorola, 之前想買V8,但係無插咭,出左V9就啱晒我要求,仲有好多野送!配埋條水晶手機繩都好襯,不過個機袋就唔係咁靚!