Lúa

去銅鑼灣搵食，見到呢間新開嘅越南餐廳，個裝修好靚，就去試一試佢！

店入面有兩層，我哋上咗樓上，因為樓上有個位置掛咗好多燈籠🏮好靚，諗住去嗰度打下卡！店員好熱情招待，因為只有兩枱客，通常新開嘅舖頭都係好有熱誠，店員亦都好落力介紹佢哋嘅食物，有一個男士疑似係老闆，每枱客佢都埋去social 下，又介紹吓佢哋嘅食物，佢話佢哋嘅檬粉同埋法包都係越南來的食材做，因為話要做返越南嘅風味，用香港食材做唔到，佢又介紹佢哋有兩款醬料，加埋香菜同埋青檸，食河粉時點，係最好味！試咗佢哋嘅湯河、檬粉、法包🥖三文治，用佢哋介紹嘅方法去食河粉，又真係幾好食，不過我個人唔係好鍾意用咁多醬料，所以試少少就算，檬粉嘅味道都好食，但係唔係好食得出同其他越南餐廳嘅檬粉有好大分別，而個法包🥖三文治就真係好好食！平時食嗰D法包係個皮好硬，但係呢個係脆嘅！我同佢老闆講，而家疫情嚴峻，佢淨係做外賣呢款法包已經夠做 😆😆

 

Café Paradise / 第三針疫苗注射

今日係 22年2月22日，好多人揀今日結婚，我就咁岩約咗今日去打第三針💉，同朋友傾開先發覺佢又係約咗今日同一個地方同一時段打針，所以我哋約埋一齊去！

去打針之前我哋一齊食個lunch，在打針嘅體育館附近，搵咗間餐廳仔食，我哋叫咗一個意粉🍝同埋一個飯，簡簡單單食一餐，傾開呢排D疫情都真係好嚴峻，身邊總有幾個中咗招 😔，好友話佢今朝返公司，佢有個同事同佢一齊返工，話唔係好舒服，做左快速測試，又係中咗招，問題係佢繼續返工 ………  😰 好友完全唔擔心自己，我就好擔心自己 🥺

嗱嗱臨食完戴返個口罩 😷🤦🏻‍♀️，傾多一陣就去打針，雖然我哋約咗四點，但係其實可以早D去，或者遲D去，只要係約咗果一日就得！我哋全程一齊排隊，過程都好快，打果陣冇乜感覺，打完坐低休息嗰陣時，就覺得個針口比之前兩次都痛，唔可以話好痛但係有D唔舒服咁，不過坐咗一陣冇乜嘢，跟住就同好友分道揚鑣，都想快D返屋企休息，好友攞咗一盒火鍋湯料俾我，都好大盒有D重，打完針隻左手唔可以用力，全程只能夠用右手拎住袋嘢💪🏻，所以要快快脆脆返屋企，但係返屋企之前都係要去超市買少少野 😅 

 

何洪記

疫情嚴重爆發，日日都幾千幾千確診，應該好快突破10,000 🤦🏻‍♀️🤦🏻‍♀️ 政府好明顯應付唔到，好多人確診咗，仲要喺屋企等安排，未等到衛生署安排，已經傳染晒比全家人 🙈 都唔知可以點收科，好多人驚中招，係驚傳俾其他人，而家檢測隨時都要等成個禮拜先有結果，呢個先至係最麻煩嘅地方，好多人都要有檢測結果先至返得工，即係話做完檢測分分鐘成個禮拜都返唔到工 😔😔

今日過去銅鑼灣，估唔到條街都好熱鬧，求其搵D嘢食，最緊要店入面冇咁多人，見呢間冇乜人，而且多數係卡位，同人隔開左好D，所以就喺呢度食，叫咗魚皮、雲吞麵、水餃麵、炸兩、叉燒包，食物質素都唔錯，好似係米芝蓮一星定係米芝蓮推介，店員嘅服務都好好👍🏻

 

車厘子🍒 2022

近呢兩年塔斯曼尼亞嘅車厘子🍒，都非常之熱賣，價錢越買越貴，今年嘅價格平咗啲，唔知係咪因為疫情嘅關係，一直想試，今年見佢價錢平咗就試吓佢，一試就真係返唔到轉頭 🤦🏻‍♀️

城中最熱賣嘅應該係43度，另外仲有紅寶石同埋金袋鼠，先後買晒呢三隻試，知道佢哋同一個牌子有唔同嘅品種，好多人都食 Lapin ，所以價錢係特別貴，同埋大部份係2kg，只有好少部份有1kg，只係買到金袋鼠同埋紅寶石有1kg 嘅包裝，價錢最貴係紅寶石，其次係43度，金袋鼠係最平嘅，當然仲有好多不知名嘅牌子，價錢係會更加平，個人認為最好食係43度，其次係紅寶石，金袋鼠就麻麻哋，果欄成行成市都係車厘子🍒，其他生果都變得好平，見到日本香印都係百幾蚊一束，超大粒嘅波子提子都係$50磅，即刻買返束香印食 👍🏻👍🏻👍🏻

 

北京冬奧2022

平時冇乜留意冬奧，今年可能因為北京冬奧宣傳多咗，加上有D政治原因，令到佢變成話題，加上疫情好嚴峻，都係匿埋屋企睇電視，同埋今年有谷愛凌，同埋我喜歡嘅羽生結弦，所以都有睇到，開幕式又係搵咗張藝謀導演，有時諗，中國咁大都唔係得一個導演，可能佢上次北京奧運嘅時候做得成功，所以對佢有信心，開幕式都幾好睇，如果可以喺現場睇一定非常之正！

 

Bamboo Thai

由年廿幾開始疫情就爆發得好嚴峻，過完年就更加多確診，因為聖誕新年嘅聚會，令到好多跨家庭嘅人互相感染，每日都有大廈圍封檢測 🥺🥺

今日約咗好友食個lunch，我哋都揀冇咁多人嘅如心廣場，去呢間食泰國菜，簡簡單單食餐開年飯，我年初一腸胃炎，嘔左成晚🤮，前兩日都食得比較清淡，今日食泰國菜見到活蝦刺身🍤，好難忍口唔食，不過食完都冇唔舒服，食完飯我哋仲喺商場影下啲假櫻花🌸😆

 

蘿蔔糕 2022

約咗好友過幾日去佢屋企整蘿蔔糕，我哋參考左烏烏嘅食譜，我自己喺屋企先試一試，因為佢個食譜嘅蘿蔔份量係非常之多，我哋計過數，如果根據食譜我哋要買好多好多蘿蔔，最後我哋決定減少一半份量，因為要預先訂蘿蔔，而我自己整呢個就跟足佢嘅食譜，食譜嘅份量係咁：
白蘿蔔1400克 (去皮後嘅重量)
粘米粉200克
澄麵50克 （等於粘米粉份量嘅¼）
馬蹄粉12.5克 （等於澄麵份量嘅¼）
總水量393毫升 (先用250毫升浸冬菇嘅水攪粉漿）其餘143毫升就係煮蘿蔔出嘅水

臘味嘅份量我就用咗：臘腸三條、潤腸兩條、冬菇五隻

因為蘿蔔得一條，所以用咗一半切粗條，一半切幼絲，臘腸同潤腸蒸一蒸佢，軟身啲容易切，我切得比較大粒D，等佢有D咬口！量好晒D粉嘅份量，加浸冬菇嘅水攪溶D粉佢，先炒咗臘味同冬菇，盛起之後原鑊炒蘿蔔，煮佢20分鐘左右，等佢出水，然後落蠔油、糖、鹽、胡椒粉調味，原本想倒返D水出嚟睇吓有幾多，但係唔小心倒瀉咗D，剩返應該有百幾毫升，熄火之後就加粉漿，搞完之後再裝落去錫紙兜，個錫紙兜比較淺，所以整到兩底，蒸佢一個鐘，攤凍之後，放入雪櫃雪左一晚，第二日切出嚟煎，好好味😋成功 👍🏻😄

btw

平時去土瓜灣，都經過呢間餐廳幾次，今日終於去試吓，呢度格局同一般茶餐廳差不多，賣點係有機械人送餐，上網落完單之後，就會有機械人將你嘅食物送到去你張枱前面，不過就會由侍應將食物攞出嚟俾你，食物嘅質素同而家好多大型嘅茶餐廳差唔多，而且食物嘅選擇都幾多，下次可以再試吓其他嘢食！

 

田中壽司

最近疫情都幾嚴峻，第五波 Omicron 傳播力婆高，不過相對死亡率就好低，唔通而家真係要與病毒共存？

因為疫情嚴峻，周圍都靜咗好多，今日去咗試呢間壽司店，其實佢開咗冇幾耐，個門面有D神秘感，因為唔係好望到裏面，令到人會卻步，感覺上好似好貴，不過其實睇吓個餐牌，價錢都係合理，午市套餐都係百幾蚊，當然有D壽司餐會貴D，近$300都有，貪佢冇乜人，就入去試吓！

我叫左個十二貫壽司的午市套餐，見到有三文魚就覺得麻麻地！不過得一件就算啦！佢有大拖羅、蟹腳、赤貝、蝦、海膽等等，海鮮嘅質素都唔錯，價錢合理，套餐有埋麵豉湯同蒸蛋，個蒸蛋幾好食，入面都有D海鮮粒粒，店員服務都好好，可能因為只得一兩個客，而家冇晚市堂食，佢哋收五點！

 

飯局作客 - 1月生日飯

今年第一個生日飯局，係好友的母親，而家都係我朋友，舊年我生日佢都有嚟食飯，所以到佢生日我哋又同佢食飯，今次去好友屋企食，我哋準備好食物，等壽星女收工過嚟食飯，今晚有海鮮、牛肉、牛展、貢丸等等！壽星女同埋佢老公，以及另一個兒子，一齊上來佢大仔屋企食，我哋食得好開心，又可以多D飯聚！😄 不過今次冇買蛋糕🎂，因為佢個仔話佢哋唔興切蛋糕，最重要係驚食唔晒！

 

The Place

前兩日去完大酒店，我今日約好友出嚟山下心！

今日約咗去QE睇醫生，睇完醫生去會合好友，先去旺角花墟行一陣，因為好友早前搵風水師傅睇過屋企，建議佢擺羅漢松，所以佢想買一棵細細地嘅擺喺屋企，在花墟行咗一個圈，揀咗棵細細地嘅，因為佢話要擺床頭，所以唔買咁大支，行完花墟，已經天黑，走去搵嘢食！

好又話想食buffet，我哋梗係奉陪啦，去咗朗豪酒店，其實酒店改咗名好耐，叫做 Cordis ，成日唔記得佢中文叫做康得思！佢呢度食 buffet 嗰間餐廳其實都幾出名，不過從來未去過，我哋去到門口見好多人等緊入座，諗住都未必有位，埋去問吓竟然有位！真係好彩！聽晚開始冇堂食，諗住好多人爭取最後機會今晚出街食嘢！

呢度食物嘅選擇都幾多，當然我哋重點係食一D”回本”嘢 🤣，生蠔海鮮呢啲就唔少得，而且佢嘅質素都唔錯，因為疫情關係，所有食物都唔可以自己攞，由職員攞俾你，生蠔每次最多攞三隻，龍蝦同埋海蝦每次都係最多攞兩隻，所以都要行幾轉，海鮮好新鮮好好味，熟食我哋食得唔多，都係燒牛肉、鵝肝之類！片皮鴨都好食，甜品有榴槤撻，都幾好味，榴槤好香，只係奶嘅成份多咗D，如果比重多番少少榴槤就好喇！整體食物嘅質素真係唔錯！我哋已經 plan緊下次幾時再嚟，不過下次可能要食lunch ☺️

 

Pizza Maru （旺角）

之前一直想是呢間餐廳，今晚終於去咗試，旺角呢間分店嘅店員全部係講英文嘅，用餐時間亦都有限制90分鐘，我哋叫咗一個Pizza同埋炸雞，食物嘅味道都唔錯，份量亦都唔少，下次可能人多啲先至可以叫多啲嘢食！

寰宇殯儀館

早前好友的兒子去世，傷透大家的心，昨天在寰宇殯儀館設靈，都係第一次去呢個殯儀館，一星期內去兩次殯儀館，真係好唏噓！

好友昨天在靈堂哭了一整天，作為一個母親，冇嘢比失去自己嘅孩子更痛苦，幸好她丈夫很堅強，能夠強忍痛苦支撐大局，而且還有一個女兒，去氹吓媽媽開心！

小朋友今日大殮，主要都係一D親人同埋我地幾個朋友，蓋棺之前，由父母睇吓棺木內有D乜嘢，擺成點，然後最後瞻仰遺容，全場每一個人都哭成淚人 😭😭😭😭，因為小朋友好像睡了覺一樣，令人萬般捨不得！婆婆同媽媽相擁痛哭了很久 🥺🥺 因為親人全部都係長輩，而妹妹年紀又太細，所以家人未能夠送佢最後一程去火葬場，我們作為朋友就代佢哋過去，由另一朋友幫忙撳掣！然後我哋返去紅磡會合佢家人，一起食晏，幸好媽媽在離開靈堂之後心情平復了不少，大家都冇咁擔心，我哋食完飯再各自回家 ！