酷熱迪士尼

上星期四,在這個酷熱警告下的天氣,都預左熱到溶,我同Flora兩個,入到去先睇吓動畫廊,然後行吓shop先,凉吓冷氣,行晒d shop都睇啱d野等走果陣先買,我地一路行一路買雪條食,又買飲品又買西瓜食,跟住就去睇巡遊,有d水淋吓無咁熱,其實都無上次咁熱,仲有小小風tim,其實我都唔介意出身汗,係怕成身臭汗味!

我地keep住去d室內地方,睇4D,睇金裝米奇,Bebe又換左人,雖然佢廣東話唔正,但係做得好,有第一代Bebe咁好,中途"小魚仙"個水母埋黎"炸"左我地一吓,落幕前阿"泰山"跳左上我地面前個木欄,大家即時尖叫,我地睇得好投入,好開心,跟住去左Banquet Hall 食野,叫左雞扒同小籠包食,可以想像到d小籠包唔會好食,不過Flora想試吓响廸士尼食小籠包係點既,食完之後,Flora 要玩Space mountain, 我無陪佢玩,我在後面的shop等佢,再一齊去玩巴斯光年,玩完出來先想起miss 左大街show !!真可惜,31號之後就無啦! 好彩上次我有睇過!

見仲有成個鐘先放煙花,就去森林果邊揾史廸仔境點影相,影完去買雞脾同魚蛋,食住等睇煙花,次次睇都影相影短片,要睇mon,今次我地唔影,完全睇現場,全程"岳"高頭大聲嘩,有時跟住音樂唱歌,好好笑,好開心..........快樂其實好簡單!

LE SALON DE THE de Joel Robuchon

再次到此店,原來相隔了兩年,時間過得真快,上次主要吃cake,今次則試了tea set,有咸點和甜品,還試了阿蘇話全香港最好食既牛角包,我唔知係咪真係全香港最好味,不過係我食過最好味,一向唔特別喜好牛角包,覺得幾油同幾"漏",不過呢個皮脆內軟,好香,唔會咁油,佢只係微暖都好好味,真係唔知新鮮出爐會係幾咁好味呢?

Tea set 有4伴迷你scone和4件好迷你既sandwich(唔知佢叫乜,總之好似sandwich就當係吧!) , scone 有牛油同士多啤梨玫瑰jam, 好好味既jam,大概係自家制造吧! sandwich 每件大約3吋x1吋大,上面好迷你既裝飾好靚好精緻,靚到唔捨得食,仲好好味呢,個朶只有一吋大既三文魚花好靚,雖然咁細件,都食得出新鮮味道.......正呀~~~~~!

食完咸點到最出名既甜點,總共有5款,先吃栗子蓉伴蛋白條果件,蛋白條對我來講略為甜一點,栗子蓉比較軟,像溶了點點,再吃macaron那件,都是甜了點,中間那件最好味,passion fruit帶點酸甜,配上三款berry和芒果.........賣飛彿!!!其餘都一貫水準,最後叫埋雪糕食,三款口味,有mango sorbet,開心果同朱古力,當然係朱古力最好味啦!

金寶泰國菜館

呢兩個禮拜,飯局都不少,呢次一行4人去九龍城食泰國菜,佢地有幾間分店,有越菜同泰菜,入到去無乜人,得兩枱客,我同Jones同埋阿健都好耐無食活蝦刺身了,大家都好鐘意食,阿新就未食過,我地叫左2碟,不過侍應話泰國蝦得返一碟,另一碟就本地蝦,味道方面本地蝦真係遜色左d,泰國蝦大隻d厚肉d.....食完活蝦刺身再食無骨鳳爪,佢地話食完咁辣既活蝦刺身,條脷麻痹晒,食鳳爪都無味!原來佢地唔食得辣,狂飲椰汁冰先無咁辣喎!冬蔭公都好足料,咖哩蟹配蒜蓉包真係無得頂,原來佢地都鐘意食蟹,仲話鐘意食唔鐘意拆,要女友拆肉比佢地食喎........都唔知係咪倒轉左講,係佢地拆比女友食至真!

個牛油焗大蝦比較heavy,可能我唔多鐘意食炸野,覺得麻麻地,個越式蛋餅同醬爆蝦丸我都無食因為好"炸"同埋好飽,我就一個人食晒碟炒菜,好飽呢!個炒飯都食唔落,但係個蒜蓉包一到,點咖哩汁超好味,即刻覺得唔夠食.......席間傾開食蟹,阿健話好想食黃油蟹,我都想食,不過呢兩年d黄油蟹好似無咁靚,遲d睇吓去邊間食啦!

Stone Grill

網誌日期：2009-08-02 01:03

果日去睇戲之前去左尖沙咀Stone Grill 食飯,我好耐好耐之前去過,搬左去海運之後第一次去,因為Flora一直好想去但係無人同佢去,我自己又想去食,所以就一早約定去試吓,我地去到門口見到另一間我好想去既BLT steak!!!我地响門口睇晒兩間既Menu先,睇完一輪都係決定跟返原意去 Stone Grill, 去到原來都好full, 我地無訂枱,不過佢地都比左張枱我地先,要早d交返張枱比佢地,我地都有個半鐘食.

佢地做緊優惠,如果order一款頭盤就可以半價食指定食粅,果日既daily special 係西冷扒,我地叫左既頭盤係煎鵝肝,12oz西冷扒同三款食物套餐,有大蝦,劍魚扒同4oz安格斯牛柳,我地等野食既時候,當然係影吓相,個waitress用英文問使唔使幫我地影相,佢以為我地係遊客,之後隔離枱果兩個外藉男士問我地where are you come from ???個個都以為我地係遊客,唔通除左遊客無港人响呢d餐廳影相?我仲以為我地好"港女"咁乜都影一餐tim!

個煎鵝肝真係好好好好味!!!!d肉類都給比下去!d食物捧來時,侍應好快手幫我地反轉另一面煎,切開同放起一部份,因為驚太快熟,塊石有成400度高温,佢好快手,我都影唔切,其實d食物煎完都比較乾同埋無乜味,係個牛柳好d,不過個sauce都幾好味!點d汁食好味d,其實塊石都好快凍左,真係要快手煎至得,呢排都好多鐵板餐興起,有pepper lunch同大家樂,兩間都食過,我都係覺得pepper lunch好食d,大家樂今次真係麻麻地好味!

Up 沖天救兵

終於等到上畫喇,我地一行4人,預早上網訂了飛,期實都不容易,一心想去Imax,卻又沒有巨幕版!因不太就腳想改去The Grand,啱得時間又無英文版,最終都係買左又一城,我地仲一直以為買左The Grand,去到打電話問朋友到未,先知道攪錯了,幸好趕得及入場!我覺得開場果個3D廸士尼城堡好靚呢!

套戲由主角Carl 小時候認識Ellis講起,2人同樣希望到南非探險,他們一起成長,結婚,他們想要孩子卻沒有了,倆人決定再為兒時的探險願望而努力儲錢,可是生活迫人,儲蓄都漸漸因生活而花掉,漸漸地步向年老,Ellis也先他一步去了................那場床前臨終的戲很感動..........我鼻子都酸了.............老伴走了,他過着枯燥平淡的生活,附近的房屋都建成高樓大厦,他更被迫送去老人院..............在絕望的一刻,他決定要實現一個數十年的夢想,他利用成千上萬個彩色氣球,把他的安樂窩升上天空,即使要歷盡艱險,都要飛往南美尋找"仙境瀑布",誰知這個旅程忽然來了個活力充沛,最愛整古做怪的8歲童軍小飛,二人要面對暴雨狂風,和傳說中的珍禽異雀以及識講多國語言的狗仔,仲要高空決戰神秘梟雄................過程緊張刺激!

成套戲色彩斑斕,相當漂亮,對白也非常惹笑,戲入面的小飛實在很可愛,他的童軍badge也超得意,我有一套"Up"的布badge,好鍾意呀!他日出碟必決要買呢!

風月堂

網誌日期：2009-07-31 01:10

今日同Flora去左先達睇手機,佢睇中左Samsung部水貨手機,個款好少見,其實個design都幾man,有d似直版既迷你PSP,不過靚mon靚聲,係用B&O既喇叭,個款就唔太襯女仔用,睇睇吓,又睇中左部Sharp既800萬像,貴左接近一倍,不過更靚既外型,Softbank既design,日本摺機款,就緊係靚啦!不過呢類日版手機改機後都好多問題,好似打/睇唔到中文SMS,鈴聲太細聲,唔support MP3鈴聲,用唔到某d台等等,我地都問得好detail,最麻煩係無機試,最後都係無買到,諗清楚先再決定.

睇完手機就過左對面間風月堂食飯,呢間餐廳全白色既設計,帶小小日式餐廳feel,主要都係西餐,我地叫左墨汁意粉同黑松露帶子天使麵,味道都ok,甜品有超多選擇,有點花多眼亂,多款pancake,waffle,ice-cream同酥餅,我地叫左香蕉芒果pancake配雪糕,超飽呀~~~~~~!

魔鬼蛋糕

網誌日期：2009-07-30 00:58

上個禮拜經過美心見天使蛋糕出左朱古力版本既魔鬼蛋糕,前兩日買返來試吓,啱啱有同事生日,順道替他慶祝一下,個蛋糕既質地同樣軟綿,忌廉加左朱古力就比較"漏",而脆脆就改左平時用來做朱古力餅底果種脆脆,都係覺得天使蛋糕好味d,可能焦糖脆脆同白忌廉既味道夾d啦!

書展

網誌日期：2009-07-27 01:11

已有幾年沒有去書展,自己不是書迷,只是有時買些資訊性的書看看,甚少看小說,只有買哈利波特,上星期從雜誌上見到一些新書介紹,心目中選了幾本想買的書,昨天便相約朋友一同去,我地行左幾個鐘,都見唔到想買既書!!行到腳都軟,只係見到TV buddy 同人影相,最終我地都係買左d講飲食,食譜之類既書,佢地又買左d漫畫小說,我仲買左正文出版社既旅遊書,見佢地一直都只係出東京同埋北海道既書,我好期待佢地出大阪既書,終於見到出左喇!仲平d添,緊係即買啦!我地走果時坐巴士,個個都即拆即睇,我地睇旅遊書睇到好想去呢!

哈利波特 混血王子的背叛 Harry Potter and the Half-Blood Prince

網誌日期：2009-07-20 00:24
前兩日睇左哈利波特混血王子的背叛,原先想去Imax但係午夜場要12:35,睇完都三點,太夜了,唯有去睇普通版,今次呢集看重左講呢幾個青少年既感情線,始終不再小朋友了,故事講霍格華兹不再像以往般安全了,馬份和石內卜都協助黑暗世界,背叛了校長,哈利懷疑城堡內隱藏危機,鄧不利多亦預備那快將來臨的最後一戰,並找來史拉轟教授幫忙,尋找那失去的記憶,得知瑞斗當年的秘密......此外,主角三人正直青春期,哈利發現自己愈來愈喜歡金妮,而榮恩卻週旋在兩女之間,而且鬧出不少笑話.如果沒有看過小說,部份內容會不太明白,導演和編劇大概已預算所有觀眾都看過小說吧!其實有看過小說會覺得skip了很多,始終時間有限.

世界に一つだけの花

網誌日期：2009-07-16 01:37


朋友剛從日本旅行回來,買了好些手信,佢地去北海道,(好想去呀~~~~)她們跟團去玩了五天,睇行程表都好緊湊,睇相都感受到果種開心,令我諗起之前去九州果次係幾咁開心!!近兩次去日本都係去東京,都想去吓郊區,近幾個月都有幾個朋友去北海道,同一樣join東灜遊,所以d相幾乎一樣!!!只有Edmond同佢老婆自由行左N次,佢地住左兩晚民宿,雖然環境好靚,不過夜晚無得外出,因為呢類郊區夜晚無街燈,無夜店在附近,只能留在房裏,玩左成日休息吓都啱既!都可以唔使出街啦!

手信之一係個由小樽買回來的音樂盒,粉紅色蛋形貼上Swarovski水晶,很漂亮,音樂是"世界に一つだけの花" 從網上找到的資料,這首歌是SMAP在03年唱的一首歌,那時的木村瘦得多了..........除左音樂盒還有薰衣草餅,茉莉花茶KitKat,和熊仔手機繩,本來她買了史廸仔坐在海澡上的手機繩,因為之前另一朋友買了一個給我,她便改送了熊仔這個給我,多謝晒!!

冰河世紀3大威龍駕到 Ice Age 3: Dawn of the Dinosaurs

網誌日期：2009-07-12 00:36


已經唔記得第一二集既內容,就當一套新既戲睇,呢次用上3D係最吸引我,加上trailer已經出左好耐,都好想睇,果集狐狸??好攪笑,d主角都唔記得個名,我睇英文版,應該會傳神d,唔知中文版翻譯得好唔好笑,我就覺得幾好笑,而且對白無咁細路,可能d小朋友會覺得無咁好笑tim,戲情都係講一班朋友去救被恐龍捉左既Sam,途中危機重重,最後當然無事啦!
開場前既trailer電影"Up"都係3Dversion,好想睇呀!熱切期待!!呢幾日已經有2班朋友約我睇 Harry potter, 諗住去 Imax 睇,但係前幾日已經賣晒15,16號既飛啦!!!!最快要20號先有呀!到時先再算啦!

十二夜

網誌日期：2009-07-09 23:29

炎炎夏日,尋日一行五人去左廸士尼"乾煎",幾乎熱到熔左,幸好有好些室內活動,不致於長時間暴曬,所有幫助降温既我地都帶齊,遮,扇,太陽眼鏡,水.......通通都不敵太陽伯伯既威力,見到d工作人員無遮無擋咁响城堡前面等幫人影相,真係辛苦晒!

我地一去到就排隊同史廸仔影相,我始終覺得史廸仔個做型好"失真"起碼個身型比例都唔啱,個樣好似翻版咁!一路排隊已經大汗叠細汗,我地影完,史廸仔就休息,佢同我地一齊行,仲同Karen手拖手行呀!!!!!羨慕死人啦!!!!

影完相即刻去商店過吓冷河先,好多史廸仔精品都好靚,最鍾意潛水做型,好得意!!我都買左幾樣野,行完shop出來,曬得很,地面都反光,行到去4D劇場已經要買雪條食降降温,睇完劇就睇Parade,今次呢個Parade既車,全部都會噴水,淋吓水都無咁熱,不過比起日本就真係小兒科,不過如果好似日本咁用幾條大水喉射水,又未必啱呢度,我覺得最好好似日本咁响城堡前面攪,唔玩既唔使走埋去,玩既就着晒泳衣浴衣先玩,就真係可以玩得盡情d!唉!好想去日本呀~~~~~~!!!

玩到黄昏都仲係好熱,我地去食burger醫肚,食完野就去坐船,坐完船出來就去揾定位等睇煙花,第十二個廸士尼夜晚,煙花仍然燦爛,只是一起來的人都不同,最想一起來的,還會再來嗎?每次我都把成班人影的大合照放大8R保留,常常拿出來看,都希望有一天再有一樣的合照!