龍華寺

網誌日期：2008-06-13 01:27

上畫去完好多人既豫園,我地覺得幾失望,不過去外地旅行,都要去睇吓d名勝古蹟,唔去過又可能有d遣憾,我地跟住坐車去龍華寺,去到都四點,成個area 都無乜人,買完票入去,憑票送左一札香,我地入到去見到大香爐,就裝左香,後來先知入面仲有好幾個大殿供奉唔同既神佛,呢度好寧靜,感覺好祥和,d佛像好大座,有幾個唔同既觀音像,又見到有個大花牌,寫住超渡四川同胞,成個氣氛沒有熱鬧嘈吵,只有寺廟應有的禪和靜,感覺舒服,我地都好喜歡呢度,後來坐的士走時,司機話呢度無乜人去,我地都奇怪,咁好既地方會無人去,唔怪得呢度無Starbucks 啦!

南翔饅頭店

網誌日期：2008-06-11 01:04




我地休息完行返出去再經過南翔饅頭店,見到得十多人排隊,比之前少左好多人,於是排隊買返籠試吓,見d工作人員不停包,這些饅頭又叫小籠,看起來像小籠包,店員不斷將饅頭倒入盒中給人客外賣,買完我地企响店旁邊吃,老實說................好失望!(可能期望太高!)它的味道有點像小籠包,只是皮厚了很多,肉少,汁少,唔熱................總之唔好味,唔明點解咁多人排隊買??好彩唔貴,舒蔡記生煎好味得多,講起生煎包,真令我念念不忘,上個星期去左朗豪坊嗰間上上食生煎包,佢地都係即煎,都好味好多汁,當然無舒蔡記咁好味啦!

食完野就坐的士去下一站龍華寺,因為身水身汗,折騰左半日,好疲累,坐車時我都睡着了一會.

新天地

網誌日期：2008-06-02 00:22

位於盧灣區的新天地,是一個娛樂購物地點,有點像蘭桂坊,分別是這裏較新,較清潔,較集中,感覺亦很舒服,這裏主要是食肆和露天茶座,主要以西餐為主,有賣中式物品的商店,有商場,戲院,酒店,還有"中共第一次全國代表大會"會址和郵政博物館. 一路上,在這裏見到的主要是外藉人仕,或一些衣看光鮮的人,我地去到時無乜人,行完成段路都揀唔到食乜,因為大部份西餐都幾貴,較平既都係三文治之類既食物,最後我地揀左商場裏面既鼎泰豐!!上海的鼎泰豐和香港的基本上一樣,食物的味道,價錢,服務,都沒甚麼分別. 食完野我地去左"中共第一次全國代表大會會址"免費參觀,之後我去d小商店買左d茶葉,跟住就離開新天地.行去揾孫中山故居,同埋"阿娘麵".

豫園

網誌日期：2008-06-09 00:53

成個上海之旅最辛苦都係呢日去豫園,呢度係我地唯一一處跟地圖揾,揾唔到要問幾次路先揾到既地方,亦都係最多遊客既地方,我地一起身就坐的士去,一心諗住去豫園入面既南翔饅頭店食野,我地一落車就見到古色古香既上海老飯店(其實上海有好多間上海老飯店!)同埋亞一金店,我地見地圖位置唔多同,其實係地圖既位置唔啱,一開始就行錯路,我地沿相反方向行,行左去一條幾熱閙既街,成條街d店主要做批發,亦有d零售,我地見到有間店賣手繪在類似石膏的裝飾品,有用相架鑲起的,也有立體公仔的,有一set中國民族公仔都幾靚不過好大盒,我買左個細既,有兩個旦型公仔係中式結婚衫做型,寫住百年好合既送比亞天(蠢左,拎住四圍行,好重呀!)亞雯就買左兩把扇,都幾靚!

我地揾來揾去行來行去都揾唔到,又熱又餓又累,終於我地行返去我地落車嗰度,然後去左老麥take 個break !食左盒麥樂雞,主要係坐吓凉吓冷氣,食完又再問吓路,又再揾過,行行吓經過一條橫巷,聞到好臭既厠所味,望入條巷,點解咁多人既?原來係豫園個廣場入口處!!!終於揾到啦,好多人呀!仲好臭呀,要行過個廁所先入到去呀!!!!

個廣場好古色古香既建築,勁多人,尤其外國人!加上係星期日,間南翔饅頭店超多人,幾十人排緊隊!!!!!我地無排到,直接入去參觀,呢度有條九曲橋,湖心亭,老實講,呢度雖然都幾優雅,但係對睇慣亭臺樓閣既中國人來講,唔太特別,只是地方較大,路上見到一團韓國人,影相時擺晒pose好攪笑,好開心!

行完豫園,再由廣場入去城隍廟,想話求返支好簽,原來無得求簽!行左個圈出返廣場,我買左d花生糖做手信(早知買多d,一個下午已經比佢地食晒兩盒!又幾好味!)然後我地去左Starbucks, 上海周圍都有Starbucks 我地都無去過,但係呢間夠特別,係古老建築裏面既Starbucks ,同埋好疲累既呢個moment ,都幾特別,好relax .......!

大食代

網誌日期：2008-06-20 00:31

都有一段時間無去尖沙咀,今日有返d陽光,就去尖沙咀行吓,出到去都幾熱,沿住海防道行到新港中心,己經身水身汗,去到新港中心,見仲裝修緊,樓下就裝修好,開左間GOD,food court由City Super 變左大食代 food repuplic,一樣係有好多間唔同既食店,我見有一間叫做新加坡的主要賣海南雞飯和燒雞飯,和小量小食,他們的雞都像燒味店一樣掛了出來,我見d海南雞幾靚,而d燒雞睇落d皮好似'淋"晒咁,我就叫左海南雞飯,佢地有兩個價錢賣$28下午茶餐同$50正價餐,貴d既餐有菜同埋多d雞,我見個個都食下午茶餐抵食d,但係我想食菜,所以揀左正價餐,個女師傅切左雞脾比我,hehe.......!個雞都幾好味,個油飯都唔錯,個湯好重藥材味,有d似肉骨菜果d藥材味,anyway我都食晒飲晒!好飽,早知食下午茶餐,就可以食埋甜品!!!!

食完去GOD行左一陣,依家GOD好似賣家品多過賣傢俬,我見到本簿想買,但係好重,所以無買,我見到個曱甴書簽呀!仲好似係實物原大tim,好得人驚呀!

廟街

網誌日期：2008-06-13 00:48

好多年無去廟街食野,本來諗住去食亞龍咖哩,但係好多人等位,行過賣海產既食店,見有位就去食,好耐無食呢d貝殼類海產,驚會腸胃炎,以前响尖沙咀返工,好多時同Maggie去食,今日再去都有d擔心,我地叫左蒜蓉蒸蝦,白灼東風螺,炒蜆,炒青口,蒸貴花蚌,全部高危食品,係d蝦食得放心d,其它都好味,連埋飲野都要四佰幾蚊,都幾貴,我見有好多遊客食,好熱鬧,食完野行廟街,見到賣既野同我响上海果d旅遊區果d幾乎一模一樣!甚至多d選擇!!行到甘肅街見到雪糕車,我有朋友做過便利店賣軟雪榚,佢話好多時懶洗機,所以d雪糕漿入口位係好dirty ,攪到我唔敢食,所以我食甜筒,食住行,無咁熱,今日天氣好悶熱,睇怕就黎落大雨! 聽日仲話去BBQ, 唔知去唔去得成?

Sex and the City

網誌日期：2008-06-12 01:00



今日同亞孫,Paula, Gary同埋Daniel一齊食飯,都好耐無同佢地食飯,坐埋都好似唔係好耐無見咁,傾計都好似平時咁,食完飯去左睇Sex and the City , 我見入場既都係以女性為主,個人覺得套戲好睇,一如電視劇一樣,有好多好笑位,Samantha 年過50仍keep得好好,又有好多靚衫睇,套戲成134分鐘,都有d唔夠喉!!

黑雨端陽

網誌日期：2008-06-08 00:10

落左成日雨,由今朝黑雨到黄雨,呢d天氣,最好留响屋企瞓吓覺,今日同屋企人食飯提早做節,酒樓的端陽套餐,其中一道菜竟然是裏蒸粽??大家都在估係一碟幾隻粽,定係一大個粽,最後原來是一個大大個的粽,每人可吃到一角,姊姊說像五餅二魚!!媽媽也包了些紅豆糭,她說加了瑤柱,她包的糭細細隻唔會太"漏",有媽媽包的糭吃真幸福,將來媽媽百年歸老,就沒有這麼幸福了!!
睇新聞話禽流感又來了,真令人擔心,還有山泥傾瀉,壓死了兩個人,其中一個是孖生姊妹,無事的那個哭得肝腸寸斷,真教人心酸............還有四處水浸..........so sad ! 希望快些雨過天晴!!

凉拌

網誌日期：2008-06-07 00:25




跟住,我地沿烏魯木齊中路去揾另一間賣西藏物品的小店-天籟,這條烏魯木齊中路,有點街市感覺,有水果店,海鮮店,超市,便利店,食肆等等,我地行行吓見到有間食店,無座位只做外賣那種,門口有個牌寫住"夫妻肺片......"唔識睇d簡體字,我又唔記得乜野係夫妻肺片,以前睇電視講過,但係唔記得左,我見佢地其實係賣一d凉拌食物,其中一款食物係夫妻肺片,仲有粉皮,豬耳,筍,青瓜等,$16一份,可選三款餸,加一款菜類,個店員叫我地一定要食夫妻肺片,其實我食完都唔知係乜??anyway, 我地買左一包,佢在這些餸上加了醬油,花生,葱花,椒絲,然後攪攪吓就食得,佢地仲有賣童子雞,見佢地在鹵水汁內取起鹵過的雞,然後放在一鍋油內炸,好似好好味咁,但係要成隻買,所以我地無買,佢都亦都有賣一d好似烤餅咁既餅,我地買左一塊試,買買吓越來越多人,我地就拎住兩包野食揾地方坐低食,行到街尾都無地方可以坐低,我地就咁企响街到食,咁啱我地企正响唔記得乜野國家既大使館對面!!!!!!!!!!好,先食左包凉拌先..........................嘩!!!!真係好好味!!!!!!!!!!!!點解d咁簡單既食物,溝埋會咁好味,可能係d醬油,同埋响街食既風味吧!依家諗起都流口水.......至於個烤餅就麻麻地,無乜特別.
食完野就諗住揾天籟,原來就响旁邊,行過幾步就到,間shop好細,香港都有d類似既店,呢度d售價同香港差唔多,不過有特價,d銀耳環都幾平,阿雯買左條銀手鏈,我買左兩對耳環,同一個織布銀包仔,一d西藏香支,同埋一件衫,加埋三佰幾蚊人仔,唔算平.

古董花園

網誌日期：2008-06-04 23:55

我們沿着淮海中路行,去到H&M,阿雯買左副太陽眼鏡,出左H&M,見到思南路有間港式茶餐廳,佢話好想飲奶茶,我地就入左去試吓,結果係令佢好失望,好彩我飲檸七,唔會相差得太遠!跟住我地就在思南路尋找阿娘麵,聽說這店是林憶蓮介紹過的,找到賣阿娘麵的泰和飲食店,可惜沒有開門!!!唯有繼續行去孫中山故居,路上見到有間屋,樓上的露台,寫住古董花園,原來是一間咖啡茶店,很漂亮的店子,因為剛去完茶餐廳,所以沒有去試,在茶店斜對面便是孫中山故居,裏面好像沒有人參觀,我們買票後,在門口拍拍照,因室內不可拍照,一入到去好凍的冷氣,在上海好少有咁凍既冷氣!我地一路參觀都只見兩三個人在參觀,在二樓的保安員很主動和熱情地講解,其中有一本電子書,只要揚一揚手,會自動掀到下頁,都是他教的,參觀完文物館,再到旁邊的故居,未入故居之前,到後花園看,一片草地,還有些小花,好relax的感覺,我們拍了些照片,便進入故居,要用膠套套住雙腳才可以入內,那是孫中山先生真正住過的地方,地方也很"骨子".
行完故居我地有同一個想法...........飲杯咖啡!!!我地去返古董花園,店旁有條小巷放了些枱椅,我們進入店後還是决定坐室外的小巷,那裏有七八張枱,有三枱客人,靜靜地,我們選了兩杯焦糖latte,味道比較淡,不過環境很舒適,我們閒談着邊渴咖啡,感覺relax,臨走前上一上洗手間,個洗手間好漂亮呀!還有陣陣花香,用的都是Loccitane 的皂液呢!有點懷舊的感覺.!