CAFFE PASCUCCI

今日凍左好多,好大風,今年唔知會唔會好凍呢?凍D既聖誕,氣氛都好D.
今日去到朗豪坊見佢地整左個奇幻王國,同舊年果個有小小相似,今次用左好似象棋做型既公仔,都好多人影相,我影左幾張相,就上左去12樓,試吓開左無幾耐既Caffe Pascucci,呢度都幾好坐,食物既選擇唔太多,不過竟然有西湯飲,我叫左個唔記得Leek & 乜野既湯,果兩塊餐包放在碗的旁邊,好像米奇老鼠造型,那個加入湯的忌廉份量較少,湯的味道不錯,相信是自家制作,不似罐頭湯,由於不是忌廉湯,不會很杰身,我還叫了個Pasta Salad, 那個pasta稍為韌了一點,如果多一點olive oil會更好,至於那杯咖啡,不太像咖啡,比較creamy,可能是這店的特色,我到來時只有一枱客,走的時候卻幾乎滿座!這店下午茶時段買drinks加$10可以選muffin或$20選件cake.而且咖啡的選擇也很多,我諗我會再來hea吓,下次可以試吓其它味道!

海角七號

今日同friend去左又一城新開果間王家沙食飯,之前去過旺角果間,相比之下新呢間比較遜色,真係去上上同翡翠仲好,食完飯去左睇海角七號,套戲响臺灣既票房破晒記錄,之前响香港做左兩場都爆晒,今日正式上畫,但係唔多人睇,大把飛賣.

套戲講范逸臣係個失意主音歌手,田中千繪係model公司既model兼翻譯,因工作關係,兩人由寃家漸變情人,由組樂團失敗到成功,成套戲都好"台灣"好地道既感覺,閩南話和緩慢的節奏在頭半段都有一點悶,都唔係好迎合港人口味,幸好尾段那場台上唱歌戲拍得較精采,總算有個較完美的結局!

謙記

尋晚去左銅鑼灣打邊爐,同Samuel,Edmond, Eva, Joe, Kit, Lo, 康仔一行8人,去左鵝頸橋附近呢間謙記,我地訂左間房,好少打邊爐既地方可以有間細房,又有電視睇,間房可以坐到12人,如果一班朋友想靜d傾吓計都唔錯,我地成晚笑Eva,話佢越來越肥,我攞部相機出來,果果都話鐘意,又話都打算買咁..............我地影左幾張相又笑一餐.

食物方面都幾多選擇,我最鐘意d菜,有好多款菜苗,而且都好靚,其他肉類都一般啦!比較特別既係好多配類比你加落豉油度"點",我加左濕蒜蓉同青椒紅椒,佢地多數用炸蒜蓉同芫茜.我地都叫左三文魚刺身同象拔蚌刺身,象拔蚌條,食到好飽,食完仲有甜品同水果送tim!

舞浜駅

經過一晚休息,翌日醒來都好精神,這一天 (27/8/08) 既目的地係廸士尼,由新宿往廸士尼可乘火車往東京駅轉車去舞浜駅,舞浜駅係最近廸士尼既車站,落到去火車站,都幾多人,先揾左中央線往東京方向既月台號碼,跟住指示去揾都唔難,因為每條火車線都用唔同顏色代表,只係車站人來人往,四通八達,人人都匆匆忙忙,好像不可以停下來一樣,令人覺得又急又亂,我地跟住指示揾到月台,月台上都好清楚顯示下一班車的到站時間以及停在那邊月台,日本的火車站都有分類垃圾桶,地方都很清潔,只是比較舊一點,往新宿這些旺區的火車都比較新,車門上都有地圖和顯示屏,火車裏的座位都是軟墊的,而坐位上面都有個架,讓站立的人可以把手提物件放在架上,以免阻礙通道.

去到東京駅要轉京葉線去舞浜駅,轉車時要行一大段路,大約十多分鐘,(成450米!)沿路都有些商店,主要是便利店,藥房和賣手信禮盒的小店,過了這些商店,還要行幾段平路的扶手電梯(有點像尖沙咀的地下通道)再要落幾次電梯才能到達京葉線往舞浜駅的月台,在等車時見到月台的便利店,有招聘廣告,part time有900yen/hour,即係六十幾元,高過老麥!

京葉線的車比較舊,不過這條線都幾多人,當然,本土人去廸士尼既都好多,所以一到舞浜就好多人落車,都唔使揾,跟住d人行就會揾到迪士尼,而且無大厦遮擋,好遠都望到廸士尼既城堡,好興奮呀!!!!!!!!

Burgeroom

久久沒有和姊姊茶聚,今天去到銅鑼灣,試試看她有否時間,剛巧她也想到銅鑼灣,便相約去試Burgeroom, 地點位於加路連山道,Agnes b 斜對面,原先想去Agnes b試, 不過覺得食晚餐比較適合,所以都係下次先去Agnes b ,今次先試Burgeroom.

我地叫左兩個burger, 一個係The club 雙層芝士牛肉另一個係煎鵝肝牛肉,同埋炸雞翼,2杯咖啡,menu 無汽水果汁,買完先見佢地原來有汽水櫃,食burger都係覺得飲汽水比咖啡適合. 個雞翼熱辣辣,應該剛炸起,勝在無乜油,而果2個burger 真係非常大份,睇見都飽,份牛肉相當厚,個鵝肝煎得剛剛好,配菜有酸瓜,蕃茄,羅馬生菜,磨菇,煙肉,芝士同雞蛋,我地都食唔晒,真係非常飽,應該2個人share 一個就啱.

博多天神

到埗既第一餐去食拉麵,在歌舞技町一番街通往酒店的路上,有好幾間拉麵店,我地去左呢間博多天神,附近都仲有2間分店,佢地以平價及無料替玉(免費加多個麵餅)作招來,門口隻豬擺設用中文寫住"可以拍照",這店子很細,比較舊,約有十多個位,有三個師傅負責煮食.
佢地既豬骨湯底好似用一個好大既爐去處理,我見到店內有兩個大大個類似蒸氣煱爐既物體用來煮湯,d湯入口好濃好"奶"既感覺,d 麵係幼麵,煮得啱啱好唔會"淋",好好味,而麵既size 細細地,一個就少左d,兩個又太多,我地都無要到替玉.
價錢方面,淨麵(有芽菜木耳)$500 yen, 叉燒拉麵 $650 yen, 加蛋 $50 yen,我見好多男士都係叫淨麵加替玉, 店門口放了些供人客自取的"無料替玉"卷,不過都唔使比店員,見d人同師傅講,師傅就會煮比佢,用另一個無湯既碗裝住比客人,所以要加麵就要留返d湯!

住在新宿 Shinjuku

到左新宿當然係去酒店先,一出車站見天色有點暗,還下起雨來,我地訂嗰間Hotel Kent 酒店位於歌舞伎町一番街,由新宿駅步行約十分鐘左右就到,酒店雖然係三星級,不過設備齊全,亦很整潔,只是洗手間細左d,日本的電視都是全高清播放的,有"無料"(免費)電視,當然也有"有料"(收費)電視,不過有料電視主要是三四級的節目.
第一日在酒店附近行吓,食左碗拉麵,同埋買左d水果,就返酒店,晚上八點就瞓左,清晨四點幾起身,舟車勞頓左十幾個鐘,都好疲累,早d休息預備翌日既行程!

出發

星期二出發,約左旅行社早上5:40在機場取酒店及機票,我像之前一樣,乘的士去九龍站轉機鐵,去到九龍站才知道未有車!!!!!!!!!!要5:52先有第一班車,唯有再坐的士,我都驚截唔到車,咁啱有人坐的士來,都唔知好彩定唔好彩,去到機場5:50車費要$200,攞左機票要6:15先可以check-in !!!!!!!!!早知瞓多半個鐘,然後先至施施然坐機鐵都唔遲,事關呢班機好多人,第一次坐西北航空,呢班機以美國底特律為終點站,中途停東京,由於係波音747,所以超多人排隊check-in,不過佢地開晒d 櫃位,同埋好快手,check in完都7:00,跟住去左Pitaza食早餐,食左個芝士火腿包同青蘋果特飲,班機預定8:10起飛,但係到8:00上機既人龍仲係好長,當然delay左小小起飛啦!

4小時既航程,大部份時間都係瞓覺,因為早機,個個都眼瞓,只係派餐時醒一醒,食完就瞓,我地去到成田空港係當地時間1:15,成機人落機,多數人去候機室等轉機,大概只有兩成人去東京,加上多數係日本居民,我地行外國人通道過關,出奇地少人,記得上次要排個幾鐘,今次排幾個字就攪掂,跟住去買車票,睇書介紹買左遊客套票$3500yen,包一張去新宿既Narita Express 車票(原價$3110yen)同一張Suica咭(日本既八達通,入面有$1500yen+$500yen 按金) 坐火車去新宿要一個半小時,去到新宿三點幾,比預期早左.

回家了

五日四夜東京之旅,話咁快就完左,今次行程都唔太理想,也有點阻滯,東京呢幾日一時好熱(就落雨嗰種熱)一時又落大雨........成身大汗,要買既野又行好耐先揾到,影完d相張咭依家又讀唔到........!!!!!!!睇吓攪唔攪到,再分享吓今次行程苦與樂,今日先休息休息!

又打風

無端端又打風,呢個鸚鵡又迫近,唔知打唔打得成,悶熱在兩日應該會落大雨.

成個禮拜都唔係幾精神,上次睇完戲頭痛左兩日,呢幾日又瞓得唔好,今日都好頭痛,原本想去睇戲都唔夠精神無去到,忍倒都唔想食药,最終太辛苦都要食!

尋日就去左Super Sandwich 食焗薯,都好耐無食,最鍾意食西蘭花芝士焗薯,仲落左好多芝士tim,一路食我望到佢地個招牌原來仲保留左Oliver's 個字,以我所知好耐之前 Oliver 係一間高檔士多,因為賣外地食材的小店,像間雜貨店士多仔,那時還沒有City Super, Great, Gourmet 呢d超市,好多人想買些優質的外地入口貨,都會去Oliver,我只記得買過些特別的糖果朱古力,而Oliver就在海洋中心廣東道入口的扶手電梯底,後來在扶手電梯底的另一邊賣三文治,只記得那些三文治好super,好大份...........後來Oliver士多不見了,漸漸發展成現在的Super sandwich.

Journey to the Center of the Earth

睇左3D版,入場時派左個3D眼鏡,個眼鏡好重,可能我唔夠精神,睇一陣已經有d頭暈,仲要用手託住個眼鏡..................講返套戲,當然無乜劇情可言,成套戲得幾個人,主要係玩電腦特技同3D效果,都幾有趣,不過睇完真係好疲累!!!!!!!!!!!!

相機

想買部相機,用緊果部又開始壞壞地,個Menu掣無反應,教唔到拍攝mode,我諗緊買部Canon IXUS80I, 細細部唔太bulky, 不過個mon得2.5吋,如果3吋mon既IXUS860就大部d厚d,個樣無咁靚,仲要貴仟幾蚊!我諗都係會買2.5吋呢部,平d,佢有5種色,銀色就太普通,粉紅色唔夠粉色,好似灰灰地(上排右一),藍色又係灰灰藍藍,剩返下面既香檳色同朱古力色,香檳色個色都好靚,但係太令,有d反光,睇落似金金地色,朱古力色好特別,好實色,唔令,比較man...........都唔知要邊隻色好,等我再諗吓先!

奧運開幕了!

2008年8月8日8時正,奧運終於都開幕了,開幕式只看了小部份,而升國旗同埋點聖火一刻,好感動...................好熱烈既氣氛,真不敢想像身在現場的震撼氣氛有幾大!能夠參與其中的人,一定畢生難忘,希望今年之內有機會可以去北京看看................無得去現場睇鳥巢同水立方,不如睇吓模型吖! 我見到都好興奮! ARUP 整左個展覽,有晒鳥巢,水立方,機場同埋唔記得乜野building,响又一城 ground floor 有得睇!