btw

平時去土瓜灣，都經過呢間餐廳幾次，今日終於去試吓，呢度格局同一般茶餐廳差不多，賣點係有機械人送餐，上網落完單之後，就會有機械人將你嘅食物送到去你張枱前面，不過就會由侍應將食物攞出嚟俾你，食物嘅質素同而家好多大型嘅茶餐廳差唔多，而且食物嘅選擇都幾多，下次可以再試吓其他嘢食！

 

田中壽司

最近疫情都幾嚴峻，第五波 Omicron 傳播力婆高，不過相對死亡率就好低，唔通而家真係要與病毒共存？

因為疫情嚴峻，周圍都靜咗好多，今日去咗試呢間壽司店，其實佢開咗冇幾耐，個門面有D神秘感，因為唔係好望到裏面，令到人會卻步，感覺上好似好貴，不過其實睇吓個餐牌，價錢都係合理，午市套餐都係百幾蚊，當然有D壽司餐會貴D，近$300都有，貪佢冇乜人，就入去試吓！

我叫左個十二貫壽司的午市套餐，見到有三文魚就覺得麻麻地！不過得一件就算啦！佢有大拖羅、蟹腳、赤貝、蝦、海膽等等，海鮮嘅質素都唔錯，價錢合理，套餐有埋麵豉湯同蒸蛋，個蒸蛋幾好食，入面都有D海鮮粒粒，店員服務都好好，可能因為只得一兩個客，而家冇晚市堂食，佢哋收五點！

 

飯局作客 - 1月生日飯

今年第一個生日飯局，係好友的母親，而家都係我朋友，舊年我生日佢都有嚟食飯，所以到佢生日我哋又同佢食飯，今次去好友屋企食，我哋準備好食物，等壽星女收工過嚟食飯，今晚有海鮮、牛肉、牛展、貢丸等等！壽星女同埋佢老公，以及另一個兒子，一齊上來佢大仔屋企食，我哋食得好開心，又可以多D飯聚！😄 不過今次冇買蛋糕🎂，因為佢個仔話佢哋唔興切蛋糕，最重要係驚食唔晒！

 

The Place

前兩日去完大酒店，我今日約好友出嚟山下心！

今日約咗去QE睇醫生，睇完醫生去會合好友，先去旺角花墟行一陣，因為好友早前搵風水師傅睇過屋企，建議佢擺羅漢松，所以佢想買一棵細細地嘅擺喺屋企，在花墟行咗一個圈，揀咗棵細細地嘅，因為佢話要擺床頭，所以唔買咁大支，行完花墟，已經天黑，走去搵嘢食！

好又話想食buffet，我哋梗係奉陪啦，去咗朗豪酒店，其實酒店改咗名好耐，叫做 Cordis ，成日唔記得佢中文叫做康得思！佢呢度食 buffet 嗰間餐廳其實都幾出名，不過從來未去過，我哋去到門口見好多人等緊入座，諗住都未必有位，埋去問吓竟然有位！真係好彩！聽晚開始冇堂食，諗住好多人爭取最後機會今晚出街食嘢！

呢度食物嘅選擇都幾多，當然我哋重點係食一D”回本”嘢 🤣，生蠔海鮮呢啲就唔少得，而且佢嘅質素都唔錯，因為疫情關係，所有食物都唔可以自己攞，由職員攞俾你，生蠔每次最多攞三隻，龍蝦同埋海蝦每次都係最多攞兩隻，所以都要行幾轉，海鮮好新鮮好好味，熟食我哋食得唔多，都係燒牛肉、鵝肝之類！片皮鴨都好食，甜品有榴槤撻，都幾好味，榴槤好香，只係奶嘅成份多咗D，如果比重多番少少榴槤就好喇！整體食物嘅質素真係唔錯！我哋已經 plan緊下次幾時再嚟，不過下次可能要食lunch ☺️

 

Pizza Maru （旺角）

之前一直想是呢間餐廳，今晚終於去咗試，旺角呢間分店嘅店員全部係講英文嘅，用餐時間亦都有限制90分鐘，我哋叫咗一個Pizza同埋炸雞，食物嘅味道都唔錯，份量亦都唔少，下次可能人多啲先至可以叫多啲嘢食！

寰宇殯儀館

早前好友的兒子去世，傷透大家的心，昨天在寰宇殯儀館設靈，都係第一次去呢個殯儀館，一星期內去兩次殯儀館，真係好唏噓！

好友昨天在靈堂哭了一整天，作為一個母親，冇嘢比失去自己嘅孩子更痛苦，幸好她丈夫很堅強，能夠強忍痛苦支撐大局，而且還有一個女兒，去氹吓媽媽開心！

小朋友今日大殮，主要都係一D親人同埋我地幾個朋友，蓋棺之前，由父母睇吓棺木內有D乜嘢，擺成點，然後最後瞻仰遺容，全場每一個人都哭成淚人 😭😭😭😭，因為小朋友好像睡了覺一樣，令人萬般捨不得！婆婆同媽媽相擁痛哭了很久 🥺🥺 因為親人全部都係長輩，而妹妹年紀又太細，所以家人未能夠送佢最後一程去火葬場，我們作為朋友就代佢哋過去，由另一朋友幫忙撳掣！然後我哋返去紅磡會合佢家人，一起食晏，幸好媽媽在離開靈堂之後心情平復了不少，大家都冇咁擔心，我哋食完飯再各自回家 ！

蜘蛛俠 不戰無歸 Spider-man No Way Home

Peter因為俾人爆咗佢係蝙蝠俠嘅身份，令到佢飽受滋擾及欺凌，除咗佢自己亦都影響到佢女朋友 MJ 同埋佢老友，甚至被大學拒收，為咗令到佢哋可以入到心儀嘅大學，佢就去搵奇異博士幫手，不過奇異博士話要令人忘記佢係蜘蛛俠，就會令到所有人都唔記得，在奇異博士施咒嘅時候， Peter因為想改為只有佢女友記得佢係蝙蝠俠，後來又想梅姨，影響到奇異博士施咒，令到不同宇宙之中認識蝙蝠俠的人都出現了，原本奇異博士想將他們送回原處，這代表佢哋可能要死亡，蜘蛛俠阻止左佢嘅做法，希望能夠說服佢哋做返好人，結果令到事情越搞越大…….！

套戲都有D意外驚喜，不過為免劇透，所以都唔多講，整體來講成套戲都好抵睇🤣，真係值得一看 👍🏻

睇完戲我哋衝出去海皮嗰邊，見到如心廣場唔似有倒數，等到最後幾分鐘佢先出現倒數嘅字，我哋影下相，最後幾秒叫好友拍片，點知佢淨係影住大廈冇影到人😅，我即刻攞架手機出嚟補飛，但係都過咗時間😆

 

飯局作客 - 倒數

 

今日約咗好友一齊倒數，先去好友屋企食飯，我哋先去買餸，其實大部份嘅食物已經買咗，仲有少少嘢我哋買埋，跟住就上去準備，等埋另外兩個朋友收工，就可以開餐，今晚有牛扒、壽司、帆立貝刺身、巴馬火腿、凍豆腐沙律、滷水雞翼同埋水果，食物都好豐富，我哋食到好飽，好友之前係同哥哥一齊住，但係相見好同住難，好友對哥哥好多不滿，最攞命係哥哥嘅鼻鼾聲好勁，令到好友冇覺好瞓！最近佢哥哥終於搬走咗，所以好友非常之開心，終於可以好好地瞓一覺！食完飯我哋就去睇戲，去青衣睇，諗住睇完就喺海邊望住如心廣場倒數！

鑽石山殯儀館

 

之前老朋友離世，今日設靈，去鞠個躬，第一次去鑽石山殯儀館，呢度嘅靈堂比較細，因為老友嘅朋友好多，我哋要在門外加櫈坐，靈堂出面有D空位，都可以坐到D人，見返好多好耐冇見嘅朋友，大家都係寒暄幾句，我都係坐左一陣就走，之前上網訂左個花牌，以表小小心意🙏🏻

Mild

前兩日在九龍城等車時，見到呢間餐廳，見佢新開，就去試吓！

食晏時間 full 晒，去一去銀行先再返嚟，過左 lunch time 返嚟，D人走晒！大把位 😆

店外寫住因為新開，食物製作時間會耐D，叫人要比D耐性等吓！店係新開，職員都好生手！餐牌都好簡單，試左佢個 三文魚 all day breakfast ，又試左白松露野菌扁意粉，同埋香辣蒜片意大利麵，咖啡就飲咗latte，不過拉花就拉得唔靚 🤣 咖啡要轉燕麥奶，店員話用晒要即刻去超市買，所以等得耐左😅

 

飯局作客 - 冬至飯

今日同好友食冬至飯，佢哋買定餸打邊爐，今晚有白鱔、蝦、牛肉、扇貝、大蜆等等，今次份量控制得啱啱好，冇食剩好多嘢，淨係剩咗D菜！我哋食得好開心吓！食完飯坐低一齊傾偈，都傾咗好耐，我哋一齊研究蘿蔔糕食譜，因為下個月要一齊整蘿蔔糕 💪🏻💪🏻

 

越粵棧

今日做冬，去咗九龍城食飯，呢間之前食過一次，我貪佢有螄蚶食！當然要叫返碟，今日D螄蚶都幾細隻，不過都好乾淨，好味！另外叫咗燒雞半隻，豉椒炒蜆，同埋炒菜！食物都保持水準 👍🏻

祥仔辣辣

今日出尖沙咀行吓，先去碼頭果間 Arabica 買飲杯咖啡先！

在海港城出面影下聖誕燈飾，跟住去商場入邊搵嘢食，呢間祥仔辣辣一路都想試，今日就去試吓佢！

叫咗個海南雞飯，佢有四款將，除咗一般果三款薑蓉、醬油、酸辣醬，多咗多麻辣醬，個味道幾特別，個人比較喜歡平時嗰三款多D，個海南雞係冇骨嘅，味道就不過不失，個飯都係，另外跟咗杯紅豆豆漿，都冇乜特別！😅😅

 

阿荔制麵

今日又去食車仔麵，試咗呢一間，價錢略為貴咗少少，因為份量都真係幾少，反而個麵嘅份量就幾多，但係D餸嘅份量真係少，相對來講就唔係咁抵食！佢哋話最出名係豬手，我就覺得味道一般，而且D豬手斬到好細粒😅

 

富裕車仔麵

最近荃灣大壩街果邊都開咗幾間車仔麵，今日試吓呢間，店入面嘅面積好細，只有三張四人枱，叫咗碗車仔麵試吓，味道比較清淡，都啱我食，係份量細左DD！😅

 

HeSheEat （旺角）

食完居酒屋，去旁邊呢間HeSheEat 度食甜品，都好耐冇嚟，我記呢間甜品舖嘅第一間分店，就係旺角呢間，當年佢啱啱開嘅時候已經幫襯過，已經係2013 年嘅事，依家佢開多左分店，而且成個餐牌都唔同晒，以前佢最出名係疏乎厘布甸，而家主要係食疏乎厘pancake 🥞，而且仲有主菜食，我哋因為食飽咗，所以淨係食個疏乎厘pancake，佢個pancake係比較實少少，冇日本食嗰D咁有空氣感，不過味道都唔錯！