ZUC.CCH.ERO

食完炸雞去食甜品，同一座大廈另外一層，店內只有4個客，有 Bar 枱同普通四人枱，店內的燈都像雲一樣，店員全女班，餐牌選擇唔多，款款造型都好靚，我地揀左一款叫做 Break the tear ，另一款叫做 Para para Sakura ！

先來 Break the tear 藍色水滴型外殻，是用糖吹出來的，先敲碎佢先食到，裡面仲有野食，打開外殻時有煙出，有一陣煙燻氣味，個殻唔算好甜，𥚃面有一朶花，同一D碎碎的，老實說食唔出係乜，有D似meringue ，但係冇乜味，講語上好味！而 Para para Sakura 好明顯棵樹係棉花糖，樹幹係朱古力，旁邊果一堆有榛子朱古力醬，紅色果D應該係紅菜頭做的啫喱，你個味道唔錯，係個朱古力樹幹比較硬！我哋叫咗兩杯飲品，我果杯花茶個茶隔係珍寶珠型，而檸檬茶的糖水和檸檬汁，就用 test tube 型的樽載，都得意！

Sodam Chicken

熱左幾日，今日開始落雨，冇阻我去銅鑼灣食嘢野先！

去左耀華街食韓國炸雞，呢坐大廈成座都係食肆，餐廳地方唔係好大，人客亦都好少，呢度有電視不斷播放K pop的 MTV，見到D人客都係比較年輕，而且女仔佔多數！我哋叫咗甜酸炸雞、魷魚仔炒年糕，又帶咗兩杯飲品，先來炒年糕，味道比較辣，都可以接受，炸雞份量都唔少，有埋手套比你，食起上嚟都方便D，味道還可以不過雞肉唔夠juicy，比較乾身！至於飲品就唔OK喇，我果杯菊花特飲，好藥水味，溶左D冰溝淡左先至易入口D！

High Street grill & 糖痴豆

又到四月之星生日晚餐，今日三缺一，缺席的好友因為媽媽病了，所以要到醫院照顧媽媽不能出席，希望她的媽媽早日康復！今次去壽星女屋企附近食飯，去咗西營盤高街，第一次去呢度，成條街都幾多餐廳，好友因為住附近，所以都熟悉呢度，佢話食過好多次，覺得呢間OK ，所以大家一齊試下！

去食飯之前，諗住去地鐵站買蛋糕，點知西營盤站係冇餅店，出咗去街外面又搵唔到有餅店，在高街亦沒有餅店，唯有去餐廳睇吓有冇，去到餐廳好友話唔使買蛋糕，話食完飯之後去食甜品當食下蛋糕！

我哋叫咗一客牛扒配薯條、薄餅、凱撒沙律同埋青口，凱撒沙律有一大塊煙肉，我唔喜歡吃煙肉，所以好友分左佢，青口都幾大隻，味道唔錯，薄餅個皮好脆，芝士可以拉得好長！好味！牛扒都Ok，整體食物都Ok！埋單時用 Citibank 送紅酒！其實應該一早問，可以食飯時飲，好彩可以成樽攞走！

食完飯行上去般咸道食甜品，去左間甜品小店，食個傳統甜品，我叫左腐竹雞蛋糖水，好友叫咗楊枝甘露，同埋一個雜豆甜品，食完甜品，行去西營盤站搭地鐵，原來有般咸道果個C出口去高街，近過由B2出口去，下次可以由C出口落去，唔使上斜路！

Namo Avant Thai restaurant

相約好友去尖沙咀食飯，呢間餐廳在尖東，之前同屋企人去過樓上酒樓飲茶，呢間餐廳有室外位，原本想坐室外，但係怕多人食煙，都係坐室內，今晚唔算多人，雖然係假期，應該好多人都去咗旅行，食肆都唔使點樣等位，我去到佢地都未到，坐低睇住menu 等！

佢地好快到埋，我地叫左大蝦冬陰公湯、生蠔、炸蝦餅、雞肉生菜包、牛肉沙律、炒飯，我地上次出來食飯已經係兩個月前，今日見面，又傾到雞啄唔斷，好友早前與太太鬧離婚，依家關係得到改善，值得高興！

食完野叫甜品食，叫左芒果糯米飯、薑汁焦糖布丁、朱古力鬆餅配熱椰子汁，呢度食物質素都唔錯，甜品味道一般，價錢偏高，份量較少，始終覺得食泰國菜，都係九龍城比較平靚正，貴價泰菜可能精緻D，但係總覺得唔夠地道風味！

靚煲皇

又飯局！

好友生日，難得今次比較齊人，約左去旺角食火鍋，第一次去呢間，位置比較隔涉，去到見到冇圓枱，只有幾張方枱拍埋一齊！我地十一個人，長枱真係唔方便傾計！食野都唔方便，下次應該冇圓枱就即刻轉場，

我地叫左兩個湯底，一個招牌湯底，有豬手、扇貝、吊車片等，味道基本上好似豬骨煲咁，我就唔多喜歡豬骨煲湯底，情願揀清湯底，另一個蕃茄牛腩湯底，我無試，因為距離太遠，食物方面，我地叫咗都係一般火鍋配料，食物質素都Ok，不過呢度比較適合二至四人食，人多真係唔好坐，見到有D枱在室外，如果天氣唔熱，坐室外就冇咁侷促！

今日有朋友攞左D有機雞蛋比我，因為數量有成60隻，趁今日飯局帶左D比好友，只係留幾隻比自己！

糖宮

我地食完潮州野，由田心消防局行過去積信街搵甜品食，行過田心消防局見到有一個悼念區，放咗好多花悼念早前救人殉職的消防員，我地沿路經過雲疊花園、田心村，再經過地鐵站過去，足足行左十幾分鐘，食飽左行下都可以幫助消化！

行到去甜品店，剛好有張六人枱，我哋叫咗四個榴槤爺爺、椰皇燉蛋白同埋寒天椰皇凍，一食榴槤，就想起我地以前一齊食榴槤的日子，希望有日再可以一齊食榴槤！呢度啲甜品味道都OK，不過價錢貴咗D！

生昌潮洲海鮮酒家

一個月前已經約左的飯局，去大圍食，上次食泰國菜果陣講左今次要食潮州野，好友食過呢間話 Ok，所以去食！

呢度係下徑口村，一排村屋地舖相連，地方幾大，有室內同室外，我地坐室內，我地六個人，叫左條鹽焗烏頭、豉汁蒸鱔、蠔餅、韭菜豬紅、鵝片、花枝蟹棗、糯米卷，今日唔係好肚餓，先試下條烏頭，打開魚皮，見到條魚有黃油，好靚，見魚尾有個label，有証書，食落口都知係好品質，正！個蠔餅唔係好大塊，但好厚！蠔仔唔腥，好好味！最鐘意食果兩樣都好好味！其他都好味，係豬紅一般。

成晚大家傾唔停，好開心，我地仲叫左個冰鎮菠蘿，都幾甜！我地傾左都好耐，跟住去搵糖水食，走果陣見到有螄蚶賣！早知叫碟食啦！見到呢到真係好多野食，下次可以再來！

外星生命 Life

在大空站內，六名太空人取得火星的生物，這是有史以來取得最遠星球的生物，他們之中一個生物學家 Hugh在實驗室測試這細胞，用不同的溫度和物質刺激它，最後令它生長起來，而且速度頗快，通過和地球方面的聯繫，美國的學生為這火星生物命名 Calvin ，在一次測試中 Calvin突然襲擊 Hugh的手，Hugh 暈倒後，其他人鎖了實驗室，不敢進去，Calvin 非常聰明，懂得逃離實驗室裏的密封箱，另一太空人 Rory嘗試拯救 Hugh，救出Hugh 後，自己卻被困在實驗室內，更被 Calvin 殺害，而聰明的 Calvin 尋找到離開實驗室的方法，衆人知道無法殺死 Calvin，並意識到要阻止Calvin 去到地球，要不惜與它同歸於盡........!

套戲頭段有少少悶，直至Calvin 出現，氣氛變得緊張，睇到好肉緊，結局有點出人意表！成套戲都係在太空船內，死侍 Ryan Reynolds 演出時間好短，Jake Gyllenhaal 已久未見佢有新作，真田廣之唔同左樣，唔認得佢喇！如果唔係呢個 cast 都未必有人睇，不過睇落都幾好睇！

Muji

又一城的 Page One close 左一排，改左做 Muji，除左同一般 Muji 一樣賣衫外，仲有 café 同埋書，見到有D意粉汁賣，個人都幾鐘意食意粉，所以買左D意粉汁同咖哩，可以伴意粉食，簡單方便！