江順河鮮

連續三日假期話咁快就完結！呢幾日懶懶閒，乜都唔願做！連原本想去剪髮都無去！

不過唔少得同朋友食吓飯！願本去尖東食，但係唔就腳，改左去我近期最愛既 isquare，呢度有幾十間食肆，可以慢慢逐間試！

今次揀咗呢間食順德菜既，之前我地成日去佐敦一間順德菜館食飯，後來間野搬左幾次，最終都執左！我諗可能响呢度會揾返果種口味！

我地叫左兩碟小食，煎尖椒同燒腩仔，個尖椒都幾好味，d魚肉有醃過，唔使點豉油！燒腩仔不過不失，當然不及容記小菜王，我地仲叫左石板燒汁生蠔，污糟雞，砵仔鬼馬焗魚腸，啫啫芥蘭煲，大良鮮奶炒蝦仁同埋蒸魚，d餸上枱時個個都嘩嘩聲，因為好大碟！係個碟好大，好似個芥蘭煲咁，個煲咁大，其實少過半煲，碟蠔得六隻，但係個鐡板就大大個！

個大良鮮奶都幾好，清清地，焗魚腸就大失所望，可能係廣東菜，揾順德師傅做就差小小，蛋比較實，魚腸無味，大家最想食既一道菜，大家吃了都無講嘢........個蠔係最好既一味菜，好香唔會腥，熱辣辣，好味，我見好多枱都有點，至於條魚，始終係河鮮，當然不及海鮮，點都有d淡水腥味！污糟雞好似荷葉蒸雞，雞肉幾滑，不過好細件，無乜肉！

食完飯一行五人，行過去厚福街食甜品，果度有叫糖仁街既甜品店，去到大排長龍，大家都有點累，唯有放棄！下次再去吧！

愛麗斯夢遊仙境 Alice in Wonderland

又一套3D電影，同樣好難買到 imax既靚位！想去 isquare，但係佢哋既 imax 仲做緊阿凡達！仲要未來果d預訂日子都無晒靚位！我諗佢隨時會做到復活節！

套戲雖然係一個好耐之前既童話故事，但係我無乜印象個故事詳細內容，今次睇完都唔知同原著有冇大分別！

故事由小小愛麗斯6歲開始，小小愛麗斯的父親是個很有遠見的人，愛麗斯常常夢見自己身處一個仙境，自覺自己是個瘋子，父親沒有因此而責怪她，還安慰她！十三年後愛麗斯的父親去世了，母親安排她嫁予貴族，在求婚宴會上，愛麗斯見到在夢境中見過白兔，她隨着白兔走到一處地方，開始她的奇妙旅程！結尾仍不忘提一提China!

故事大致同獅子女皇魔衣櫥差不多！小童冒險旅程，中間有勇氣的考驗，最後當然是戰勝壞人！當然加了3D，視覺效果非常的漂亮！

真心泰國菜館

睇完戲去食泰國菜，响朗豪坊地下UA售票處的樓梯旁，有個不太起眼的電梯，乘電梯上二樓，呢度地方細細的，我還是第一次去，坐下來，可由窗向外望，見到盛八的招牌，我地叫左幾樣野食，大家都唔太肚餓，個咖喱青口幾香，不過得好少，但係好多泰式矮瓜，個豬頸肉跟既辣汁，無泰式甜酸醬咁夾豬頸肉咁好味，炒飯就好辣，本來無叫飲品，因為太辣而叫左野飲！我地叫左薄餅食咖喱，都食得哂全部野食，送埋甜品椰汁糕，都清埋！

食飯既時候，阿兒宣佈婚訊，真係估佢唔到，原來靜雞雞拍左四五年拖！依家仲話九月結婚tim，阿魚先至結左婚三個月，就到佢當日既姊妹結婚！今次仲睇緊阿魚d結婚相，蜜月相，下次要睇阿兒既婚紗相！阿魚去左馬爾代夫渡蜜月，果度好靚呀！佢哋仲住水上屋tim！睇相睇到我都好想去呀，我諗來諗去，應該只有一個人會同我去，不過十小時飛機................等我諗吓先！話咁快，個個結婚既結婚，離婚既離婚，生仔既生仔........咁就過左十年.........當年一齊做野既情景，好似前兩年既事咁近！

天生不是寶貝 Precious

呢套戲一早想睇，今日去左睇，劇情講外表肥胖的女主角Precious先後遭父親強姦而懷孕，母親不但沒有理會，更不時對她虐打，她的存在價值就只有福利金，Precious和她那個有唐氏綜合症的女兒就是福利金的來源，16歲的她，在第二次懷孕時被學校終止了課堂，老師轉介她到另一間特殊學校，在那裏，她遇到一班對她好的人，令自我價值低，不懂與人溝通的Precious開始成長，在兒子出世後，她帶著兒子回家，再被母親虐打，眼見兒子被母親拋在梳化，她决心離開這個家，幸得她的朋友和老師的協助，她才可在中途宿舍暫住，此時她的母親到來探她，告知Precious她父親的死訊，他死於愛滋病............後來她母親向社工表示想與Precious團聚，演社工的Mariah Carey向她了解Preious被侵犯的情況時，這個母親含淚道出Precious自三歲起被侵犯........令本來視女兒為寶貝(precious)的母親因女兒變了情敵而不再愛她..........！

女主角的悲慘遭遇，在見到一線生機時却不幸感染愛滋，令人感慨！電影中加插了Precious的幻想，淡化了悲慘的感覺，尾段的幾場最為感人，幾個主角都分別得獎，個人認為演母親的女角演得最好.

今晚竟然在家滑倒，真想不到會發生，幸好只是擦傷了小小！

華麗后台 Nine

原本想去 isquare睇Precious，但係呢間無上，就改睇華麗后台先，雖然去過幾次，但係次次都好趕，今日有小小時間，行過去House 3果邊睇吓，次次都係去House 1 /2 入場，見得好少地方比人等入場，而House 3呢邊有好大既地方比人等入場，而且都幾靚！

套戲無Chicago咁好睇，雖然集多位影后的演出，只是故事未算特別，可能太深我唔明掛！個故事講男主角係一個江郎才盡既導演，在逃避現實之餘，同時周旋在幾個女人之間！多場歌舞去表達各人的想法，老實說中段和尾段有點慢了下來，都有點悶！

寡佬飛行日記 Up in the air

今個星期有好幾套戲上，套套都想睇，先睇左呢套，故事係講佐治古尼係一個要四圍飛去美國唔同地方既公司炒人，而佢亦都非常enjoy呢種無家既生活，佢亦希望儲到佢心目中既目標飛行哩數，直至公司請了一個新人，大胆建議用net meeting形式取代面對面炒人，以減少出trip使費，令佐治古尼唔可以再儲飛行哩數，仲要安定下來，公司為左說服佢，就安排呢個新人跟佢去炒人，呢段時間，佢識左個同佢好夾既女人，另外佢個妹妹結婚，未來妹夫逃婚，同埋新人對感情既睇法，令佢對自己既諗法有好大既改變，當佢想改變自己既生活時，卻又發生意料唔到既結果！

套戲有d對白都幾有趣，幾到肉，年輕既新人，講嘢一針見血，講中哂中年人既死穴，結局都幾出人意表！

Enchanted Garden

前日係小姨甥仔的生日，一家幾口去左迪士尼酒店食Buffet，之前去過好幾次，不過對上一次都好耐之前，好似係前年的Halloween，佢哋日頭入咗去迪士尼樂園玩，我就夜晚入去join佢哋，呢間餐廳嘅buffet食物都係一般，勝在可以近距離同米奇米妮影相！而且Annual pass有得減$100，上次入去迪士尼因為太多人排隊而無同着新年裝既佢哋影相，今次可以影返夠喇！除左米奇米妮之外仲有Goofy，Goofy一見到姨甥女即刻走埋去攬住佢，可能認得佢，仲好攪笑咁同佢影相！食完野就食蛋糕，個蛋糕係米奇做形既朱古力蛋糕，米奇仲會一齊拍手其他人就一唱生日歌，影完合照又好似之前咁哂埋相，整埋鎖匙扣比我地，我地買左幾張相，我就要左同米奇影果張，小姨甥都累得很，最開心果個應該係我！哈哈！

狼人 Wolfman

套戲令我諗起之前套福爾摩斯，時代背景好相似，只係呢套講狼人，男主角原本在美國生活，後來因弟弟失蹤了，他的未婚妻寫信要求他協助，他離家多年，再次回到陰陰沉沉的家，此時弟弟的屍體被發現了，他為了查出弟弟的死因而留低，附近的居民都傳說是巨型怪物所為，他在吉卜賽人居住的地方調查時，就被抓傷了，他被送回家醫治，但傷口神奇地快速痊癒，因為被狼人抓傷後，過一段時間傷者便會在月圓之夜變成狼人，而且在控制不到的情況下殺人，直至天亮，後來他更發現了父親的秘密.........！

套戲好多突然撲出來的情景，真係比佢嚇倒吓！安東尼鶴健士一貫的陰沉角色，令我詅起佢套沉默的羔羊！！

唉下個星期四大量新戲上，好幾套都想睇，不過最近飯局頻繁，可能唔夠時間去睇！
呢幾日好潮濕！好唔舒服，開抽濕機又凍！！

Cafe Allegro 雅廊

今年公司的團年飯轉一轉唔食中菜，去食buffet，在大家無乜意見既情況下，又只有一個人有提議，我地去左尖東富豪九龍酒店地庫果間雅廊，個廣告話$318龍蝦海鮮自助餐，仲有折，去到見有好多學生，teenage果d，唔知係咪星期二用渣打咭有68折，所以咁多人，食物方面都係d大路野，不過無生蠔，冷盤有長脚蟹，翡翠螺，青蠔，蝦，熱盤都係中菜，咖喱，雖然有龍蝦伊麵，不過好少量，我都無食到，燒味就更加唔會食，另外會每人會有半隻焗龍蝦，個sauce係wasabi都好少見，以二佰幾食餐算不過不失！

Patisserie Tony Wong

終於去左九龍城試 Patisserie Tony Wong既蛋糕，早前從雜誌看到Tony Wong 離開了帝苑，自立門戶，之前他與謝寧合作開的餅店就在這店過幾個舖位，未知甚麼原因不再合作，抑或他只是顧問形式的協助？但我相信蛋糕才是他的最強，老實說，我很久沒有去過帝苑了，根本唔記得佢既出品係點，但係學過整蛋糕既朋友都知，佢响蛋糕界較有名氣，而且出過幾本書，亦係信心既保證！聽講帝苑還要從日本請師傅來頂替他呢！

去到店外，見門面有點歐洲小店feel，店裏約有六七人，都在選購和訂餅，見不到Tony Wong本人，餅櫃裏放了招牌玫瑰花形蛋糕，全部已preserved，,想食就要訂。我唯有買西餅，選了最出名的Napolean，還有些唔記得乜嘢名既餅，有朱古力，有榛子，同埋白色既mousse cake，我沒有試哂所有，只食左Napolean同白色果件，其餘都留給家人食，個Napolean好好味，好香脆，拿破倫餅係我既"飛佛"，我睇書見係用紅桑子做，而我買果個係用車厘子，不過都好好味唔太甜！白色果件就普普通通，裏面係apricot果醬，其實都好啱我食，因為無咁甜！下次試吓朱古力既cake先得，我見門口個牌寫住情人節只有玫瑰花形蛋糕兩種味供應，唔知仲洗唔洗訂呢？

Cafe Corridor

很久很久沒有去銅鑼灣，今日走了一趟，時代廣場加了扶手電梯後，還是第一次去，地下的賀年裝飾花瓶，看上去好像扶手電梯是一條水管，倒水入花瓶內，花瓶內有幾個巨型萬花筒，四處都是國內遊客，拍些照之後上樓上行了一陣，還是不敢試那長長的電梯，只試了兩層樓的新電梯便走了。

落到地面，行過對面那棟舊樓，去試試那間店其名的Cafe Corridor，在這條小巷盡頭，小小的店內，有着自家的風格，牆上的照片，手寫的黑板menu，有種年輕人部屋的style，咖啡是畫了花花裝飾，味道不錯，french toast用法包做，看起來像片煎鵝肝，味道不太甜，清閒地坐吓傾吓計都唔錯，只是地方有點細，枱之間有點近，說話可要細聲點！

mi2cool

今日去又一城，行到邊都覺得冷清清，可能promotion未開始，d人要等到有野送先買嘢！所以個商場好靜！去到H&M見到做減價做左一排，已經好耐無新貨返過，d衫好似由夏天賣到冬天，啱啱先打通左三層，好似停左咁，唔知以為就執！去Log-on一樣咁靜，上到food court多返d人，不過好少見咁多坐位比你揀，仍然係mi2cool最多人，呢間麵店都開左一段時間，好鐘意食佢地d啜啜麵 (蒟蒻麵），不過佢哋都有佢哋既堅持，唔係款款麵都可以轉麵底！

d小食都唔錯，其實價錢都唔算平，不過好食就貴少少都無所謂，何况呢度好食又平既食肆唔多！

今日睇電視介紹添好運，仲未有時間去試，事關要預等好耐，可能再遲d先！

前幾日土瓜灣冧樓，真係估唔到這個文明城市都會有這樣的事情發生！真係覺得自己好幸福！

波西傑克森：神火之賊 Percy Jackson & The Olympians: The Lightning Thief

食完飯就去睇呢套戲，個故事有d似Harry Potter+Xmen既戲種，魔法加特技，故事講一班由天神同人類所生既人，一齊住在一個地方，有d唔知自己身份既，就同人類一切生活，而果d天神係古希臘既宙斯，同另外兩個唔記得個名既天神，係三大天神，主角波西係一個天神既仔，本來過住平淡生活，因為天神的"閃電"被偷去，波西被懷疑係果個賊，而令佢發現自己的身份，繼而有一連串既探險歷程。

比Harry Potter較為無咁細路仔，較接近Xmen，加上多場打鬥，都比較啱青少年以上人士，喜歡睇特技電影既朋友就一定覺得好睇！

八月花

網誌日期：2010-02-21 00:00

前幾日好病，都堅持住去睇戲，因為朋友一早買左飛，我諗住最多到時响戲院眠一眠，坐車出去時，睡着了一陣，就好左d，到埗後再食埋藥，當堂好左好多！

每年情人節商場都幫聖雅各義賣玫瑰，今年既玫瑰最閃爍，因為加左led燈，而花上亦加了金粉，所以好靚！

第一次去又一城間八月花，因為肚唔舒服，原本想食壽司都無去，我地叫左set dinner有翅，有蝦，煮得比較清淡，都好啱食，份量好少，好似乳豬咁，一人一片！最多係茄子，一來味道麻麻地，二來份量較多！呢日病就夠食，平時一定唔夠！仲有一碟菇，好似鮑魚咁大，無影到相，伴左兩條露筍，都一樣好清淡！仲有糯米飯，我地都無食哂呢！

牛藏

網誌日期：2010-02-18 00:16

上次去睇戲時，去左戲院旁邊果間牛藏(店名個藏字少左幾劃，揾唔到果個字)試吓，呢間日式烤肉店，好似和幸同盛八咁，不過呢度d食物選擇少d，我地除左order 和牛盛合之外，只係叫左黑豚肉，同埋冷烏冬，今次夠哂時間食，一碟和牛有五款肉，碟黑豚肉薄薄幾片燒起上黎就好搶火，原本想叫碟菜，但係得沙律同粟米蕃薯，所以叫左碟枝豆，個烏冬就無乜味，好淡，原本想叫手打烏冬，但係手打烏冬係跟牛肉既湯烏冬，都係食冷烏冬算！今次食得好飽呢。
呢幾日又凍返，快d暖返啦！好凍呀！！！

緣滿情人節 Valentine's Day

網誌日期：2010-02-17 00:02




這陣子忙極累極了！昨天還病起來！吃過午飯便開始拉肚子！還有點發燒！

上星期看了這電影，還沒有時常upload一下blog，這個新年沒甚麼外語片，最想看這部，今次去 isquare睇，故事講幾段愛情，當中多個人物都有連帶關係，其實都好似之前套 Love actually，只是略為不夠浪漫，一套戲有咁多紅星演出，而且愛情小品，直都是女生的"飛佛"，都値得一睇嘅！