異形 羅穆盧斯 Aliens Romulus

2142年，在 Jackson's Star 殖民地，Rain 與弟弟Andy在這個地方生活和工作，Andy 其實係 Rain 的父親重新編程的人造人，由於她的原工作合約被迫延長了日子，她的前度Tyler 說服她與幾個朋友，一起前往一艘廢棄的太空船，是一座分為Romulus和Remus的太空站。盜取太空船上的冷凍艙，讓他們可以逃往另一行星，因Andy 的人造人身上有晶片可以幫助控制太空船上的電腦系統，他們到達太多空船後，在補充冷凍燃料時，他們意外關閉了冬眠的溫控系統，觸發了鎖定程序並釋放了異形，當他逃離艙室時，一隻異形附到他們一個組員的面上。。。！

之前睇過咁多集異形，對佢都有啲期望，可能都已經冇乜新嘅突破，劇情都係意料之內，套路都係同之前嘅差唔多，都估計到劇情發展，所以都唔係睇得太緊張！

 

深圳福田： 花悅庭、Rivet coffee、就犟牛肉火鍋

早大半個月已經約咗朋友今日上去深圳，呢個組合第一次返大陸，我哋約咗喺落馬洲等，一行五個人，搭地鐵三個站去到福田嘅平安金融中心，呢個商場我哋都嚟過幾次，上次食過隴滿桂西湖菜，今次去佢對面果間花悅庭食片皮鴨，好友在美團落單，叫咗個套餐，店入面嘅裝修都好靚，呢度亦都有好多茶嘅選擇，但係我哋諗住一陣去飲咖啡，所以冇叫一D特別嘅茶，就咁普通叫咗壺茶就算，頭盤有醉雞同埋海蜇頭，仲有一個水煮魚，片皮鴨就一食，淨係食鴨皮，食法係傳統一塊好薄嘅餅皮包住鴨皮、青瓜、醬汁，鴨皮都幾脆，雖然冇肥膏，但係油脂都好豐富，好食，仲有一個好多蔥鋪喺面嘅羊肉，小籠包，另外再叫多一個小食，食到非常之飽😄整體食物質素好好👍🏻

食完飯我哋行咗一陣，就去搵 Rivet coffee shop，呢間coffee shop我哋第一次嚟呢個商場嘅時候已經想試，當時因為太飽冇試到，今日一心過嚟試，我哋坐低之後每人叫咗杯咖啡，我哋有四杯都係冰滴咖啡，佢有個細嘅樽仔裝住咖啡（好似之前喺中環嗰間泰國餐廳個樽一樣），另外有個杯同一舊四方冰，十足10威士忌嘅杯同冰🥃🧊，因為話個咖啡豆係用威士忌木桶發酵過，味道又真係幾好飲，我哋坐喺度傾偈傾咗個幾鐘，因為喺度講鬼故🫣，又驚又搞笑！🤣🤣

跟住再去行街，行咗幾間超市，買咗一D零食，又買咗芝士蛋糕，最後好友要去馬盒超市買雞，佢每次都要買手撕雞返香港，今次佢又買六隻，我同好友各買一隻，前後買咗九隻，要俾咗錢轉頭先至返嚟攞，因為我哋今晚食飯喺旁邊一間火鍋店度食，可以攞咗位先，轉頭先嚟攞雞

今晚食牛肉火鍋，因為我哋成枱都係牛魔王，所以揀咗一間食評比較好嘅火鍋店，不過呢間冇得喺美團落單，直接喺店入面落單，我哋叫咗一個雜錦牛肉嘅圈圈，佢係一個中空圓形嘅碟，啱啱好中間係放火鍋湯底，呢個圈圈主要係用嚟打卡，同埋試吓邊隻牛肉好食，上面除咗唔同部位嘅牛肉，仲有牛胸油，同埋牛舌，不過佢冇喺每一款牛肉上面註明係乜嘢部位，整體覺得唔算話好出色，店入邊有間透明房，見到有三個人在𥚃面不停喺度手切牛肉，望到放喺最高嗰嚿牛肉寫住雪花牛肉，所以我哋就試吓叫一碟淨雪花牛肉，呢碟就好出色，好食過頭先嗰D好多，如果唔係貪要打卡，建議直接叫雪花牛肉！因為我哋另外叫咗一碟吊龍，覺得都冇雪花牛肉咁好食，碟雪花牛肉$148 ，真係好抵食，仲有佢哋個手打牛丸都好好食，我哋都叫咗兩碟，除咗菜同響鈴我哋都冇乜叫其他嘢，因為食牛肉都飽🤣🤣 今餐食得好飽好滿足，因為個牛肉質素係唔錯，全日五個人三餐消費一共$1,900人仔😂

 

三和敍、Puff bake and Marouf

今朝瞓醒覺，就去九龍城三和敍食個晏，之前兩次想去都食唔到，一次太過晏佢哋落場，第二次佢哋冇開，今次終於可以去到，入到去只有兩個客，我點咗和牛漢堡套餐，個造型好似挽肉の米🤣 三嚿和牛漢堡，先在佢哋個爐燒到七八成熟，再換一個細嘅爐，繼續熱住俾我，套餐跟咗湯同埋飯，白飯可以免費再添，亦都可以加錢要埋蒸蛋、沙律同飲品，仲有小食可以追加，我就叫咗一串燒雞翼，店員建議三件牛肉漢堡食法，第一件就咁食原味，第二件可以沾生雞蛋，最後可以沾佢哋一個好似飯素嘅醬汁，我覺得都係沾生雞蛋最好食，牛肉嘅質素唔錯，而且份量都幾多，我個人覺得呢個餐真係好抵食，後來見到有其他人入嚟，而且越來越多人，大部份都係食呢個餐，雖然我加咗嘢，就算唔加嘢都夠飽，真係唔夠就加多個飯，就一定夠，飲品我淨係叫咗杯橙汁，其實佢有咖啡，不過我記憶中佢個咖啡唔係特別好，我都係留返去coffee shop飲🤣

出尖沙咀飲杯 Arabica%，跟住去咗堪富利士道，有間新開嘅餅店，佢個酸種蛋撻學足Bake House咁，買左一個試吓，又買左一個 Pain au Chocolat 😄，但他個皮好脆，蛋汁亦都唔會太甜，Pain au chocolat 就一般，店內仲有間咖啡店，因為頭先飲咗咖啡，所以就叫咗杯檸檬梳打飲，出面又落雨，所以在店內食埋件餅飲埋杯嘢先走！

Hogan coffee

今日有點無聊，走左去銅鑼灣伊榮街呢間藍色咖啡店，去到竟然冇人，我仲諗住可能要等位，店面積不大，只有十幾個位，我就坐門口玻璃窗位置chill 吓，餐牌食物有意粉同 risotto ，亦有包點、沙律等，咖啡除一般咖啡，仲有另一個單品咖啡menu，見到佢有張枱，獨立有磨豆機同兩款咖啡豆及一些手冲的配置，因為佢呢度有個餐牌係可以叫單品咖啡，應該可以即場喺呢個位置沖，我就叫咗一個漢堡包，同埋一杯latte，食物嘅味道都唔錯，咖啡亦都幾好，呢個位旺中帶靜，下次行開銅鑼灣都可以過嚟坐吓！

 

陳勤記滷鵝飯店

今日去左日出康城食lunch ，印象中呢個商場冇乜好食，見到呢間店，又入去試試，店面積不大，乜沒有幾個客，叫左個雞柳炒油麵，加左個湯，味道一般，可能呢度主打滷水鵝，我又冇試到，所以唔知好唔好食！或者下次試吓！

後記：睇新聞，原來呢間食肆將會結業😅

 

After you

今日約咗朋友去Airside ，因為好友在日本買咗禮物俾我，所以今日相約出嚟攞，約咗去 Airside ，去咗呢間coffee shop，呢度地方唔算好大，純白色嘅設計，都係好簡約嗰種，主要係食厚多士、pancake、甜品 同飲品，我哋一人叫咗一個厚多士，一個係芒果糯米飯，真係有少少糯米飯鋪喺多士上面，配咗兩個雪糕球，另一款係蜜糖厚多士，只有兩個雪糕球同埋一大堆cream，另外一人叫咗一杯咖啡，食物同預期差唔多，都幾好食，咖啡亦都唔錯，好友送俾我嘅係在日本Starbucks買嘅套裝杯，一共有三款杯，一個係富士山造型，另一個係達磨， 而第三個係貓貓，三個杯都唔同size，一個紙盒裝住，好靚，雖然屋企已經有好多杯😅，不過呢幾隻杯真係好靚，最重要係嗰份心意，好友每次去日本都買 Starbucks 水樽或水杯俾我😅😆

 

汐

飲完咖啡，去耀華街同好友食晏，我哋揀咗兩間餐廳，一間喺街尾，見到佢半露天，今日天氣好熱，所以唔去果間，轉左呢間上樓嘅食日本嘢，上到去係一個客都冇，今日係星期日，竟然可以冇客，可能已經過咗午市時間吧，又或者佢樓下個水牌未轉名都唔定，店內地方唔係好大，大概有10張吧枱，另外有兩枱榻榻米，每枱可以坐四個人，我就揀咗榻榻米坐，即係要除鞋果隻，餐牌係非常之簡單，有四款熱丼同五款冷丼，同埋一啲小食同飲品，我見到店入面有好多酒樽做裝飾，我估佢晚市係類似居酒屋咁，佢呢度有個優惠就係50分鐘內用餐完畢就可以有七五折，我就等埋好友嚟先叫嘢食，佢係食物上枱之後先開始計時，因為枱面有個計時器，好友就叫咗個牛肉壽喜燒丼，我就揀咗八爪魚配刺身帶子丼，食物都OK，而且有七五折都幾抵食！

食完飯再同好友去睇波鞋，不過佢嫌專門店要行好遠，同埋佢知道專門店冇折，所以我哋去咗時代嗰間馬拉松度睇吓，因為佢自己買咗對Hoka 覺得好靚，所以介紹我去睇吓，成個時代廣場都好靜，但係唔知點解呢間馬拉松好多人，可能佢有折扣，好友睇啱嗰對鞋呢度都有，佢上網買個價錢平少少，而家呢度都有折，折咗之後比好友上網買，仲要平多十幾蚊，所以我都買咗一對😄最近愛上呢個牌子嘅波鞋，因為能夠減輕腳痛，所以前後買咗三對🤣🤣