2025年11月日本東至西長途旅行 Day 7 - 仙台青葉城、山形市、霞城公園、濟生館

今朝在酒店吃個簡單的早餐，因為酒店供應的早餐，食物選擇不多，所以很快吃完，上房攞返行李就去check out ，跟住揸車去附近的青葉城，18分鐘就到，青葉城入面有間寺廟浦安宮，有D着和服嘅小朋友慶祝七五三，喺呢度參拜，行入D有個伊達正宗卿像，旁邊可以遠眺仙台市，我哋離遠仲望到前幾日去過嘅觀音像，當然係同呢度好遠嘅距離😆 

去完青葉城，去返市中心商店街，今日要再食多次仔虎燒肉😆！一開門即刻入去！我哋一早plan咗食乜嘢，我哋四個人叫咗三個切落套餐，再加一個牛肉刺身，原本想叫兩碟，不過都係食完一碟睇吓夠唔夠先再加，原本想叫四個套餐，最後都係叫咗三個先，因為佢肉嘅份量都唔算少，飯又可以叫大碗啲都唔使加錢🤭果然三個餐加一個牛肉刺身都夠食！好好味嘅牛肉，個牛肉刺身好似食緊大菠蘿咁！真係好抵食！平時我哋去旅行都好少重複食一間食店，通常都去試吓新嘢，今次呢間真係忍唔住要食多次，因為唔知幾時再有機會去仙台😅

食完飯好友車我去火車站，我落咗車佢哋就直接去機場還車！上到火車站，搵到仙山線月台，搭JR去山形駅，半小時左右就到！去到山形站，行去酒店只需要2分鐘，先去酒店check in，放低行李，再去行吓啲景點，見附近有一個叫做霞城公園嘅地方，行十零分鐘就去到，見到有護城牆，但係入面沒有城堡😅 只有一個運動場館！行咗個圈都冇乜嘢睇，只有一個城門入口係比較古色古香D😅 行去另一邊見到有個山形市鄉土館，有座紅色磚嘅建築物，就入去睇吓，呢度又叫做舊濟生館，應該係好耐之前嘅醫學館之類！入去呢個館要收費，而且唔可以着鞋，佢有提供拖鞋俾你，我入館嘅時候剩返半個鐘頭就關門，所以有少少急趕，館內嘅建築係一個圓形嘅建築，仲有兩層可以參觀，佢展示嘅都係一啲醫療歷史嘅嘢，例如一啲醫療器具等等，所以我都係好快望吓，因為着住嗰度拖鞋行路好唔方便，個地比較跣，所以影咗陣間相就走！

行返出去仙台站，附近有個廣場，有幾間酒店，其中Richmond我都諗過住，不過見佢嚟車站遠少少，價錢又貴啲，所以冇揀到，佢個位置都真係僻少少，廣場上有個空地，做緊牡蠣BBQ，好似幾吸引，不過我一個人好難食得多，見對面有個山形縣綜合文化藝術館，行入去個館應該關咗門，不過旁邊有間叫0035 嘅商店，所以入去睇吓，因為佢有餐廳，所以賣嘅嘢都係食物，食物都好吸引，我揀咗咖喱同埋豚角煮，再行返車站中央最旺嘅位！呢度個商場叫做S-PAL，地方唔大，不過係呢度最熱鬧嘅地方，商場都有兩三層，不過大部份係賣手信，我又買咗少少嘢食，跟住就行返去酒店，放低啲嘢就出去食晚飯！

行過對面嗰間大和酒店，佢樓下有間壽喜燒，叫做米沢牛登起波，今晚食好少少，店入面嘅人唔多，唔知係咪坐咗入個室，見到卡位只有兩枱客，除咗我，後面嗰枱四個人都係香港人😅 等緊位嘅時候我見到佢擺咗啲火柴喺度，我攞咗一盒，因為而家已經好少見到火柴呢個物體😅 坐低叫左個壽喜燒套餐，有120g 嘅牛肉，一共有三片牛肉，雪花都頗多，仲有配菜同埋一碗飯！所以都夠食，不過佢個壽喜燒鍋就唔係開爐煮，係用一個小爐熱住，變咗有少少似Shabu Shabu咁😅，不過啲牛肉係好食嘅👍🏻 質素都唔錯！ 呢度條街好靜，所以食完嘢只係可以去便利店，附近除咗食店同便利店，都冇嘢行，藥妝店都唔見有😅

酒店住後感：
Comfort hotel Yamagata 
揀呢間酒店，因為價錢好平，前兩晚都係同一個集團嘅酒店，但係價錢貴咗接近兩倍，只係因為撞正日本假期，所以今晚住呢間，可以溝淡返🤣🤣 酒店嘅位置真係好便利，由火車站行過嚟，出天橋就有電梯落地面， 2分鐘就去到酒店，酒店房幾乎同尋晚嗰間係一樣，空間唔大，但係相對較為新淨，接待處喺地面，一入門口就見到，方便好多，酒店入面得一部電梯，不過入住嘅人唔多，每層樓大概有十幾間房，房間都係整齊清潔，正常發揮😆