Fleür

又行過去南豐紗廠，就嚟試晒成個商場D餐廳，今日去呢間開咗唔係好耐，因為頭果幾次嚟都見唔到，我諗開咗幾個月，旁邊嘅咖啡店就係我嚟呢個商場第一間幫襯嘅店舖，記得當時隔離係未有呢間餐廳，店入邊嘅地方唔算好大一眼睇晒，店外面有D座位，望吓個餐牌食物嘅選擇都唔少，而且賣相好似幾靚添，我揀咗個Avo lover ，係一個牛油果做嘅菜式，佢呢度主菜名稱都係用lover ，例如 Meat lover 、Seafood lover 等，過咗一陣店員上咗餐俾我，見到個賣相都唔錯，影影吓相先至發現呢個帶子唔係我嘅，我一下子唔記得咗我叫嗰個係牛油果， 好彩我未除口罩，店員可以攞返比人哋，之後先至有個啱嘅俾返我，成碟野有三樣食物，都係牛油果，同一隻流心蛋，絕對好難食得飽，不過今日都唔係好肚餓，加上杯咖啡都足夠，下次試吓其他食物先！

 

The Park of Years 素年

仲有幾日過年，出去大南街買返支洗頭水先，順便去呢間👆🏻之前經過見到但係冇位嘅餐廳，今日去到好多位，門外兩張枱都冇人坐，我就唔坐出面喇，因為出面係影相位，留返比人地影相！

店外面嘅招牌寫住 The World is yours 我以為呢個係店名，原來呢個招牌係久唔久就會轉左D字，反而店名只係細細個寫喺個門邊！店入面有個好大嘅書架，另外仲有D食物售賣，都係一D醬料之類嘅嘢，店入面坐位都幾多，因為見店入面長方型都好深，呢間餐廳係食素食為主，我叫咗個竹炭野菌漢堡包配蕃薯條，另外飲咗杯咖啡！個蕃薯條食落好似南瓜條咁，而且佢係橙色，定係佢可能真係南瓜條都唔定，可能係我記錯餐牌！素食來講食物嘅質素真係唔錯，店員亦都好好招呼，整體來講個感覺都係唔錯，下次可以再嚟！

 

篤篤船麵

經常經過呢間泰式麵店，一直都冇機會試，今日見佢冇乜人就試吓，餐牌都好簡單，可能係午餐時間，選擇唔係好多，就叫咗一碗船麵食，味道就普普通通，都冇乜特別！

 

飯局主場 - 第廿三回

近日D澳洲龍蝦好平，聽講話因為大陸唔肯入澳洲龍蝦，令到D龍蝦滯銷，所以就要平D比香港，一般都係百幾蚊就已經一隻，上次去好友屋企食過返尋味，今次自己在屋企整，參考左同一個食譜，今日街市嘅豆腐店竟然買唔到伊麵！幾檔都賣晒，相信因為龍蝦平咗，好多人都好似我咁整龍蝦伊麵，所以搞到街市D伊麵賣晒，好彩之前在超市買咗包裝伊麵，就淥兩個嚟做龍蝦伊麵！

做法：先將龍蝦放雪櫃雪暈佢，就切定洋蔥同蒜蓉，個伊麵先用滾水煮一煮，等佢變咗淋身，然後備用，跟住炒香D洋蔥同埋蒜蓉，然後裝起備用，龍蝦身一開二，龍蝦煮之前落少少鹽同埋生粉，伊麵用雞湯煨一煨佢，煮到佢差唔多乾晒水就得，盛起備用，煎一煎龍蝦，然後落洋蔥同蒜蓉加蓋煮一分鐘，跟住再落雞湯煮一煮然後再加芝士，成個過程大概4-5分鐘，唔好煮大耐！將龍蝦同芝士汁倒在伊麵上便完成！好味道！

 

紗織

食完壽司想飲杯咖啡，先至想起本來今日諗住去呢間甜品店度試吓，好彩冇忘記到！去到餐廳門口見到唔使等位，咁就啱啱好喇！我旭坐吧枱位，可以近距離睇店員整佢地招牌嘅甜品，就係和栗紗織，呢個甜品近日在日本都好Hit，雖然去唔到日本，不過網上都成日見到當地人share出嚟，不過香港呢間聽講唔係正式日本果間過嚟，即係同一個名，不過既然香港得一間，都唔理佢係唔係日本過嚟，都即管試吓！

店入面嘅位唔係好多，我地坐低之後都係剩返一張枱，轉個頭已經冇位要等位，我哋當然想食個招牌和栗紗織，不過店員話今日冇，所以轉左要紫薯紗織，另外再配一個春雪。初開，其實兩個甜品都係有疏乎厘pancake在底部，紫薯紗織就係有個蛋白餅，上面就即時將一舊紫薯蓉搞成條狀，鋪在pancake表面，紫薯嘅顏色好深色所以都好靚，味道亦都唔係好甜，甜度都算適中，蛋白餅亦都唔會好甜，而春雪初開其實係有一D液態忌廉加咗士多啤梨糖漿，鋪在pancake上，有塊膠紙圍住個pancake，要拉起張膠紙，等D液態嘅忌廉流下來，兩個甜品都唔會做得好甜，應該好啱香港人口味，另外叫咗杯咖啡飲，都唔錯！

 

鮨三川

上次 walk in 冇位，今次早一日 book 左！店內裝修都係傳統壽司店的格局，有兩邊，每邊都係一張壽司枱，每枱有八個定十個位，另外有房，今日唔爆，見有兩個位冇人坐，店內裝修好新淨，應該開左唔耐，餐牌亦都好簡單，只有三款 omakase 同一款丼，當然有單點壽司刺身，只是沒有標明價錢！

我們叫了12貫壽司🍣 的”鮨” omakase ，師傅是逐件壽司做好放在你面前的碟上！我們叫了支 sake ，店員比左十二生肖杯比我地揀，杯底十二生肖好靚，不過反轉來裝酒時，就睇唔到係乜嘢生肖喇！😅

每款壽司放在碟上，師傅都會講係乜嘢魚配乜嘢鹽或醬，今日吃的有針魚、黑鰽、帆立貝配竹炭、間八、金目鯛、牡丹蝦伴燒蝦膏、池魚、醬油漬吞拿魚、北海道銀雪魚配柚子麵豉、大拖羅、三文魚籽軍艦、海膽，共12款，另外追加了赤貝和白子，各款夀司都好好味！真係物超所值！食完壽司仲有一小碗烏冬，烏冬相對遜色了！甜品是芝麻雪糕！味道都幾好！整體來說很滿意，一定要再來，希望佢唔好咁快加價🤣

 

彭福公園

我哋在大埔小白露行咗一陣，見冇乜嘢行就搭車去咗沙田彭福公園，因為呢度係狗🐕🐩🦮🐕‍🦺公園，有好多人帶狗狗來，好友隻狗好少出街，更加係好少見到咁多狗，所以佢玩得好開心，每條柱位都小便留低自己的氣味！已經冇晒小便，仍繼續谷一、兩滴落D柱位！🤣好攪笑！之前從未試過放左條繩比佢周圍走，今次就放佢自己行，因為成個公園D狗都係咁！不過佢唔係好知道我地放左條繩，仍然貼近我地行！☺️ 

玩左半日，狗狗同我地一樣攰攰地😅行返去火炭就各自回家了！因為沒有晚市堂食，唯有各自回家！好友話佢隻狗返到屋企狂飲水，頭先在公園點都唔肯飲水！🤦🏻‍♀️跟住就瞓著左🤣

 

Billow bar seafood bistro

好耐冇見好友隻狗，今日特登預約咗去呢間餐廳，一來餐廳可以帶狗仔入去，二來近好友嘅屋企，佢帶隻狗搭的士就唔使咁貴！

餐廳嘅位置都係比較隔涉，我哋搭的士入去，餐廳都幾爆場，我地預早 book 左枱，不過呢間餐廳嘅Booking系統麻麻地，因為限聚令嘅關係，每次只能夠book兩人枱，所以我哋分開咗兩次book，選擇座位嘅時候亦都選擇左 garden (pet zone) ，我哋做完Booking之後，一個電話收唔到短訊，另一個電話就收到，但係佢哋個熱線係冇人聽電話果種，想改又改唔到，想問又問唔到，唯有重新book多次，去到接待處嘅時候都係冇另一個電話嘅紀錄，不過佢都安排到座位，跟住佢話我哋有寵物應該訂位時要 remark ，其實揀座位嘅時候已經揀咗Pet zone ，唔明點解仲要 remark ? 安排座位嘅時候亦都問佢可唔可以坐側邊，職員不斷強調佢哋好爆，安排唔到。。。。
其實見到我哋想坐個位一路都冇人坐，唔知點解安排唔到？

餐牌嘅選擇都唔算好多，不過幾個set都好吸引，我地揀咗牛扒、羊膝、帶子闊條麵，食物嘅質素都唔錯，我哋又要傾偈、又要影相、又要玩狗，好忙！D嘢食都凍哂！食完飯我哋喺附近行吓，門外有一小片鬱金香園，仲有檸檬樹！有間小花店，其實呢度冇乜嘢行，都係圍住個湖行咗一陣，天氣好好都行得好舒服！

 

SAKImoto 嵜本

呢間麵包店都開咗成個月，之前見佢裝修緊，開咗之後諗住去又唔記得咗，今日趁出去剪髮之前，去試一試佢，店入面有堂食，座位唔算好多，堂食嘅人亦都唔多，睇吓個餐牌，其實佢只有一款食物就係佢哋嘅麵包🍞，只不過麵包有兩款選擇，麵包兩款係極美同極生，極美應該係冇牛油同牛奶，我揀咗極生，而果醬就有好多款選擇，我揀咗藍莓🫐、檸檬🍋、芝麻嘅果醬，加一款北海道牛油🧈，飲品都算幾多款，我就叫咗杯dirty，我就覺得佢唔夠 dirty 🤣

店入面有好多款果醬，亦都有佢哋嘅麵包，麵包係獨立一片裝，價錢都唔平，單係賣麵包同果醬應該都幾難維持，仲要係海港城呢啲咁貴租嘅商場，可能而家市道唔好平D租，但係之後應該都好難支持！