Afuri 阿夫利

睇完戲在商場行吓，見到原來開咗一間拉麵店，覺得個名好熟，但係肯定未食過，可能見過其他人post或者雜誌介紹過都唔定，店入面都唔算細，位置近廚房有幾排嘅高枱，另外有D四人枱，見冇乜人就試吓啦，佢嘅做法係喺門口個自助機度俾錢，揀嘢落單俾錢，餐牌都好簡單，亦都唔係太多選擇，我揀咗一碗柚子拉麵同埋一個餃子，坐近廚房嘅高枱，可以望到廚房入面嘅人工作，個拉麵味道都唔錯，柚子嘅味道都好清新，餃子食得出係自家製，唔係雪藏果種餃子嘅味道！

酒過漫畫人生 Don’t Worry, He Won’t Get Far on Foot

John 係一個酒鬼，經常菸酒，自小就埋怨被生母拋棄，藉著飲酒麻醉自己，一次他和朋友 Dexter 飲酒飲咗一整天，夜晚朋友駕車送他的時候，因為飲醉酒駕駛而炒車，好友只是擦傷，但就嚴重重傷，導致下半身癱瘓，雙手活動能力亦有限，雖然已經癱瘓，但John 仍然菸酒，過着頹廢的生活，有一天他決定戒酒，就參加戒酒會，認識到助戒人 Donnie，Donnie對他幫助很大.....！

自從3月28日開始戲院已經冇開，足足等左個幾月今日再開返，一定要去睇返場戲，不過幾間戲院播放嘅電影都有D唔同，但係好多都有舊時少少嘅戲，我唔知套戲有幾耐，依稀好似記得睇過 trailer ，見到影帝主演應該都唔會太差，戲入面嘅男配角 助戒人 Donnie 影得幾好，總係覺得佢好面善，後來先知原來係華爾街狼人入面嘅男配角 Jonah Hill，轉左頭髮顏色同埋造型真係認佢唔到！男主角感到困擾嘅時候都會搵佢傾偈，而佢嘅說話亦都好有影響力，亦幫助左男主角走出人生嘅低谷，套戲都有D深度，年輕人睇可能會覺得悶，都係原諒自己原諒別人果種！

gram

這星期忙極了！終於可以休息返一日，雖然腦海仍然諗住D工作，總算係偷得浮新半日閒，先去醫肚！去咗呢間 gram，在香港已經開咗段時間，一直冇去試，因為都知道唔夠日本好食，不過即管試吓啦，不過想食嘅疏乎厘 pancake就賣晒，咁叫咗個 French toast 加雜莓食，另外叫左杯意大利牛奶咖啡，咖啡比較濃，toast 就一般啦！限聚令放寬到可以坐八個人，所以呢兩日出街食飯都多人左！

Oyster Cove

前兩日去好友嘅新居幫手打掃，佢呢個新居相當之殘舊，而且上手未搬走，因為上手身在大陸，要幾個月後先返嚟！所以佢D嘢唔掉得，只能執埋一邊，我地買咗好多抽真空袋，上手因為只有兩母女，所以係超多衫同埋超多書！好彩呢間係天台屋，有好大個天台空間，可以將部份唔用嘅傢俬放出去，所以入面只係用咗大概一張單人床3尺×6尺嘅空間，將物品疊高，咁就有返多D位用！執完D嘢之後又要清潔，間屋好耐冇清潔過，而且好多嘢都係溶溶爛爛，所以花咗好多功夫去做清潔，忙左兩日搞到身水身汗，腰酸背痛，今日就要休息吓喇！

唔使返工嘅星期一，真係要好好休息同埋食返餐好嘅，今日好想食生蠔，所以上網搵咗間蠔吧，去到嘅時候見到門口有兩個廚房佬坐在門口食煙，好似未開門，所以轉去第二度食，正在諗緊食乜嘅時候，又見到另一間蠔吧，咁就入去試吓啦！店入面只有兩個客，呢度可以坐大約30人，喺門口見到餐牌，午市做緊半價，不過呢度半價都要百零蚊，見佢有精選生蠔拼盤，但係個份量係一打或者兩打，我一個人食唔到唔多，所以唯有散叫，叫咗四隻唔同嘅生蠔，分別係 Eske、La Perle Noire、Fine de claire、Lambert ，其實都分唔到邊隻打邊隻，淨係叫店員介紹比較爽身嘅生蠔，唔要一D好creamy 嘅生蠔，D 生蠔都好新鮮，係有兩隻有少少殻碎，不過有濃濃嘅海水味，而且好爽身，好啱食！除咗生蠔我另外叫咗一個 risotto ，係一個蒜蓉蘆筍什菌risotto ，即係一個素食Risotto ，前兩日同好友執完屋食飯都係食 risotto ，前日就在 the pantry 食咗冬陰公Risotto ，尋晚就去咗桔梗食燉飯，前兩日嘅飯就比較硬身，今日呢個就啱啱好軟硬適中，只係咸咗少少，整體來講都唔錯！

食完飯去咗寶靈街睇吓有冇布埋，因為好友間屋想用塊布遮住D雜物，去到先發覺以前條街好多賣布嘅舖頭已經冇咗，於是搭車落去深水埗，因為深水埗都好多賣布同埋配件嘅地方，係近住太子果邊，睇咗好多間，實在太多選擇唔知點揀，唯有影咗D相俾好友佢知自己睇吓邊款啱，或者再帶佢落嚟買！

上海街購物 - 蒸爐盤、麵粉

放大假，冇得去旅行，留港消費，去咗上海街行吓，上次想買一個蒸爐用嘅盤，但係唔記得度尺寸，今次度好晒先至嚟買，行咗幾間，搵到一個同原本用開果個一樣size，只係深D，就平平哋買一個返去試吓啦，只係$117 ，如果配原廠要近千元！當然平時野鋼水係冇咁靚啦！不過都係不鏽鋼，可以入到爐就得啦！除咗買俾蒸爐用嘅盤，去咗一間叫做 I ❤️ Cake 嘅舖頭，係賣整蛋糕麵包嘅食材同用具，而家在超市係買唔到麵粉，呢度就大把選擇，除咗麵粉仲有粘米粉、糯米粉等等，總之整蛋糕、麵包、糕點嘅食材佢都有，我見到近期都幾Hit嘅黃姜粉，所以都買咗一樽仔，今日都好多人嚟買嘢，見店員不斷補貨不斷收錢，人流絡繹不絕，我就買咗高筋粉同低筋粉，仲有買咗酵母，順便買咗糖霜同埋粘米粉，麵粉見佢有日本製同埋英國有機麵粉，價錢只係相差$3 ，最後都係揀咗日本製，雖然買齊晒料，但係爭個焗爐！下個月應該可以買！到時一定要整個麵包食下！

飯局作客 - 生日火鍋

近期已經好少有生日飯局，今日呢個飯局都係在家裏打邊爐，上次去好友屋企打邊爐，今次食過返尋味，買嘅食物同上次差不多，不過今次嘅牛肉就去咗第二度買，上次好友屋企個爐滾唔起，今次換咗個爐就好好多，今次天氣暖返D，所以食起上嚟都有D熱，但係又未至於要開冷氣，今次好友買咗墨魚滑好好味！蛋糕就買咗香蕉朱古力，同我哋估計一樣，壽星女都鍾意食，今次壽星女帶埋女兒一同過來慶祝，都有一排冇見佢，大個女左好多！

101 台式休閒餐廳

這間台式餐廳時常都好多人，前後食過幾次，主要都係食米線，或者係台式飯，其實佢下午茶都幾抵食，因為米線嘅份量都幾多，不過餸就比較少，呢度其實主打係個湯底，有雞湯、藥膳湯、麻辣湯，我淨係試過雞湯同埋藥膳湯，味道都唔錯，次次都飲晒D湯，下午茶亦都有送埋飲品，所以都幾多人鍾意你食下午茶。

因為呢間店兩邊都係玻璃，一邊係望到出街，幾次都見到對面有間賣古早味蛋糕嘅小店，經常排長龍，而且好早就關門，大概四、五點左右就已經收工，而且行過見到佢個出爐時間表都幾密，但係都咁多人排隊，搵次冇咁多人就買來試吓啦！

Café Cérès

今日相約好友 F 食個午餐，原本想去大和堂，但係好多人等位，根據上次我去嘅經驗，呢度啲人係會坐好耐，加上今日假期，又行緊限聚令，所以等位會更加耐，所以決定去第二度食，去咗呢一間餐廳，見到有位，雖然有好多張枱，但係因為限聚令，實際剩返一張枱，啱啱好我哋入埋就無位，好友今日一身工作 look ，原來佢話今日有地方要去，就係去睇新屋，今日我得閒所以同佢一齊入去，先食飽野再去！

好友今日湊左隻狗去沖涼，可以夜晚先至去湊番佢，所以我哋就食D嘢入去，我哋叫咗一個漢堡包同埋一個海鮮意粉，一杯玫瑰咖啡同埋抹茶鮮奶，漢堡包係藍芝士牛肉漢堡，個藍芝士好鹹，雖然藍芝士本身係鹹嘅，但係個份量好多，所以覺得好鹹，其實應該用少少就夠，要減咗一半出嚟先至覺得啱味，牛肉就好好味，麵包亦都好食，因為呢間餐廳旁邊嘅麵包店係同一間公司，佢最先係做麵包店後來先做埋餐廳，所以麵包係好食，意粉就不過不失，咖啡就唔算特別好，食完嘢我哋就出發入上水金錢村！

由九龍城搭小巴去九龍塘，再搭火車入去上水，再轉小巴過去金錢村，都用咗唔少時間，落咗車仲要行一條長長嘅巷，差不多行到街尾先至係好又要租嘅地方，然後仲要行樓梯上3樓，個單位都好舊，因為個單位本身係有人住緊，但係佢哋一家人返咗大陸，要有一段時間先返來，所以唔想交租，就叫屋主將個單位租比人先，而佢呢一家人本身都係中港兩邊走，而且較多時間在大陸，所以屋入邊嘅嘢都好簡單，冇乜傢俬，不過雜物亦都唔少，因為原本果家人有大有細，有好多書本同埋玩具，我哋要將佢哋嘅嘢執埋一邊，同埋將部份嘅嘢放出天台，好彩佢天台都幾大，放咗出去嘅嘢只係佔咗天台好少位置，不過間屋比較舊同埋有一段時間冇人住，所以要花D時間清潔，我哋只係簡簡單單騰出一入空位先，下次再過嚟做一轉清潔，見到好友要住響呢度，個心好唔開心，因為環境真係唔係咁理想，屋入邊嘅牆都甩晒批蕩，廁所板又爛嘅，廚房個去水位又爛嘅，水喉水係啡色嘅，門外面嘅燈又唔着，夜晚返嚟黑麻麻點算呢！擔心佢一個女仔住喺度，夜晚唔知安唔安全，因為天台又冇得鎖，門又未換鎖，上手唔知會唔會陣間走返嚟！雖然佢只係住幾個月，會再搬，見到咁樣都唔係咁開心！

花樣年華

疫情下，好多食店都好冷清，今日去咗呢間試吓，其實佢前身係王家沙，依家都係王家沙，只係改咗名，晚飯時間只有五、六枱客，相當冷清，而且附近嘅舖頭都好早關門，希望疫情盡快過去啦，因為好多人真係因為咁失業！

我哋叫咗小籠包、酸辣湯麵、釀尖椒、同埋高力豆沙，好耐冇食過高力豆沙啦，所以好想食！

飯局作客 - 牛扒餐

上星期約咗好友今晚在家食牛扒餐，其中一個好友J 今日放假，所以一早去買定嘢食，準備定嘢，跟住我就買咗兩罐龍蝦湯罐頭，因為好友整咗蒜蓉包，想配過龍蝦湯，所以叫我買埋上去，上到去佢已經慢煮好韓牛牛扒同埋羊架，整埋蒜蓉包同埋薯蓉，仲有一塊和牛牛扒，等好友 F 收咗工，差不多到步嘅時候，就開始煎牛扒同羊架，同一時間焗爐焗薯蓉同埋蒜蓉包，返到嚟啱啱好開餐，好多嘢食，三個女人食咁多嘢！再開埋支菠蘿酒同埋梅酒飲，今次我哋自己整嘢食，冇男士去煮俾我哋食，都一樣煮得好好食！自從好友F 同男友分手後，大家再見亦算是朋友，因為F仍然居住在前男友的家，而前男友就搬到自己母親的家住，不過最近好友 F 被前男友趕走，要他今個月內搬走，所以大家關係就冇以前咁好，而好友F 亦都要準備搬家，相信她搬走之後，與前男友不會再有往來，日後將不會再有四人行了！實在令人可惜！不過佢做得出趕F 走，都預咗有咁樣嘅結果！

四季湯館

前兩日睇雜誌介紹呢間湯館，就過去試一試，店入面只有一個客，連埋我只有兩個，店入面大概只有十多個位，我叫咗一個螺頭老雞燉花膠，另外叫咗一個香酥肉排客飯，個花膠湯都幾足料，味道亦都唔錯，個香酥肉排睇落好似好乾，不過食落口又唔係想像中咁乾，都有D Juicy！個菜飯都幾好味，D飯粒似係日本米，幾好食，呢度食物嘅質素都唔錯，價錢都算合理，環境企理，地點就腳，之後可以再嚟！

孖啡

呢日無無聊聊地出咗去旺角，去一去銀行，銀行入面都少咗人，以前可以沖咖啡飲，今日冇得飲，去完銀行，就自己去飲咖啡，去咗呢間樓上舖，自從限聚令之後，食客都分開坐，或者係冇乜客，樓上鋪就更加靜，上來嘅時候有三、四枱客，不過好快走咗兩枱，我叫咗個蜆意粉同埋一杯咖啡，個意粉都幾好味，不過D蜆有埋殻，就要花D時間處理，咖啡就普普通通唔算特別，D店員就冇乜表情，可能冇乜嘢做，個樣好似發吽豆！

食完野去 Ocean Three 睇吓D牛扒，因為約咗好友下星期三在家据扒，睇完再行咗去果欄嗰邊，睇吓有冇乜嘢靚生果，日頭嘅果欄熱鬧好多，不過都冇嘢啱食，再行過去油麻地上海街，睇吓D廚具用品，見到有個不鏽鋼盤，應該啱蒸爐用，不過冇度到尺寸所以唔敢買，費事買咗返去唔啱用，下次先再過嚟睇！

千味手工餃子

呢間小店只係做餃子一種食材，餃子嘅選擇都幾多，除咗餐牌上面嘅餃子，亦都會有會有推介嘅餃子，只會寫在黑板上，除咗餃子都仲有啲小食，餃子亦都可以配麵，呢度嘅餃子有煎餃或者湯餃，可以叫六個或者八個，亦都有外賣生餃子，試過個湯係粟米紅蘿蔔湯，都幾清甜，而且餃子都幾大隻，因為佢係多菜少肉，咬開個餃子就會見到好多菜，但係肉就真係好少，煎餃嘅感覺就唔係咁好，唔知點解個餃子皮有種膠質嘅感覺，可能係油既問題，總之就怪怪地，而且點餃子嘅醋，亦都係冇味，只有好少好少嘅酸味，做唔到提味嘅效果，所以都係湯餃搞好D！