スーパー丼 Superdon

上星期放假去銅鑼灣，已經想試呢一間日本丼，諗住等埋朋友先一齊食，今日去銅鑼灣開完會就可以一齊去食喇！

見到佢下午做優惠價錢，有$58至到$88 ，我哋就叫咗一個和牛帆立貝丼，同埋和牛海膽丼，佢跟埋一個麵豉湯，過當唔會好大碗，上面嘅和牛味道都唔錯，當然唔係雪花和牛，所以冇乜脂肪，海膽嘅份量就好少，而且好細條，不過味道都不過不失，帆立貝就差工，因為佢好似炸既咁，比較乾同埋食唔到鮮味！不過以咁嘅價錢來講，已經係抵食！不過要攞到優惠，就要 like 佢哋Facebook，仲要share 個優惠！

湯火功夫麻辣燙

都有一排冇去銅鑼灣行街，每次都係開完會匆匆忙忙走，今日趁放假過去行吓，原本想去食一間日本丼，都係留返下次同好友開完會去食，跟住想去蛇王二，又想試吓其他，行咗去後邊謝斐道，見到呢間食麻辣燙，其實我唔係好知乜嘢叫做麻辣燙，所以就去試吓佢，店入面格局都係類似譚仔個類，店員都好詳細解釋，我揀咗個下午茶餐，加多兩款餸，佢麻辣有得揀大中小麻，同埋大中小辣，未食過，所以揀咗小試一試，我覺得佢完全唔辣，應該揀中試吓，因為我見佢講明係做麻辣，可能會好辣都唔定，點知原來咁唔係咁辣，食落同譚仔果D差唔多，冇乜特別，叫做試過就算！

浜滝

最近少咗約呢個Group 嘅好友，因為其中兩個分咗手，雖然算係再見亦是朋友，但係佢哋都唔想成日見面，何況男嘅已經有新女友，以前幾乎每個星期都食飯，而家就個幾月先食一次，有時我哋三個女仔都會約出嚟，今次去呢間日式餐廳，係上次好友J生日果陣時本來想去，但係 wall in 冇位，今次預早訂咗枱，所以就有位，店入面嘅枱唔多，一眼睇晒五張高枱，四個單邊位，仲要幾迫夾，佢仲有樓上，不過我諗樓上唔會大好多，我哋冇上去睇所以唔知有幾大，呢度係居酒屋feel，所以係迫迫夾夾先至覺得熱鬧！

我哋嚟到嘅時候都滿座，不過有兩枱台走咗之後，就冇客入來喇，我地訂位嘅時候預訂咗龍蝦，佢係起咗龍蝦肉，上面再放海膽，份量都幾細，因為隻龍蝦其實唔大隻，$368 唔係咁抵食，海膽亦都唔係好靚！另外我地亦都叫咗白燒鰻魚、玉子海膽、一夜干、鰻魚飯、雞翼、燒牛舌、雞軟骨串，食物嘅份量都幾少，雖然食物質素都唔差，不過以價錢來講真係唔係咁抵食，食完野坐咗陣就走，因為好友在生果檔買了榴槤，一齊行返去好友 F屋企食，上到屋企，呢對舊情侶同以往一樣，一返到屋企就打機🤦🏻‍♀️！已佢屋企有盞燈又壞咗冇去整，所以黑黑地！坐咗一陣好友 K 就話要走先，因為第二日要返工，可能要打俾新女友傾一陣電話掛！🤫 佢呢頭走咗，果頭舊女友就講佢點差，其實佢男友嘅缺點大家一早睇到，只係當時佢太愛對方接受佢所有缺點，依家醒咗先睇到佢嘅問題，我覺得人冇完美，兩個人一齊都係要大家夾，其實佢兩個都夾到只係解決唔到錢嘅問題，都係果句啦，貧賤夫妻百事哀，兩個都做類似freelance 嘅工作，收入就梗係唔穩定，好多家庭支出都係要比，做男人冇責任心都好難解決到！

飯局作客 - 除夕倒數

除夕夜，又有遊行，所以我哋唔出去食喇，去咗好友 F 淘大花園嘅屋企整嘢食，好友一早準備定食物，之前佢話喺HKTVmall 買咗個大魚大肉套餐，只係$199 ，已經有三樣肉類，今晚就食咗佢兩樣，整咗隻燒雞同埋煎左塊牛扒，仲有剩一包豬肋條冇食到，隻雞尋晚已經醃左，不過呢D外國雞種嘅肉質係麻麻哋嘅，始終唔係鮮雞，不過都醃得幾好味，牛扒就最簡單因為唔使醃，就咁煎，好友亦都買咗少量海鮮，有鮑魚、象仔蚌、仲有隻唔知乜嘢紫色嘅蚌，仲有炒蜆同埋炒菜！都好豐富，另一好友 S亦帶D泰國買返嚟嘅零食，其實主要係薯片同薯片！我地一路整嘢食一路傾計，好友S的父親入了醫院做手術，令她很擔心，不過她到來前已經去過醫院看父親，見他進展良好所以她亦放心了！

我地一路食嘢一路睇電視，今晚亦都冇煙花匯演，因為遊行所以改為豪華版的幻彩耀香江，如果有煙花我哋一定出去現場睇！另外仲有旅發局搞咗個大抽獎， 6:00PM 開始登記，但係個個都攞唔到驗證碼，覺得好似被騙！我向來冇抽獎運，所以我都冇搞，食完晒野都差唔多要倒數啦，好友 I 亦都洗晒D碗 （又係成班女人坐喺度，男人做晒煮野同洗野😅）我哋係咁自拍，影埋個電視機，一齊倒數好搞笑，新嘅一年希望香港平平安安，最緊要大家身體健康！今晚雖然得我哋四個，不過都好開心！

澳洲係最先踏入2020年，果邊亦都有放煙花慶祝，不過澳洲果邊山林大火燒左好多日，當地有D市民覺得唔應該慶祝，因為山火都未救熄，希望佢哋快D撲滅到山火啦！唔好影響咁多野生動物同人類嘅安全啦！

雞翼山

成日搭車經過望到呢一間小店，之前有一次想去食，但係好多人，近排市道淡靜，今日雖然係星期六，但係冇乜人，所以就去試吓佢 !

店入面嘅地方係好細，有幾個座位，但係其實可以坐喺度食嘅，得一張枱，另外仲有一張枱係企喺度食，不過我諗佢主要都係做外賣多，其實成間店淨係賣雞翼都有得做，我見佢唔同款嘅雞翼，其實係個醬汁唔同，同埋佢係即做，將個醬汁撈落個雞翼果度煮，所以要稍為等一等，佢都有D飲品，但係選擇比較少，所以我覺得佢係做外賣比較多，落咗order都係等左幾分鐘就有得食，我揀咗文青風玫瑰雞翼，其實係蜜糖汁加咗玫瑰花瓣，個雞翼係預先炸左，所以唔係好熱，不過都微暖，味道都唔錯，蜜糖配雞翼都唔會差得去邊，如果佢可以熱D，雞翼再 juicy D 就更好，同埋佢企位果張枱都幾污糟，我見好多雞皮碎攝咗响枱邊，好明顯張枱好耐冇清潔！🤦🏻‍♀️

白頭山：火山浩劫 Ashfall

趙仁昌很快就要退伍了，在回家的路上突然遇上地震，地震相當嚴重，影響整個南北韓，地震源於白頭山這座睡火山，另一方面，總統秘書前往尋找科學家姜奉萊，他正準備離開韓國前往美國，因為他是美國公民，可以成坐美國專機離開，最終他亦接受秘書的勸說，前往青瓦台與總統會面，向總統講解他研究了一段時間的報告，就是關於白頭山預計尚有兩次嚴重爆發，到時地震帶來的影響，比早前的更要嚴重，唯一可以阻止地震再發生的方法，就是用核彈，在火山附近的礦洞打開缺口，但首先要從北韓偷取核彈，再將彈頭送往煤礦，再引爆核彈，趙仁昌受命前往北韓，尋找間諜李準平，只有他才能夠帶他們偷取核彈............！

之前睇預告已經好想睇，三大男主角，有李秉憲、與神同行的河正宇，廝殺列車的馬東石，女主角亦都有裴秀智，陣容都可算強大，李秉憲在荷里活拍片一段時間，回歸韓國拍電影，雖然早間的角色，都一樣要型，戲份亦都重，佢入面嘅特技都做得好好，拍得住荷里活嘅技術，成套戲都係韓電影嘅formula，認真製作+少少搞笑+人性光輝+感動時刻，基本上近年幾套受歡迎嘅韓國電影，都係有呢D元素，不過不得不佩服韓國人在電影或者電視上，寫嘅故事同埋劇情，題材都好有新鮮感，只係出嚟嘅效果，都係離唔開個幾條公式，都係一定估到個劇情發展！

今日又去英皇戲院睇戲，今次幫襯左杯咖啡，等咖啡嘅時候，見到佢其實有個酒吧，有小食同埋有酒飲，我諗唔係睇戲都可以上嚟飲杯野，坐下傾下計都幾好！

八天堂

前兩日去APM，見到開咗間八天堂，今日去試吓佢，之前在東京食過一次，在日本都有唔少分店，香港應該係第二間分店，唔知佢係咪日本材料運過嚟，定係香港材料香港整，味道都唔錯，覺得係日本好食D，始終去旅行嘅心情食乜都好食D！不過個包壓扁左，個樣就真係唔係咁靚喇！

葉問4 完結篇 Ip Man The Finale @英皇 iSquare 戲院

葉問的妻子去世後，和兒子相依為命，一天收到徒孫 Billy 送來的機票，是他徒弟李小龍希望他能夠前往美國看他的武術交流，原本不打算前往的葉問，因確診患了癌症，希望兒子能夠到美國讀書，所以前往美國，替兒子張羅，他到達美國後，卻因徒弟而被中華總會的會長拒絕協助.......！

來到第四集，亦都講明係完結篇，即係打埋呢一集就再冇葉問喇！個人認為打鬥場面好睇，特別係令人期待的畫面出現了，就係李小龍出手，動作指導好野！如果有睇過李小龍的紀錄片，都睇到戲中神還原當年的情景！陳國坤應該下了不少工夫去操練，雖然不及李小龍狠快，但已經非常出色，始終李小龍是無人能及的！劇情發展是意料中事，父子情的一段戲頗為令人動容，畢竟知道父親患上絕症，再也不會鬥氣！

今次去咗新開嘅英皇 iSquare 戲院睇戲，戲院在星期三先至開張，期待睇吓佢嘅IMAX同之前有咩唔同，不過而家上緊話嘅係Star Wars，所以興趣不大，遲啲想睇套戲先至去睇IMAX ！戲院嘅格局同以前差唔多，但係廁所就大左好多，以前個廁所得三格，經常大排長龍，而家大左一倍有多，真係值得一讚！而且見到佢小食部都幾多嘢食，不過我啱啱食完拉麵，所以冇買嘢食！下次可以睇戲食嘢一齊做！

Elephant grounds

都有一段時間冇去過沙田，今日過到去，見到個差別都唔係好大，當然有D商戶係轉左，好似呢家咖啡店，以前係連鎖店，而家都算係連鎖店不過係細規模一D，見到佢餐牌上面嘅咖啡都幾特別，原本我想叫一杯椰奶咖啡，但係佢話冇，所以轉左叫咗一杯薄荷咖啡，不過完全飲唔到有薄荷味，而且都好甜！見佢仲有一啲麵包、雪糕售賣，而且仲有T恤賣添，不過我都係坐咗一陣就走，所以都冇詳細睇佢有乜其他嘢賣？

J. Boroski

食完串燒，同好友去攞車，發覺佢換咗車，以前佢揸Benz，而家竟然係揸 Maserati 🇮🇹 !!!!!

好友話想去中環飲嘢，所以就由尖沙咀揸車過中環，去咗荷李活道果附近，呢個好友其實好鍾意去中環飲嘢，當然我都好鍾意中環呢邊夜晚嘅氣氛，尤其是荷李活道呢邊好熱鬧，氣氛亦都好好，我哋去咗一間幾隱蔽嘅酒吧，我地由後門行入去，酒吧入邊唔係好大，亦都唔係好多人，睇吓佢哋嘅餐牌，主要係分類選擇，例如 Gin 酒一頁好多個牌子選擇， Vodka 亦都有好多款，至於Cocktail，佢嘅做法係你自己想飲乜嘢 Cocktail 就 order ，或者由 Bartender 自己調配比你，你淨係話俾佢聽你想要乜嘢類型，例如你要乜嘢酒底，味道要甜啦、酸啦，有冇D乜嘢你唔要啦，或者係食物敏感啦，咁佢就自行調配比你，我就叫佢調一杯甜甜地嘅有Vodka 成份嘅酒比我，兩位好友因為唔飲酒，所以飲 Mocktail ，我果杯飲品係橙橙紅紅色，佢哋果杯就係黃色，大家都係甜甜地，味道都唔錯！

我哋繼續傾計，好友講到佢而家嘅工作，其實佢搞緊一個app ，搞咗好耐，上次見佢果陣時已經搞緊，到而家都仲未可以download得到，因為佢話好多前期工作要做，見到佢前期工作都做得幾成功，期待佢下個月個app 推出市場，可以做到好嘅成績啦，佢都有提到佢太太，最近佢地去完旅行，同埋佢太太公司嘅工作情況，都幾羨慕佢哋兩公婆，雖然佢老婆要成日飛，但係佢兩個感情好好，佢哋都好想搬去中環，但係佢話現時能力上面仲爭小小，始終佢開發個app 呢年幾都冇收入，靠佢太太一個人嘅收入，生活當然冇問題，但係供樓可能有少少壓力，何況中環嘅樓價咁高！可能要再努力多兩、三年先至有機會，希望佢成功啦！

飲到咁上下都要走喇，因為聽日大家都要返工，好友揸車送我哋返屋企，佢話其實呢架車佢都想換，因為好食油，佢話唔係食油咁簡單，直情係好似倒油咁⛽️，好搞笑！不過架車係老婆送，所以再揸多一段時間睇下點先，總之佢話一開車就要諗定去邊度入油，好搞笑，臨走我地約定下次去BBQ，諗住去西貢燒，因為有車！諗住叫多一個朋友，因為佢架車只係坐到四個人，想叫多兩個都唔得😂😂