裝修大作戰 - 7

今日約左去旺角砵蘭街揀磚，呢度好多裝修用品店，我地去左一間樓上鋪，應該係同裝修公司相熟，選擇好多，大陸磚平價一D，意大利磚當然靚，貴一倍以上！最後當然買大陸磚，揀左地磚，廚、廁的牆磚，價錢比預期平！

揀完磚，揀坐廁、洗面盆、花洒、水龍頭，坐廁個個睇落差不多！坐上去試，揀左個細少少，方方地，油壓式廁板，洗面盤揀左個圓形的，水龍頭買了意大利牌子，浴室花洒、廚、廁水龍頭，同一個系列！

買完再去買牆紙，只需要買一卷，只是床頭幅牆要貼，所以一卷就夠！

裝修大作戰 - 6

搬走左十日，今日上去睇睇！冇師傅開工，因為拆左大門只有鐵閘，隔住鐵閘見到入面所有野已經拆晒，個窗撘左栅，覺得好開心，感覺所有舊野冇晒，看到新的開始，影左幾張相，自己一路睇一路笑！

貓之家

又到溫馨飯聚！

上次去完烏溪沙BBQ，又約出來！上次是好友生日，今次係佢個仔！今次去另一個好友在上水的家，他的家剛裝修完不久，全屋以白色為主，牆上掛了三幅希臘風景相，窗上掛了一幅魚網和貝殼，很有希臘 feel ! 地方當然不及烏溪沙村屋大，不過兩個人住已經很足夠！

好友家中養了一對貓，貓媽媽剛生了三隻貓BB，很可愛，牠們都很弱小，所以都不敢抱牠們！

今晚又打邊爐，又係洗野洗左好耐！今晚的食物也很豐富！有龍蝦、蝦、帶子、蟹柳、大量肥牛，和一些打邊爐必備的食物！我們開了紅酒和白酒，吃得很開心！

今個月的食局頗多，十日後又有另一飯局喇！

裝修大作戰 -5

明天要交吉屋比人喇，今日又要返工，唔夠時間！剩餘要搬走的東西也比預期多得太多了，唯有放棄一部份！

先將一半物件用行李箱車去老媽的家，然後再返轉頭，執埋剩餘果D，好辛苦呢！又落雨，差D截唔到的士，攪到好夜先完成！

新志記

相約了舊同事飯局，上次是十二月，已經相隔八個月了！約好了在太子站的新志記，在地鐵D出口，一出來見到一間志記，原來是同一間，只是招牌沒有"新"字，見到餐牌是新志記，才確定是這裡，這裡是一家頗舊的飯店，店內裝修較殘舊，坐位也不多，都以細枱為主，我們十多人，訂了最大的那張枱，老友們陸續到來，雖然不再見面，但總有說不完的話題！

我們叫了鵝腸、鹽焗雞、炸生蠔丶西蘭花帶子、生炒骨、椒鹽鮮魷、蒸勝瓜等等，呢度D燉湯好得！好足料好好飲，叫左兩大煱，好正！D小菜好夠鑊氣，全部都好好味，一定要再來！

飯後大家已經約定中秋節後出來，去BBQ！

裝修大作戰 - 4

為了要趕快完成pack 箱，在放假時日以繼夜執，和每晚收工執，大量棄掉雜物後，將保留的pack箱，這才驚覺家中雜物是如此的多！為了將箱頭數量控制在40箱左右，我將一年沒有用過或將來未必會用的，都棄掉，只是怕倉不夠位，昨晚還pack 通宵，最終是56箱，早兩日已經知道超過50箱，已通知了搬運公司，要加錢了，可能要加租一個細倉了！我打電話去迷你倉問會唔會有大小小4x7倉，我話我book 左倉今日入，有冇大小小既倉可以換，佢話有呀！留左比你！我都冇講我係邊個，佢竟然知道我要換大D倉，原來佢話物流果邊，我聯絡開果位曾小姐通知左佢，話我由原本40箱加到50幾，叫佢揾定個倉比我，剛剛好有人臨時退租，才有倉比我，太細心了！也太巧合了！

約了迷你倉的搬運部門，下午兩點，先清一些垃圾，再到樓下叫收買佬回收電器，收買的阿姐上來看，所有電器都不值錢，因為都很舊，我志在佢幫我搬走，她問我有否舊酒、舊CD、舊手錶，我其實有支長頸FOV，正考慮是否有人收，冇就掉左佢，便問她收不收，她說值幾百元，我諗可能唔止，不過原本就想掉，就算了，平平地比佢收！

攪完回收電器，個司機話要遲45分鐘才到，我又掉一些垃圾，執屋時發現有幾支紅酒，大概是七、八年前的，放得太久了，不知有否變壞，也棄掉了，才放到垃圾站，轉頭已被人執走了！！掉完垃圾，車也到了，兩個搬運工人好快手pack 好野，收買佬也來收電器，成間屋變得好大空間，剩餘些垃圾要呢幾晚清埋！

跟貨車去迷你倉，我先上去辦手續，D箱上到去再數一次，運輸工人將貨入倉，入晒倉後只剩餘小小空間，原來租倉是沒有鎖的，你可以自己帶鎖，他們也有供應，收費$60，唯有照買，另外倉咭$60，可以自由出入，攪掂晒就攞埋D電器catalogue 去裝修公司，比佢地預尺寸做櫃，早D返屋企執埋D野！

Wu Kai Sha BBQ

好友生日，又相約成班人去好友在烏溪沙的村屋BBQ，因為要返工沒有join 佢地買食物，去到見佢地未洗好野，不過都差不多洗好，同上次一樣，超多野食，有蝦、帶子、鮑魚、石斑、羊架、雞翼、牛扒、雞扒、粟米、蕃薯、等等，個爐放在屋門外，由三位男士主力做燒烤的工作，女士們都舒舒服服地涼住冷氣等食！好幸福呀！

裝修大作戰 - 3

上次傾完平面圖，話兩星期左右睇3D圖，最後要三星期，上星期打比我，但係夾唔到時間，最終要等多幾日我才有時間去睇，差不多四星期才睇到圖！

設計師攞返上次張平面圖，一邊講解D擺位同尺寸，見到3D圖既設計好鐘意，我好怕設計老土，個設計雖然有小小用唔盡D空間，但係為左在小小的單位營造空間感，我仍決定採用原有設計，反正這兩星期已經大量棄掉冇用的雜物，需要儲物的地方也大大減少，寧願多點空間！廚房的設計我很喜歡，完全是我夢想的那種！只是洗衣機放不了我選擇的那款，不是設計的問題，而是入口不夠，要不是設計師的提醒，我也忘記了入口不夠闊！

設計師替我設計了隱藏的洗手間門，我很喜歡，書枱的設計是沒有枱腳的那種，目的也是增加空間感，而餐枱最後還是決定用高身的枱櫈，看著設計圖，一邊想像實情況，很期待呢！

睇完設計圖，要埋單計數，比第一天初步的估價多了16%，亦是我預計之內，簽好合約，定了開工日期是八月十號！尚有12天時間，要努力執拾了！

























攪掂之後行去租迷你倉，之前上網睇左，見呢間迷你倉在旺角有幾個
倉，在弼街呢個有新張優惠八五折，所以揀呢個，由設計公司行過去只係兩個街口，上到去，見呢度都好新淨，我預算有40箱野，諗住租個4呎x6呎倉，佢只有一個4x6，大D都冇，但係4x6個倉有個柱位，佢扣返個柱位租金比我，我只係擔心到時唔只40箱，驚放唔晒，唯有盡量減少箱數！租倉要比兩個月正價做按金，月租以足月計，入倉第一個月不足一個月按比例計算，之後計一個足月，我預計8月6號入倉，租到10月31號，如果延期以七天計租金，即係7日、14日、21日咁計，不足7日也計7日租，另外可租倉咭，方便自己出入倉，收$60，攪掂晒手續後，要回家開始努力 pack野喇！

裝修大作戰 - 2

上星期度尺後，今日約左上去睇平面設計圖，今次姚生介紹了設計師Jo，我們一起傾全屋基本擺位，平面設計圖跟我心目中的相約，由入門口，廳、房、廚、廁，每個位置的尺吋，大約的間隔，採用的色調等等，一路傾一路在平面設計圖上畫呀畫，心𥚃很期待看到完成的一天呢！

傾完去附近幾條街行一行，睇睇D裝修物料，呢度好多派傳單的亞姨，她的很落力，我估佢地成功帶到客比D裝修公司，可能有佣金分，所以當你攞第一張傳單，其他人就蜂擁而上，她們不斷游說你上去參觀陳列室，甚至追住你行，一邊努力遊說，如果不是定了裝修公司，可能會去睇睇，這裡有很多裝修公司，競爭很大吧！我選的那家卻沒有派傳單，而樓下的小店又唔憂做，對比很大！

在附近行了幾家賣浴室用品的店，見到賣的都是幾個牌子，價錢相約，心目中也有一兩個選擇，還要等兩星期才出3D設計圖，在這兩星期要努力執拾家中雜物！

未來戰士: 創世智能 3D 4DX Terminator : Genisys

John Connor 率領一眾戰士，攻擊 Skynet，發現他們派了機械人重返 1984年，殺 John 的母親 Sarah，John 派了志願者 Kyle 前往救助，Kyle 返回1984年，找到了 Sarah ，而 Sarah 自九歲起受到 T800的保護，三人一起對抗 T1000，他們利用時光機，去到2017年，阻止 Skynet與 Genisys 連接，此時 John 卻來到此處與他們會合，他們計劃進入 Skynet 的主樓破壞系統，但發現 John 並不是本來的 John....!!

今次都係睇4DX版本，效果不算強，電影今集揾返 Arnold 做 T800，穿梭不同時代，有年輕、中年和老年的他，比起他在轟天猛將時，沒有那麼老態，幾個年輕演員比較陌生，故事亦不及第一、二集好睇，始終拍得越多，越難拍得好睇！

Ted 2 賤熊2

承接上一集 Ted 與女友結婚了，可惜兩人關係漸漸變差了，Ted為了改善兩人關係，想要生一個BB，Ted 想盡辦法去取得精子，計劃生育或領養，但礙於 Ted 是熊公仔，不能合法領養，令 Ted 決定告上法庭，可惜Ted被裁定是一件物件而非人類，他與老友再去紐約尋找律師幫助，再向法庭申請翻案，中途再遇上壞人想拆開 Ted 的身體再研發大量生產.....!

Ted 仍舊非常賤，粗口橫飛，在捐精中心攪亂，非常爆笑，可惜這節時間太短，加長五分鐘一定更多笑料，今集加入了 Amanda Seyfried ，又有 Morgan Freeman 客串，更有睇頭！

裝修大作戰 - 1

一直"想"裝修一下屋企，這個"想"已經年多了，終於要成事了！

早前上網、睇雜誌、問人、選了兩間心水的裝修公司，一家是屋企樓下的小店，之前搵過佢做過兩次小維修，做得OK，而且大家街坊街里，做開呢個屋邨單位，應該可靠，上次師傅來維修時已略略建議過怎樣做，說可以到店看一些其他單位的完成照片，上門報價收$300，可在裝修費扣回，而另一家在網上找到的，在網上看過一些裝修公司的資料，見這家公司的管理頗為專業，有不同團隊監察工程，又有一些裝修投訴的新聞稿提醒人客小心受騙，感覺專業，價錢應該會貴一點，這公司是包括設計，有很多單位完成的相和短片，很多都是豪宅，可能豪宅面積才夠大做示範吧！不知會否好貴，又或者做唔做細單位呢？

上星期走到樓下的小店，沒有開門！唯有今星期再去！今星期有開門了，見到上次那個師傅，問他裝修報價，他說有工程做緊唔得閒，叫我過左暑假先再揾佢！=.=" 唯有去另一間！

另外這一間是設計公司，其實也不需要甚麼設計，簡簡單單便可，也即管去看看吧！這公司在旺角道，去得旺角道，先去彌敦道吃過甜品吧！上次去過的 Le Dessert Palais 就在彌敦道近旺角道，吃過甜品就步行前往，沿旺角道行，這裡有不少裝修物料售賣，選擇很多，而且好漂亮呢！行到去豪華戲院對面，再乘電梯上去，去到門口，按了門鈴等了一陣，有個年輕人來應門，問是否想報價，入到去見到有幾個年輕人對著電腦工作，這裡地方不大，帶中國風的裝修，有很多書本，我在一個小房等待，剛才的年輕人問我地址，然後上網找了我家的平面圖，然後有個姓姚的設計師和我傾，他也很年輕，感覺這家公司是一班年輕人，有誠意想做好間公司，好像不錯，與姚生溝通了我的想法，初步報了價錢和包括的項目，因為他們沒有上門報價，只用平面圖簡單畫了概念和預算，認為價錢OK便要支付一萬五千元訂金，他們便安排上門度尺、畫圖、電腦模疑完成圖、夾用料等，約需一個月時間才動工，他還說，除了傢俬電器不包之外，地╱牆磚、坐廁、花灑、水龍頭、鋁窗等都要另計，到時可以帶我去附近的商店揀，我先付了訂金，再約翌日上門度尺。

安排好了，到附近賣裝修物料的商店看看，見到好多地磚都好漂亮，有些洗手間的物料也很漂亮，下次過來睇圖再看吧！現在要動工執屋了！好期待新屋呢！

韓珍

相約好友出來吃飯，已經有一年沒有見面了，今次三缺一，不過亞Yu帶埋老公來，仍然是四位，原本去食日式放題，但建議的那位缺席，而且我不太熱衷日式放題，改了去食韓燒！

去了寶勒巷的這家店，時間尚早，店內的人不多，店內都是一些長枱，可以坐兩枱八人，有小量四人枱，還有幾個VIP房，餐牌食物選擇不少，一坐低已送一支米酒，老實說，支酒味道怪怪，頗難飲！我們人齊後才點菜，叫了醬油蟹、八式豬腩肉，三款牛肉、泡菜煎餅，豆腐牛肉湯等等，第一次食醬油蟹，味道很好，好鮮味！正！牛肉也很好味！我們叫的八式豬腩肉其實可以叫四式，不過又想試晒咁多款，我們要慢慢燒，慢慢吃！店員頻頻換燒烤網，不怕燒焦！

席間亞Yu夫婦兩人大吐苦水，原來與沒有來的那位合作做生意的不快經驗，難怪那位話缺席，Yu的丈夫便來了，都說好朋友不要合作做生意，總是會反臉收場！

3D 4DX Jurassic World 侏羅紀世界

故事講述Zach 和Gray 兩兄弟，一起到 Isla Nublar 的主題公園 Jurassic World，他們的亞姨 Claire 在這主題公園做高層，這個 Jurassic World 是廿二年前的 Jurassic Park 改建而成，每天有二萬多名訪客來到，公園為了保持訪客人數上升，研發了改造DNA 的恐龍，比暴龍更大更兇猛更聰明的兇王龍，在預備公佈這新品種前，園主Simon 找來了恐龍訓練員Owen 來觀察，Owen 一直訓練速龍，與牠們建立了關係，而 Vic 一直想將受訓的恐龍用在軍事用途上，但 Owen強烈反對。Owen 與 Claire 一起去看兇王龍，卻發現牠失蹤了，當他們走入兇王龍的飼養園內，才發現兇王龍仍在園中，之後更逃離了飼養園，園方要立即疏散遊客，Vic 亦趁機派員生擒兇王龍，同時間 Zach 和 Gray 坐的球型觀光車停滯在草叢，兩兄弟自己駕駛到其他地方，卻遇上兇王龍.......!

很期待的一部電影，結果頗失望，難怪不在暑假黃金檔期上畫，珠玉在前，看過 Jurassic Park 的人，一定像我一樣期待，可惜沒有像 Jurassic Park 令人驚喜，套戲主要以多種恐龍作賣點，很多地方都沒有交代，例如兇王龍是怎樣鍊成的？只在結尾交代用了那些動物的基因，以恐龍做軍事用途實在難以至信，又要加插速龍與主角的互信，為結局作出鋪排，眾主角無論在任何情況下都不會有事，而且非常神勇，如劇情所講， Jurassic World 的地點是昔日 Jurassic Park 的"遺址"，有人會去嗎？

今次都係睇4DX，動作效果不算多，但噴水次數較多，小心噴到入口！>.<

The World is Alive - Canon EOS5S / EOS5SR 作品展覽分享會

早兩星期收到 Canon email ，六月六號和七號有呢個作品展覽分享會，剛好今天放假，便預約，全日有三個 section ，上午是英語，下午有兩個粵語 section，選擇下午的 section ，可惜都 full 了，唯有 book 上午，地點在中環 PMQ元創坊，已經是第三次去 PMQ，每次來都好熱，今天也不例外！分享會地點在二樓的 The Qube ，在外面等候登記入場，沒有冷氣，好熱！幸好等十多分鐘，先登記，再派一張遊戲咭，有些海報任取，然後入坐，這裡大約有150個坐位，都幾乎坐滿，上午請來的嘉賓是 Kevin Ou，在美國從事替名人攝影的工作，他介紹自己的工作情況，亦講了些5DS/R的優點，和一些照片效果，他講了約一小時，便到大家期待的試機時間！

會場設置了四個試影區，第一個有穿婚紗的 model予人拍照，照片效果即時在旁邊的電腦顯示，放大看一些細節位，都非常清晰細緻，這就是5千萬像素的威力！第二個試影區是全黑佈置上，放了金銀色飾物，還有黑色雀鳥和羽毛裝飾，拍了張試試。每根黑色的羽毛仍清楚看到紋理！第三個是一些乾花，也是有很多細節予人試影的，最後是一些紅辣椒和藥材，這個沒有試，因為都是乾貨類和之前一個相約，另外亦有些大幅的攝影作品，都是來自各主講嘉賓的，他們用EOS5DS／R拍攝的，作品非常出色！另外今年是5D系列十週年，同場展出曆年的5D相機（其實只有五款，已包含新的兩款）！

試完機去玩遊戲，其實不是遊戲，只要 Like 佢地 Facebook，share今次活動的post，再留言喜歡新款機那一個賣點，便送一個Tote bag！

The Captain's house

今日放假，都要早D起身去食野，平時都要諗食物，今次有目標，就係厚福街呢間餐廳，剛開業時已經想去，但係過一排又忘記左！

今次食 lunch，上到去，冇人！只有我們這枱，和另一枱跟著我出電梯的日本人，可能時間尚早吧！看看餐牌，是日午餐選擇不少，也有想試的海鮮袋，我們叫了海鮮袋，有多款海鮮選三款，當然可以加錢要多幾款，我們的海鮮袋𥚃面有螺、青口、扇貝，另外加了龍蝦，還有一些菇和腸，海鮮雖然新鮮，不過貝殼類的海鮮好細粒，而且個 sauce 頗heavy ，新鮮的海產還是清煮最好味！另外叫了一客安格斯牛扒，好好味！是真材實料！下次可以再 encore !