古琴雅苑

好友四月生日，終於約到佢食生日飯喇！

壽星女講明要食片皮鴨，我哋都好想食，所以訂咗枱一齊去呢度食，去食飯之前我去攞蛋糕，因為之前一日訂咗個蛋糕，攞完蛋糕放咗喺餐廳，再出去行吓，因為仲有成個鐘，四條友走咗去DONKI行咗陣，買咗少少野，就行返去餐廳睇吓有位未！點知都仲有幾多位！早知我哋早D過去啦！

叫咗一隻北京填鴨、小籠包、松子魚、脆鱔、菜 🥬 ，好好味，北京填鴨配卷餅🫓真係冇得輸 😋😋 食得飽飽地，雖然有蛋糕食，但係忍唔住要叫一下高力豆沙香蕉！真係好耐冇食過！反正一客得四粒啊，一人一粒啱啱好！食完甜品再切蛋糕，今次呢個蛋糕係咖啡味，在 Tony Wong 度訂，佢出咗D半磅裝嘅蛋糕，啱晒我哋人少少食，平時D 蛋糕一磅裝四個人食就太多，起碼要六至八個人先食到一磅，而家出咗呢啲半磅裝，以每磅價錢計，其實係貴咗少少，但係就啱啱好食得晒！

飯局作客 - 新貓貓朋友🐈

睇完戲，約咗朋友去佢屋企食飯，一去到佢屋企就話介紹個新朋友俾我識，原來佢養咗隻貓貓，佢話係一隻近乎全白色嘅布偶貓，好友對全白色嘅寵物有D喜好，之前佢養咗隻柴犬，又係揀咗一隻全白色嘅，都係該品種之比較少有嘅顏色！早幾年佢經常話養隻貓，我哋都勸佢唔好養，因為佢之前養過兩隻狗都俾咗人，最重要係佢自己都未養得掂 😅

好友準備咗海鮮同埋牛肉，今晚打邊爐，另一好友未到之前，當然係同隻貓貓 🐈玩下啦，我都好耐冇玩過貓喇，佢隻貓有D驚青，雖然只係買咗幾日，不過當我哋递起手想摸佢個頭嘅時候，佢都好本能反應地縮開，感覺好似之前養佢嘅人係會成日打佢，所以見到人递高手就驚驚🥺

今晚食埋個分兩份控制得好好，啱啱好食晒，好好味！我哋已經約定下次食榴槤 🤭🤭

 

怪獸與鄧不利多的秘密 Fantastic Beasts: The Secrets of Dumbledore

幾個月冇去睇戲，戲院終於開返，亦都有好多戲上畫，先睇咗呢套先！

Newt 幫助一隻母麒麟誕下小麒麟，小麒麟能夠看到人類的靈魂，及未來的魔法生物，此時他們受到Grindelwald 的手下襲擊，搶走了小麒麟，Newt 返回母麒麟身邊時，發現牠已經奄奄一息，以及另一隻小麒麟，原來小麒麟是雙胞胎！於是他將小麒麟帶回自己的皮箱內！

鄧不利多年輕時，與 Grindelwald 曾經許下血盟，希望統治人類世界，任何一方都不可以違背對方，Grindelwald 參加領袖競選，希望能夠統治人類，鄧不利多阻止不到他，於是 Newt 聯同麻瓜 Jacob 等人對抗 Grindelwald …..！

套戲好長，成兩個半鐘，我覺得劇情拖得有D慢，雖然已經嚟到第三集，我都唔係好記得第一、二集劇情 😅比起前兩集，呢集有少少悶，係後半段先至比較緊湊！

檸檬手撕雞

最近成日睇抖音嘅短片，主要都係睇啲食譜，貪佢時間快，唔會咁長氣同埋因為短時間，食譜都係比較簡單，之前睇咗呢個手撕雞，又學下整！

買咗兩隻雞髀，只需要用鹽焗雞粉醃佢一陣，然後就蒸佢30 分鐘，然後要攤返凍佢，留返起蒸雞嘅肉汁，在雞肉汁加以下配料：一個檸檬、一個蒜頭、四隻辣椒、一棵芫荽，再加少少糖，然後自己試味，可以酌量加糖或者鹽去調到啱自己口味，將雞髀手撕起肉，再淋埋個汁就食得啦！雖然個食譜都好簡單，不過時間都要四十分鐘左右😅

 

心信奇妙 再次相會

迪士尼樂園關閉咗三次，今次關閉咗104日，尋日重開，尋日因為冇假放，所以約咗今日去！尋日睇新聞唔係好多人，我記得每次第一日開都唔多人，但係今日就好多人，可能因為係星期五嘅關係！張年票本來二月到期，Extend 左三次之後，出年五月先到期！😄

今日早少少出門，先去食少少嘢，然後直接入園，門口唔係好多人，可能好多人一早入咗去，入到去就覺得好多人，所有機動遊戲都要排隊最少半小時，所以我都冇玩機動遊戲，所有商店都好多人，不過晏晝都有巡遊，當然係規模細好多，只有三卡車！亦都有D舞台表演，不過今日好曬，所以我都冇睇到，大部份時間留喺商店入面涼冷氣！剛剛入嚟嘅時候見到好多產品都好靚，都好想買！佢哋出咗一隻頭箍，係可以自由組合上面嘅卡通人物，我就冇買到，因為屋企都好多頭箍！又有D春天粉紅色嘅產品，同埋出咗好多款口罩都好靚，又有D幾特別嘅背囊，不過質料好硬身，同埋容量比較細，所以都唔啱我！我走嘅時候，只係得壹樣嘢啱，然後買咗兩盒口罩就算，今期佢有優惠價換購米奇背囊，有四個顏色選擇，我揀咗個紫色！

太陽未落山就走喇，我見好多人都走，因為冇夜間巡遊又冇煙花睇，唔知幾時先可以有煙花睇呢？

 

海港薈

好友移居左台灣一年後，攞咗居留權，早幾個月返咗嚟香港，不過撞啱疫情，都冇辦法約出嚟見面，而家疫情放緩，今日開始恢復晚市堂食，即刻約出嚟食飯，今晚去大埔食，已經好幾年冇去過大埔！商場入面嘅店舖幾乎全部轉晒，只有少數仲係不變！以前喺呢度返工，好多時都去呢間酒樓食晏，酒樓就冇乜點變！

我哋四個都好耐冇見，經常只係在Facebook傾幾句，大家都係講吓近況，好友在台灣嘅生活好寫意，因為佢冇乜點打工，都係幫下朋友手，所以都好清閑，佢打算留多幾個月先走，所以都想搵啲part-time做吓，過吓日晨，而另一好友，講起原來佢八歲個女有 ADHD 注意力不足過動症，不過唔係好嚴重果隻，佢話開頭唔知道嘅時候，老師成日投訴佢好曳，都估唔到老師冇咁嘅經驗，發覺唔到佢嘅問題，只係一味投訴！反而其他學習班嘅老師就發現到佢嘅問題，所以叫好友同佢做吓評估，不過好又話睇政府嘅評估，要等年幾兩年，所以搵咗啲政府資助嘅機構去做評估，但係都要$8000 ！最後評估出咗嚟真係有，就可以攞住評估書去睇政府醫生攞藥，先至可以慳到D醫療費 😔 

今晚我哋叫咗燒味雙拼，有叉燒同燒腩仔，好耐冇食過燒男仔喇！好好味！另外仲叫咗條魚、雞煲、蝦仁豆腐、金銀蛋莧菜，呢餐價錢都唔貴，最重要大家食得開心！

 

伊間咖啡

周不時搭車會經過啟岸呢個住宅大廈，佢樓下嘅商場叫做啟岸巷子，今日去睇吓呢度有D咩食，原來呢個位置都好細，只有幾間食店，有一間好多人排隊，應該係193開嘅Cafe，另外仲有幾間食店，有食台灣嘢、日本烤肉、壽司店、炸魚薯條等，見到呢間咖啡店，就是一是佢！

店入面嘅座位好少，因為水吧已經佔咗店一半位置，店內一共有四張枱九個坐位，不過都坐滿，食物嘅選擇都好簡單，除咗佢擺出嚟嘅糕點之外，都係三文治同巴斯克蛋糕，店主推介佢哋三平嘅三文治，有蛋沙律同埋吞拿魚，吞拿魚佢哋話係自家做㗎，另外就試咗佢哋嘅甘栗Madeleine ，咖啡就叫咗杯 latte！

三文治都幾厚，味道都唔錯，不過食咗大半，咬到一小舊吞拿魚係好腥嘅，所以食剩小小就唔敢食喇😅 最近成日腸胃炎，所以都唔敢食！個 Madeleine 同 咖啡都ok ！

 

剪髮

之前疫情爆發嘅時候，髮型屋都唔俾開，原本話要停業兩個月，但係停咗一個月左右，又話可以開返！上次係過年前剪過頭髮，中間因為髪型屋冇開，唯有自己略為修剪，而家前後隔咗三個月，終於可以去剪髮，早兩個星期因為驚太多人，所以唔去住！約左今日去！

剪髮前先去食啲嘢，去咗The One嘅 Dazzling cafe ，依度啲食肆都好冷清，呢間餐廳都算比較多人，起碼有一半位有人！

望一望個餐牌，冇咗我最鍾意食嘅佛羅倫斯干貝意大利麵！唯有叫其他食，叫咗個青醬奶油雞腿意大利麵，雞腿切成左三件，應該唔足一隻雞腿🍗！😅 另外叫咗杯奶蓋烏龍茶，個奶蓋非常之濃厚！

食完野去剪頭髮，好快就九點，跟住去 DONKI 行吓，呢度好多人，要排長龍俾錢！🤦🏻‍♀️買完嘢又落去果欄買生果， 今次買咗奇異果🥝、提子、王林蘋果！原本想買榴槤，但係好多人！下次先買！

 

Halfway coffee 半路咖啡 （旺角）

疫情稍為放緩，而且一路回落緊，呢幾日都係三千人左右，回想第一波疫情嘅時候，超過100人感染已經係非常緊張，而家由幾萬人跌到落幾千人已經覺得好好，同埋今一波疫情，真係好多人都冇出街，街上面嘅人都明顯少咗好多！

今日去呢間餐廳，位置都幾隔涉，門口亦都唔起眼，行過左都唔知，店個設計應該係將原本舊店略為改裝，保留原有店裝修，加D新元素落去，水吧位有個招牌寫住 ”堅強貿易行” ，唔知係舊有保留左落嚟，定係店主新加落去，店內最特別係D玻璃窗，係好大幅嘅窗，而家呢個天氣去將玻璃窗打開咗，外邊有啲室外座位，室內嘅座位其實係在一條巷度，條巷嘅唔好處係會有人喺度食煙，整體感覺都好舒服！👍🏻

店入面都係得四個客人，唔多人，睇吓餐牌都好簡單，食物得2-3 款，其餘係撻、包之類，我叫左三文魚牛油果酸種麵包🥑🥯同埋咖啡☕️，飾物整得好精緻，睇得出好花心機去整，咖啡就用傳統中式圖案設計嘅咖啡杯，幾特別！整體來講呢度環境舒服，食物同咖啡都唔錯，唯一係位置比較偏僻，不過咁樣可能就會少D人，坐得舒服D 😅

 

煲仔榮記

之前行過呢間好多次，都冇入去食，因為感覺好似冇位，又望唔清楚裏面係點樣，今日見到佢好明顯係有好多位，所以入去試吓 ！

原來店入邊個座位好少，只有四張枱，同埋一D旁邊嘅位，餐牌亦都非常之簡單，基本上只有麵同埋煲仔飯，比一般茶餐廳更加少選擇，因為佢呢度主要係食沙嗲牛肉麵，配搭唔同嘅餸，而佢嘅招牌煲仔飯，就係金蠔同埋蝦乾，就叫晒兩樣野，飲品方面佢係用樽仔去裝，細細樽咁，不過就唔太環保！另外仲有賣豉油、醬汁之類嘅嘢！

食物嘅味道唔錯，應該賣一兩款都夠做，不過我覺得唔會有好多熟客，喺旺角區應該唔會太多人日日都食呢，同埋煲仔飯始終都係冬天先多人食！

 

無花果浸雞

疫情下，冇晒飯局，今日晏晝去尖沙咀搵老細一齊飲杯咖啡☕️☕️，跟住就去採購，因為而家D店舖好早就閂門，收工係買唔到嘢，只有放假先至能夠一次過買晒日用品，不過今個禮拜疫情有所緩和，每日確診嘅數字都低於一萬 ，四位數已經覺得好好咁，好多人都走出街！原本想去果欄買水果，不過屋企仲有，上個禮拜買咗血橙、香蕉、波子青提，可以慢慢食足一個禮拜，最近D波子提子好大粒，而且價錢都好平，不過好大抽，買一抽隨時都三四磅！

夜晚喺屋企煮嘢食，前幾日喺抖音見到個無花果浸雞食譜，又學人地整下，材料好簡單，有石斛、無花果、北芪、紅棗，食譜冇講份量，就跟佢個圖咁上下數量去煮，將藥材煲半個鐘，然後放埋啲雞落去，煮熟之後就食得，我覺得個味道有D淡，可能我落得太多水，同埋無花果唔係好出到味，下次可能要試吓將無花果切開！等佢出味D！