老馮茶居

呢兩日好想飲茶食點心，因為都好耐冇食過，行去地鐵站嘅時候見到呢間茶居，入去試吓，見佢有啲點心都有啲特別，所以叫咗個牛腩腸粉，以為係平時嗰啲腸粉只不過加咗牛腩喺裏面，點知原來係朱腸粉上面鋪咗牛腩同腩汁，所以都幾”漏”，另外叫咗叉燒包、糯米雞、粉果，因為個腸粉份量太大，搞到食唔晒啲嘢😅 雖然呢間店都幾旺，但我覺得啲嘢食唔係特別好食，可能佢價錢比較實惠，所以都幾受歡迎！

 

福田

已經四年冇去過大陸，最近睇新聞成日都講好多香港人都返大陸玩，因為深圳已經進步咗好多，多咗好多大商場，食嘢又好平，地方亦都乾淨咗好多，因為好多新起嘅建築，所以周圍都好新淨，相約好友今日上去，我哋幾個住埋喺附近，所以一齊搭的士去西九龍圓方，我哋搭高鐵去福田，車程只需要14分鐘，真係非常之快，我就用12306個app買飛，佢哋就上網買飛，去到西九龍車站，我哋買埋回程飛先，跟住就過海關，上車好快就到站，落咗車在福田呢邊唔需要再過關，因為喺香港已經做咗一地兩檢，我哋一出閘就沿着地下街行，地下街已經好多嘢食賣價錢都好平，我哋先行去皇庭廣場食晏，揀咗一間叫做湘辣辣嘅店，呢間主打用新鮮牛肉，門口都有個隔住玻璃嘅肉檔，見到個師傅喺度切牛肉，店入面見到有一排飯煲，因為會每張枱俾一煲飯，見到呢度好多店都係咁樣做法，因為佢啲小菜係好好送飯，所以每台都有一個飯煲，我哋叫咗一碟現炒花龍(牛肉)、鮮貝戀上蝴蝶蝦、口味雞雜、剁椒魚頭，仲有炒咗碟菜，飲品我哋就叫咗水果茶同埋檸檬茶，我哋全部要微甜，今日好熱，加上呢度啲冷氣唔係好大，所以我哋都要叫凍飲，好友杯檸檬茶冇做到微甜，好友話唔算好甜可以唔使換，我哋同店員講，另外兩杯一定要微甜，店員都好緊張，話要同我哋換過另一杯，好又話唔使，擾攘一輪之後，店員去叫經理過嚟，經理在加把口話幫我哋換或者比一杯另外嘅飲品好友試吓，我哋見佢哋咁堅持，所以都接受佢比另外一杯飲品 😅 服務非常之好！

幾款餸都好好食，大家都忍唔住要白飯！仲要添飯 😂 其實大家唔想食咁飽，因為仲想食其他嘢，食完飯我哋去商場行咗一陣，周圍去試食啲零食，好友買咗好多，我就淨係買咗炒栗子同埋秋葵乾，比較健康一啲嘅零食，佢哋又買糕點，又買芒果乾同埋魚乾，行完呢個商場我哋就去返頭先個地下街買手搖，呢度啲手搖係幾好飲，因為真係用茶葉沖，亦都聞到茶葉嘅香味，附近好多買麵包同蛋糕嘅地方，賣相非常之吸引，而且好香，好友又買咗啲返去聽日食！

飲完手搖我哋又行去第二個商場，我哋行出街嘅時候開始想落雨，所以行咗入去四季酒店隔離嘅商場，呢個商場好靜，但係好明顯啲店舖係比較高檔，見到一間日本料理店好吸引，上網睇過價錢一啲都唔平，因為佢係主要食蟹嘅，老實講比咁嘅價錢我情願去日本食😅 行完商場再過返去皇庭廣場嗰邊，因為好大雨我哋都係搭的士，咁啱呢㗎的士唔收Alipay，淨係收WeChat Pay，我哋冇，問佢收唔收港紙，佢話收但係冇得找，我哋只係搭咗$10 人民幣，所以俾咗$20港紙佢唔使走！

入到商場行咗陣，又買咗少少零食，就開始去搵位食火鍋，去咗呢間叫做禧牛薈，好友未食過，大家一齊試吓，牛肉都唔錯，係冷氣唔夠凍！好彩好友帶咗把手提風扇，吹一陣冇咁熱😅

食完飯去咗行超市，見到有手撕雞賣，好友一共買咗四隻，另外又買咗大樹菠蘿，真係滿載而歸，跟住再去買杯手搖，然後就去火車站，去到火車站都要等一陣先可以入閘，因為佢係開車前10分鐘左右先比入閘，入咗閘去月台都要等一陣，差唔多一上車就開車，因為㗎火車係廣州開落嚟，所以要等到夠鐘先至有車埋站，返到香港先至做過關，好友因為拎住太多野，被關員叫停檢查😆

去到圓方的士站搭的士，超級多人，要先攞飛，再等佢叫Number先至行埋去排隊，我哋嘗試call Uber，但係冇車，我想搭地鐵，因為我冇乜買嘢，但係好又拎住好多嘢，所以一齊等的士，足足等咗一個鐘頭先至有車！所以真係強烈建議搭地鐵去第二個站搭的士，或者直接搭地鐵走會慳好多時間！

 

2023-3 廸士尼 18周年

經歷咗兩個禮拜嘅壞天氣，今星期終於有返啲太陽，今日喺香港迪士尼18周年，就入去迪士尼行吓，其實最主要係帶部 Insta360嘅X3去影相，今日都唔算好多人，不過好多都係國內遊客，行過新園區 World of Frozen 入口，見到好似做緊招待會，夜晚睇新聞都見到有介紹，呢期啲商品冇乜特別靚嘅嘢，應該係提早咗做Halloween嘅promotion，同時推出咗啲商品，影咗一輪相就走，因為好熱呢😅

 

山西印象

三年前，疫情比較嚴峻嘅時候，我成日都去呢間山西印象食飯，貪佢冇乜人，而且家庭式經營，店員比較友善，應該係兩公婆同埋個女一齊做，不過我其實聽唔明佢哋講乜嘢，可能佢哋係山西人，講開山西話，國語都帶口音，又唔係好識講廣東話，但係識聽廣東話，後來店主話業主要加租，所以佢哋結束咗冇繼續經營，之後喺街度撞過佢哋，都算有緣，原來佢哋都想喺荃灣開返舖，但係都搵唔到啱嘅舖位，隔咗大概一年左右，今年佢哋終於開返鋪喇！就係返以前舊舖嘅對面，大間左，仲有樓上！見到佢地開返，都好鄧佢哋開心！

當然要幫襯吓！我多數食麵，佢地D麵係自己拉的，老闆拉麵，老闆娘煮麵，亞女收錢😄 平時晏晝冇乜客，我諗主要做晚市，有酸菜魚食，我就食晏所以食飯或麵，食物保持到水準，始終家庭式經營，都係住家的味道👍🏻👍🏻又可以做飯堂喇！

 

kobane

星期四晚一場黑雨，落左16小時，竟然是五百年一遇的大雨！導致地鐵站月台都入晒水，最誇張係黃大仙中心成個商場地庫全層被水淹沒左！上星期五打風，今星期黑雨，我連續兩星期都放假，都留在家中，邊度都去唔到 🤦🏻‍♀️ 浪費咗我兩日假期，好似兩個星期冇放過假咁 🥹🥹

今日想有小小假期 feel ，去左南豐紗廠食晏，都有一陣子冇去南豐紗廠，原來已經有一年冇嚟食野😅，今日仍然有雨，不過唔大雨，商場好多人同狗狗🐕🐩，之前好鍾意去嗰間 Between Haru 已經執咗笠，轉咗手去，而家呢間叫做 konabe ，裝修同之前冇乜大分別，餐牌D食物風格都有D似之前果間😅，係少咗啲麵包，多咗D甜品！

叫咗個壽喜燒牛肉燴飯，玫瑰咖啡🌹☕️，食物質素都唔錯，係份量細咗D😅，咖啡略嫌淡咗少少🤏🏻 店員比之前嗰間好，比較友善，走果陣，廚房入面做嘢嘅人都會同你講聲拜拜👋🏻🤣

 

黑色大暴雨

 

尋晚收工開始落雨，估唔到雨勢咁大，好快就轉左黑雨， 今朝瞓醒仲係黑雨，上個星期五打完十號風球，今個星期五又黑雨，連續兩個禮拜都要喺屋企，尋晚果場雨仲搞到周圍水浸，天文台話五百年一遇咁大雨，最誇張係好多地方變咗好似條河咁，成個黃大仙中心地庫嗰層浸到上頂，好誇張！

十號風球 - 蘇拉

前兩日呢個風急轉彎，兜返嚟香港，前日1號風球，尋日3號風球，尋日天文台已經講定，今日凌晨兩點左右會掛8號，仲講明可能會改掛10號，話呢個Fung拍得住當年嘅溫黛，結果去到夜晚八點幾就掛咗10號，全日喺屋企無所事事，就執吓屋、搞吓衛生，睇個情況，聽日可能會繼續打風，原本約咗好友聽日食晏，唔知食唔食得成呢？