福田

已經四年冇去過大陸，最近睇新聞成日都講好多香港人都返大陸玩，因為深圳已經進步咗好多，多咗好多大商場，食嘢又好平，地方亦都乾淨咗好多，因為好多新起嘅建築，所以周圍都好新淨，相約好友今日上去，我哋幾個住埋喺附近，所以一齊搭的士去西九龍圓方，我哋搭高鐵去福田，車程只需要14分鐘，真係非常之快，我就用12306個app買飛，佢哋就上網買飛，去到西九龍車站，我哋買埋回程飛先，跟住就過海關，上車好快就到站，落咗車在福田呢邊唔需要再過關，因為喺香港已經做咗一地兩檢，我哋一出閘就沿着地下街行，地下街已經好多嘢食賣價錢都好平，我哋先行去皇庭廣場食晏，揀咗一間叫做湘辣辣嘅店，呢間主打用新鮮牛肉，門口都有個隔住玻璃嘅肉檔，見到個師傅喺度切牛肉，店入面見到有一排飯煲，因為會每張枱俾一煲飯，見到呢度好多店都係咁樣做法，因為佢啲小菜係好好送飯，所以每台都有一個飯煲，我哋叫咗一碟現炒花龍(牛肉)、鮮貝戀上蝴蝶蝦、口味雞雜、剁椒魚頭，仲有炒咗碟菜，飲品我哋就叫咗水果茶同埋檸檬茶，我哋全部要微甜，今日好熱，加上呢度啲冷氣唔係好大，所以我哋都要叫凍飲，好友杯檸檬茶冇做到微甜，好友話唔算好甜可以唔使換，我哋同店員講，另外兩杯一定要微甜，店員都好緊張，話要同我哋換過另一杯，好又話唔使，擾攘一輪之後，店員去叫經理過嚟，經理在加把口話幫我哋換或者比一杯另外嘅飲品好友試吓，我哋見佢哋咁堅持，所以都接受佢比另外一杯飲品 😅 服務非常之好！

幾款餸都好好食，大家都忍唔住要白飯！仲要添飯 😂 其實大家唔想食咁飽，因為仲想食其他嘢，食完飯我哋去商場行咗一陣，周圍去試食啲零食，好友買咗好多，我就淨係買咗炒栗子同埋秋葵乾，比較健康一啲嘅零食，佢哋又買糕點，又買芒果乾同埋魚乾，行完呢個商場我哋就去返頭先個地下街買手搖，呢度啲手搖係幾好飲，因為真係用茶葉沖，亦都聞到茶葉嘅香味，附近好多買麵包同蛋糕嘅地方，賣相非常之吸引，而且好香，好友又買咗啲返去聽日食！

飲完手搖我哋又行去第二個商場，我哋行出街嘅時候開始想落雨，所以行咗入去四季酒店隔離嘅商場，呢個商場好靜，但係好明顯啲店舖係比較高檔，見到一間日本料理店好吸引，上網睇過價錢一啲都唔平，因為佢係主要食蟹嘅，老實講比咁嘅價錢我情願去日本食😅 行完商場再過返去皇庭廣場嗰邊，因為好大雨我哋都係搭的士，咁啱呢㗎的士唔收Alipay，淨係收WeChat Pay，我哋冇，問佢收唔收港紙，佢話收但係冇得找，我哋只係搭咗$10 人民幣，所以俾咗$20港紙佢唔使走！

入到商場行咗陣，又買咗少少零食，就開始去搵位食火鍋，去咗呢間叫做禧牛薈，好友未食過，大家一齊試吓，牛肉都唔錯，係冷氣唔夠凍！好彩好友帶咗把手提風扇，吹一陣冇咁熱😅

食完飯去咗行超市，見到有手撕雞賣，好友一共買咗四隻，另外又買咗大樹菠蘿，真係滿載而歸，跟住再去買杯手搖，然後就去火車站，去到火車站都要等一陣先可以入閘，因為佢係開車前10分鐘左右先比入閘，入咗閘去月台都要等一陣，差唔多一上車就開車，因為㗎火車係廣州開落嚟，所以要等到夠鐘先至有車埋站，返到香港先至做過關，好友因為拎住太多野，被關員叫停檢查😆

去到圓方的士站搭的士，超級多人，要先攞飛，再等佢叫Number先至行埋去排隊，我哋嘗試call Uber，但係冇車，我想搭地鐵，因為我冇乜買嘢，但係好又拎住好多嘢，所以一齊等的士，足足等咗一個鐘頭先至有車！所以真係強烈建議搭地鐵去第二個站搭的士，或者直接搭地鐵走會慳好多時間！