心信奇妙 再次相會

迪士尼樂園關閉咗三次，今次關閉咗104日，尋日重開，尋日因為冇假放，所以約咗今日去！尋日睇新聞唔係好多人，我記得每次第一日開都唔多人，但係今日就好多人，可能因為係星期五嘅關係！張年票本來二月到期，Extend 左三次之後，出年五月先到期！😄

今日早少少出門，先去食少少嘢，然後直接入園，門口唔係好多人，可能好多人一早入咗去，入到去就覺得好多人，所有機動遊戲都要排隊最少半小時，所以我都冇玩機動遊戲，所有商店都好多人，不過晏晝都有巡遊，當然係規模細好多，只有三卡車！亦都有D舞台表演，不過今日好曬，所以我都冇睇到，大部份時間留喺商店入面涼冷氣！剛剛入嚟嘅時候見到好多產品都好靚，都好想買！佢哋出咗一隻頭箍，係可以自由組合上面嘅卡通人物，我就冇買到，因為屋企都好多頭箍！又有D春天粉紅色嘅產品，同埋出咗好多款口罩都好靚，又有D幾特別嘅背囊，不過質料好硬身，同埋容量比較細，所以都唔啱我！我走嘅時候，只係得壹樣嘢啱，然後買咗兩盒口罩就算，今期佢有優惠價換購米奇背囊，有四個顏色選擇，我揀咗個紫色！

太陽未落山就走喇，我見好多人都走，因為冇夜間巡遊又冇煙花睇，唔知幾時先可以有煙花睇呢？

 

海港薈

好友移居左台灣一年後，攞咗居留權，早幾個月返咗嚟香港，不過撞啱疫情，都冇辦法約出嚟見面，而家疫情放緩，今日開始恢復晚市堂食，即刻約出嚟食飯，今晚去大埔食，已經好幾年冇去過大埔！商場入面嘅店舖幾乎全部轉晒，只有少數仲係不變！以前喺呢度返工，好多時都去呢間酒樓食晏，酒樓就冇乜點變！

我哋四個都好耐冇見，經常只係在Facebook傾幾句，大家都係講吓近況，好友在台灣嘅生活好寫意，因為佢冇乜點打工，都係幫下朋友手，所以都好清閑，佢打算留多幾個月先走，所以都想搵啲part-time做吓，過吓日晨，而另一好友，講起原來佢八歲個女有 ADHD 注意力不足過動症，不過唔係好嚴重果隻，佢話開頭唔知道嘅時候，老師成日投訴佢好曳，都估唔到老師冇咁嘅經驗，發覺唔到佢嘅問題，只係一味投訴！反而其他學習班嘅老師就發現到佢嘅問題，所以叫好友同佢做吓評估，不過好又話睇政府嘅評估，要等年幾兩年，所以搵咗啲政府資助嘅機構去做評估，但係都要$8000 ！最後評估出咗嚟真係有，就可以攞住評估書去睇政府醫生攞藥，先至可以慳到D醫療費 😔 

今晚我哋叫咗燒味雙拼，有叉燒同燒腩仔，好耐冇食過燒男仔喇！好好味！另外仲叫咗條魚、雞煲、蝦仁豆腐、金銀蛋莧菜，呢餐價錢都唔貴，最重要大家食得開心！

 

伊間咖啡

周不時搭車會經過啟岸呢個住宅大廈，佢樓下嘅商場叫做啟岸巷子，今日去睇吓呢度有D咩食，原來呢個位置都好細，只有幾間食店，有一間好多人排隊，應該係193開嘅Cafe，另外仲有幾間食店，有食台灣嘢、日本烤肉、壽司店、炸魚薯條等，見到呢間咖啡店，就是一是佢！

店入面嘅座位好少，因為水吧已經佔咗店一半位置，店內一共有四張枱九個坐位，不過都坐滿，食物嘅選擇都好簡單，除咗佢擺出嚟嘅糕點之外，都係三文治同巴斯克蛋糕，店主推介佢哋三平嘅三文治，有蛋沙律同埋吞拿魚，吞拿魚佢哋話係自家做㗎，另外就試咗佢哋嘅甘栗Madeleine ，咖啡就叫咗杯 latte！

三文治都幾厚，味道都唔錯，不過食咗大半，咬到一小舊吞拿魚係好腥嘅，所以食剩小小就唔敢食喇😅 最近成日腸胃炎，所以都唔敢食！個 Madeleine 同 咖啡都ok ！

 

剪髮

之前疫情爆發嘅時候，髮型屋都唔俾開，原本話要停業兩個月，但係停咗一個月左右，又話可以開返！上次係過年前剪過頭髮，中間因為髪型屋冇開，唯有自己略為修剪，而家前後隔咗三個月，終於可以去剪髮，早兩個星期因為驚太多人，所以唔去住！約左今日去！

剪髮前先去食啲嘢，去咗The One嘅 Dazzling cafe ，依度啲食肆都好冷清，呢間餐廳都算比較多人，起碼有一半位有人！

望一望個餐牌，冇咗我最鍾意食嘅佛羅倫斯干貝意大利麵！唯有叫其他食，叫咗個青醬奶油雞腿意大利麵，雞腿切成左三件，應該唔足一隻雞腿🍗！😅 另外叫咗杯奶蓋烏龍茶，個奶蓋非常之濃厚！

食完野去剪頭髮，好快就九點，跟住去 DONKI 行吓，呢度好多人，要排長龍俾錢！🤦🏻‍♀️買完嘢又落去果欄買生果， 今次買咗奇異果🥝、提子、王林蘋果！原本想買榴槤，但係好多人！下次先買！

 

Halfway coffee 半路咖啡 （旺角）

疫情稍為放緩，而且一路回落緊，呢幾日都係三千人左右，回想第一波疫情嘅時候，超過100人感染已經係非常緊張，而家由幾萬人跌到落幾千人已經覺得好好，同埋今一波疫情，真係好多人都冇出街，街上面嘅人都明顯少咗好多！

今日去呢間餐廳，位置都幾隔涉，門口亦都唔起眼，行過左都唔知，店個設計應該係將原本舊店略為改裝，保留原有店裝修，加D新元素落去，水吧位有個招牌寫住 ”堅強貿易行” ，唔知係舊有保留左落嚟，定係店主新加落去，店內最特別係D玻璃窗，係好大幅嘅窗，而家呢個天氣去將玻璃窗打開咗，外邊有啲室外座位，室內嘅座位其實係在一條巷度，條巷嘅唔好處係會有人喺度食煙，整體感覺都好舒服！👍🏻

店入面都係得四個客人，唔多人，睇吓餐牌都好簡單，食物得2-3 款，其餘係撻、包之類，我叫左三文魚牛油果酸種麵包🥑🥯同埋咖啡☕️，飾物整得好精緻，睇得出好花心機去整，咖啡就用傳統中式圖案設計嘅咖啡杯，幾特別！整體來講呢度環境舒服，食物同咖啡都唔錯，唯一係位置比較偏僻，不過咁樣可能就會少D人，坐得舒服D 😅

 

煲仔榮記

之前行過呢間好多次，都冇入去食，因為感覺好似冇位，又望唔清楚裏面係點樣，今日見到佢好明顯係有好多位，所以入去試吓 ！

原來店入邊個座位好少，只有四張枱，同埋一D旁邊嘅位，餐牌亦都非常之簡單，基本上只有麵同埋煲仔飯，比一般茶餐廳更加少選擇，因為佢呢度主要係食沙嗲牛肉麵，配搭唔同嘅餸，而佢嘅招牌煲仔飯，就係金蠔同埋蝦乾，就叫晒兩樣野，飲品方面佢係用樽仔去裝，細細樽咁，不過就唔太環保！另外仲有賣豉油、醬汁之類嘅嘢！

食物嘅味道唔錯，應該賣一兩款都夠做，不過我覺得唔會有好多熟客，喺旺角區應該唔會太多人日日都食呢，同埋煲仔飯始終都係冬天先多人食！

 

無花果浸雞

疫情下，冇晒飯局，今日晏晝去尖沙咀搵老細一齊飲杯咖啡☕️☕️，跟住就去採購，因為而家D店舖好早就閂門，收工係買唔到嘢，只有放假先至能夠一次過買晒日用品，不過今個禮拜疫情有所緩和，每日確診嘅數字都低於一萬 ，四位數已經覺得好好咁，好多人都走出街！原本想去果欄買水果，不過屋企仲有，上個禮拜買咗血橙、香蕉、波子青提，可以慢慢食足一個禮拜，最近D波子提子好大粒，而且價錢都好平，不過好大抽，買一抽隨時都三四磅！

夜晚喺屋企煮嘢食，前幾日喺抖音見到個無花果浸雞食譜，又學人地整下，材料好簡單，有石斛、無花果、北芪、紅棗，食譜冇講份量，就跟佢個圖咁上下數量去煮，將藥材煲半個鐘，然後放埋啲雞落去，煮熟之後就食得，我覺得個味道有D淡，可能我落得太多水，同埋無花果唔係好出到味，下次可能要試吓將無花果切開！等佢出味D！

 

越發

上次去桔梗食嘢嘅時候，行去果欄果陣經過呢間越南餐廳，每次經過都見到好多人等位，見今日冇乜人，就去試吓佢，餐廳入邊嘅座位好少，大概只有十幾個位，所以成日都要等位，趁唔使等位先至去試，餐牌食物選擇唔算好多，試咗佢哋招牌牛柳牛丸河，牛柳都算鮮嫩，不過份量就少啲，牛丸就唔算好出色，又試左佢哋嘅雞絲檬粉，D雞絲幾好食，檬粉不過不失，唔少得一杯越南咖啡，唔錯！😌

飯局作客 - 石圍角

呢兩個月疫情嚴峻，已經好耐冇同朋友食飯，好友平時都成日搵人食飯，佢終於按奈唔住要搵朋友食飯，所以搵埋我兩個人簡單食，其實之前佢阿嫂確診咗，佢姪仔就搬咗去佢屋企避疫，但係搬咗去佢屋企之後都確診埋🤦🏻‍♀️，好友同佢一齊住都冇中招，真係好勁，可能因為佢平時有潔癖嘅關係，佢都非常之小心，等到佢姪仔搬走咗超過一個星期之後，佢成個禮拜都喺度清潔清潔清潔，先至放心約我上去，而我亦都每日做快速檢測，呢日就去佢屋企一齊鋸扒 🥩

去到佢屋企基本上已經食得，只係我遲咗上去，佢未煎牛扒，不過好快就搞掂，我哋好簡單咁煎左兩塊牛扒，炒咗D三色椒，再加少少菜，煮咗兩碗罐頭南瓜湯 😅 上次去好友屋企食嘅牛扒就麻麻哋，今次嗰兩塊牛扒就好好多，不過個邊位都係比較厚，煎嚟煎去都係有D生 😅 食完個扒仲有甜品，好友買咗D好細粒嘅竽圓，佢都係第一次食，質感就好煙靭，不過就冇味 🤣🤣

後記：同好友食完飯之後兩日，佢就確診咗…..🤦🏻‍♀️

 

航拍 22 - 三星灣

 

原來已經超過一年冇放飛機！上星期好友問我有冇興趣一齊去放飛機，當然有啦！咁啱大家一齊放假，就去西貢走一轉！

好友話去西貢三星灣到放飛機，我哋入到西貢直接去碼頭搭船，拍好架車就坐船過去，喺碼頭見唔到有船去三星灣，跟住上網search到個電話，所以就打電話去問下，對方話叫我哋碼頭度等吓，見到藍旗黃旗船就係去三星灣，跟住見到有一隻船，成隻黃色嘅，由遠處駛緊過嚟，應該就係呢隻船，船泊岸之後，唔使問船家都睇到有個牌寫住去三星灣同麻藍笏，船費只係$30來回，好平，成隻船得我哋兩個，真係覺得佢油錢都蝕埋，後來想多一個人，跟住就開船，船程只需10分鐘就到，其實呢度剩係得個海灘，見到附近都有D屋，有D仲好似別墅咁，但係位置都唔係太近海灘呢邊，我估果度就係麻藍笏，因為隻船停完沙灘之後，就駛咗佢果邊，附近亦都有D魚排，海灘上面都有D人喺度玩水，我哋就喺碼頭放飛機！

耐冇玩都要少少時間佢諗吓點樣控制！不過每次有好友同我一齊放我就定好多，自己一個去放，硬係有D騰雞 🤣🤣 本來喺魚排上高飛咗一陣，覺得影得幾好，後來先發覺唔記得撳掣錄影🤦🏻‍♀️🤦🏻‍♀️

桔梗

又到311 ，日本311大地震已經11年了，時間過得
真係好快！

出去旺角食啲嘢，諗起好耐冇去呢間餐廳，今日就去食下！疫情下餐廳都冇乜客，上次佢係座無虛席，今次只有三、四枱客！餐牌都轉咗，見到佢有一個係和牛嘅餐牌，叫咗個和牛三文治，味道都唔錯，而且食得好飽，因為三文治嘅份量都唔細😆