Grind size

又放大假，前兩日玩完運動電競，呢兩日都好好瞓，今日瞓到好晏先起身，起咗身之後喺屋企摸咗好耐，先至出去搵食！😅

原本想去尖沙咀，但係前兩日先去完，所以轉左去旺角，行去女人街睇吓有冇一啲新開嘅餐廳，因為而家女人街好多檔口冇開檔，條街變咗冇遮擋，可以睇到兩邊嘅舖頭，下下見到呢間餐廳，佢門口出邊嗰幾檔小販都冇開檔，好清楚睇到成間舖頭，我諗應該開咗唔係好耐，因為都好新淨，同埋之前行過唔見！

店入面大概有六七張枱，有幾張望向街嘅高櫈，呢度有樓上，但我冇上去睇，見到有啲人抱住隻狗入嚟，都係坐樓上，可能樓上係可以帶狗狗入座，睇吓個餐牌都幾多選擇，主要有D小食、意粉及漢堡包，我叫咗個漢堡包，同埋一杯 Dirty ！漢堡包入面D肉有D雞軟骨，口感幾特別，但係個味就麻麻哋，而且個醬都幾都多，對我來講就比較 heavy 😅仲有好大份薯條，我只係食咗幾條，食飽就走喇！跟住就去信和行吓街，再去朗豪坊行吓，消費吓振興經濟！買咗個富士山袋🗻，同富士山杯🗻🥃，我本身有一個富士山杯，見到佢呢度有一個同我果個一模一樣只係細 D size，所以買埋佢！😆

 

無聲絕境 2 A Quiet Place Part II

 

回到第一天，當怪物第一天來到地球時，天空出現了火球墜落，Lee 和 太太Evelyn 及子女一家和好友 Emmett 一家正在觀看球賽，見到火球墜落，各人覺得不對勁，便各自回家，途中怪物出現，一家人幸好能聚在一起，經過四百多天，Evelyn 誕下小兒子後，找到方法對付怪物，女兒 Regan 看到對面山頭的火，知道有其他人，他們決定前往對面山頭看看，是否有其他人仍然活着，他們到達對面山頭後，險被怪物吃掉，幸好及時被人救起，原來救他們的人正是 Emmett ，大家共處期間，Regan 開了收音機，發現有人在廣播，Regan 發現廣播的位置，就在附近不足一天的路程，她悄悄地獨自前往該島，Evelyn 請求 Emmett 去找 Regan …….!

未睇之前，好友話影評麻麻哋，睇完之後又覺得幾好睇，唔知係咪因為我哋期望唔高，所以覺得比預期好睇，不過我覺得成套戲都好緊張，當然唔少得突然間彈出嚟嚇你嗰種驚嚇，不過個結局好似有伏線，可能有下一集都唔定😏

飯局主場 - 第廿四回

今日相約好友玩足一日，首先去食午餐，原本想去心儀嘅意大利餐廳，但係冇位，等咗半個鐘頭都冇，所以去咗對面另一間餐廳，呢間 Harbour-side grill ，我之前嚟過，今次再嚟食個lunch，我哋叫咗lunch set，每個course都有三個選擇，我哋就揀晒三樣嘢，要加錢嗰啲都唔揀，除咗龍蝦湯，因為大家都想飲，然後一齊share食主菜！

食完飯就匆匆忙忙趕去戲院，因為今朝好友遲到左45分鐘，所以搞到我哋好匆忙，去到戲院去埋廁所啱啱好開場！今日睇無聲絕境2！

睇完戲我哋去玩運動電競！呢間 AME Stadium 運動電競館，去年九月已經開，剛剛開果陣，我哋就已經想玩，話去玩到講咗兩次，今次終於玩得成！我哋因為驚自己體力未必應付到，所以揀咗新手體驗賽，價錢$140可以玩兩款遊戲，如果單玩一款遊戲要$100 ，有四款遊戲俾你揀，有踩單車、騎馬、划艇同埋拳擊，而有部滑雪機係另外計錢，淨係玩呢個機都要$140 ，我哋見到佢多咗一部機，係健身嗰種，有兩條好粗嘅繩，我唔知嗰種叫做乜嘢，總之係要好大體力先至玩到嘅一個遊戲，我哋就玩唔到，我哋選擇左踩單車同埋騎馬，因為好友打完針兩日，隻手冇乜力，玩唔到划艇，拳擊我哋就冇興趣，所以就揀單車同騎馬，先玩單車🚴🏻‍♀️，呢個遊戲都唔係好吃力，因為我都好耐冇踩過單車，絕對唔係想像中咁辛苦，個場景係由灣仔踩去中環，中間仲要好似玩Mario咁，撞D閃電同埋盒仔去加能量！跟住就玩騎馬🏇，騎馬係VR，要帶眼罩，個場景係沙田馬場，VR 睇個場景係靚好多，我哋要喺沙田馬場跑一個圈，呢個係頗為吃力，因為要有少少深蹲咁嘅姿勢，唔係真係坐喺隻馬上，同埋要不停chok馬頸！不過都幾好玩，可能因為我跑第一😏😆不過真係攰，我對腳就唔係好攰，但係個胃就有啲痛，可能好少用呢個位用力，所以個胃好似抽筋咁！而佢哋兩個就話隻腳好攰，我哋休息嘅時候睇人哋玩滑雪機🏂，呢個我好想玩，不過佢哋覺得好難，下次或者我自己嚟試，整體來講都幾好玩，不過我留意到當有人玩完部機之後，佢哋係冇消毒，或者好馬虎咁消毒，呢樣就真係做得唔好！如果真係懶清潔，就建議比即棄手套我地戴好D！

玩完之後，又行返過去海港城，因為我哋諗住去City Super買嘢食去我屋企食，試埋我哋之前買嗰兩支酒，我哋買咗海膽、韓牛牛扒🥩、牛油果雞肉沙律🥑、三文魚薯仔沙律🥔、香橙南瓜沙律配咖啡汁，原本想買D生果，但係發覺呢度啲生果貴得好誇張，以前都冇咁貴，一包晴王提子要過千元，實在太貴了，所以冇買到，跟住我地就call的士去我屋企！

返到屋企，先食咗一D即刻可以食嘅嘢先，我哋食海膽唔記得咗買紫菜，於是我攞之前買嗰D意大利餅仔伴海膽食，佢哋話個餅仔都幾好食，我都覺得呢個餅仔係可以食唔停口！期待已久嗰兩支白酒，試試第一支，失望！🤦🏻‍♀️第二支，一樣咁失望！🤦🏻‍♀️🤦🏻‍♀️可能真係吹捧得太誇，完全唔好飲，唯有留返下次用嚟煮意粉😅 跟住就煎牛扒🥩，燒紅左隻pan，一面煎分半鐘，另一面就煎1分鐘，比五成熟生咗少少，分半鐘嗰邊就有少少焦，不過都好食，韓牛始終係肉味重！我食完嘢我哋吹吓水睇吓電視，可能今日玩咗一日，大家都好眼瞓，所以坐多一陣就走，今晚大家都會好好瞓！

保鑣救殺手 2 Hitman’s Wife’s Bodyguard

 

Michael 在休假期間，Darius 的妻子Sonia 煞到，要求Micheal協助她拯救 Darius 。Michael迫於無奈，協助她的找到 Michael 的下落， 救到他們之後，又被警察盯上，而 Michael 在休假期間，不能使用槍械或武器，被迫與他們一同上路⋯⋯！

個人覺得套戲麻麻哋好睇，上一集好睇D，今集夾硬加插女主角，而且加D鹹加D粗口，反而覺得過分俗氣，男主角擺脫唔到死侍嘅影子，好似佢拍邊套戲都覺得佢做緊死侍咁😅

泰.夯蝦 （荃灣）

好友S 生日，四人行去食燒蝦，之前去過尖沙咀嗰間，覺得店入面空氣唔係太流通，唔知呢間會唔會好D！

夜晚突然間傾盆大雨，仲黃色暴雨添，好在有帶遮，我哋訂咗枱，上到去稍等一陣就可以入座，呢度因為係任食，所以要分時段，今晚都好多人，應該都滿座，我哋坐低之後覺得好熱，見到頭頂個冷氣冇開着，所以叫職員開咗佢，開咗就好D，我哋呢個時段嘅人入晒坐之後，大家開始燒烤，就發覺煙霧離漫！非常之大煙，都係抽風系統唔理想，燒烤嘅時候發覺個爐好大火，但係燒好耐先熟，我諗係因為有個冷氣吹住，但係唔開個冷氣就會好焗，所以大家都想快D燒完就走，因為太大煙😶‍🌫️，同埋太熱！🥵

食物方面主要都係食蝦🦐，當然佢有其他食物選擇，一坐低已經俾咗碟肉我哋，但係肉嘅質素真係差，所以我哋都只係燒咗幾片試吓，另外，燒咗D貝殼類食物🦪，食埋個蛋糕就走啦，大家異口同聲都話呢間冇下次🙅🏻‍♀️🙅🏻‍♀️🙅🏻🙅🏻‍♀️

 

高流灣

又有同事離職了，今晚同佢食飯，呢間食店係 C類場所，即係可以六個人一張枱，我哋九個人，就分咗兩張枱，呢度有小菜或者火鍋，我哋揀咗火鍋，叫咗都係一D大路嘢食，冇特別叫海鮮，呢度食材都幾新鮮，而且份量都幾大碟，味道唔錯👍🏻

食完飯，例牌攞份禮物出嚟，今次送耳機，因為呢個同事都鍾意聽歌，大家都影吓相留念，因為同事今次離職嘅原因係移民，佢就去英國，因為佢有親戚喺嗰邊，佢周不時同人講佢自己移民嘅安排，聽到有D同事都心郁郁，佢話佢住嗰度係比較郊區一D，唔係咁多香港人，佢買咗間House，好似話二百幾萬港紙左右，最主要都係有兩個小朋友要過去讀書，希望佢過到去生活愉快啦！

Cruella 黑白魔后

 

Estella 一出世，頭髮就係一半黑一半白，她和母親相依為命，她長大後衣着打扮都好有自己嘅風格！而且性格都同其他小朋友好唔同，有一次母親帶他到一個豪宅，裏面有好漂亮嘅衣服，但係媽媽就俾狗推左落懸崖死去，他自己一個在公園遊蕩，認識了另外兩個男孩，自此三人便一起生活，三人呃呃騙騙過日子，由於他喜歡做衫，所以希望加入最著名的服裝公司，可惜入職後一路只做一些低微的工作，直至收到老闆的賞識……！

套戲都幾好睇，我唔知呢套戲同101斑點狗有冇關係，因為我都唔記得咗果套戲係講乜嘅，不過呢套戲入邊D角色嘅造型都好似101斑點狗，兩個女主角都做得好好，唔錯！

Livehouse

從來未去過西九文化區，今日就去睇吓有乜嘢食，呢度嘅位置都幾格攝，應該有小巴可以直接去到，不過我就搭咗巴士，在西隧口行返過去，今日天氣好熱，行到身水身汗！🥵

原本想去食中菜，不過我覺得佢啲嘅價錢都好貴，所以冇去試，去咗呢一間西餐廳，餐廳係半開放式，所以冷氣唔係好凍，加上我行到身水身汗，所以都覺得好熱！🥵

餐廳入面有個舞台，我諗夜晚可能有 Live Band，其實天氣咁熱佢地可以拉埋一部份嘅門，等D冷氣唔使走晒，店入面嘅座位都唔算好多，我哋叫咗一個沙律同埋一個牛仔骨，每人要一杯咖啡，咁熱當然飲凍㗎啦，食物嘅味道都唔錯，咖啡都好飲，淨係熱左D🥵

食完野喺附近行吓，見到 M+ 博物館，不過就未開放，所以入唔到去睇，行行下開始落雨，仲幾大雨下添！所以我哋call車轉左去尖沙咀海港城！😅