飯局主場 - 第廿四回

今日相約好友玩足一日，首先去食午餐，原本想去心儀嘅意大利餐廳，但係冇位，等咗半個鐘頭都冇，所以去咗對面另一間餐廳，呢間 Harbour-side grill ，我之前嚟過，今次再嚟食個lunch，我哋叫咗lunch set，每個course都有三個選擇，我哋就揀晒三樣嘢，要加錢嗰啲都唔揀，除咗龍蝦湯，因為大家都想飲，然後一齊share食主菜！

食完飯就匆匆忙忙趕去戲院，因為今朝好友遲到左45分鐘，所以搞到我哋好匆忙，去到戲院去埋廁所啱啱好開場！今日睇無聲絕境2！

睇完戲我哋去玩運動電競！呢間 AME Stadium 運動電競館，去年九月已經開，剛剛開果陣，我哋就已經想玩，話去玩到講咗兩次，今次終於玩得成！我哋因為驚自己體力未必應付到，所以揀咗新手體驗賽，價錢$140可以玩兩款遊戲，如果單玩一款遊戲要$100 ，有四款遊戲俾你揀，有踩單車、騎馬、划艇同埋拳擊，而有部滑雪機係另外計錢，淨係玩呢個機都要$140 ，我哋見到佢多咗一部機，係健身嗰種，有兩條好粗嘅繩，我唔知嗰種叫做乜嘢，總之係要好大體力先至玩到嘅一個遊戲，我哋就玩唔到，我哋選擇左踩單車同埋騎馬，因為好友打完針兩日，隻手冇乜力，玩唔到划艇，拳擊我哋就冇興趣，所以就揀單車同騎馬，先玩單車🚴🏻‍♀️，呢個遊戲都唔係好吃力，因為我都好耐冇踩過單車，絕對唔係想像中咁辛苦，個場景係由灣仔踩去中環，中間仲要好似玩Mario咁，撞D閃電同埋盒仔去加能量！跟住就玩騎馬🏇，騎馬係VR，要帶眼罩，個場景係沙田馬場，VR 睇個場景係靚好多，我哋要喺沙田馬場跑一個圈，呢個係頗為吃力，因為要有少少深蹲咁嘅姿勢，唔係真係坐喺隻馬上，同埋要不停chok馬頸！不過都幾好玩，可能因為我跑第一😏😆不過真係攰，我對腳就唔係好攰，但係個胃就有啲痛，可能好少用呢個位用力，所以個胃好似抽筋咁！而佢哋兩個就話隻腳好攰，我哋休息嘅時候睇人哋玩滑雪機🏂，呢個我好想玩，不過佢哋覺得好難，下次或者我自己嚟試，整體來講都幾好玩，不過我留意到當有人玩完部機之後，佢哋係冇消毒，或者好馬虎咁消毒，呢樣就真係做得唔好！如果真係懶清潔，就建議比即棄手套我地戴好D！

玩完之後，又行返過去海港城，因為我哋諗住去City Super買嘢食去我屋企食，試埋我哋之前買嗰兩支酒，我哋買咗海膽、韓牛牛扒🥩、牛油果雞肉沙律🥑、三文魚薯仔沙律🥔、香橙南瓜沙律配咖啡汁，原本想買D生果，但係發覺呢度啲生果貴得好誇張，以前都冇咁貴，一包晴王提子要過千元，實在太貴了，所以冇買到，跟住我地就call的士去我屋企！

返到屋企，先食咗一D即刻可以食嘅嘢先，我哋食海膽唔記得咗買紫菜，於是我攞之前買嗰D意大利餅仔伴海膽食，佢哋話個餅仔都幾好食，我都覺得呢個餅仔係可以食唔停口！期待已久嗰兩支白酒，試試第一支，失望！🤦🏻‍♀️第二支，一樣咁失望！🤦🏻‍♀️🤦🏻‍♀️可能真係吹捧得太誇，完全唔好飲，唯有留返下次用嚟煮意粉😅 跟住就煎牛扒🥩，燒紅左隻pan，一面煎分半鐘，另一面就煎1分鐘，比五成熟生咗少少，分半鐘嗰邊就有少少焦，不過都好食，韓牛始終係肉味重！我食完嘢我哋吹吓水睇吓電視，可能今日玩咗一日，大家都好眼瞓，所以坐多一陣就走，今晚大家都會好好瞓！