Thomas Trillion Passion de la Pâtisserie

食完野去攞蛋糕，上星期日晚去訂，見營業時間至到八點，趕到走七點半，竟然關左門！正要失望地離開，見到店內有人，門又推得開，就問一問，我話想訂拿破倫，店員話星期一休息，要星期二先落到單，佢地星期三有堂，星期四未必做得切，咁唯有照訂，到星期二通知冇先轉其他，不過店員話收左機，出唔到單位，我話到時點知邊個訂，佢又話唔使比訂，星期二 confirm 。好彩星期二通知可以整到拿破倫！ 

今日去攞餅，入到去見餅櫃一件餅都冇！問店員取拿破倫，閒談時，佢話今日D cake 賣晒，仲有一個客未取蛋糕，攞埋就收工！我諗佢地賣晒就收工，蛋糕就可以上網訂！

Café Cérès

今日幾左好友飯局，因為有人生日，我去左九龍城 Thomas Trillion 訂蛋糕，去攞蛋糕前，食D野先，去左呢間Café Cérès，呢度有一間麵包店一間餐廳，都開左好幾年，當年吳鎮宇同人嘈交，好似係呢間 Cérès 麵包店！

餐廳都裝修過，幾靚，入來時有兩枱客，我坐低一陣，佢地都走喇，變左我一個包場，在門口睇左餐牌先入來，可以即刻叫野食，見到有 high tea set，心郁郁想食，最後都係叫左個漢堡包，下次先試 tea set吧！

叫左安格斯牛肉漢堡，份量好大，仲有薯條跟埋！漢堡包除左牛肉同車打芝士，仲加左黒松露同蟹肉，個人唔太喜歡加左黑松露，搶晒味，覺得黑松露比較適合配清淡的意粉！個牛肉要五成熟，出來效果 overdone 左，另外叫左杯菠蘿冰，天氣好熱，飲杯冰降降溫先得！

My Journeys with Duffy

上星期一去完迪士尼，先發現原來開左間 Journeys with Duffy , 仲可以同 Duffy and Shellie May 影相添，但係星期五至日先有得影！今日星期五放假，一於再入去影！

今日比上星期熱，因為冇落雨！

目標為本！只係去同 Duffy and Shellie May 影相！原來間 shop 就係之前周生生個舖位，少左自由行，金舖都做唔住! 去到見影相截左龍！在出口影幾張，下一轉先去排！

新店全部賣 Duffy 、Shellie May 同埋 Gelatoni 產品，不過冇乜新品！雖然潛水裝的 Duffy 公仔，造型有點怪，睇多兩次順眼左，覺得其實幾獨特，熊仔造型一向好冬天，好少咁夏日 feel，見 Tsum Tsum 潛水 Duffy 幾順眼，就寅佢地啦！反正我冇 Tsum Tsum Duffy！

行一圈返見到已經有人排隊，仲有半個鐘，都照排，一心入來影，唔想 miss左，其實都好快，排第六、七，都好快影得，先影 Duffy 同 Shellie May ，佢地著水手裝，好可愛呢！然後一齊影合照！yeah ! !

肌智同學會 Central Intelligence

今日約左裝修公司上來執埋D手尾，師傅話要拆左個櫃出來整，因為電線藏左入牆！要約過第二日整！整完野去睇戲！

套戲講Robbie ( Dwayne Johnson) 高中時係一個肥仔，比同學欺凌，將全身赤裸既佢，掟出球場，比所有同事見到，只有全級最叻同學，人稱 Golden jet 的 Kevin 申出援手，自此， Robbie 離開了學校！

二十年後，當年大好前途的 Kevin ，今日只是一個會計，而 Robbie 改名叫 Bob Stone，與 Kevin 在 Facebook 相認後，Bob 脫胎換骨變左大隻佬，與 Kevin 飲酒聚舊之後， Bob 要求送 Kevin 回家，然後又要求佢幫手上網 check account，仲要求在他的家睡覺，第二朝早，突然有 CIA 上門搵 Bob .........

成套戲都係D美式笑話、影射名人、攪笑動作等，都幾好笑，Melissa McCarthy 客串了一場，見到佢出場都好笑，完場有 NG 片段，好攪笑！

35.6度

今日超級熱！高達35.6度，近幾十年最熱一日，今年天氣遲左熱，又成日落雨，冇幾多日好天過，得上星期一至五連續好天之外，今個夏天都冇乜陽光普照的日子！

咁熱，買塊韓牛返去煎吓先！去 City super 買，見佢地有兩款，一款韓國河東郡松葉牛係之前食過的，另一款新的，唔記得名，價錢貴$20 per 100 gram ，店員推介貴果隻，話肉味更濃！買果陣得兩塊，一塊 100 gram ，另一塊300 gram ，揀左塊大，店員話呢隻好好賣，今日賣左廿幾塊(^_^)！話有一個客買左十塊添！我叫佢比塊肥膏我起鑊，佢話切塊和牛肥膏比我！

買埋沙律菜，就返屋企煎！洗一洗煎 pan，燒熱後，用肥膏擦擦煎 pan，然後大火每邊煎一分錢，再中細火每邊煎三分鐘，效果是七、八成熟，沙律菜落陳醋加堅果仁油，再配返杯梅酒，雖然想配紅酒，不過得返幾支留返同朋友飲既紅酒，唔捨得開住，所以都係飲埋支梅酒算喇！用我好鐘意果隻蝸牛碟上菜！牛扒好好味，同之前食果隻其實唔大分別！食左韓牛，都覺得之前食 Dry aged 、wet aged都失色左，和牛又太多油，韓牛少D脂肪，肉味香濃，真係不作他選！

寒戰2 Cold War II

承接上集，署長劉 sir 妻子被挾持，要求釋放李家俊，署長親自帶亞俊前往交換人質，可惜被人救走了亞俊，妻子雖然救回，但惹來各方面的批評，他亦要出席聽証會解釋，會上他被簡議員簡律師及李文彬追擊，同時，署長與簡律師暗中調查幕後黑手，兩人調查方向一致，在署長掌握到大部份資料和証據後，他決定在權力移交前賭上一切......

睇過上一集的人，一定會睇！上星期電視台更重播，讓人重溫一次劇情，今次加入了周潤發，戲份比預期少，角色亦缺乏發揮機會，三大影帝一比，明顯梁家輝最好，這個老差骨自然而有氣勢，今次睇 Janis Man 成熟了不少，成套戲同上集一樣，槍戰、爆炸等拍得緊張又刺激！

seasons by Olivier e

一年前來過這家店，今日再來 tea，店環境沒有改變，tea set 的木箱改了不用店主的全名 Olivier Elzer ，只用 Olivier e ，而且木箱細了，咸點另外上，感覺簡潔了，取食物也容易了，食物方面改了一部份，但食物保持水準，好吃！今日小暑，很熱呢！好友原本想坐 outdoor ，我當然反對了，這種天氣，有風扇也絕對不足夠！食完 tea，去睇戲！

3D 泰山傳奇：森林爭霸 4DX The Legend of Tarzan

1884 年，多國瓜分了剛果這片森林，比利時國王派了手下 Rom 前往剛果尋找礸石，森林內的族人原意交礸石給他，唯一要求對方將泰山帶回來。

泰山 John 與妻子 Jane 在英國生活，受邀前往剛果，重回舊地，令 John 回憶小時候回猩猩養大，直至遇上 Jane 才返回文明社會，今次到達剛果，好快就被 Rom 挾持了 Jane，泰山帶著幾個族人前往營救....

套戲冇講泰山點樣回復文明，主要講佢點樣救佢老婆，女主角都幾靚，男主角好大隻，個人比較喜歡演 Rom 的 Christoph Waltz ，可惜近年被定型，只做沒有好結果的奸角！今次睇3D 4DX，連續幾場落雨戲，噴濕晒塊面，幾乎想關左出水掣，當一片森林草地時，又放出清新的草青味，好清香！

迪士尼 星球大戰：入侵明日世界

甚少在七月份去迪士尼，因為天氣好熱，不過難得放星期一，天氣又有驟雨，應該唔太熱！

先去青衣食個 lunch，去麵屋武藏食碗沾汁麵，然後入園，下午有陽光頗曬，入園前 check 袋的位置，改了在水池旁，售票處之前，而且得一條隊，不過下午入園的人不多，所以都好快！

入到去過左三點，飛天巡遊三點開始左，出到大街都要廿幾分鐘，先去商店凉一陣冷氣，到巡遊行到大街先睇，睇一陣已經成身汗，好曬呢！

睇完巡迴去左睇4D，經過明日世界，見到 Ironman 果邊已經整得七七八八，而噴水池呢度轉左做絕地聖戰士特訓，有星戰成員同小童互動玩遊戲，而幸會史廸仔亦改了做星球大戰指揮站，本身唔係星戰迷，所以冇興趣。過去睇完4D，去童話園林，呢個係一個迷你版童話故事的場景，有小型的城堡，故事有長髮公主、美女與野獸、白雪公主、 Mermaid 等等，只係影吓相，好快行完，跟住去故事劇場， 想睇"迪士尼魔法書房"，自從金裝米奇頒獎禮完左近一年之後，今次第一次去睇呢個劇，見仲有半個鐘，行過去望望，見到已經好多人排隊，唔想 miss 呢個，所以去排隊，雖然熱，但有D風，都唔係好辛苦，今日好多人，全院滿座，個劇主要講米奇、高飛，走入故事書𥚃的每一頁，幫助小白尋找雪地，當然唔少得Elsa 同 Anna啦！

睇完劇出來，見地面濕了，應該落左陣雨，過去玩迷離大宅，又要排隊，始終好多學生已放暑假，特別多人！好彩室外排隊時間短D，入到去，又等第三架車前排，等五條線，呢架先可以完整睇晒中國熊貓果 part，今日帶左 motion cam ，試吓效果，可能環境較黑，效果唔理想！玩完出來都七點，去大街商店買野，今期換購的湯盅頗受歡迎，見好多人換，又見到紙巾架，正欠缺呢個，買返個先！買緊野果陣又落雨，我諗八點夜間巡遊可能會取消，過左陣就聽到廣播話取消，好多人都走，我買完野都走！

流左成日汗，又累又餓，去左 simply life 食埋飯先至返屋企！

愛麗斯夢遊仙境2穿越魔鏡 Alice through the looking glass

1874 年 Alice 航海一年後返回英國，她發現中國可以發展船務，想游說船公司，無奈因生計問題，母親已將大屋抵押，船公司迫她賣船換屋，此時，她返回 wonderland ，與好友再見面，發現瘋帽性情大變，因他相信家人未死，只有 Alice 可以幫助他，要幫助他，只能時光倒流，返回所有事情發生的源頭......

對上一集都唔係好記得內容，一路睇就有返D記憶，因為有時光倒流返去以前，更了解到為何紅心女皇與妹妹結怨的原因，今集 Johnny Depp 戲份較少，戲中亦有提及中國，可能要上大陸市場，總要加點中國原素吧！

3D 魔獸爭霸：戰雄崛起 4DX Warcarft The Beginning

今日相約好友看電影，去睇呢套戲因為好友以前打呢個 game，佢話其待左好耐，我冇玩過呢個game，當一般電影去睇，睇戲前，去左香檳大廈地庫果間星座餐廳，食佢地最出名的蕃茄麵，麵係即食麵，我就轉食意粉，食完過去 iSquare 睇戲！

電影講述一個叫Azeroth的王國，卻被獸人入侵，面臨開戰。獸人戰士因為一道由魔力控制的傳送門，才令兩個世界打通了，獸人進入Azeroth後， Azeroth 遭大肆破壞，而獸人面對將要種族滅絕，國王與獸人將會展開一場大戰！

呢套戲，吳彥祖都有份做，佢個角色係獸人世界法師，唔單止睇唔到樣，連聲都變左，根本唔知係佢！睇劇情發現展，一定仲有下集，完場見未開燈，以為仲有野睇，原來冇！唔明點解唔早D開燈，對套戲期望好高的好友，表示大失所望！

非常盜 2 Now you see me 2

又一城的 AMC 戲院在一月初關閉後，改為 MCL的 Grand cinema，足足裝修了5個月，上星期俏俏地開了業，原本昨天想去睇戲，但買不到飛，今日是閒日，少人D，可以睇喇！戲院裝修好靚，始終新裝修，Starbucks 也開了，看來是原班人馬工作，戲院的售票處，安排有點欠佳，分了三條龍，有四個 counter，三條龍分別有東亞銀行信用卡的尊線、即場及預售，預售的位置最多，可以預位人龍打蛇餅，但東亞專線和即場卻只可排幾個人，東亞專線當然較少人排，但即場其實最多人，預售一般較少，卻佔最多位，安排就如之前的 AMC，即場其實比較急，有時可能仲有幾分鐘開場，應加快處理才對！

講返套戱！

四騎士消失了整整一年，加入了新成員Lula 後預備再次現身，卻被人起底，Dylan身分亦暴光， 他們被送到澳門後，遭上次被他們盜錢的 Arthur 兒子Walter要脅執行一項任務，得手後卻要逃避警方通緝和Walter 的追捕，四騎士在澳門最古老的魔術店，得到店主的協助，再來一個的魔術大匯演！

用返上集原班人馬，只是女主角轉了人，加入了周杰倫的演出，還露兩手魔術，戲份比預期多，背景是澳門，有不少廣東話的對白臨時演員，港人較有親切感，每次有廣東話對白出現，觀眾都會笑，結局同上集一樣精彩。