2024年5月英法自由行 Day 9 - (法國) 凡爾賽宮 Château de Versailles

今朝一早出門口，因為佢凡爾賽宮要成個鐘頭車程，我哋冇食早餐直接去搭車，搭RER B 線由巴黎北站出發，搭兩個站去 Saint-Michel Notre Dame 聖米歇爾聖母院站，轉M線去 Versailles Château Rive Gauche站，仲要行15分鐘😅 睇過Google幾條路線都係要行，最少都9分鐘，呢條路線已經係最快嘅一條，去到轉M線嘅時候，我哋都唔知架車啱唔啱，因為佢啲火車冇寫個終點站去邊，要靠聽廣播，但係廣播又聽唔清楚佢講乜，所以都係是但上一架車一路行睇吓有冇唔對路，我哋等到一架火車係兩層嘅，我哋照上咗車先，上到車佢有個路線圖，見到佢會去一個叫做Versailles Chantiers 站，見到都係凡爾賽宮附近，所以都照搭到去落車，睇返地圖係冇介紹呢一個站，但係睇個路線圖我哋搭嗰架車應該係有兩條路，一條線應該係去我哋原本要去嘅 Versailles Château Rive Gauche 站，而另一條線去而家呢個 Versailles Chanters 站，之後仲要再繼續去其他地方，睇地圖見兩個站距離唔係差好遠，我哋亦都冇得選擇，照樣跟地圖行過去，沿路條路都好靜，冇乜人，可能因為係朝早8:00 ，我哋諗住沿路搵吓有冇地方食早餐，但係完全冇舖頭開🫠 行咗15分鐘左右就已經去到凡爾賽宮門口，時間尚早門口亦都唔多人，但係已經有人開始排隊等9:00入場，咁我哋一路排隊，輪流再去門口影相！

搭正九點就可以入場，我哋第一時間衝去鏡廳，但係行錯路🤦🏻‍♀️，去咗第二個展館，再問一問人先至去返鏡廳嗰邊，去鏡廳要先經過一D寢室，我哋冇停低睇，諗住返轉頭先再睇，因為希望想影到鏡聽唔好咁多人，去到鏡廳嘅時候亦都唔算多人，人數在10人之下，有啲位仲可以影到冇人，我哋好開心狂影相，又拍片，影咗十幾分鐘之後，就行返轉頭去睇返頭先嗰D寢室，其中一個寢室係瑪麗皇后嘅寢室，我認得張床嘅顏色，但係印象中佢有個M字，今次見就冇咗個M字，所以我都唔肯定佢係咪同一間房，不過已經見唔到有其他房係近似呢間房，所以應該都係瑪麗皇后嘅寢室，行完一輪又行返去鏡廳，比頭先多咗一倍人有多，不過比起我上一次已經係少咗好多人，上一次係無論你點影都係人山人海 😅所以今次好開心可以影到唔太多人！

行到10:00 ，就去搵嘢食，因為我記得呢度有間Angelina，佢係開10:00 ，我哋去到嘅時候都要等位，其實佢未滿座，不過法國人做嘢，係慢慢嚟，我哋有我哋排隊，佢哋有佢哋慢慢入人，等咗20分鐘左右，就可以入座，入到去都見到已經冇乜枱，入多一枱都滿座，我哋叫咗一個牛角包🥐，同一個 Pain du chocolat 😄 兩杯咖啡，但係店員搞錯咗，俾咗杯朱古力我哋，冇咗朱古力牛角包 😅 既然落錯咗單，攞咗杯朱古力俾我哋，我哋就飲埋佢，另外再叫多個包，今次驚再搞錯，所以再叫牛角包！🥐 😅 幾年冇飲過呢隻朱古力，已經唔記得咗個味道係點，不過佢加咗cream又真係滑D，味道好濃厚，食完嘢之後埋單嗰陣，店員俾咗張優惠卡我哋，可以買佢商店嘅產品有八折優惠，所以我就買咗朱古力粉比屋企人，曾經食過佢一隻心形盒裝朱古力係好好食嘅，但係而家已經冇得賣，否則我一定買返幾盒！

食飽早餐就有力繼續行，行埋其他嘅展館，上兩次跟旅行團嚟時間好少，今日我哋預咗大半日時間都會喺度參觀，除咗參觀展館之外，我哋都會行埋佢個花園，之前跟團根本冇機會參觀，因為呢個花園係超級大，我哋睇住張地圖都已經覺得有排行 😄我哋先行埋紀念品店，不過冇乜嘢睇啱😅

跟住去行公園，去到公園入口先至知要買飛，要俾€10，我哋12點開始行，跟住地圖嘅指引去行，會經過好多個位置，睇地圖佢係由十幾個大花園組合而成一個大大大花園！去到第一個花園已經狂影相，覺得好靚，原來佢只係其中一小部份😅 睇地圖大致分左16個區，有好幾個區係有水池，部份仲有音樂水池表演，其實夜晚仲有燈光表演，不過我哋唔會留到咁夜，因為發覺要等佢天黑都要成九點幾，因為我哋返返去巴黎北站要個幾鐘，就太夜啦，行到最入有個大水池叫做 Grand canal 話佢係運河又有D誇張，不過水池後面仲有另外一個地方，應該唔會比遊客參觀，睇地圖就係一個好大嘅草地，我哋行咗大半個area嘅時候，見到有小火車可以搭，但係我哋都已經差唔多去到終點站，所以都唔需要搭，同埋呢個火車唔係去晒成個花園，只係一部份嘅地方，另外佢都有哥爾夫球車可以租，不過要成€42一個鐘，一個鐘應該唔夠時間，因為要停低影相，我哋都行咗三個幾鐘先行得晒😅 真係行到好攰！

行返出凡爾賽宮，諗住去附近搵D嘢食，但係發覺由凡爾賽宮出嚟，附近都有少少荒蕪，附近冇乜店舖，我記得上次跟團喺凡爾賽宮側面有條街有D熱鬧，不過今次我哋行正門直出，行到好遠都見唔到有商店😅最後行咗15分鐘，搵到一個area，呢度附近有啲餐廳，我哋隨便揀咗一間叫做 Le Chat qui prise 嘅餐廳，叫咗一個沙律同埋燒雞，味道一般，不過店員幾好招呼，好Nice！

食完飯再喺附近行咗兩個圈，就搵火車站搭車，去左一個叫做 Versailles Rive Droite 站搭L線轉A 線再轉B線，足足用左1小時15分鐘 😅返到酒店差唔多七點，好又話要返酒店休息，我就覺得肚餓，所以自己去咗搵嘢食，喺附近行咗兩個圈都冇乜嘢啱食，最後去返我哋day one食嗰間生蠔店，自己叫咗一打生蠔食🦪😅食完先至返酒店🤣