今朝第一站去大皇宮，由巴黎北站搭D 線去Chatelet Les Halles站，行5分鐘去 La Défense 轉1號線去 Champs-Élysées-Clemenceau 站，在月台已經見到去大皇宮嘅出口指示，大皇宮依家暫停開放，仲圍晒版裝修緊，我哋只能夠透過圍板嘅縫隙影吓相，跟住就行去亞歷山大三世橋影相，條橋都封咗一半，我哋只能夠喺半條橋一邊影相😅 過咗條橋就係小皇宮，去到佢仲未開門，仲有幾分鐘，門口已經有好多人等緊，大家都喺門口個金色閘度影吓相，10:00開始有人出嚟開門，都搞咗幾分鐘先至開晒道門，一入到去已經係一個展覽廳，我哋四圍睇吓展品同影相，呢度主要都係擺咗一D雕塑，行咗一個圈見到有條樓梯落下一層，呢層都係另一個展區，但係展品就冇樓上咁吸引，佢好似有幾個房咁，每個房都有唔同嘅展品，行晒成個轉區之後，出到去有一個花園，呢度有間餐廳，我哋坐喺花園食早餐，買咗兩個早餐set，set 有個 Pain au chocolat 、一支果汁、一杯咖啡☕️ 呢度環境好靚，坐喺度食早餐零舍開心😌😌
食完早餐行返去亞歷山大三世橋，再影多一陣相，就行去榮軍院，十幾分鐘就去到，上次去榮軍院嘅時候，門口係一個大草地，今次個大草地已經起緊奧運嘅看台，冇得坐大草地，上次冇入到去榮軍院，今次就入去睇吓，一入到去覺得好靚，行到又去入口，入到去係一個大嘅廣場，我哋喺度影吓相，我哋行入去見到應該仲有博物館，要另外買飛，我哋冇入到去博物館，純粹喺廣場周圍影吓相，呢度個景好靚，加上藍天白雲，我哋影咗好多相，我哋喺樓上嗰層見到有個博物館係唔使俾錢，入到去睇主要係一啲軍事嘅物品，例如係服裝、武器等等，都幾多嘢睇，同埋都幾靚，睇完行返出去嘅時候，見到廣場中央有樂隊喺度表演，我哋又去睇吓，樂隊開始嘅時候係好嚴肅，最後果part嘅表現就好輕鬆，仲有少少搞笑，我哋喺榮軍院參觀咗兩個鐘，跟住就去巴黎鐵塔！
由榮軍院行去巴黎鐵塔都要20分鐘，加上巴黎鐵塔前面嘅草地，又係封咗，冇得喺草地影相，直接行去巴黎鐵塔底部，又要經過安檢，我哋book咗3:30 ，3:00已經要排隊準備入場，仲要去排隊搭𨋢，因為架lift嘅容量好細，速度亦都比較慢，所以上到去已經四點🤦🏻♀️ 其實我哋都好肚餓，但係一樓呢層未有嘢食，所以我哋為咗個圈影吓相先，呢度有間手信店，不過我哋冇嘢睇啱，就搭𨋢上去2樓，呢層就有餐廳，不過我哋就去食三文治嗰間店，買咗兩個包食住先，然後繼續去影相，呢層有個位置係玻璃地面，又係企喺玻璃上望落去地面，影完相再落返地面已經五點幾，我哋就準備去對面岸影返過嚟！
對面岸係一個叫做咩Place du Trocadéro嘅地方，佢係一個廣場，由呢邊影返過去巴黎鐵塔，就可以影到全景，我哋過到嚟嘅時候落雨，所以個地下都濕晒，亦都影唔到幾多張相，因為突然間好似橫風橫雨咁，有D論盡😅
跟住我哋搭地鐵去凱旋門，我哋由 Trocadéro 站搭6號線去 Charles de Gaulle - Étoile站，行四分鐘就去到凱旋門嘅側面，出到嚟已經停咗雨，不過地下都濕晒，我哋想影凱旋門嘅倒影，地面又唔夠濕😅 我哋影完側邊再影前少少，然後再影正面，跟住再行隧道上去凱旋門，今日有活動，有好多軍人喺度，所以入唔到去凱旋門嘅中間，只能夠喺外圍影相，跟住我哋就行去香榭麗舍大道！
去到香榭麗舍大道，最吸引嘅莫過於係LV總店，佢旁邊仲起咗一座好似LV行李箱咁嘅建築，我唔知佢係未起完定點，總之就係入唔到去，亦都見唔到有入口，不過都好靚，我諗夜晚應該會仲靚！我哋沿着香榭麗舍大道行，我記得上次嚟呢度好多吉卜賽女小偷，今次就唔見晒！
我哋跟住行去坐船仔，同我之前跟團一樣都係去果間 Bateaux-Mouches 搭船，碼頭有好多旅遊巴停咗喺度，我諗每個旅行團都係搭呢架船，全程一個鐘，在塞納河兜咗個圈，可以影吓巴黎鐵塔，仲有自由神像，雖然已經係夜晚八點，但係個天仍然未黑，所以影出嚟都唔知係夜晚😄
游完船河已經九點，個天開始黑，因為巴黎鐵塔夜晚嘅閃燈，係天黑之後一個鐘， 所以我哋預計10:00會有閃燈睇，否則的話就要11點，我哋要去搵一條街，叫做 Rue de Monttessuy，因為呢條街出咗名係望到巴黎鐵塔，而又有D食店，我哋諗住食晚餐順便睇閃燈，喺呢條街行咗一轉睇嚟睇去覺得一間中餐飯店個位置係最理想，仲要門外面剩返兩個位，我哋都唔考慮咁多，食中餐都冇問題，不過老實講坐室外真係有好凍，因為落過雨加上天黑，呢間中菜館叫做百和樓，我哋先叫兩碗湯，飲湯暖吓身先，仲有成半個鐘先10點，飲完湯先至叫啲嘢食，拖慢時間，我哋睇餐牌嘅時候，討論食乜嘢，講到爭啲嗌交🤦🏻♀️ 最後我哋叫咗一個米粉，同埋一個炒飯，等到21:48 巴黎鐵塔就着咗燈，搭正10點先至閃燈，本來氣氛有點僵，因為閃燈開始大家都心情好返D！都一齊影吓相！五分鐘就完結了，確實係好靚，我上次係在巴黎鐵塔下睇閃燈，今次係離遠睇閃燈，兩次睇到咁靚！
睇完閃燈我哋就埋單走，行去地鐵站嘅時候經過自由之火 Flamme de la Liberté，呢個金色嘅火把下面，正正係戴安娜王妃發生車禍嘅隧道，所以好多人都喺呢個火把下面擺鮮花同佢嘅相片，紀念戴妃，我哋再行去地鐵站搭車返酒店休息！
沒有留言:
發佈留言