2024年5月英法自由行 Day 1 - （英國）King Cross station 國王十字車站、British Museum 大英博物館、唐人街、Convert garden 柯芬園

同好友計劃左幾個月，開過幾個茶會😂，睇左好多 Youtube ，上網search 左一輪，今次其實係好友要去英國伯明翰同埋曼徹斯特探朋友，順道想留喺倫敦度玩幾日，所以捉埋我陪佢去，原本想去多幾個地方，但係唔夠時間同埋可能要做好多資料蒐集，所以都係選擇去埋法國，兩個地方玩深入小小！好友早在5月1號已經飛左過去，我就13號晚過去。

上一次去歐洲已經係七年前嘅事，雖然我哋今次做咗好多資料蒐集，但係都唔夠時間詳細研究，因為呢排都好忙碌，今日早上仍然要返工，原因係希望自己眼瞓D，到時搭飛機就唔會瞓唔着（希望😅），好耐未試過呢D鐘數去機場，先去貴賓室度食個晚餐，疫情後幾乎每次都係朝早去，所以只有D簡單嘅食物選擇，晚餐就豐富好多，而且少人D，自助食物有香草蝴蝶粉，仲有其他意粉，而掃QR code落單嘅呢，就有四款熱食同埋一款紅豆沙，我就叫齊五款，有炒米粉、三丸湯米粉、豬肋骨、豉汁魚柳配豆腐，好豐富，食得好飽！食完再慢慢行去等上飛機！漫長嘅14小時飛行時間開始😅

今次唔坐窗口位，因為驚去廁所要麻煩人哋，坐中間一排三個坐位嘅旁邊位，隔離坐咗一對夫婦，咁佢哋去廁所就唔會經過我呢邊，咁我就可以瞓吓覺，上咗機冇幾耐就準備派晚餐，因為我頭先食得好飽，所以我冇食，等佢派完餐先至開始瞓覺，雖然瞓吓醒吓，但係都可以瞓到七八個鐘，瞓醒之後，就睇吓電影，睇返哈利波特其中一集，跟住又派早餐，我亦都冇食到早餐，因為預計去到倫敦會合好友都會去食嘢，所以冇食到，飛機準時到達，去到倫敦係上午嘅六點幾，呢度比香港慢七個鐘，好友由曼徹斯特搭火車過嚟，預計要10點幾先去到倫敦，所以我有好多時間，先去增值張Oyster Card，七年冇用張咭，仍可正常用到，然後搭火車去倫敦市，原本係想搭 Piccadilly line 去國王十字車站，雖然時間耐D，但係價錢平D又唔使轉車，最主要因為我有時間，但係我搵唔到佢喺邊度搭，最後都係搭咗 Elizabeth line，一條快少少嘅線，呢條線要去到 Paddington 轉車，要轉 Hammersmith & City 線，我轉車嘅時候搭錯咗方向，搭咗一個站發現唔對路，就過對面月台搭翻返轉頭，去到國王十字車站，一出嚟已經見到 Argyle street，酒店就應該喺呢度附近，跟住地圖去搵酒店，去到酒店先至九點，放低件行李先，見到酒店係傳統英國排屋，呢度成條街嘅排屋都係酒店，我哋 book 嗰間差唔多要去到街尾！入到酒店覺得佢有少少舊，喺接待處放低行李我就出去行吓！

行返去國王十字火車站，個火車站都好靚，順便睇吓歐洲之星嘅車站位置，因為過幾日我哋都要搭，所以提早去睇吓先，歐洲之星嗰邊嘅車站係最靚嗰座紅色磚嘅建築，嗰度應該有一間酒店，我喺火車站影咗一陣間相，望吓歐洲之星嘅車站，我記得同我上次嚟搭歐洲之星嘅地方係同一個地方，有個標誌性嘅拱形頂，同埋有個鐘，就確定到唔會去錯，影完相然後就行去Euston 火車站，因為好友會喺呢個站落車，由國王十字火車站行過去只係10分鐘，沿路四圍睇吓嘢！

行到去Euston 火車站見到外面都幾熱鬧，好多人喺度等人，本來呢度有啲凳可以坐，但係因為落過雨，啲凳已經濕晒，呢度有三個小販檔，一檔係賣咖啡另外兩檔係賣麵包，我就買咗杯咖啡，英國都好流行 cashless ，原本我想俾現金，但係因為佢有毫子，我唔想找硬幣返嚟，所以都係比信用卡，天氣比預期凍，可能因為落過雨，我只係帶咗短袖衫同一件外套，可能有需要買多件衫，睇吓天氣點樣再決定，等到 11:20 好友先至出現，我哋就一齊行返去酒店，放低佢件行李先，好友去到酒店都同我一樣覺得有少少伏，但係未睇到間房，希望唔會太差，當初揀呢間係因為貪佢就腳同埋價錢平，所以都有心理準備唔會好理想，只但求乾淨企理😅

今日book咗去大英博物館，其實佢係免費入場（應該都唔好意思收人錢🤭），不過要做預約，我哋約咗一點，睇Google 地圖，由酒店行過去大概係20分鐘，所以我哋決定行過去，去到應該係大英博物館嘅後門，已經見到有人排緊隊入場，首先係要做安檢 check袋，然後就可以入場，完全唔需要check 預約，我諗佢因為今日預約咗嘅人唔太多，所以都冇特別check，入到去我哋行返去前門兜一個圈影吓相先，然後去展館度參觀，好友比較鍾意睇中國館，我哋先睇咗其他館順路再去搵中國館，入到博物館有少少熱，因為呢度冇乜冷氣，我盡我嘅記憶記得邊啲展品係真店之寶，就介紹俾好友影相😂 例如 Rosette stone 、巴特農神殿大理石雕、埃及木乃伊(其中一個貓木乃伊曾經喺香港展出過)，再睇埋中國館，雖然唔係一D好出名嘅展品，但係都好靚好精細同埋好歷史悠久，真係慨嘆當年比人搶掠咗好多國寶😅

行咗兩個幾鐘就行完，由博物館出返嚟，行去唐人街搵食，大概15分鐘路程，沿路經過一間劇院做緊哈利波特，我哋只係門口影吓相，行到去唐人街，原本想去食一間新加坡餐廳叫 Singapulah，喺門口睇咗個餐牌覺得都偏貴，就行去其他地方睇吓有咩食，最後覺得價錢都係差唔多，所以行返去星加坡餐廳，點知原來佢要落場，所以冇得食，最後行咗去佢對面果間蘭州牛肉拉麵店，我哋一人點咗一碗麵，同埋叫佢俾咗兩杯水，餐廳係中國人開嘅，所以識講國語，有中文餐牌，我哋叫咗一碗蘭州牛肉麵，同埋一碗紅燒肥腸麵，拉麵做得唔錯幾好食，個湯都好飲，平均每碗13英鎊，估唔到在英國第一餐就食中餐😅

食完飯喺唐人街附近行吓，因為呢度有間M&M，同埋Lego，間M&M好大間，有四層高，除咗朱古力仲有唔少相關產物，例如裝朱古力嘅容器，另外仲有啲服裝、咕𠱸、袋等等，當然仲有自選朱古力，亦都有可以印自己個樣嘅朱古力，都幾有趣！入口有四個M&M公仔，一字排開過斑馬線，就係模仿Beatles 經典海報，好多人都企中間，擺埋同一個pose影相！😂😂 至於Lego，我見影相嘅多，買嘅少，同我哋一樣😅😅 佢呢度都砌咗哈利波特幾個主角出嚟，都係一個打卡點！淨係呢兩間shop，都玩咗成個鐘，不過一樣嘢都冇買🤭

跟住去西敏寺，諗住沿途會經過唐寧街首相府，去打吓卡，中途經過騎兵衛隊博物館，不過冇嘢睇，冇換兵儀式又冇馬，只有馬屎😂 同埋一兩個衛兵，所以影咗幾張相就走，去到唐寧街封咗路，冇得影相🤦🏻‍♀️ 所以直接去西敏寺！

去西敏寺必定見到大笨鐘，所以同大笨鐘影吓相先，然後再行去西敏寺，原本想入去西敏寺，但係佢收3:30 ，我哋去到已經五點幾，所以無緣進入，只有外圍影吓相，又影下個金色郵筒，然後再返轉頭影大笨鐘，跟住行去柯芬園！

我哋去柯芬園嘅主要目的，係好友想去食一間牛扒店，叫做 Flat Iron ，去到餐廳，要等位，登記咗之後佢會send SMS 俾我哋，我哋個電話卡係提供咗一個英國電話俾我哋，所以可以留電話，佢話大概等40分鐘，所以我哋去附近行吓，等佢有位嘅時候 message通知我哋，行去附近睇吓，見到原來柯芬園都幾靚，呢度好多食店，又有個好似商場咁嘅地方，有D小商店同埋食店，仲有間 Apple shop，旁邊都有個小市集，主要都係賣紀念品，我哋睇咗一輪，覺得價錢有D貴，所以再睇多兩日先再決定！

我哋行咗30分鐘，就行返去餐廳度等，因為嗰度有得坐，坐多十幾分鐘就有位，餐廳有兩層，我哋坐樓下，餐牌都好簡單，因為主要係想食牛扒🥩，基本上牛扒係得一款，當然有一個貴D嘅選擇，類似是日精選咁寫咗喺牆上，我哋揀個最平嘅牛扒，都要14英鎊一份，仲要冇醬汁，要另外俾錢，仲有 side dish 都係另計，我哋叫咗一份醬汁，如果牛扒好食其實唔需要點汁，所以只叫一份，必要時點吓！老實講，牛扒唔算出色，可能因為呢個牛扒性價比喺呢一區嚟講算高，所以好多人都介紹呢間，主要都係因為佢抵食，同埋佢呢間餐廳有個特色，就係每個客人飯後都會送一杯雪糕，佢會比一把迷你菜刀仔比我地，每人一把，攞呢把菜刀仔上返去入口個位置，就可以換一杯雪糕，好友覺得把刀仔好得意，好想要一把，但係又想食雪糕，最後佢決定食雪糕，當我哋上返去嘅時候，竟然比我喺樓梯執到一把菜刀仔😅，咁就可以換一杯雪糕之餘，又可以留起一把刀仔🤣🤣

食飽飯就返酒店，睇吓間酒店房如何，返到酒店已經九點幾，匆匆忙忙沖個涼就要瞓！

酒店住後感 ：
Argyle Square hotel
酒店位置算方便，距離最近國王十字地鐵站出口大概3-5分鐘路程，附近住宅居多，相對比較靜，晚上回來嘅時候，路口總有一班黑人聚集，不過佢哋應該冇惡意，因為我哋每晚經過佢哋都冇乜嘢，附近都有D食肆，但係我哋都冇幫襯過，酒店有點舊，係傳統嘅英國牌屋，呢度一整列排屋都係酒店，我哋嗰間差唔多去到街尾，門面亦都明顯比其他嘅酒店舊，我哋安排住喺地庫嗰層，要行樓梯，房間嘅面積唔大，除咗兩張單人床，同一張書枱，剩餘嘅空間只能夠打開一個篋，洗手間唔算細，不過冇梘液，只有番梘🧼😅，亦都冇牙膏牙刷，歐洲嘅酒店通常冇，亦都冇電水壺，房入面有兩塊餅乾、兩個蘋果、一D即溶咖啡，有兩支水，冷氣好充足，呢度雖然有兩隻窗，但係望出去係天井，加上我哋住地庫嗰層，所以冇view可言，木地板有D爛，浴室相對新淨D，可能翻新過，開手提花灑時頭頂個花灑🚿都會出少少水😅 張床褥好軟腍，都瞓得幾好，不過排屋嘅弊病係隔音比較差，成日聽到隔籬房有人講嘢，好彩佢哋唔會夜晚好嘈，不過一早就聽到D人拖篋或者行路嘅聲，所以都會好早俾佢哋嘈醒😅