2024年5月英法自由行 Day 6 - (法國） Marché Bastille 巴士底市場、Pavillon de l'Arsenal、Norte Dame巴黎聖母院、Shakespeare and Company莎士比亞書店 、Monnaie de Paris 法國造幣廠、Le Bon Marché 樂蓬馬歇百貨公司、Chartier

今朝一早上網訂左 巴黎博物館通行證 四天pass €77 一張，兩張再加網上手續費€6.3 總數€160.3，當然Klook 等網站都有售，呢個通行証包左55間博物館入場，有兩間冇開（包括巴黎聖母院），53 間都冇可能去得晒，有35間在巴黎巿中心，其餘在市中心外圍地方，而呢55間當中亦都有部份係需要預約，我哋揀咗幾間要預約嘅，因為要預約就通常比較多人去，我地預約左羅浮宮、凡爾賽宮、橘園美術館、海軍府，一般入場費羅浮宮€22、凡爾賽宮€21、橘園美術館€12.5、海軍府€17，已經相等於€73 ，基本上去多一間博物館已回本，四日票係以第一次用計第一日，所以我地預約分開左三日去！

攪完通行証就去火車站買車飛，我地買 Navigo 週票，但週票係由星期一開始計，今日星期日，所以我地買下星期開始計的週票，另購一張單程飛，週票加埋單程飛共€30.75，週票全星期任搭，包埋去戴高樂機場及廸士尼，其實巴黎地鐵在市中心搭去邊都係€2.15 ，包括由巴黎北站去機場，去凡爾賽宮就€4.15，基本上搭7-8 程車已回本，我地用五日點都搭到！

攪掂晒就出發去巴士底市場 Marché Bastille ，由巴黎北站搭五號線，搭五個站去Bréquet-Sabin站 ，而唔係Bastille 站，其實搭多個站去Bastille 站落都得，只係街頭街尾嘅分別，我哋由 Bréquet-Sabin 落，一出車站就已經係巴士底市場裏面，如果由Bastille 站落，出嚟就會係巴士底 “廣場”，亦都係市場嘅另一邊入口，其實是但一邊行先都得，因為呢個廣場都係要行返轉頭先行到一圈，只係搭少一個站，去到市場首先見到嘅係賣衫同一啲布藝產品嘅檔口，行嗰啲開始就有食物，呢度嘅食物好吸引，有賣水果、肉檔、海鮮、意粉、芝士、海鮮、鮮花等等，非常之吸引，生肉就唔可以買，亦都有熟食，我哋行咗一陣就見到生蠔，前後見到有兩檔，有一檔嘅範圍好大，但係就冇人食，另一檔個範圍就細D，反而多人食，我哋就跟人哋幫襯細果檔，我哋揀咗€20 有六隻嘅生蠔，生蠔好新鮮，冇尋晚食果D咁鹹，好味！👍🏻👍🏻👍🏻👍🏻我哋唔敢買咁多，因為要留肚食其他嘢😆 跟住見到 Mozzarella ，我哋都好想食，但係佢好大嚿/大包，肯定食唔晒😅 跟住我見到有一檔係賣燒雞，除咗有成隻燒雞亦都有雞髀，見到D燒雞喺後邊兩個爐燒緊，好吸引，所以我哋買咗一隻雞髀試吓，如果好食先再考慮買多隻，成隻燒雞€11，一隻雞髀€3，4隻雞髀€10，我哋買左隻雞髀，就行去兩邊檔口中間嘅一D水池位，果度有D長凳可以坐，我哋就坐低食雞髀，隻雞髀好好食呀 👍🏻👍🏻👍🏻👍🏻，不過我哋都冇買多一隻，因為好友話飽！😅 呢個市場真係唔錯，可惜好多嘢都唔可以買返香港，如果在巴黎住民宿，就可以喺呢度買嘢返去煮 😌 

我哋行多兩個圈就走！我哋由巴士底市場行出嚟，想去飲杯咖啡，見到附近有D露天茶座，就揀咗一間叫 Le Bastille ，一人飲杯咖啡，坐下影吓相，然後先開始行去下一個目的地！

由巴士底廣場去巴黎聖母院，要行25分鐘，我哋想睇吓沿途有冇乜嘢特別嘢，我哋就經過一個地方叫做Pavillon de l'Arsenal嘅展覽館，裏面係一啲同建築相關嘅嘢，亦都有巴黎聖母院嘅模型，我哋睇咗一陣就走

沿路會經過塞納河，因為巴黎聖母院其實喺一個島上高，佢旁邊亦都有另一個叫聖路易島，我哋由巴士底廣場過去，會先經過聖路易島，一行入去就經過一間好靚嘅教堂，教堂入邊都幾多人，而且好似係做緊崇拜，所以我哋影咗幾張相就即刻走，驚影響到其他人，沿着呢條大街一路行到尾，就係一條橋，過咗條橋就係巴黎聖母院，而家嘅巴黎聖母院，係正在復修緊，因為2019年火燭，需要長時間去重建一啲位置，所以成個聖母院嘅後方，都係為晒鐵棚，基本上係得返正面嗰一座冇受影響，我都係第一次嚟巴黎聖母院，我哋講笑咁話，下次嚟就影唔到有鐵棚嘅巴黎聖母院🤣🤣 得返正面可以影相，我哋就行過去影吓，正面呢邊有啲樓梯，坐滿晒人面向住教堂影相，影完相我哋由聖母院右邊嗰條橋行出去，呢度有兩檔賣crêpes ，我哋幫襯咗一檔買咗個士多啤梨crêpes ，好味👍🏻👍🏻 

在巴黎聖母院對面，沿着河邊有一D賣海報同書本嘅檔攤，好有一種懷舊嘅氣息，因為海報多數都係一D舊法國街景，或者係舊時裝封面，我買咗一張係Vogue 幾十年前嘅封面相，我覺得幾靚😍 行完呢度，又行過對面街，因為我哋想搵一間莎士比亞書店，跟住地圖去搵，去到見到好多人，排晒隊等入去，我地唔想排，所以就在門口影相就算！

繼續再行，見到一個叫做 Place Saint-Michel 嘅廣場，呢度有好多攤檔，有賣蜜糖、鳥結糖、飾物等，睇左一陣，D野幾靚不過偏貴 😅

跟住去左一間 Monnaie de Paris 法國造幣廠，建築都幾靚，所以我哋入去望吓，入場係唔需要費用，入到去有一個空地，可以俾人影吓相，入到室內，有條長樓梯，鋪咗紅地氈，又可以影吓相，上到去裏面展示咗一D以前法國嘅錢幣同歴史，佢最有趣嘅地方係有一個位置，係擺放咗一D舊式嘅遊戲機，小朋友可以向職員攞D硬幣去玩呢D遊戲機，因為我哋見一家大細入去都係淨係俾硬幣小朋友，所以我哋就冇問佢攞😅 裏面仲有一啲好懷舊嘅裝飾，我哋都係參觀吓影吓相就走😄 落返樓下有一間商店，係賣造幣廠嘅紀念品，亦都有奧運會嘅紀念品賣，好友買咗一個Hello Kitty嘅錢幣俾佢朋友，我就冇收穫😅

跟住我哋想去食晏，繼續喺附近行，都睇唔啱有啲咩食，原本想搵一間拉麵店，但係去到冇開，去咗佢對面有一間食龍蝦包嘅舖頭，因為上次喺英國食咗個龍蝦包覺得好食，所以想試吓呢間如何，店名叫做Homer ，我哋叫咗兩個龍蝦包，價錢比上次平三成，不過味道就一般，冇上次喺英國食果個咁好食，跟住我哋想去搵一間百貨公司叫做 Le Bon Marché 樂蓬馬歇百貨公司，係好友嘅朋友介紹佢去行，在法國冇乜商場可以行，只有百貨公司，呢間百貨公司都幾多嘢睇，不過價錢都係偏貴，所以我哋行咗一陣都走！

跟住就去搭地鐵，我哋要去搵一間餐廳食傳統法國菜，我地由 Sèvres-Babylone站搭12號線，去到Madeleine 站，再轉8號線去 Grands Boulevards站，地鐵出去好近就去到餐廳門口，見到佢個門口有D怪怪地，唔似係餐廳入口，行過少少見到有條巷，行入去先係餐廳嘅入口，去到啱啱好有位，裏面嘅裝修比較古老，枱同枱之間係非常接近，而且佢呢度係要搭枱，因為座無虛席，枱上方有個架可以擺你個袋或外套，因為坐得迫，所以氣氛都幾熱鬧，我哋主要係試佢個法式焗蝸牛🐌、油封鴨腿，另外叫咗條魚，同埋兩杯飲品，佢呢度嘅特色之一，就係將你落嘅order時，店員將order 直接寫喺鋪在枱面的紙上，然後埋單嘅時候，會直接人手計算銀碼寫埋落張紙度😅

我哋影咗一陣間相就有嘢食，我諗大部份人都係叫呢幾樣嘢，本身唔係特別喜好蝸牛，佢呢個都落咗好多香草，我就覺得香草味已經冚過晒蝸牛本身嘅味道，不過蝸牛本身都冇乜味，就好似香港嘅田螺東風螺咁，至於個油封鴨腿亦都唔係想像中咁出色，不過不失，條魚亦都係普普通通，我哋都食咗成個鐘頭，呢餐埋單都要€40，價錢嚟講都唔算貴，我諗因為佢性價比都唔錯，所以咁多人嚟食，走嘅時候見到出面大排長龍，頭先見到門口怪怪地嗰個位原來係排隊位，已經排到出街外面，喺法國好少見到有餐廳排咁長龍😄

食飽飯又行返酒店，路程20分鐘，返到酒店又上網買定巴黎鐵塔嘅入場券，後面日去，酒店仍然係冇冷氣，加上今日我哋全日冇開窗，房間有啲侷，所以我哋打開窗，直至到瞓覺嘅時候先至關窗😅

 

2024年5月英法自由行 Day 5 - （英法）Granary Square 、歐洲之星往巴黎北站

今朝一早起身，暫存行李在酒店，然後8:00 就出去行吓！首先尋晚 search 附近有條河，河邊有個商場/廣場，叫做 Granary Square ，我地行到過去有少少落雨，去到可能時間太早，D商店同食店都未開，得一間餐廳開左，原本想食個早餐，但好友嫌貴！所以四圍行吓，在河邊影吓相，因為冇野睇(未開)，所以就離開呢個範圍！

行返去國王十字車站𥚃面食早餐，去左一間叫做 Benugo 的買左兩個包同咖啡，食完行去近 Euston 站，見到有個 The British Library ，入口有個大型雕塑，又影吓相，跟住想去一間 Postal Museum 在酒店附近 ，去到發現要行去另一個地方買飛入場，上網睇要十幾英鎊，好友又嫌貴，所以最後都冇入到去，唯有早少少返酒店攞返行李，早D過去搭歐洲之星 😅

歐洲之星 Eurostar (英國往法國)
出發前已經訂左歐洲之星車飛，佢唔同日子時間售價有唔同，原本諗住在英國留多一日，但車飛價錢貴D，所以都係留四晚，依家睇返，四晚剛剛好，今日應該book 早D車，我地搭 2:30 車，原本諗住早個半鐘到車站辦手續，依家早兩個鐘，就走買小小野食上火車食，然後先過關，行李過關主要過X 光機，呢度會耐D，因為照得慢D，跟住過海關，英國出境好快，一出英國海關接住行前幾步，就係法國入境海關，見到咁近要再排隊，都唔知係法國海關，要諗一諗係咪應該排隊，點知好友就咁衝左過去🤦🏻‍♀️ 之後由關員入去捉返佢出嚟排隊！法國海關都好快手，過左關之後，我地搵個位坐低食野，等到14:09 就有廣播去邊個月台上車，根據七年前搭歐洲之星嘅經驗，要盡快上車，因為行李架嘅位置好細，擺唔到幾多行李，上到車見到行李位置有啲似日本嘅NEX，但係座位會多D，職員會叫人將細件行李擺喺座位上面嘅行李架，騰空多D位置比D大喼擺，今次坐呢架歐洲之星明顯比上次果架新淨，亦都寬敞D，車程兩小時廿分鐘，法國比英國快一個鐘，所以去到法國巴黎北站，就係法國時間17:50。

一到站就行咗去其中一個出口出，諗住搵吓間酒店，我哋由6號出口出，原來一出火車站已經見到間酒店，我哋放低行李然後再出嚟搵嘢食，先去火車站睇吓，見到有間超市，有奧運吉祥物公仔賣，我哋可以喺度買樽裝水，跟住就去搵一間生蠔店，我哋路過一個好似街市咁嘅地方叫做 Marché Saint Quentin，入面都有海鮮檔，其中有一檔都有生蠔，不過我哋想試我哋要搵嗰間先，穿過個街市行去後面街，再行入呢條街就搵到間生蠔店，店名叫做 Pleine Mer ，佢淨係賣生蠔，店入面有大概五六張枱，有一張枱就放咗喺店外面，佢D生蠔係分大細size，我哋叫咗中size No。3，一打只係€18.5，仲跟埋一份麵包，我哋再叫咗兩杯白酒，生蠔都好新鮮，而且海水味好重，我略嫌鹹咗少少，都好抵食！我哋原本想叫多半打大D嘅，不過佢話賣晒，咁就食埋D麵包算喇！

酒店住後感
Tim Hotel Gare du Nord 巴黎北站提姆酒店
酒店位於巴黎北站6號出口外，一出火車站就見到酒店，只係過一條冇乜車嘅馬路，酒店現在正係裝修緊，所以我哋搵唔到入口，因為入口已經圍封咗，只係圍板嘅側邊有個好似走火門咁嘅入口，招牌亦都被遮擋左一半，所以除咗喺酒店嘅外牆有招牌之外，都冇特別指示由邊度入，原來就在金寶快餐隔離度門入，入咗酒店簡單做個登記，佢哋張工作枱都係臨時嘅，跟住佢安排咗我哋入住2樓，呢度有一架lift，好細，最多一件行李加一個人，好友唔知點樣㩒，最後架lift 壞左，唯有拎行李行樓梯，好彩我行李好輕，上到去，間房竟然係未裝修好，個廁所有幾條毛巾喺地下，個浴屏都未裝上去，棟咗喺張床側邊 😓 落返去接待處同佢講，佢轉左另一間房喺一樓嘅俾我哋，我先上去睇咗間房有冇問題，然後再上2樓叫好友落嚟，不過頭先間房有行李架同衣架，呢間就冇，所以我哋上返去攞行李架同衣架落嚟😂 房間嘅面積唔算大，不過都可以各自打開個喼，當然因為佢裝修緊，剛裝修完嘅房一定係新淨，呢度開咗窗對住個火車站好嘈，但係一閂咗窗就靜晒，隔音非常之好，跟住好友話好熱，所以我哋開咗冷氣，但係個冷氣冇料到，我哋出去嘅時候問返接待員，佢話因為裝修嘅關係，冷氣係未用得，其實而家呢個天氣，夜晚低過廿度，唔開冷氣都唔會熱，不過關咗窗就有D侷，唔關窗就會好嘈😅 酒店一樣係冇牙膏牙刷🪥供應，不過就有齊洗頭水、護髮素、沐浴露🧴，垃圾桶只有一個細嘅喺廁所，又係唔方便，床頭有USB插頭，張床褥亦都係好軟腍腍，我就瞓得幾好，好友就第一晚已經話焗親 😓