新南苑

今晚相約好友去打邊爐，去呢間火鍋店，之前訂唔到位，今次一早訂左，仲有房添！我地7個人，間房可以坐8個人，呢度係任食，先食雞煲，我地叫左兩個小辣先，店員教我地電爐教140，煲兩分鐘，然後攪下佢，電爐教低去120，又煲兩分鐘，又攪下佢，然後再教低電爐去100，再煲兩分鐘落油炸鬼，熄火，食得！幾好味，好快食晒，因為份量唔太多，又叫多兩煲，佢係任食的，不過我地要留肚食火鍋，之後叫果兩煲，只來了一煲，食食下都覺得夠，所以冇追佢個雞煲，就轉火鍋，轉左火鍋就唔可以叫返雞煲，我地叫左花甲湯底，火鍋到左之後，就會上一盤海鮮，有扇貝、蚌、蠔、脆肉鯇魚片、蝦，按人頭數量，每款7件，另外兩碟牛肉，份量幾少，部分食物可以再order，而部分食物再 order 要比錢！例如牛肉、蝦、蠔等海鮮都要比錢，蔬菜、飲品就自助，食物質素都幾好，以價錢二百幾一位算抵食，難怪經常滿座，咁難訂位！

食完火鍋又切蛋糕，好友2月29號生日，4年一次，我地照同佢慶祝，我地成晚吹水吹到夠鐘交枱，已經約定下個月食飯，有兩個好友生日，到時再食飯！