綠簿旅友 Green book

1962年，Tony 工作的夜總會因為要裝修，佢要搵其他工作去維持生計，經朋友介紹，去咗一個鋼琴家 Don 屋企面試，因為 Don 要搵一個司機同佢去南部巡迴演奏，由於 Don 是有色人種，而Tony 一向對有色人種都不太喜歡，所以沒有即時答應這份工作，不過 Don 認為 Tony 可以幫佢解決到問題，所以得到 Tony 太太同意之後，就聘用了 Tony 作位司機，在未來八個星期一起深入南部演奏，兩個性格和生活南轅北轍的人，路途上一定有很多火花.......！

套戲攞咗金球獎最佳電影，自然多人睇，事實上套戲都真係好睇，成套戲好流暢，對白精警惹笑，成套戲都冇冷場，當年黑人的待遇很悲慘，讓人感受到男主角的孤單和傷感，配上搞笑的男配角擦出不少火花，值得一睇！

十里潮香

相約好友去銅鑼灣食飯，因為呢班朋友都有一段時間冇見，去咗呢間食潮州菜嘅飯店，店子的地方不大，座位頗為逼夾，我地主要都係叫D傳統潮州餸，有芋頭、潮式拼盤、胡椒豬肚湯、鹹肉炒韭菜花、炸墨魚丸評拼蝦丸、蠔仔烙、蠔仔粥、我片等等，食物味道一般，唔係特別好，而且每碟餸嘅份量都比較細，不過價錢都算優惠，席間我地傾開計，講到其中一個大家都認識嘅朋友，最近發現鼻腔𥚃面有腫瘤，而且腫瘤非常大，現正待抽組織檢查，情況唔係太樂觀，令大家都好擔心，雖然大家都好耐冇聯絡，希望佢能夠早日康復！始終佢年紀唔係好大，仲有兩個女，細果個都未讀完書，佢太太就好擔心，終日以淚洗面，我地只能夠勸佢唔好想太多，始終未證實是否惡性，希望佢能夠平復心情，整理好心情去面對！

品穀 Big grains

前幾日睇雜誌，見到介紹灣仔開左一間餅店，應該開咗三個月左右，今日去灣仔順便過去睇下，店子位於太和街，近住街市，呢條街比較少人行，佢地主打牛角包，除咗經典口味之外，仲有黑豹芝麻牛角包同埋檸檬朱古力酥，買咗一個黑豹芝麻牛角包試，見到店入面有 scone 、蛋糕、批、麵包、曲奇餅、雜果仁等等，仲有茶品賣，不過因為已經黃昏我唔敢飲茶，所以無試，樣樣都好靚好想食，我買果個黑豹芝麻包，係你買咗之後，佢先至唧D黑芝麻忌廉入去個包入面，麵包做得好靚而且質素都高，好好味，一定要試下其他嘢，見佢有個檸檬芝士蛋糕，好似好正，下次有人生日，就在呢度買蛋糕啦！

Cafe S (La Serene)

放假天，好耐冇去銅鑼灣，走過去行下，上左去 Sogo 食嘢，呢間餐廳好多時都無位，今日難得好多位，就去食D嘢，過左午飯時間，餐牌只有 set 可以叫，叫咗個鮮蝦天使麵，同埋一個豬扒意大利包，再加左兩杯藍山咖啡，食物嘅味道都唔錯，最正當然係杯咖啡啦！好耐冇飲啦，不過唔知係咪因為飲左咖啡，夜晚瞓唔着添！

航拍 13 - 西貢羊洲

有兩個幾月冇去航拍了，實在技癢，今日起身見到個天色比較灰暗，不過有少少陽光，所以走左入去西貢，睇下有冇乜嘢地方可以航拍，由牛池灣搭小巴入去西貢，沿路見到個天灰灰沉沉，連緊餘嘅太陽都冇左，近幾次去航拍天氣都係唔好，都係冇太陽，去到西貢碼頭，見到個天咁樣都想打退堂鼓，在附近食左少少野之後，由碼頭行過去另外一邊，見到之前山竹果陣冲左埋岸嘅遊艇，仍然擱置左在海濱旁邊，變成左景點，呢度有個小小嘅空地，就響度飛一轉睇下，天色實在唔理想，只係近近地飛左去對面個羊洲度影咗少少相就返來，都冇再飛第二轉喇，唯有等下次天氣好D先再飛啦！

滿泰小廚

今日入去西貢航拍，在碼頭附近搵食，見到有條巷仔，入面都有好幾間食肆，去咗呢間食泰國菜嘅小店，叫咗碗泰式雞肉河粉，同埋燒菠蘿雞翼，食物嘅味道都唔錯，只係個雞翼都唔算係燒，雖然表面有少少燒焦，可能係之前燒過，而家翻熱，應該係非繁忙時間，唔會特登為左我果一碟雞翼走去開爐燒吧！

食完野在附近行下，既然入到黎西貢就搵下果間 Noble living ，原本行過左一次，但係見佢唔到，跟Google地圖搵，先發現頭先經過，行返過去先見到，原來佢在兩間食店中間，而兩間食店門外都有帳篷，所以睇唔到佢，加上佢冇招牌，所以真係睇唔到，店入面一個人都冇，產品同平時上海街睇果D差不多，之前在佢把個網頁睇過一D五顏六色嘅廚具，而家都仲有得賣，顏色都係果D無變，所以都冇乜嘢啱！

無敵破壞王 2 打爆互聯網 Wreck-it Ralph 2 Ralph breaks the internet

Ralph 同Vanellope 係好朋友，他們一起生活在遊戲機中心內，有各自的遊戲機，因為他們是遊戲裏面的角色，有一天遊戲機中心的店主購入了一部可以上互聯網的遊戲機，他們為了尋找 Vanellope 的遊戲機配件，闖入了互聯網世界，首次踏足互聯網世界，他們認識了新朋友，嘗試在互聯網世界內賺錢，希望能購買到遊戲機配件.......!

這個電影已經係第二集，我冇睇過第一集，不過大致上都估計到講乜，佢有D似 Toy story ，遊戲機內的卡通人物，在遊戲機中心關門後都會活動，由於係迪士尼嘅製作，𥚃面都加左唔少迪士尼元素，仲有成班公主，都幾搞笑！

三和叙

呢個幾星期食到好飽濟，食左幾日火鍋，日日出街食，好想在家食個蔬菜沙律，清清腸胃，原本今晚要做節，但媽媽身體不適，所以取消了，諗住回家休息，但好友相約去食好西，見係日本野，應該唔太油膩，可以一試！

這家店子開業不久，現在仍是試業，大厦應該是新起的，店子樓高三層，每一層都很細，地下一層是爐端燒，另外兩層，一層是鐵板燒，另一層是壽司，店員說在爐端燒一層可以 order 壽司，但壽司一層不能 order 爐端燒及鐵板燒，原因是要上上落落，怕食物凍了，而壽司刺身本身是凍的，所以沒有影響，這店下午5:00後才開門，只做 Happy hour 和晚市，今天冬至，鐵板燒冇位，只有壽司和爐端燒，我地本來想食壽司，之後改坐爐端燒果層，可以食兩樣！佢每層大約只有十個位，兩張四人枱同圍住壽司枱/爐端燒枱坐，如果食壽司，又棟 Omakase 的話，就只可以坐壽司吧，方便師傅與人客互動！

我地上完又落，去返地下食爐端燒，叫左幾串食物試下先，先叫左佐賀和牛、牛舌、雞肉丸、豚肉露筍卷、白鱔、雞翼，每樣都係一小串，試完覺得牛舌、雞肉丸同白鱔好食，所以再叫多兩串，佐賀牛就太油了，燒過的和牛已經迫出了一些油份，但仍然很膩，證明油花好多！另外叫左壽司，有大拖羅同赤貝，仲有天婦羅蕎麥麵同銀鱈魚西京燒，壽司都唔錯，大拖羅入口即溶，只係冇日本咁好食！個天婦羅做得幾好，蕎麥麵都好食！銀鱈魚較日本的好食！仲叫左個燒和牛胸腹，呢個好食又唔油膩，正！

我同好友都有D飽，但她男友未飽，所以叫左燒雞肝、油甘魚壽司、牡丹蝦同燒裙邊壽司，後面果幾樣就麻麻地，整體來說，爐端燒做得比壽司好，店員很耐心解說，服務態度友善，亦有日藉店員，下次會考慮試下食鐵板燒！

倫哥火鍋私房菜

停左一晚，又再打邊爐，今晚又係同另一班同事聖誕gathering，去咗西環果間分店，又係訂咗間房，呢個分店因為有酒牌，所以我地可以叫酒飲，叫咗一支 sake，不過味道麻麻地！所以叫另外一支，部份人就飲啤酒汽水，呢間同尖沙咀果間嘅分別係冇咗刺身，我覺得其實唔使刺身都夠食，今次我地只係叫左兩部雞煲，冇食到咁飽，所以打邊爐火鍋配料要再 refill 幾次，同埋男士偏多，其中有兩個仲好拆得，所以都叫左幾多嘢食，食完飯又係交換禮物，今次我交換左一個 diffuser 返嚟，而我買嘅係實用嘅牙刷機！