飯局主場 - 第六回

最近好友辭咗工，見佢得閒就約佢食飯，原本諗住食乜嘢好，佢提議去我屋企食，因為未去過我屋企，所以想上嚟睇下！

即日通知，唯有即刻去買餸！得兩個人唔係咁多嘢食，首先買塊靚牛扒先！出咗去尖沙咀 City super買，見佢做緊示範山形牛，雖然好香，但係我覺得太肥啦，油脂太重了，都係買返韓牛，買咗一塊細細地，另外買咗沙律菜！即刻要趕返屋企！

返到屋企樓下，在街市買咗蝦同埋石斑，整定D嘢等佢上嚟，佢有朋友車佢過嚟，所以俾咗地址佢，就自己去到我樓下，打比我叫我開門！

好友轉左工，走去賣生果，所以攞咗啲水果上來，有靚靚的香印提子，仲有啲未見過嘅水果，放在雪櫃先，食完飯再一齊食下，我也兩個人，開咗支梅酒飲，係我在日本買果支八年梅酒，最近幾次去日本都要買，但係只有7-11先至有售，而日本7-11亦冇咁多分店，所以都唔係咁容易買到，因為就算有7-11，都唔係間間有貨！手頭上仲有三支，兩支330ml，一支500ml，在東京買的是330ml，在大阪買到的是500ml，我一年去幾次日本，應該都唔難補貨。

食完飯我哋一齊睇下電視，食下水果，又口痕攞包薯片出來食，薯片係頭先在 City Super買的，見佢係和牛Wasabi味，就買來試下，不過食唔出有呢兩隻味，就好似一般原味薯片一樣！傾到十一點幾，好友要出去果欄入貨啦，就送佢去搭車，去到巴士站先發覺尾班車已經開咗，唯有改搭小巴去地鐵啦！今晚好開心，傾左成晚計，希望下次可以多幾個人一齊再傾啦！

Taylor Shellfish farms

尋日突然間諗起大坑有間食蠔既好似幾好，之前睇電視介紹過，上網search左，見佢哋開四點，响屋企Hea下，到兩點幾先至出去，去到都係三點幾，在附近行下睇下影下相，仲有十分鐘先至開門，然後店員執緊野，問佢可唔可以坐低等，佢話可以，就坐低先！

一路睇下餐牌，又影下相，店內只有十多個位，完全 outdoor，呢D天氣都 ok，店員攞住生蠔餐牌介紹，上面都有10多款生蠔選擇，店員揀咗幾款介紹，就叫左佢介紹果D其中四款，分別係 USA Pacific rock、Ireland majestic oyster、French la Déesse blanche 、French Mont saint Michel oyster，每款蠔都有張紙仔跟埋，話你知呢隻係邊款生蠔！除咗生蠔，另外叫左個意大利飯同埋 Buffalo wing，飲品就買一送一，生蠔好好味，個人覺得 USA Pacific rock 啱食D，Buffalo wing 都好味，意大利飯就一般啦！

奇異博士 Doctor Strange

我地食完tea，去睇戲，去左UA 睇3D IMAX ，睇來睇去，都係 Imax 畫質最好！

套戲講述男主角 Dr. Strange 是一個優秀、自負、自私的醫生，而且技術超群，一次意外，令他一雙手，無法正常活動，更不能再次執起手術刀，在沒有痊癒希望的時候，他得知一個脊髓受傷，下身癱瘓，根本不可能痊癒的病人，竟然能從新走路，他從病人口中得知，令他康復的機會，於是隻身前往尼泊爾，尋找高人，找到的卻不是醫生，而是 Ancient one ......

套戲大玩視覺效果，打鬥場面略為悶了點，加插了香港做基地，雖然場景好假，仍有點親切感！

Vivienne Westwood café

去完旅行返來馬不停蹄每日都有節目，今日就約咗好友去 High tea，去尖沙咀的 Vivienne Westwood cafe ，之前剛剛開的時候好多人排晒隊，而家就唔使等位，去到已經有枱，坐左門口側邊張枱，呢度除咗High tea ，仲可以叫單獨一件cake，不過我哋都係叫咗 tea set，我就叫咗一杯咖啡，好友就叫左果茶飲，tea set 咸點方面，黑橄欖酥卷、迷你三文治、巴馬臣芝士脆條、煙三文魚忌廉多士，味道唔錯，甜點有杏桃撻、Macaron、Tiramisu cup、雲尼拿水果撻，食完都好飽，雖然仲有朱古力棒，不過已經食唔落！

2016年10月開心東瀛遊 -Day 6 天神橋筋六丁目 天然溫泉浪速之湯、心齋橋 gram 、樂道

今朝起身，去搵溫泉浸！上網搵到一間，在天神橋筋六丁目，我地去難波站搵野食，在地下街一間叫古潭的拉麵店，吃了拉麵和餃子，在地下街行左一陣，搭千日前線，去日本橋站轉乘堺筋線，六個站就到天神橋筋六丁目站，在5號出口出來，轉左手邊一路直行，呢區係住宅區，冇乜高樓，抬頭望到右邊遠處有座高D，看似就是溫泉所在，行近D見到就係天然溫泉 なにわの 湯，呢座 building 有八層高，溫泉在頂樓，中間幾層係停車場，上到去，有自動售賣機，除了入場票，還有租毛巾，售賣乳液、牙刷等等，入場費 ¥800，租大毛巾要¥500，我地只買入場票和租毛巾，沐浴露有免費供應的，憑票去接待處入場，呢度都幾大，人也不少，我地比較鐘意浸露天風呂，今日有太陽，呢度有一排石床，瞓在石床，有水浸住，又曬住太陽，好易瞓著，有D風吹下就凍凍地，浸左大約一小時，就走喇！

地鐵站附近有個天神橋筋商店街，行一陣，呢度有點舊，所以都沒有收穫，搭返火車返去心齋橋，去食 pancake ！呢間位於心齋橋的 pancake shop 叫做 gram ，尋晚經過見到疏乎里 pancake 好吸引，但係尋晚太夜食唔到，今日早D來，入口是一條樓梯，要排隊，一日分三個時段供應，早上 11:00，下午3:00和6:00，我地食3:00果段，排第七、八，等緊的時候，好友去大丸買巨峰提子返香港，我就排隊等，佢買完返來仍未入得，等到3:25才到我們可以入坐！我地一人叫一個疏乎里 pancake！蠢左，應該叫一個，另外叫一個其他款試，個 pancake 送來時，我地超興奮，狂用 live 影相，好攪笑，雖然食落一陣風，不過都好好味！

食完 pancake 最後衝次，encore 再去楽座食立食！今次叫左天婦羅蔬菜、鮑魚、帶子、牛肉、燒雞翼，還叫了兩杯菠蘿酒！食完野返酒店 check out ！酒店太近火車站，時間可以用到好盡，慢慢搭火車去機場，返香港喇！時間過得真係好快！

2016年10月開心東瀛遊 - Day 5 京都、和服體驗、八板神社、花見小路

今日去京都，玩左幾日，都有點累，遲左起身，去搵野食，行左去大丸，去食肆果層，有間叫有喜屋的蕎麥麵店，叫了兩碗麵，味道一般！食完野撘車去京都！

去到京都衹園四条，接近一點！我地先去租和服，去返之前租開果間，在八板神社旁邊的大廈上去，叫夢京都 Yume Kyoto ，今日頗多人，要等一陣，入到去先揀和服，揀了最貴的¥10800那組，因為是最漂亮的，而且包埋set 頭，揀完和服又要揀腰帶同埋包包，我揀了黑底橙黃花的和服，好友揀了淺藍色和服好搶眼！著好和服等 set頭，因為我比好友快換完衫，所以set頭先，到好友 set頭時，我就幫佢影相！攪掂晒就落去影相，因為送兩張專人拍攝相片，所以先去影相，好快影完，就我地自己繼續去八板神社影相，冇入去清水寺影，因為好友唔想行，影完出去行街，行到花見小路果邊，搵左間甜品店叫做ぎおん，要上一層的，坐位是 tatami ，坐的那種，我叫了款期間限定的粟子雪糕，因為著左和服好熱，好友叫了款熱的，食完甜品，出到來，竟然落大雨！我地跑過對面的商店，卻沒有甚麼好買的，無奈在門外等，雨勢頗大，有路過的大陸人見我們穿和服，走過來拍照，我地乘機叫佢地遮我地出街囗，因為前面街囗出去的商店街，是有瓦遮頭的，這邊有很多商店，可以慢慢行，等停雨，行左幾間店之後，雨勢減細了，我們衝過對面商店街，又繼續行，行去我最鐘意果間日本髮式店かつ"ら清老舗，他們的髮式真係好靚但好貴，而且只有穿和服才適合用，所以每次只可以來欣賞下，影下相，行完差不多要還和服，去到和服店對面仍有微雨，我地冒雨衝呀衝，衝去和服店，交還和服就好快，除晒出來換返衫就得喇！

返返去難波揾食，尋晚睇 Facebook 見有人介紹一間食店，好似好吸引，一於去試下，店名是立ち吞みあたりや食堂，就在難波，係一間立食的居酒屋，店內非常熱鬧，好多人爆晒場，要等一陣先有位，餐牌主要係日文，都有個簡單英文餐牌，我地叫左刺身、燒雞翼、鮑魚、扇貝、和牛片和酒，食物好ok，酒類選擇好多，而且大多是日本酒，不過我地揀左果汁酒，貪佢易入口！

食飽又返酒店食水果！